رَوْمَا 16:2 - الكتاب المقدس بالعربي الدارجي هنا تشاد

² أَقْبَلَوْهَا بِأُسُمْ الرَّبّ وَ ضَيُّفُوهَا بِالضِّيفَةْ الْوَاجْبَةْ لِلنَّاسْ الصَّالِحِينْ. سَاعُدُوهَا فِي أَيِّ شَيّءْ الْهِي تِدَوْرَهْ مِنْكُو أَشَانْ هِي ذَاتْهَا سَاعَدَتْ نَاسْ كَتِيرِينْ وَ سَاعَدَتْنِي أَنَا كُلَ.

رَوْمَا 16:2 Referenca të Kryqëzuara

فِلِبِّي 2:29

وَ خَلَاصْ، أَكُرْبُوهْ بِأُسُمْ الرَّبّ بِفَرْحَةْ كَبِيرَةْ. وَ نُقُولْ لَيْكُو وَاجِبْ تِكَرُّمُوا بِزِيَادَةْ أَيِّ نَادُمْ مِثْلَهْ هُو.

فِلِبِّي 1:27

لَاكِنْ خَلِّي تِعِيشُوا بِالْحَالْ الْمُوَافْقَةْ لِبِشَارَةْ الْمَسِيحْ. وَ مِثِلْ دَا، كَنْ نَجِي نِشِيفْكُو وَلَّا كَنْ أَنَا بَعِيدْ مِنْكُو كُلَ، خَلَاصْ نَسْمَعْ كَلَامْ فِيكُو الْيُقُولْ إِنْتُو ثَابْتِينْ بِفِكِرْ وَاحِدْ وَ هَدَفْ وَاحِدْ وَ إِنْتُو قَاعِدِينْ تِحَارُبُوا سَوَا فِي شَانْ الْإِيمَانْ اللِّقِيتُوهْ مِنْ بِشَارَةْ الْمَسِيحْ.

2 يُوحَنَّا 1:10

كَنْ نَادُمْ بُقُولْ هُو مَسِيحِي وَ يَجِي لَيْكُو وَ كَلَامَهْ مَا يِوَافِقْ لِلتَّعْلِيمْ دَا، مَا تِضَيُّفُوهْ وَ مَا تِسَلُّمُوهْ كُلَ.

فِلِمُون 1:17

زَيْن. نَعَرِفْ كَدَرْ إِنْتَ تَجْعَلْنِي أَنَا مُشَارِكْ مَعَاكْ فِي الْإِيمَانْ. وَ نَطْلُبْ مِنَّكْ تَكْرُبْ الْفَايِدْ قَوِي مِثِلْ تِدَوْر تَكْرُبْنِي أَنَا قَوِي.

فِلِمُون 1:12

وَ أَنَا قَاعِدْ نِقَبِّلَهْ لَيْك مَعَ الْجَوَابْ دَا وَ دَا قَاسِي لَيِّ أَشَانْ نَقْرَمْ لَيَّهْ بِلْحَيْن.

تِيطُس 2:3

وَ وَصِّي الْعَجَايِزْ كُلَ أَشَانْ حَالْهِنْ تَبْقَى تَقِيَّةْ وَ مَا يَبْقَنْ قَوَّالَاتْ وَ لَا سَكَّارِيَّاتْ. خَلِّي يِعَلِّمَنْ أَخْوَاتْهِنْ كِكَّيْف يِسَوَّنْ الْخَيْر.

2 تِمُوتَاوُس 1:18

وَ نَسْأَلْ رَبِّنَا لِوَانِي سِفِرُسْ أَشَانْ يَلْقَى رَحْمَةْ مِنْ اللّٰهْ فِي الْيَوْم الْأَخِيرْ. وَ إِنْتَ تَعَرِفْ هُو سَاعَدَانِي كَتِيرْ وَكِتْ أَنَا قَاعِدْ فِي حِلَّةْ أَفَسُسْ كُلَ.

1 تِمُوتَاوُس 2:10

لَاكِنْ خَلِّي تِلْجَمَّلْ بِعَمَلْ الْخَيْر مِثِلْ مُوَافِقْ لِلْمَرَةْ التِّتَابِعْ دَرِبْ اللّٰهْ.

كُلُوسِي 4:10

أَخُونَا أَرِسْتَارْكُسْ الْقَاعِدْ مَعَايِ فِي السِّجِنْ يِسَلِّمْكُو وَ مَعَايَهْ مَرْخُوسْ أَخُو بَرْنَابَا. وَ مَرْخُوسْ دَا، كَنْ جَاءْ لَيْكُو، أَكُرْبُوهْ قَوِي مِثِلْ وَصَّوْكُو بَيَّهْ أَوَّلْ.

أفَسُس 5:3

لَاكِنْ الزِّنَى وَ الْحَالْ الشَّيْنَةْ وَ الطَّمَعْ، خَلِّي يَبْقَوْا مَا فِيهُمْ أَمْبَيْنَاتْكُو مَرَّةْ وَاحِدْ. وَ مَا تِحَجُّوا فَوْقهُمْ أَبَداً. دَوْل مَا أَفْعَالْ هَنَا نَاسْ صَالِحِينْ.

