رُؤية 7:1 - الكتاب المقدس بالعربي الدارجي هنا تشاد

¹ وَ بَعَدْ دَا، أَنَا شِفْت أَرْبَعَةْ مَلَائِكَةْ وَاقْفِينْ فِي أَطْرَافْ الْأَرْض. وَ هُمَّنْ قَاعِدِينْ يَدْحَرَوْا الرِّيحْ أَشَانْ مَا تُسُوقْ مِنْ أَيِّ جِيهَةْ مِنْ الْجِيهَاتْ الْأَرْبَعَةْ وَ لَا فِي الْأَرْض وَ لَا فِي الْبَحَرْ وَ لَا فِي الشَّدَرْ.

رُؤية 7:1 Referenca të Kryqëzuara

مَتَّى 24:31

وَ حِسّ الْبُرُنْجِي الْعَظِيمْ يِنْسَمِعْ وَ هُو يِرَسِّلْ مَلَائِكَتَهْ فِي أَيِّ جِيهَةْ أَشَانْ يِلِمُّوا النَّاسْ الْعَزَلَاهُمْ مِنْ أَيِّ بَكَانْ فِي الْأَرْض.

دَنْيال 7:2

وَكِتْ أَنَا نَايِمْ بِاللَّيْل، أَنَا شِفْت فِي الرُّؤْيَةْ دِي رِيحْ بَدَتْ تُسُوقْ مِنْ الْجِيهَاتْ الْأَرْبَعَةْ وَ هَزَّتْ الْبَحَرْ الْكَبِيرْ.

إرْمِيا 49:36

أَنَا نِجِيبْ فِي عِلَامْ عَدُو الْيَجِي مِنْ كُلِّ جِيهَةْ مِثِلْ الرِّيحْ. وَ نِشَتِّتْهُمْ بِالرِّيحْ دِي وَ مَا فِي بَلَدْ الْمَا يَوْصَلَوْا فَوْقهَا النَّاسْ الْعَرَّدَوْا مِنْ عِلَامْ.

مَرْخُوس 13:27

وَ يِرَسِّلْ مَلَائِكَتَهْ فِي أَيِّ جِيهَةْ أَشَانْ يِلِمُّوا النَّاسْ الْعَزَلَاهُمْ مِنْ أَيِّ بَكَانْ فِي الْأَرْض.

دَنْيال 8:8

وَ التَّيْس دَا بِقِي كَبِيرْ مَرَّةْ وَاحِدْ وَ لَاكِنْ وَكِتْ لِقِي قُدْرَةْ بِزِيَادَةْ، قَرْنَهْ الْكَبِيرْ دَا أَنْكَسَرْ وَ فِي قَدَّهْ، قَمَّوْا أَرْبَعَةْ قُرُونْ كُبَارْ مُوَجِّهِينْ عَلَيْ الْجِيهَاتْ الْأَرْبَعَةْ.

حِزْقِيال 37:9

وَ اللّٰهْ قَالْ لَيِّ: «أَتْنَبَّأْ لِنَفَسْ الْحَيَاةْ! أَتْنَبَّأْ، يَا إِبْن آدَمْ، وَ قُولْ لِنَفَسْ الْحَيَاةْ: ‹دَاهُو اللّٰهْ الرَّبّ قَالْ: ”يَا نَفَسْ الْحَيَاةْ، تَعَالْ مِنْ الْجِيهَاتْ الْأَرْبَعَةْ وَ أَدْخُلْ فِي الْمَيْتِينْ دَوْل وَ خَلِّي هُمَّنْ يَحْيَوْا.“›»

حِزْقِيال 7:2

«أَسْمَعْ، يَا إِبْن آدَمْ! دَاهُو اللّٰهْ الرَّبّ حَجَّى لِسُكَّانْ بَلَدْ إِسْرَائِيلْ وَ قَالْ: ‹دِي هِي النِّهَايَةْ! النِّهَايَةْ تَجِي فِي الْأَرْبَعَةْ جِيهَاتْ هَنَا الْبَلَدْ.

