رَوْمَا 3:4 - الكتاب المقدس بالعربي الدارجي هنا تشاد

⁴ لَا، أَبَداً. كَنْ كُلَّ النَّاسْ كَدَّابِينْ كُلَ، اللّٰهْ يُقُولْ دَايْماً الْحَقّ. أَشَانْ دَا، الْكِتَابْ بُقُولْ: <يَا اللّٰهْ، إِنْتَ صَادِقْ وَكِتْ تِكَلِّمْ وَ تِنَّصِرْ وَكِتْ تِحَاكِمْ.>

رَوْمَا 3:4 Referenca të Kryqëzuara

زَبُور 51:4

ضِدَّكْ إِنْتَ وِحَيْدَكْ بَسْ، أَنَا أَذْنَبْت وَ سَوَّيْت شَيّءْ فَسِلْ قِدَّامَكْ. وَ فِي شَانْ دَا، إِنْتَ صَادِقْ وَكِتْ تِكَلِّمْ وَ عَادِلْ وَكِتْ تِحَاكِمْ.

زَبُور 116:11

وَ فِي بَرْجَلَتِي، أَنَا قُلْت: «كُلَّ النَّاسْ كَدَّابِينْ.»

غَلاطِية 2:17

شِلْنَا دَرِبْ الْمَسِيحْ لِنَبْقَوْا صَالِحِينْ وَ بَيْدَا كُلَ، عِرِفْنَا نُفُوسْنَا مُذْنِبِينْ. هَلْ نُقُولُوا الْمَسِيحْ هُو سَبَبْ ذُنُوبْنَا وَلَّا؟ لَا، أَبَداً.

عِبْرَانِيِّين 6:18

وَ فِي شَانْ الْكَلَامْ دَا، عِنْدِنَا شَجَاعَةْ شَدِيدَةْ، أَوَّلْ بِوَعَدْ اللّٰهْ وَ بَتَّانْ بِحَلِيفَةْ اللّٰهْ. الْأَشْيَاءْ الْإِتْنَيْن دَوْل أَكِيدْ مَا يَفْشُلُوا أَشَانْ مَا مُمْكِنْ اللّٰهْ يِخَلِّي كَلَامَهْ الْقَالَهْ. وَ خَلَاصْ، أَنِحْنَ التُّبْنَا لِلّٰهْ أَشَانْ نَنْجَوْا، نَكُرْبُوا قَوِي الْعَشَمْ الْهُو قَدَّمَهْ لَيْنَا.

تِيطُس 1:2

وَ بِسَبَبْ الْإِيمَانْ دَا، يَرْجَوْا بِعَشَمْ الْحَيَاةْ الْأَبَدِيَّةْ الْهُو وَاعَدَاهُمْ بَيْهَا مِنْ قُبَّالْ بِدَايَةْ الدُّنْيَا. وَ اللّٰهْ أَبَداً مَا يَكْدِبْ.

تَثْنِية 32:4

هُو الْمَلْجَأْ وَ أَعْمَالَهْ تَمَامِينْ أَشَانْ دُرُوبَهْ كُلُّهُمْ عَدَالَةْ. هُو إِلٰـهْ أَمِينْ وَ مَا عِنْدَهْ أَيِّ ظُلُمْ وَ صَادِقْ وَ عَادِلْ.

أيُّوب 36:3

عِرْفِتِي لِقِيتْهَا مِنْ بَعِيدْ وَ نِوَصِّفْ كَدَرْ الْخَلَقَانِي عَادِلْ.

يُوحَنَّا 3:33

وَ أَيِّ نَادُمْ الْقِبِلْ شَهَادْتَهْ أَكَّدْ كَدَرْ كَلَامْ اللّٰهْ صَحِيحْ.

زَبُور 119:160

أَسَاسْ كَلَامَكْ حَقّ وَ كُلَّ شَرِيعْتَكْ عَدَالَةْ إِلَى الْأَبَدْ.

رُؤية 3:7

«وَ أَكْتِبْ كَلَامِي لِلْمَلَكْ هَنَا جَمَاعَةْ الْمُؤمِنِينْ الْفِي حِلَّةْ فِلَدَلْفِيَةْ. دَاهُو كَلَامِي، أَنَا الْقُدُّوسْ وَ الصَّحِيحْ. عِنْدِي مُفْتَاحْ هَنَا الْمَلِكْ دَاوُدْ. وَ كَنْ أَنَا نَفْتَحْ الْبَابْ، مَا فِي نَادُمْ الْيَقْدَرْ يِسِدَّهْ وَ كَنْ أَنَا نِسِدّ الْبَابْ، مَا فِي نَادُمْ الْيَقْدَرْ يَفْتَحَهْ.

1 يُوحَنَّا 5:20

وَ نَعَرْفُوا كَدَرْ إِبْن اللّٰهْ جَاءْ وَ فَتَّحْ لَيْنَا قُلُوبْنَا أَشَانْ نَعَرْفُوا اللّٰهْ هُو الْإِلٰـهْ الْحَقّ وَ خَلَاصْ أَنِحْنَ بِقِينَا نَاسْ الْإِلٰـهْ الْحَقّ بِإِبْنَهْ عِيسَى الْمَسِيحْ. هُو بَسْ الْإِلٰـهْ الْحَقّ وَ الْحَيَاةْ الْأَبَدِيَّةْ.

