تِيطُس 1:16 - الكتاب المقدس بالعربي الدارجي هنا تشاد

¹⁶ يُقُولُوا يَعَرْفُوا اللّٰهْ لَاكِنْ بِعَمَلْهُمْ يَكْفُرُوا بَيَّهْ. نَاسْ مِثِلْ دَوْل مَكْرُوهِينْ وَ عَاصِيِينْ وَ مَا يَنْفَعَوْا لِأَيِّ عَمَلْ هَنَا خَيْر.

تِيطُس 1:16 Referenca të Kryqëzuara

1 يُوحَنَّا 2:4

وَ النَّادُمْ الْيُقُولْ هُو يَعَرِفْ اللّٰهْ وَ لَاكِنْ مَا يِتَابِعْ الْوَصَايَا، هُو كَدَّابْ وَ الْحَقّ مَا قَاعِدْ فَوْقَهْ.

إشَعْيا 29:13

وَ رَبِّي قَالْ: «الشَّعَبْ دَوْل يِقَرُّبُوا لَيِّ بِكَلَامْ خُشُومْهُمْ. يِمَجُّدُونِي بِلِسْنَيْهُمْ بَسْ وَ لَاكِنْ قُلُوبْهُمْ بَعِيدْ مِنِّي. وَ خَوْفهُمْ مِنِّي، دَا مِنْ وَصِيَّةْ الْهُمَّنْ عَلَّمَوْهَا مِنْ النَّاسْ بَسْ.

أفَسُس 5:6

مَا تِخَلُّوا نَادُمْ يُغُشُّكُو بِكَلامْ بَاطِلْ. بِسَبَبْ الذُّنُوبْ الْمِثِلْ دَوْل، اللّٰهْ يِنَزِّلْ غَضَبَهْ فَوْق الْعَاصِيِينْ.

حِزْقِيال 33:31

وَ شَعَبِي يَجُوا لَيْك بِكَتَرَةْ وَ يَقْعُدُوا قِدَّامَكْ. وَ يَسْمَعَوْا كَلَامَكْ وَ لَاكِنْ مَا يِطَبُّقُوهْ. يُغُشُّوا بِكَلَامْهُمْ وَ يَمْشُوا وَرَاءْ مَالْ الْحَرَامْ.

يَهُوذَا 1:4

أَشَانْ فِي نَاسْ وَاحِدِينْ فَسْلِينْ أَنْدَسَّوْا أَمْبَيْنَاتْكُو بِعَشِيرْ. وَ هُمَّنْ قَاعِدِينْ يِعَوُّجُوا كَلَامْ رَحْمَةْ اللّٰهْ لِيِحَلُّلُوا بَيَّهْ الْمُحَرَّمَاتْ. وَ بَيْدَا، يَنْكُرُوا عِيسَى الْمَسِيحْ الْهُو بَسْ سَيِّدْنَا وَ رَبِّنَا. وَ مِنْ زَمَانْ، الْكِتَابْ حَجَّى بِالْعَذَابْ الْيَرْجَاهُمْ.

رَوْمَا 1:28

النَّاسْ أَبَوْا مَا يَعَرْفُوا اللّٰهْ وَ أَشَانْ دَا، اللّٰهْ سَلَّمَاهُمْ لِعُقُولْهُمْ الْفَاسْدِينْ وَ قَمَّوْا يِسَوُّوا الشَّيّءْ الْمَا وَاجِبْ يِسَوُّوهْ.

رُؤية 21:27

وَ أَيِّ شَيّءْ الْمَا طَاهِرْ وَلَّا أَيِّ نَادُمْ الْيِسَوِّي الْمُحَرَّمَاتْ وَلَّا أَيِّ كَدَّابْ مَا يَدْخُلُوا فَوْقهَا. الْيَدْخُلُوا فِي الْمَدِينَةْ دِي، إِلَّا النَّاسْ الْأَسَامَيْهُمْ مَكْتُوبِينْ فِي كِتَابْ الْحَيَاةْ هَنَا الْحَمَلْ.

