رَوْمَا 7:5 - الكتاب المقدس بالعربي الدارجي هنا تشاد

⁵ أَشَانْ وَكِتْ أَنِحْنَ لِسَّاعْنَا عَايْشِينْ فِي طَبِيعِتْنَا الْإِنْسَانِيَّةْ بَسْ، شُرُوطْ التَّوْرَاةْ سَبَّبَوْا فِي أَجْسَامْنَا الشَّهْوَاتْ الْيِوَدُّونَا لِلذَّنِبْ. وَ الشَّهْوَاتْ دَوْل لَزَّوْنَا لِنِسَوُّوا الشَّيّءْ الْيِوَدِّينَا لِلْمَوْت.

رَوْمَا 7:5 Referenca të Kryqëzuara

أفَسُس 2:3

وَ أَوَّلْ كُلِّنَا مِنْهُمْ وَ نِتَابُعُوا شَهْوَاتْ الْإِنْسَانْ وَ نِسَوُّوا الشَّيّءْ الْجِسِمْنَا وَ أَفْكَارْنَا يِدَوْرُوهْ. أَوَّلْ أَنِحْنَ ذَاتْنَا وَاجِبْ لَيْنَا غَضَبْ اللّٰهْ مِثِلْ النَّاسْ الْآخَرِينْ.

غَلاطِية 5:24

وَ النَّاسْ الْبِقَوْا نَاسْ هَنَا الْمَسِيحْ عِيسَى خَطَّوْا شَهْوَاتْهُمْ الْفَسْلِينْ فِي الصَّلِيبْ وَ كَتَلَوْهُمْ.

غَلاطِية 3:10

وَ كُلَّ النَّاسْ الْأَنْكَرَبَوْا فِي طَبِّقِينْ شُرُوطْ التَّوْرَاةْ، اللَّعَنَةْ قَاعِدَةْ فَوْقهُمْ. أَشَانْ مَكْتُوبْ فِي الْكِتَابْ كَدَرْ أَيِّ نَادُمْ الْمَا يِتَابِعْ الْكَلَامْ الْمَكْتُوبْ فِي التَّوْرَاةْ كُلَّ كَيْ وَ مَا يِطَبِّقَهْ تَمَامْ، هُو مَلْعُونْ.

رَوْمَا 6:13

مَا تِسَلُّمُوا بَتَّانْ أَجْسَامْكُو لِلذَّنِبْ مِثِلْ آلَةْ الْيِسَوُّوا بَيْهَا الشَّرّ. لَاكِنْ بِالْعَكْس، إِنْتُو ذَاتْكُو سَلُّمُوا نُفُوسْكُو لِلّٰهْ مِثِلْ نَاسْ الْبَعَثَوْا مِنْ أُسْط الْمَيْتِينْ. وَ سَلُّمُوا أَجْسَامْكُو لِلّٰهْ مِثِلْ آلَةْ الْيِسَوُّوا بَيْهَا الْخَيْر.

رَوْمَا 6:21

وَ وَيْن النَّتِيجَةْ اللِّقِيتُوهَا مِنْ الذُّنُوبْ الْأَوَّلْ سَوَّيْتُوهُمْ دَوْل؟ هَسَّعْ الْعَيْب كَرَبَاكُو بِسَبَبْهُمْ أَشَانْ الذُّنُوبْ دَوْل يِوَدُّوا النَّاسْ لِلْمَوْت.

1 يُوحَنَّا 3:4

أَيِّ نَادُمْ الْقَاعِدْ يَذْنِبْ، هُو يِخَالِفْ وَصَايَا اللّٰهْ. الذَّنِبْ هُو مُخَالَفَةْ وَصَايَا اللّٰهْ.

كُلُوسِي 3:5

أَشَانْ دَا، قُشُّوا مَرَّةْ وَاحِدْ مِنْ أَفْكَارْكُو كُلَّ شَيّءْ الْمِنْ الْأَرْض مِثِلْ الزِّنَى وَ الْحَالْ الشَّيْنَةْ وَ الشَّهْوَاتْ الْفَسْلِينْ وَ النِّيَّةْ الْفَسْلَةْ وَ الطَّمَعْ. وَ بِالصَّحِيحْ، الطَّمَعْ هُو مِثِلْ عِبَادَةْ الْأَصْنَامْ.

1 كُرُنْتُس 15:56

وَ الْمَوْت عِنْدَهْ قُدْرَةْ فَوْقنَا بِسَبَبْ الذُّنُوبْ. وَ الذُّنُوبْ عِنْدُهُمْ قُدْرَةْ فَوْقنَا بِسَبَبْ شُرُوطْ التَّوْرَاةْ.

يَعْقُوب 4:1

الدُّوَاسْ وَ الْهُرَاجْ أَمْبَيْنَاتْكُو جَايِينْ مِنْ وَيْن؟ هُمَّنْ جَايِينْ مِنْ شَهْوَاتْكُو الْقَاعِدِينْ يِحَارُبُوا فِي قُلُوبْكُو.

يَعْقُوب 1:15

وَ الشَّهْوَةْ هِي مِثِلْ مَرَةْ التَّغْلَبْ وَ تَلْدَ صَغِيرْ. الشَّهْوَةْ كُلَ تَغْلَبْ وَ تَلْدَ صَغِيرْ وَ صَغِيرْهَا، هُو الذَّنِبْ. وَ الذَّنِبْ كَنْ خَلَاصْ كِبِرْ يِسَبِّبْ الْمَوْت.

