رَوْمَا 7:4 - الكتاب المقدس بالعربي الدارجي هنا تشاد

⁴ يَا أَخْوَانِي، إِنْتُو كُلَ بِقِي لَيْكُو مِثِلْ دَا. وَكِتْ كَتَلَوْا الْمَسِيحْ، إِنْتُو مُتُّوا مَعَايَهْ فِي جِسْمَهْ وَ بِقِيتُوا حُرِّينْ مِنْ شُرُوطْ التَّوْرَاةْ. وَ بَيْدَا، تَبْقَوْا هَنَا سَيِّدْ آخَرْ وَ هُو النَّادُمْ الْبَعَثْ مِنْ أُسْط الْمَيْتِينْ. وَ خَلَاصْ، كُلِّنَا نِسَوُّوا الْخَيْر الْاللّٰهْ يِدَوْرَهْ.

رَوْمَا 7:4 Referenca të Kryqëzuara

1 بُطْرُس 2:24

وَ فِي الصَّلِيبْ، هُو بِنَفْسَهْ حَمَلْ ذُنُوبْنَا فِي جِسْمَهْ أَشَانْ نِخَلُّوا الذُّنُوبْ مَرَّةْ وَاحِدْ وَ نِعِيشُوا بِحَالْ صَالْحَةْ. وَ بِوَاسِطَةْ جِرَاحَهْ، إِنْتُو لِقِيتُوا الشِّفَاءْ.

إشَعْيا 54:5

أَشَانْ الْخَلَقَاكِ، هُو مِثِلْ رَاجِلْكِ وَ أُسْمَهْ اللّٰهْ الْقَادِرْ. وَ الْيَفْدَاكِ، هُو قُدُّوسْ إِسْرَائِيلْ وَ يِنَادُوهْ إِلٰـهْ كُلَّ الْأَرْض.

رَوْمَا 8:2

وَ قُدْرَةْ الرُّوحْ الْقُدُّوسْ التَّنْطِي الْحَيَاةْ فِي عِيسَى الْمَسِيحْ حَرَّرَتْنِي مِنْ قُدْرَةْ الشُّرُوطْ الْقَدِيمِينْ الْوَدَّوْنِي لِلذَّنِبْ وَ الْمَوْت.

أفَسُس 2:15

هُو بَطَّلْ دَرِبْ قَوَانِينْ الْيَهُودْ مَعَ شُرُوطْهُمْ أَشَانْ يِكَوِّنْ فِي الْعَلَاقَةْ مَعَايَهْ نَفَرْ وَاحِدْ جَدِيدْ فِي بَدَلْ نَفَرَيْن. وَ مِثِلْ دَا، هُو سَوَّى أَمْبَيْنَاتْنَا السَّلَامْ.

رَوْمَا 7:6

لَاكِنْ هَسَّعْ أَنِحْنَ حُرِّينْ مِنْ شُرُوطْ التَّوْرَاةْ أَشَانْ مُتْنَا مَعَ الْمَسِيحْ وَ مُتْنَا لِلْكَرَبَانَا مَسَاجِينْ. وَ بِمِثِلْ دَا، نَعَبُدُوا اللّٰهْ مَا بِالْعِبَادَةْ الْقَدِيمَةْ حَسَبْ الْكَلَامْ الْمَكْتُوبْ، لَاكِنْ بِقُدْرَةْ الرُّوحْ الْقُدُّوسْ فِي الْحَيَاةْ الْجَدِيدَةْ.

غَلاطِية 5:18

وَ كَنْ الرُّوحْ الْقُدُّوسْ قَاعِدْ يُقُودْكُو، إِنْتُو مَا قَاعِدِينْ تِحِتْ شُرُوطْ التَّوْرَاةْ.

كُلُوسِي 1:22

وَ لَاكِنْ هَسَّعْ، اللّٰهْ سَوَّى صُلُحْ مَعَاكُو بِوَاسِطَةْ إِبْنَهْ الْجَاءْ بِجِسِمْ إِنْسَانِي. وَ إِبْنَهْ مَاتْ لِيِسَوِّيكُو نَاسْ خَاصِّينْ وَ يِقَدِّمْكُو لِلّٰهْ بَلَا خَطَا وَ بَلَا عَيْب.

