رُؤية 9:11 - الكتاب المقدس بالعربي الدارجي هنا تشاد

¹¹ وَ الْجَرَادْ عِنْدَهْ سُلْطَانْ الْقَاعِدْ يُقُودَهْ وَ هُو مَلَكْ الْهَاوِيَةْ وَ أُسْمَهْ بِكَلَامْ عِبْرَانِي أَبَدُّونْ وَ أُسْمَهْ بِكَلَامْ يُونَانِي أَبُلِيُونْ (مَعَنَاتَهْ الْمُدَمِّرْ).

رُؤية 9:11 Referenca të Kryqëzuara

أيُّوب 26:6

قِدَّامْ الرَّبّ، كُلَّ الْقُبُورْ مُكْشُوفِينْ أَيْوَى، بَكَانْ الْهَلَاكْ مَا مُغَطَّى مِنَّهْ.

أفَسُس 2:2

وَ فِي الْوَكِتْ الْفَاتْ دَاكْ، إِنْتُو قَاعِدِينْ تِتَابُعُوا دَرِبْ الدُّنْيَا وَ تِتَابُعُوا كَبِيرْ الْمَمْلَكَةْ الشَّيْطَانِيَّةْ الْقَاعِدَةْ بَيْن السَّمَاءْ وَ الْأَرْض وَ هُو الشَّيْطَانْ الْقَاعِدْ يَخْدِمْ فِي قُلُوبْ النَّاسْ الْيِخَالُفُوا اللّٰهْ.

2 كُرُنْتُس 4:4

النَّاسْ الْمَا مُؤمِنِينْ دَوْل قُلُوبْهُمْ عَمْيَانِينْ أَشَانْ إِبْلِيسْ عِنْدَهْ سُلْطَةْ فِي الدُّنْيَا دِي وَ هُو عَمَاهُمْ. هُو يِدَوْر يَدْحَرْهُمْ مَا يِشِيفُوا النُّورْ الْمَجِيدْ هَنَا الْمَسِيحْ النِّبَلُّغُوا بَيَّهْ الْبِشَارَةْ. الْمَسِيحْ هُو صُورَةْ اللّٰهْ.

يُوحَنَّا 16:11

هُو يِعَرِّفْهُمْ الْحِسَابْ أَشَانْ اللّٰهْ حَاسَبْ إِبْلِيسْ سُلْطَانْ الدُّنْيَا خَلَاصْ.

يُوحَنَّا 14:30

«وَ نِحَجِّي مَعَاكُو شِيَّةْ بَسْ أَشَانْ إِبْلِيسْ سُلْطَانْ الدُّنْيَا جَايِ. هُو مَا يَقْدَرْ يِسَوِّي لَيِّ شَيّءْ،

يُوحَنَّا 8:44

أَبُوكُو هُو إِبْلِيسْ وَ إِنْتُو عِيَالَهْ وَ تِدَوْرُوا تِسَوُّوا الشَّيّءْ الْهُو يِدَوْرَهْ. هُو كَتَّالْ دِمَمْ مِنْ الْبِدَايَةْ وَ أَبَداً مَا دَوَّرْ الْحَقّ أَشَانْ فِي قَلْبَهْ، الْحَقّ مَا فِيهْ. كَلَامْ الْكِدِبْ بِقِي لَيَّهْ لُغِّتَهْ أَشَانْ هُو كَدَّابْ وَ كُلَّ الْكَلَامْ الْكِدِبْ، هُو أَبُوهْ.

1 يُوحَنَّا 5:19

وَ نَعَرْفُوا كَدَرْ أَنِحْنَ بَسْ نَاسْ هَنَا اللّٰهْ وَ كُلَّ النَّاسْ هَنَا الدُّنْيَا قَاعِدِينْ فِي إِيدَيْن إِبْلِيسْ الشَّرِيرْ.

1 يُوحَنَّا 4:4

يَا عِيَالِي، إِنْتُو نَاسْ هَنَا اللّٰهْ وَ غَلَبْتُوا الْأَنْبِيَاء الْكَدَّابِينْ دَوْل خَلَاصْ، أَشَانْ هُو الْقَاعِدْ فِيكُو أَكْبَرْ مِنْ الْقَاعِدْ فِي الدُّنْيَا.

يُوحَنَّا 12:31

هَسَّعْ بَسْ الْعِقَابْ يَجِي فِي الدُّنْيَا. وَ هَسَّعْ بَسْ يِنْطَرِدْ إِبْلِيسْ سُلْطَانْ الدُّنْيَا.

رُؤية 12:9

وَ الْغُولْ الْكَبِيرْ رَمَوْه وَ هُو بَسْ الدَّابِي الْقَاعِدْ مِنْ زَمَانْ وَ أُسْمَهْ إِبْلِيسْ وَ الشَّيْطَانْ وَ هُو الْكَدَّابْ الْغَشَّ نَاسْ الدُّنْيَا كُلُّهُمْ. وَ هُو رَمَوْه فِي الْأَرْض وَ مَلَائِكَتَهْ كُلَ رَمَوْهُمْ مَعَايَهْ.

أيُّوب 28:22

وَ الْهَلَاكْ وَ الْمَوْت يُقُولُوا: «أُدْنَيْنَا سِمْعَوْا بَيْهَا.»

أيُّوب 31:12

وَ دِي نَارْ التَّاكُلْ لَحَدِّي الْآخِرَةْ وَ تِدَمِّرْ كُلَّ إِنْتَاجِي.

زَبُور 88:11

فِي الْقَبُرْ يِحَجُّوا بِرَحْمَتَكْ وَلَّا؟ وَ فِي الْهَلَاكْ يِحَجُّوا بِصِدْقَكْ وَلَّا؟

أمْثال 15:11

الْمَوْت وَ الْهَلَاكْ كُلَ مُكْشُوفِينْ لِلّٰهْ. اللّٰهْ مَا يَكْشِفْ قَلِبْ بَنِي آدَم بِزِيَادَةْ وَلَّا؟

لُوقا 8:31

وَ الشَّوَاطِينْ شَحَدَوْا عِيسَى أَشَانْ مَا يِرَسِّلْهُمْ فِي بَكَانْ الْعَذَابْ.

يُوحَنَّا 5:2

وَ فِي بِرْكَةْ وَاحِدَةْ قَاعِدَةْ فِي مَدِينَةْ الْقُدُسْ قَرِيبْ لِبَابْ الْغَنَمْ وَ أُسُمْهَا بِكَلَامْ عِبْرَانِي بَيْت حِسْدَةْ. وَ فِي خَمْسَةْ رَوَاكِيبْ جَنْب الْبِرْكَةْ دِي.

رُؤية 16:16

وَ الشَّوَاطِينْ جَابَوْا الْمُلُوكْ فِي بَكَانْ وَاحِدْ وَ الْبَكَانْ دَا أُسْمَهْ بِكَلَامْ عِبْرَانِي هَرْمَقَدُونْ.