تِيطُس 3:3

خَلِّي مَا نَنْسَوْا كَدَرْ أَوَّلْ أَنِحْنَ كُلَ مِثِلْهُمْ، جُهَّالْ وَ عَاصِيِينْ. أَوَّلْ أَنِحْنَ مُوَدِّرِينْ وَ شَهْوَاتْنَا مَلَكَوْنَا وَ قُلُوبْنَا مَرْبُوطِينْ فِي حَلَاتْ الدُّنْيَا. أَوَّلْ أَنِحْنَ عَايْشِينْ بِالْفَسَالَةْ وَ الْحُسُدْ، وَ قَاعِدِينْ نَكْرَهَوْا النَّاسْ وَ النَّاسْ يَكْرَهَوْنَا.

أفَسُس 2:11

يَا أَخْوَانِي الْمَا يَهُودْ، فَكُّرُوا فِي حَالِتْكُو الْقَدِيمَةْ. أَوَّلْ الْيَهُودْ يُقُولُوا فَوْقكُو إِنْتُو مَا مُطَهَّرِينْ. وَ النَّاسْ الْيُقُولُوا الْكَلَامْ دَا يُقُولُوا هُمَّنْ بَسْ الْمُطَهَّرِينْ لَاكِنْ طَهُورِتْهُمْ قَطِعِينْ الْجِلِدْ الْيِسَوُّوهْ بِإِيدَيْن النَّاسْ بَسْ.

رَوْمَا 7:23

لَاكِنْ نِحِسّ فِي نَفْسِي شَيّءْ آخَرْ الْقَاعِدْ فِي جِسْمِي الْيِدَوْر يَمْلُكْنِي وَ هُو يِدَاوِسْ مَعَ فِكْرِي. وَ خَلَاصْ، أَنَا بِقِيتْ مَسْجُونْ تِحِتْ مُلُكْ الذَّنِبْ الْقَاعِدْ فِي جِسْمِي.

رَوْمَا 6:23

أَشَانْ أُجْرَةْ الذَّنِبْ، هِي الْمَوْت وَ الْعَطِيَّةْ الْاللّٰهْ يَنْطِيهَا بَلَا تَمَنْ، هِي الْحَيَاةْ الْأَبَدِيَّةْ بِرَبِّنَا عِيسَى الْمَسِيحْ.

رَوْمَا 6:19

فِكِرْكُو فِكِرْ إِنْسَانِي وَ أَشَانْ دَا، أَنَا قَاعِدْ نِحَجِّي لَيْكُو بِكَلَامْ هَيِّنْ مِثِلْ كَلَامْ النَّاسْ. أَوَّلْ سَلَّمْتُوا أَجْسَامْكُو مِثِلْ عَبِيدْ لِلْحَالْ الشَّيْنَةْ وَ لِلْخَطَايَا السَّوَّوْكُو خَاطِيِّينْ بِزِيَادَةْ. هَسَّعْ وَاجِبْ تِسَلُّمُوا أَجْسَامْكُو لِلْحَالْ الصَّالْحَةْ وَ تَبْقَوْا نَاسْ اللّٰهْ الصَّالِحِينْ.

رَوْمَا 5:20

وَ شُرُوطْ التَّوْرَاةْ جَوْا أَشَانْ قُدْرَةْ الْخَطَا أَنْشَافَتْ بِزِيَادَةْ. لَاكِنْ فِي الْبَكَانْ الْكِتِرْ فَوْقَهْ الذَّنِبْ، رَحْمَةْ اللّٰهْ كُلَ كِتْرَتْ بِزِيَادَةْ.

رَوْمَا 4:15

أَشَانْ شُرُوطْ التَّوْرَاةْ يِجِيبُوا غَضَبْ اللّٰهْ فَوْق النَّاسْ. وَ لَاكِنْ كَنْ شُرُوطْ مَا فِي، مُخَالَفَةْ الشُّرُوطْ كُلَ مَا فِي.

رَوْمَا 3:20

أَشَانْ مَا فِي إِنْسَانْ يَبْقَى صَالِحْ قِدَّامْ اللّٰهْ بِطَبِّقِينْ شُرُوطْ التَّوْرَاةْ. بِالْعَكْس، الشُّرُوطْ قَاعِدِينْ أَشَانْ بَيْهُمْ الذَّنِبْ يِنْعَرِفْ.

رَوْمَا 1:26

وَ أَشَانْ دَا، اللّٰهْ سَلَّمَاهُمْ لِشَهْوَاتْهُمْ الْيِجِيبُوا فِي رُوسَيْهُمْ الْعَيْب. وَ عَوِينْهُمْ كُلَ خَلَّنْ مِنْهِنْ الرُّجَالْ وَ دَوَّرَنْ عَوِينْ.

يُوحَنَّا 3:6

الْمَوْلُودْ مِنْ إِنْسَانْ، هُو إِنْسَانْ وَ لَاكِنْ الْمَوْلُودْ مِنْ الرُّوحْ، هُو رُوحْ.

مَتَّى 15:19

أَشَانْ مِنْ دَاخَلْ قَلِبْ الْإِنْسَانْ يَمْرُقْ الْفِكِرْ الشَّيْن وَ الْكَتِلْ وَ الزِّنَى وَ الْفَسَالَةْ وَ السِّرْقَةْ وَ الشَّهَادَةْ بِالْكِدِبْ وَ كَلَامْ الْكُفُرْ.

2 كُرُنْتُس 10:3

صَحِيحْ، أَنِحْنَ عَايْشِينْ فِي الدُّنْيَا لَاكِنْ مَا نِحَارُبُوا مِثِلْ نَاسْ الدُّنْيَا.