رَوْمَا 6:22

لَاكِنْ هَسَّعْ إِنْتُو حُرِّينْ مِنْ الذَّنِبْ وَ بِقِيتُوا عَبِيدْ اللّٰهْ. وَ النَّتِيجَةْ التَّلْقَوْهَا، هِي الْحَالْ الصَّالْحَةْ وَ هِي تِوَدِّي النَّاسْ لِلْحَيَاةْ الْأَبَدِيَّةْ.

غَلاطِية 3:13

لَاكِنْ الْمَسِيحْ فَدَانَا مِنْ اللَّعَنَةْ الْجَايَةْ مِنْ التَّوْرَاةْ. هُو ذَاتَهْ بِقِي مَلْعُونْ فِي شَانَّا. أَشَانْ الْكِتَابْ بُقُولْ: <أَيِّ نَادُمْ الْمُعَلَّقْ فَوْق فِي الْحَطَبْ، هُو مَلْعُونْ.>

رَوْمَا 6:14

خَلَاصْ، الذَّنِبْ مَا عِنْدَهْ قُدْرَةْ فَوْقكُو بَتَّانْ أَشَانْ هَسَّعْ إِنْتُو مَا تِحِتْ شُرُوطْ التَّوْرَاةْ لَاكِنْ إِنْتُو تِحِتْ رَحْمَةْ اللّٰهْ.

كُلُوسِي 2:14

وَ الْمَكْتُوبْ الْاللّٰهْ سَجَّلْ فَوْقَهْ كُلَّ ذُنُوبْنَا الْيِحَاسِبْنَا بَيْهُمْ حَسَبْ الشُّرُوطْ، هُو قَشَّاهْ مَرَّةْ وَاحِدْ بِمَوْت الْمَسِيحْ فِي الصَّلِيبْ.

كُلُوسِي 1:10

وَ مِثِلْ دَا، تَعَرْفُوا كِكَّيْف تِعِيشُوا بِحَالْ الْوَاجْبَةْ لِنَاسْ الرَّبّ وَ تِسَوُّوا دَايْماً الشَّيّءْ الْهُو يَرْضَى بَيَّهْ وَ تِسَوُّوا كُلَّ عَمَلْ الْخَيْر وَ تَعَرْفُوا اللّٰهْ بِزِيَادَةْ.

فِلِبِّي 1:11

وَ تَبْقَوْا صَالِحِينْ وَ مَلَانِينْ بِالْخَيْر الْجَايِ مِنْ عِيسَى الْمَسِيحْ. وَ خَلَاصْ، الْمَجْد وَ الشُّكُرْ لِلّٰهْ.

رُؤية 19:7

خَلِّي نَفْرَحَوْا وَ نِعَيُّدُوا وَ نِمَجُّدُوا اللّٰهْ أَشَانْ يَوْم هَنَا عِرِسْ الْحَمَلْ تَمَّ وَ الْعَرُوسْ جَهَّزَتْ نَفِسْهَا.

رَوْمَا 6:2

لَا، أَبَداً! أَنِحْنَ مُتْنَا وَ مَرَقْنَا مِنْ مُلُكْ الذَّنِبْ. كِكَّيْف نِعِيشُوا فَوْقَهْ بَتَّانْ؟

كُلُوسِي 2:20

أَكِيدْ إِنْتُو مُتُّوا مَعَ الْمَسِيحْ وَ بِالْمَوْت دَا، بِقِيتُوا حُرِّينْ مِنْ شُرُوطْ عَادَاتْ الدُّنْيَا. وَ كَنْ مِثِلْ دَا، مَالَا تِدَوْرُوا تِعِيشُوا بَتَّانْ مِثِلْ إِنْتُو نَاسْ هَنَا الدُّنْيَا؟ مَالَا تِتَابُعُوا شُرُوطْهَا الْبُقُولُوا:

كُلُوسِي 1:6

وَ بِشَارَةْ الْمَسِيحْ قَاعِدَةْ تِجِيبْ نَتِيجَةْ وَ تِلْوَزَّعْ فِي الدُّنْيَا. وَ دَا مِثِلْ هِي قَاعِدَةْ تِسَوِّيهْ فِي أُسُطْكُو مِنْ يَوْم إِنْتُو سِمِعْتُوا بِنِعْمَةْ اللّٰهْ وَ عِرِفْتُوهَا بِصَحِيحْ.

فِلِبِّي 4:17

قُلْت الْكَلَامْ دَا، مَا أَشَانْ نِدَوْر مِنْكُو مُسَاعَدَةْ بَتَّانْ لَاكِنْ أَشَانْ أَيِّ شَيّءْ التَّنْطُوهْ فِي شَانْ رَبِّنَا، هُو يَقْبَلَهْ وَ يُخُطَّهْ فِي مَخَزَنْ الْحَسَنَاتْ.

يُوحَنَّا 3:29

النَّادُمْ الْعِنْدَهْ الْعَرُوسْ، هُو بَسْ الْعَرِيسْ. وَ رَفِيقْ الْعَرِيسْ هُو يَقِيفْ جَنْبَهْ وَ يَسْمَعْ كَلَامَهْ. وَ كَنْ يَسْمَعْ حِسّ الْعَرِيسْ، هُو فَرْحَانْ بِفَرْحَةْ كَبِيرَةْ. وَ الْفَرْحَةْ دِي، هِي فَرْحَةْ هِنْتِي وَ هَسَّعْ أَنَا فَرْحَانْ مَرَّةْ وَاحِدْ.

مَتَّى 26:26

وَ وَكِتْ قَاعِدِينْ يِلْعَشَّوْا، عِيسَى شَالْ خُبْزَةْ وَاحِدَةْ وَ شَكَرْ اللّٰهْ وَ كَسَرْهَا وَ أَنْطَاهَا لِتَلَامِيذَهْ وَ قَالْ: «شِيلُوهْ وَ آكُلُوهْ. دَا جِسْمِي.»

رُؤية 21:9

وَ مَلَكْ وَاحِدْ جَاءْ لَيِّ وَ هُو وَاحِدْ مِنْ السَّبْعَةْ مَلَائِكَةْ الْأَوَّلْ عِنْدُهُمْ السَّبْعَةْ كِيسَانْ وَ دَفَّقَوْا السَّبْعَةْ وَبَاءْ الْأَخِيرِينْ فِي الْأَرْض. وَ هُو حَجَّى لَيِّ وَ قَالْ: «تَعَالْ، نِوَصِّفَكْ الْعَرُوسْ التَّبْقَى زَوْجَةْ الْحَمَلْ.»

عِبْرَانِيِّين 10:10

وَ بِالْيِدَوْرَهْ اللّٰهْ دَا، عِيسَى الْمَسِيحْ قَدَّمْ جِسْمَهْ مَرَّةْ وَاحِدَةْ وَ نِهَائِيَّةْ وَ الضَّحِيَّةْ دِي سَوَّتْنَا خَاصِّيْن لِلّٰهْ.

2 كُرُنْتُس 11:2

أَنَا عِنْدِي مَحَبَّةْ شَدِيدَةْ لَيْكُو وَ مَحَبِّتِي دِي جَايَةْ مِنْ اللّٰهْ. أَنَا مِثِلْ أَبُو الْبِنَيَّةْ اللِّسَّاعْهَا مَا شَافَتْ رَاجِلْ وَ إِنْتُو بَسْ الْبِنَيَّةْ. وَ أَنَا سَوَّيْت مَوْعِدْ أَشَانْ الْبِنَيَّةْ دِي تَاخُدْ رَاجِلْ وَاحِدْ وَ هُو الْمَسِيحْ. وَ نِدَوْر نِقَدِّمْكُو لَيَّهْ مِثِلْ بِنَيَّةْ الْمَا عِنْدَهَا عَيْب.