1 صَمُوِيل 15:22

وَ صَمُوِيلْ قَالْ: «اللّٰهْ يَفْرَحْ بِضَحَايَا مُحَرَّقِينْ وَ بِضَحَايَا آخَرِينْ وَلَّا؟ وَلَّا يَفْرَحْ كَنْ تِطِيعْ كَلَامَهْ؟ أَشَانْ كَنْ تِطِيعَهْ، دَا أَفْضَلْ مِنْ الضَّحَايَا وَ كَنْ تَسْمَعْ كَلَامَهْ، دَا أَفْضَلْ مِنْ شَحَمْ الْكُبَاشْ.

رُؤية 21:8

لَاكِنْ الْخَوَّافِينْ وَ الْمَا مُؤمِنِينْ وَ الْفَاسْدِينْ وَ كَتَّالِينْ الدِّمَمْ وَ الزَّنَّايِينْ وَ السَّحَّارِينْ وَ عَابِدِينْ الْأَصْنَامْ وَ كُلَّ الْكَدَّابِينْ، بَكَانْهُمْ يَبْقَى بَحَرْ النَّارْ وَ الْكِبْرِيتْ الْأَصْفَرْ. وَ دَا بَسْ الْمَوْت التَّانِي.»

1 تِمُوتَاوُس 5:8

وَ أَيِّ نَادُمْ الْيَابَى مَا يِرَيِّسْ أَهَلَهْ وَ خَاصَّةً نَاسْ بَيْتَهْ، هُو نَكَرْ الْإِيمَانْ خَلَاصْ. نَادُمْ كَافِرْ أَخَيْر مِنَّهْ.

إشَعْيا 58:2

لَاكِنْ كُلِّ يَوْم هُمَّنْ يِفَتُّشُونِي أَنَا وَ يِدَوْرُوا يَعَرْفُوا دُرُوبِي مِثِلْ أُمَّةْ التِّطَبِّقْ الْعَدَالَةْ وَ مَا خَلَّتْ شَرِيعَةْ إِلٰـهَّا وَ مِثِلْ يِدَوْرُوا مِنِّي شَرِيعَةْ عَادِلَةْ وَ يِرِيدُوا يِقَرُّبُوا لَيِّ.

إشَعْيا 48:1

أَسْمَعَوْا، يَا ذُرِّيَّةْ يَعْقُوبْ، إِنْتُو الْيِنَادُوكُو بِأُسُمْ إِسْرَائِيلْ وَ مَرَقْتُوا مِنْ صُلُبْ يَهُوذَا. أَسْمَعَوْا، إِنْتُو التَّحَلْفُوا بِأُسُمْ اللّٰهْ وَ تَذْكُرُوا إِلٰـهْ بَنِي إِسْرَائِيلْ لَاكِنْ بَلَا أَمَانْ وَ بَلَا عَدَالَةْ.

1 صَمُوِيل 15:24

وَ خَلَاصْ، شَاوُولْ قَالْ لِصَمُوِيلْ: «أَنَا أَذْنَبْت! أَشَانْ خَالَفْت أَوَامِرْ اللّٰهْ وَ وَصِيّتَكْ إِنْتَ. أَنَا خُفْت مِنْ الرُّجَالْ الْمَعَايِ وَ تَابَعْت كَلَامْهُمْ.

أيُّوب 15:16

كَنْ مِثِلْ دَا، كِكَّيْف الْإِنْسَانْ الْيِسَوِّي الْحَرَامْ وَ الرَّشْوَةْ يَبْقَى صَافِي، هُو الْيِشِيفْ الْفَسَالَةْ هَيْنَةْ لَيَّهْ مِثِلْ شَرَابْ أَلْمِي؟

1 تِمُوتَاوُس 1:9

وَاجِبْ نَفْهَمَوْا كَدَرْ اللّٰهْ أَنْطَى شُرُوطْ التَّوْرَاةْ مَا لِلصَّالِحِينْ بَسْ لَاكِنْ أَنْطَاهُمْ لِلْمُجْرِمِينْ وَ الْعَاصِيِينْ وَ الْكُفَّارْ وَ الْمُذْنِبِينْ وَ النَّاسْ النِّجْسِينْ وَ الْبَكْرَهَوْا الدِّينْ وَ النَّاسْ الْيَكْتُلُوا أَبَّهَاتْهُمْ وَ الْيَكْتُلُوا أَمَّهَاتْهُمْ وَ كُلَّ كَتَّالِينْ الدِّمَمْ.