رَوْمَا 9:14

وَ فِي الْكَلَامْ دَا، نُقُولُوا شُنُو؟ نُقُولُوا اللّٰهْ هُو ظَالِمْ وَلَّا؟ أَبَداً، مَا كَيْ!

زَبُور 138:2

نَسْجُدْ عَلَيْ بَيْتَكْ الْمُقَدَّسْ وَ نِمَجِّدْ أُسْمَكْ أَشَانْ رَحْمَتَكْ وَ أَمَانَكْ. أَشَانْ إِنْتَ كَبَّرْت أُسْمَكْ وَ وَعَدَكْ زِيَادَةْ مِنْ كُلِّ شَيّءْ.

مِيخا 7:20

وَ تِوَصِّفْ أَمَانَكْ لِذُرِّيَّةْ يَعْقُوبْ وَ خَيْرَكْ لِعِيَالْ إِبْرَاهِيمْ مِثِلْ إِنْتَ زَمَانْ حَلَفْت بَيَّهْ لِأَبَّهَاتْنَا.

زَبُور 100:5

أَشَانْ اللّٰهْ رَحِيمْ وَ رَحْمَتَهْ دَايْمَةْ وَ أَمَانَهْ قَاعِدْ مِنْ ذُرِّيَّةْ لِذُرِّيَّةْ.

1 يُوحَنَّا 5:10

الْمُؤمِنِينْ بِإِبْن اللّٰهْ كَرَبَوْا الشَّهَادَةْ دِي فِي قُلُوبْهُمْ. النَّاسْ الْمَا مُؤمِنِينْ بِالْكَلَامْ الْاللّٰهْ قَالَهْ، هُمَّنْ كَدَبَوْا اللّٰهْ أَشَانْ أَبَوْا مَا يَقْبَلَوْا شَهَادَةْ اللّٰهْ فِي إِبْنَهْ.

غَلاطِية 2:21

أَبَداً أَنَا مَا نَنْكُرْ نِعْمَةْ اللّٰهْ. كَنْ النَّاسْ يَبْقَوْا صَالِحِينْ بِطَبِّقِينْ شُرُوطْ التَّوْرَاةْ، مِثِلْ دَا الْمَسِيحْ مَاتْ بَلَا سَبَبْ.

رَوْمَا 6:15

وَ دَا كِكَّيْف؟ هَلْ نَذْنُبُوا أَشَانْ أَنِحْنَ عَايْشِينْ تِحِتْ رَحْمَةْ اللّٰهْ وَ مَا تِحِتْ شُرُوطْ التَّوْرَاةْ وَلَّا؟ لَا، أَبَداً.

رَوْمَا 3:31

وَ بِمِثِلْ دَا، هَلْ بَدَّلْنَا مَرَّةْ وَاحِدْ شُرُوطْ التَّوْرَاةْ بِالْإِيمَانْ وَلَّا؟ لَا، أَبَداً. بِالْعَكْس، أَنِحْنَ ثَبَّتْنَا شُرُوطْ التَّوْرَاةْ.

مَتَّى 11:19

وَ بَعَدَيْن أَنَا إِبْن الْإِنْسَانْ جِيتْ وَ أَنَا قَاعِدْ نَاكُلْ وَ نَشْرَبْ وَ قَالَوْا: ‹هُو أَكَّالْ وَ سَكَّارِي وَ رَفِيقْ لِنَاسْ الْيِشِيلُوا مِيرِي وَ الْمُذْنِبِينْ.› لَاكِنْ حِكْمَةْ اللّٰهْ الصَّحِيحَةْ تِنْشَافْ فِي عَمَلْ النَّاسْ الْيِتَابُعُوهَا.»

أيُّوب 40:8

إِنْتَ تِدَوْر تِبَطِّلْ شَرِيعْتِي وَلَّا؟ وَ تِدَوْر تِسَوِّينِي خَاطِي أَشَانْ تِبَرِّي نَفْسَكْ وَلَّا؟

غَلاطِية 6:14

وَ كَنْ لَيِّ أَنَا، أَبَداً مَا نِدَوْر نِفَاشِرْ لِلنَّاسْ بِأَيِّ شَيّءْ، إِلَّا بِصَلِيبْ هَنَا رَبِّنَا عِيسَى الْمَسِيحْ. وَ الصَّلِيبْ دَا، كَتَلْ لَيِّ شَهْوَاتِي هَنَا الدُّنْيَا وَ بَيَّهْ أَنَا كُلَ بِقِيتْ مِثِلْ نَادُمْ مَيِّتْ لِلدُّنْيَا.