1 كُرُنْتُس 10:16

فَكُّرُوا فِي عَشَاءْ الْمَسِيحْ وَ فِي كَاسْ عَصِيرْ الْعِنَبْ النَّشَرْبَوْا مِنَّهْ وَ نَشْكُرُوا اللّٰهْ. وَ وَكِتْ نَشَرْبَوْا مِنَّهْ، أَنِحْنَ مَا مُشْتَرِكِينْ فِي دَمّ الْمَسِيحْ وَلَّا؟ وَ فَكُّرُوا فِي الْخُبْزَةْ النَّكْسُرُوهَا. وَكِتْ نَاكُلُوا مِنْهَا، أَنِحْنَ مَا مُشْتَرِكِينْ فِي جِسِمْ الْمَسِيحْ وَلَّا؟

يُوحَنَّا 15:8

وَ مَجْد أَبُويِ يِبِينْ زِيَادَةْ وَكِتْ إِنْتُو تَبْقَوْا مِثِلْ فُرُوعْ الْيَلْدَوْا عِيَالْ كَتِيرْ. وَ بَيْدَا، تِوَصُّفُوا نُفُوسْكُو كَدَرْ إِنْتُو تَلَامِيذِي.

يُوحَنَّا 6:51

أَنَا خُبْز الْحَيَاةْ النَّزَلْ مِنْ السَّمَاءْ. وَ أَيِّ نَادُمْ الْيَاكُلْ مِنْ الْأَكِلْ دَا، يِعِيشْ دَايْماً. وَ الْأَكِلْ الْأَنَا نَنْطِيهْ لِنَاسْ الدُّنْيَا أَشَانْ يِعِيشُوا، هُو لَحَمْ جِسْمِي.»

إشَعْيا 62:5

مِثِلْ صَبِي يَاخُدْ بِنَيَّةْ عُدْرِيَّةْ، أَوْلَادْكِ يَكُرْبُوكِ. وَ مِثِلْ الْعَرُوسْ تَبْقَى فَرَحْ لِرَاجِلْهَا، إِنْتِ كُلَ تَبْقَيْ فَرَحْ لِإِلٰـهْكِ.

مَرْخُوس 4:20

وَ التَّيْرَابْ الْوَقَعْ فِي التُّرَابْ الْعَدِيلْ يِمَثِّلْ النَّاسْ الْيَسْمَعَوْا كَلَامْ اللّٰهْ وَ يَكُرْبُوهْ عَدِيلْ. وَ هُمَّنْ يِجِيبُوا إِنْتَاجْ سَمَحْ، وَاحِدِينْ مِنْهُمْ 30 أَوْ 60 أَوْ 100 حَبَّةْ.»

رَوْمَا 6:11

وَ بِمِثِلْ دَا، أَعَرْفُوا كَدَرْ إِنْتُو كُلَ مُتُّوا وَ أَنْفَرَقْتُوا مِنْ قُدْرَةْ الذَّنِبْ وَ بَعَثْتُوا وَ بِقِيتُوا حَيِّينْ لِلّٰهْ بِعِيسَى الْمَسِيحْ.

رَوْمَا 7:3

وَ بِمِثِلْ دَا، كَنْ مَشَتْ أَخَدَتْ رَاجِلْ آخَرْ وَكِتْ رَاجِلْهَا لِسَّاعْ قَاعِدْ حَيّ، شُرُوطْ التَّوْرَاةْ تُقُولْ هِي زَانِيَةْ. لَاكِنْ كَنْ رَاجِلْهَا مَاتْ، هِي تَبْقَى حُرَّةْ مِنْ الشُّرُوطْ دَوْل. وَ كَنْ تَمْشِي تَاخُدْ رَاجِلْ آخَرْ كُلَ، الشَّرِيعَةْ مَا تُقُولْ هِي زَانِيَةْ.