رَوْمَا 16:23

وَ غَايُسْ يِسَلِّمْكُو. هُو سِيدْ الْبَيْت الْأَنَا مُضَّيِّفْ فَوْقَهْ. وَ بَيْتَهْ هُو الْبَكَانْ الْيِلِمُّوا فَوْقَهْ جَمَاعَةْ الْمُؤمِنِينْ. وَ رَسْطُسْ وَكِيلْ صَنْدُوقْ هَنَا مَالْ الْحِلَّةْ وَ أَخُونَا كَوَارْتُسْ يِسَلُّمُوكُو.

رَوْمَا 16:9

وَ سَلُّمُوا أُرْبَانْ الْيَخْدِمْ مِثِلْنَا لِلْمَسِيحْ وَ حَبِيبِي إِسْتَخِي.

رَوْمَا 16:6

وَ سَلُّمُوا مَرْيَمْ الْخَدَمَتْ لَيْكُو كَتِيرْ.

رَوْمَا 15:7

خَلَاصْ، أَقْبَلَوْا كُلَّ مُؤمِنْ بِالْمَسِيحْ مِثِلْ الْمَسِيحْ قِبِلَاكُو. وَ بِمِثِلْ دَا، تِمَجُّدُوا اللّٰهْ.

أعمال الرُسُل 9:41

وَ بُطْرُسْ كَرَبْهَا مِنْ إِيدَيْنهَا وَ عَاوَنَاهَا وَ هِي قَمَّتْ فَوْق. وَ نَادَى كُلَّ الصَّالِحِينْ وَ الْعَجَايِزْ وَ خَلَاصْ قَدَّمَاهَا لَيْهُمْ حَيَّةْ.

أعمال الرُسُل 9:39

وَ بُطْرُسْ قَمَّ مَشَى مَعَاهُمْ. وَ وَكِتْ جَاءْ فِي الْبَيْت، وَدَّوْه فَوْق فِي الْبَكَانْ الْهِي رَاقْدَةْ فَوْقَهْ. وَ كُلَّ الْعَجَايِزْ الْمِسْكِينَاتْ قَاعِدَاتْ يَبْكَنْ وَ مَشَنْ لِبُطْرُسْ أَشَانْ يِوَصِّفَنْ لَيَّهْ اللُّبَاسْ وَ الْخُلْقَانْ الدُّورْكَاسْ خَيَّطَتْهُمْ وَكِتْ هِي حَيَّةْ.

أعمال الرُسُل 9:36

وَ مَرَةْ وَاحِدَةْ قَاعِدَةْ فِي حِلَّةْ يَافَا أُسُمْهَا طَابِيتَةْ وَ بِكَلَامْ يُونَانِي، دَا دُورْكَاسْ مَعَنَاتَهْ غَزَالَةْ. وَ هِي كُلَ مِنْ التَّلَامِيذ. وَ كُلِّ يَوْم، هِي قَاعِدَةْ تِسَاعِدْ الْمَسَاكِينْ وَ هِي دَايْماً شَغَّالَةْ بِعَمَلْ الْخَيْر.

مَتَّى 25:40

وَ الْمَلِكْ يُقُولْ لَيْهُمْ: ‹نُقُولْ لَيْكُو الْحَقّ، كَنْ سَوَّيْتُوا شَيّءْ مِثِلْ دَا لِوَاحِدْ مِنْ أَخْوَانِي الصُّغَارْ دَوْل، دَا مِثِلْ سَوَّيْتُوهْ لَيِّ أَنَا.›

أعمال الرُسُل 9:13

وَ حَنَانِيَّا رَدَّ لَيَّهْ وَ قَالْ: «يَا رَبِّنَا، سِمِعْت خَبَرْ مِنْ نَاسْ كَتِيرِينْ يُقُولُوا الرَّاجِلْ دَا سَوَّى عَمَلْ شَيْن فِي نَاسَكْ الصَّالِحِينْ فِي مَدِينَةْ الْقُدُسْ.

أعمال الرُسُل 9:15

وَ الرَّبّ حَجَّى لَيَّهْ وَ قَالْ: «أَمْشِي بَسْ. الرَّاجِلْ دَا، أَنَا عَزَلْتَهْ أَشَانْ يَبْقَى خَدَّامِي وَ يَمْشِي يِبَشِّرْ بِأُسْمِي لِلنَّاسْ الْمَا يَهُودْ وَ لِمُلُوكْهُمْ وَ لِبَنِي إِسْرَائِيلْ.

رَوْمَا 16:15

وَ سَلُّمُوا فِلُلُوغْ وَ جُولِيَةْ وَ نِيرِي وَ أَخْتَهْ وَ أُلُومْبَا وَ كُلَّ الصَّالِحِينْ الْقَاعِدِينْ مَعَاهُمْ.