رَوْمَا 11:1

وَ أَشَانْ دَا، أَنَا نَسْأَلْ سُؤَالْ. اللّٰهْ أَبَى شَعَبَهْ بَنِي إِسْرَائِيلْ مَرَّةْ وَاحِدْ وَلَّا؟ لَا، أَبَداً. أَنَا ذَاتِي مِنْ بَنِي إِسْرَائِيلْ وَ مِنْ ذُرِّيَّةْ إِبْرَاهِيمْ وَ مِنْ قَبِيلَةْ بَنْيَامِينْ.

زَبُور 62:9

أَيْوَى، بَنِي آدَم زَايْلِينْ وَ الْإِنْسَانْ مَا عِنْدَهْ أَمَانْ. كَنْ خَطَّيْتهُمْ فِي الْمِيزَانْ كُلَ، وَزِنْهُمْ خَفِيفْ مِنْ الرِّيحْ.

2 كُرُنْتُس 1:18

اللّٰهْ صَادِقْ! كَلَامْنَا لَيْكُو أَبَداً مَا يَبْقَى «أَيْوَى» وَ «لَا» فِي نَفْس الْوَكِتْ.

رَوْمَا 11:11

أَشَانْ دَا نَسْأَلْ. هُمَّنْ وَقَعَوْا مَرَّةْ وَاحِدْ لَحَدِّي بَتَّانْ مَا يُقُمُّوا وَلَّا؟ لَا، أَبَداً. هُمَّنْ وَقَعَوْا وَ بِخَطَاهُمْ دَا، نَجَاةْ اللّٰهْ لِحْقَتْ النَّاسْ الْمَا يَهُودْ أَشَانْ يِسَوِّي الْيَهُودْ يَحْسُدُوهُمْ.

رَوْمَا 7:7

وَ كَنْ نُقُولُوا شُرُوطْ التَّوْرَاةْ سَبَّبَوْا فَوْقنَا ذُنُوبْ، فِي الْكَلَامْ دَا نُقُولُوا التَّوْرَاةْ وَ الذُّنُوبْ هُمَّنْ سَوَا وَلَّا؟ لَا! أَشَانْ أَوَّلْ أَنَا مَا عِرِفْت الذَّنِبْ لَاكِنْ التَّوْرَاةْ بَسْ عَرَّفَانِي بَيَّهْ. أَوَّلْ كَنْ التَّوْرَاةْ مَا قَالْ: <مَا تَطْمَعْ>، أَنَا مَا نَعَرِفْ الطَّمَعْ.

رَوْمَا 6:2

لَا، أَبَداً! أَنِحْنَ مُتْنَا وَ مَرَقْنَا مِنْ مُلُكْ الذَّنِبْ. كِكَّيْف نِعِيشُوا فَوْقَهْ بَتَّانْ؟

لُوقا 20:16

أَكِيدْ، هُو يَجِي وَ يِكَتِّلْهُمْ لِلْحَرَّاتِينْ دَوْل وَ خَلَاصْ يَنْطِي الْجِنَيْنَةْ لِنَاسْ آخَرِينْ.» وَ وَكِتْ النَّاسْ سِمْعَوْا الْكَلَامْ دَا قَالَوْا: «خَلِّي اللّٰهْ يَدْحَرَهْ!»

رَوْمَا 7:13

وَ بِمِثِلْ دَا، الشَّيّءْ الْعَدِيلْ كَتَلَانِي وَلَّا؟ لَا! لَاكِنْ الذَّنِبْ كَرَبْ الشَّيّءْ الْعَدِيلْ وَ بَيَّهْ سَبَّبْ لَيِّ الْمَوْت وَ الذَّنِبْ يِنْعَرِفْ. وَ بِالْوَصِيَّةْ بَسْ، شَرّ الذَّنِبْ يِنْعَرِفْ مَرَّةْ وَاحِدْ.

1 كُرُنْتُس 6:15

مَا عِرِفْتُوا كَدَرْ هَسَّعْ جِسِمْ الْمُؤمِنْ عُضُو مِنْ جِسِمْ الْمَسِيحْ وَلَّا؟ وَ كَنْ مِثِلْ دَا، هَلْ نِوَدِّي جِسْمِي الْهَسَّعْ عُضُو مِنْ جِسِمْ الْمَسِيحْ وَ نَنْطِيهْ لِمَرَةْ شَرْمُوطَةْ؟ أَبَداً.

1 تِمُوتَاوُس 3:16

وَ بَلَا شَكَكْ، دَرِبْ التَّقْوَى الْاللّٰهْ بَيَّنَهْ لَيْنَا، هُو عَظِيمْ. الْمَسِيحْ بِقِي إِنْسَانْ وَ بَانْ فِي الدُّنْيَا وَ الرُّوحْ الْقُدُّوسْ شَهَدْ لَيَّهْ. الْمَلَائِكَةْ شَافَوْه فِي السَّمَاءْ وَ نَاسَهْ بَشَّرَوْا بَيَّهْ الْأُمَمْ. نَاسْ آمَنَوْا بَيَّهْ فِي الدُّنْيَا وَ اللّٰهْ رَفَعَهْ فَوْق فِي مَجْدَهْ.