رَعُوث 4:11 - الكتاب المقدس بالعربي الدارجي هنا تشاد

¹¹ الشُّيُوخْ وَ كُلَّ الشَّعَبْ الْقَاعِدِينْ فِي خَشُمْ بَابْ الْحِلَّةْ قَالَوْا: «أَنِحْنَ شَاهِدِينْ! اللّٰهْ يِبَارِكْ الْمَرَةْ التَّدْخُلْ فِي بَيْتَكْ وَ يِسَوِّيهَا مِثِلْ رَاحِيلْ وَ لَيْئَةْ، هِنَّ الْإِتْنَيْن أَمَّهَاتْ ذُرِّيَّةْ يَعْقُوبْ جِدِّنَا. وَ إِنْتَ تَبْقَى غَنِيْ فِي خَشُمْ بَيْت أَفْرَاتَةْ وَ مَشْهُورْ زِيَادَةْ فِي بَيْت لَحَمْ.

رَعُوث 4:11 Referenca të Kryqëzuara

تكوين 29:32

وَ لَيْئَةْ بِقَتْ غَلْبَانَةْ وَ وِلْدَتْ وِلَيْد وَ سَمَّتَهْ رَأُوبِينْ (مَعَنَاتَهْ اللّٰهْ شَافْ تَعَبِي). وَ قَالَتْ: «أَكِيدْ هَسَّعْ دَا، رَاجْلِي يِرِيدْنِي.»

مَتَّى 2:6

<يَا بَيْت لَحَمْ فِي دَارْ بَنِي يَهُوذَا، إِنْتِ مَا حِلَّةْ الْأَصْغَرْ لِحُكَّامْ يَهُوذَا أَشَانْ نَادُمْ وَاحِدْ يَمْرُقْ مِنْكِ وَ هُو الْحَاكِمْ الْيَبْقَى رَاعِي لِأُمَّتِي بَنِي إِسْرَائِيلْ.>»

مِيخا 5:2

وَ اللّٰهْ قَالْ: «إِنْتِ، يَا بَيْت لَحَمْ أَفْرَاتَةْ، إِنْتِ صَغَيْرَةْ لِتِنْحَسْبِي أَمْبَيْن عَايِلَاتْ يَهُوذَا. وَ لَاكِنْ نَادُمْ وَاحِدْ يَمْرُقْ مِنْكِ الْيَحْكِمْ بِأُسْمِي فِي بَنِي إِسْرَائِيلْ. وَ قَعَرَهْ جَايِ مِنْ بَعِيدْ مِنْ الزَّمَنْ الْقَدِيمْ.»

زَبُور 132:6

أَيْوَى، فِي أَفْرَاتَةْ سِمِعْنَا خَبَرْ هَنَا صَنْدُوقْ مُعَاهَدَةْ اللّٰهْ وَ فِي زَرَعْ يَعَرْ لِقِينَاهْ.

رَعُوث 1:2

وَ هُو أُسْمَهْ أَلِيمَلِكْ وَ مَرْتَهْ أُسُمْهَا نَعِيمَةْ وَ أَوْلَادَهْ أَسَامَيْهُمْ مَحْلُونْ وَ كِلْيُونْ. وَ هُمَّنْ مِنْ خَشُمْ بَيْت أَفْرَاتَةْ مِنْ حِلَّةْ بَيْت لَحَمْ فِي تُرَابْ يَهُوذَا. وَ هُمَّنْ مَشَوْا لِبَلَدْ مُوَابْ وَ سَكَنَوْا هِنَاكْ.

تَثْنِية 25:9

خَلَاصْ حَمَاتَهْ تِقَرِّبْ لَيَّهْ قِدَّامْ الشُّيُوخْ وَ تِسِلّ نَعَالَهْ مِنْ رِجْلَهْ وَ تَبْزُقْ لَيَّهْ فِي وِجْهَهْ. وَ تُقُولْ: «دَا بَسْ الْيُكُونْ لِأَيِّ رَاجِلْ الْيَابَى مَا يِجِيبْ ذُرِّيَّةْ لِأَخُوهْ.»