عَدد 24:16

دَا كَلَامْ النَّادُمْ الْيَسْمَعْ كَلَامْ الْإِلٰـهْ وَ عِنْدَهْ عِلِمْ مِنْ الْعَالِي وَ وَكِتْ يَسْجُدْ، عُيُونَهْ يِنْفَتْحُوا يِشِيفْ الرُّؤْيَةْ الْيِوَصِّفْهَا لَيَّهْ اللّٰهْ الْقَادِرْ.

إرْمِيا 6:30

وَ يِنَادُوهُمْ الْفُضَّةْ الرَّفَضَوْهَا أَشَانْ اللّٰهْ رَفَضَاهُمْ.

أمْثال 30:12

فِي نَاسْ وَاحِدِينْ يَحْسُبُوا نُفُوسْهُمْ طَاهِرِينْ وَ لَاكِنْ مَا غَسَّلَوْا النَّجَاسَةْ مِنْ جِسِمْهُمْ.

إشَعْيا 59:13

كَدَبْنَا وَ عِصِينَا اللّٰهْ وَ أَبَيْنَا مَا تَابَعْنَا إِلٰـهْنَا. حَجَّيْنَا إِلَّا بِظُلُمْ وَ مُؤآمَرَةْ ضِدّ الْآخَرِينْ وَ قُلُوبْنَا مَلَانِينْ بِكَلَامْ كِدِبْ.

إرْمِيا 5:2

كَنْ هُمَّنْ يَحَلْفُوا بِاللّٰهْ الْحَيّ كُلَ، حَلِيفِتْهُمْ دِي كِدِبْ سَاكِتْ بَسْ.»

إرْمِيا 12:2

إِنْتَ بَسْ مَقَّنْتُهُمْ مِثِلْ شَدَرَةْ وَ دَسَّوْا عُرُوقْهُمْ فِي التُّرَابْ وَ كِبْرَوْا لَحَدِّي سَوَّوْا عِيَالْ. خُشُومْهُمْ يِنَادُوا أُسْمَكْ وَ لَاكِنْ قُلُوبْهُمْ مَا مَعَاكْ.

2 تِمُوتَاوُس 3:17

وَ بَيَّهْ خَدَّامْ اللّٰهْ يَبْقَى قَادِرْ وَ جَاهِزْ أَشَانْ يِسَوِّي أَيِّ عَمَلْ هَنَا خَيْر.

تِيطُس 3:1

ذَكِّرْ الْأَخْوَانْ أَشَانْ يَسْمَعَوْا كَلَامْ الْحَكُومَةْ وَ الْكُبَارَاتْ وَ يِتَابُعُوا كَلَامْهُمْ. وَ خَلِّي يَبْقَوْا جَاهِزِينْ لِيِسَوُّوا الْخَيْر فِي كُلِّ حَالْ.

تِيطُس 3:3

خَلِّي مَا نَنْسَوْا كَدَرْ أَوَّلْ أَنِحْنَ كُلَ مِثِلْهُمْ، جُهَّالْ وَ عَاصِيِينْ. أَوَّلْ أَنِحْنَ مُوَدِّرِينْ وَ شَهْوَاتْنَا مَلَكَوْنَا وَ قُلُوبْنَا مَرْبُوطِينْ فِي حَلَاتْ الدُّنْيَا. أَوَّلْ أَنِحْنَ عَايْشِينْ بِالْفَسَالَةْ وَ الْحُسُدْ، وَ قَاعِدِينْ نَكْرَهَوْا النَّاسْ وَ النَّاسْ يَكْرَهَوْنَا.