تكوين 24:60

وَ بَارَكَوْا رِفْقَةْ وَ قَالَوْا: «يَا أَخُتْنَا! أَبْقَيْ أَمّ هَنَا مَلَايِينْ النَّاسْ وَ ذُرِّيِّتْكِ تِشِيلْ تُرَابْ هَنَا عُدْوَانْهَا!»

أمْثال 14:1

الْمَرَةْ الْعِنْدَهَا حِكْمَةْ تَبْنِي بَيْتهَا وَ الْمُنَافِقَةْ بِنَفِسْهَا تَخْرِبْ بَيْتهَا.

تكوين 23:10

وَ عَفْرُونْ قَاعِدْ فِي لُبّ الْحِتِّيِّينْ وَ رَدَّ لِإِبْرَاهِيمْ قِدَّامْ كُلَّ الْحِتِّيِّينْ الْجَوْا قَاعِدِينْ فِي خَشُمْ بَابْ الْحِلَّةْ وَ قَالْ:

تكوين 29:25

وَ بِفَجُرْ، يَعْقُوبْ شَافْ وَ عِرِفْ كَدَرْ دِي لَيْئَةْ! خَلَاصْ قَمَّ قَالْ لِلَابَانْ: «دَا شُنُو السَّوَّيْتَهْ لَيِّ دَا؟ مَا لِرَاحِيلْ بَسْ أَنَا خَدَمْت لَيْك؟ مَالَا غَشَّيْتنِي؟»

أمْثال 31:23

وَ رَاجِلْهَا مُكَرَّمْ فِي حِلِّتَهْ وَكِتْ يَقْعُدْ مَعَ شُيُوخْ قَبِيلْتَهْ.

تكوين 29:16

وَ لَابَانْ عِنْدَهْ بَنَاتْ إِتْنَيْن وَ الْكَبِيرَةْ أُسُمْهَا لَيْئَةْ وَ الصَّغَيْرَةْ أُسُمْهَا رَاحِيلْ.

تكوين 35:23

لَيْئَةْ جَابَتْ لَيَّهْ رَأُوبِينْ الْبِكِرْ وَ شِمْعُونْ وَ لَاوِي وَ يَهُوذَا وَ يَسَّاكَرْ وَ زَبُلُونْ.

تكوين 35:24

وَ رَاحِيلْ جَابَتْ لَيَّهْ يُوسُفْ وَ بَنْيَامِينْ.

تَثْنِية 25:7

وَ كَنْ الرَّاجِلْ دَا أَبَى مَا يَاخُدْ حَمَاتَهْ مَرِةْ أَخُوهْ، هِي تَمْشِي فِي خَشُمْ بَابْ الْمَدِينَةْ وَ تُقُولْ لِلشُّيُوخْ: «حَمَايِ أَبَى مَا يِعَلِّي أُسُمْ أَخُوهْ فِي إِسْرَائِيلْ. وَ أَبَى مَا يُقُمّ بِوَاجْبَهْ هَنَا الْحَمَى.»

1 مُلوك 21:8

وَ هِي قَمَّتْ كَتَبَتْ جَوَابَاتْ بِأُسُمْ أَخَابْ وَ خَتَمَتْهُمْ بِخِتْمَهْ. وَ رَسَّلَتْ الْجَوَابَاتْ دَوْل لِلْكُبَارَاتْ وَ الشُّيُوخْ السَّاكْنِينْ مَعَ نَابُوتْ فِي حِلِّتَهْ.

1 أخبار 2:51

وَ سَلْمَا هُو الْبَنَى حِلَّةْ بَيْت لَحَمْ وَ حَرِيفْ هُو الْبَنَى حِلَّةْ بَيْت قَدِيرْ.

إرْمِيا 32:10

وَ كَتَبْت مَكْتُوبْ الْمُبَايَعَةْ وَ خَطَّيْت فَوْقَهْ خِتْمِي وَ دَا قِدَّامْ الشُّهُودْ الْأَنَا نَادَيْتهُمْ. وَ وَزَنْت الْفُضَّةْ فِي الْمِيزَانْ.