إشَعْيا 27:8

وَ لَاكِنْ وَكِتْ اللّٰهْ عَاقَبَاهُمْ، هُو طَرَدَاهُمْ وَ مَرَقَاهُمْ وَ قَشَّاهُمْ بِنَفْخَةْ شَدِيدَةْ فِي يَوْم هَنَا رِيحْ الْجَايَةْ مِنْ صَبَاحْ.

رُؤية 9:14

وَ الْحِسّ حَجَّى لِلْمَلَكْ السَّادِسْ الْعِنْدَهْ بُرُنْجِي فِي إِيدَهْ وَ قَالْ: «حِلّ الْمَلَائِكَةْ الْأَرْبَعَةْ الْمَرْبُوطِينْ فِي الْبَحَرْ الْكَبِيرْ وَ هُو الْفُرَاتْ.»

إشَعْيا 11:12

هُو يَرْفَعْ رَايَةْ لِلْأُمَمْ وَ يِلِمّ بَنِي إِسْرَائِيلْ الْمَطْرُودِينْ وَ يَجْمَعْ بَنِي يَهُوذَا الْمُشَتَّتِينْ فِي الْأَرْبَعَةْ جِيهَاتْ هَنَا الْأَرْض.

رُؤية 7:3

وَ قَالْ: «مَا تِتَلُّفُوا الْأَرْض وَ لَا الْبَحَرْ وَ لَا الشَّدَرْ لَحَدِّي نُخُطُّوا وَسِمْ لِأَيِّ عَبِدْ هَنَا رَبِّنَا اللّٰهْ فِي جَبْهِتَهْ.»

رُؤية 9:4

وَ الْجَرَادْ مَا عِنْدَهْ إِذِنْ أَشَانْ يِتَلِّفْ أَيِّ شَيّءْ أَخْضَرْ فِي الْأَرْض وَ لَا الْقَشّ وَ لَا النَّبَاتَاتْ وَ لَا الشَّدَرْ. وَ لَاكِنْ عِنْدَهْ إِذِنْ أَشَانْ يَهْجِمْ كُلَّ النَّاسْ الْمَا عِنْدُهُمْ وَسِمْ اللّٰهْ فِي جَبْهِتْهُمْ.

زَكَرِيَّا 6:1

وَ بَتَّانْ رَفَعْت رَاسِي وَ شِفْت رُؤْيَةْ. وَ دَاهُو شِفْت أَرْبَعَةْ عَرَبَاتْ هَنَا حَرِبْ مَرَقَوْا مِنْ بَيْن جِبَالْ إِتْنَيْن هَنَا نَحَاسْ.

يُونُس 1:4

وَ وَكِتْ مَاشِينْ فِي الْبَحَرْ دَا، اللّٰهْ رَسَّلْ رِيحْ شَدِيدَةْ وَ شَلَّالْ شَدِيدْ قَمَّ لَحَدِّي يِدَوْر يِكَسِّرْ السَّفِينَةْ.

رُؤية 6:6

وَ سِمِعْت حَرَكَةْ تِشَابِهْ حِسّ وَ الْحِسّ دَا جَايِ مِنْ أُسْط الْأَرْبَعَةْ مَخْلُوقِينْ السَّمَاوِيِّينْ وَ قَالْ: «خَلِّي تَمَنْ الْقَمَحْ الْأَحْمَرْ وَ تَمَنْ الْقَمَحْ الْأَبْيَضْ يِزِيدُوا بِعَشَرَةْ مَرَّاتْ. لَاكِنْ مَا تِزِيدْ تَمَنْ الدِّهِنْ وَ الْخَمَرْ.»

إشَعْيا 27:3

أَنَا اللّٰهْ بَسْ حَارِسْهَا وَ نَزْقِيهَا فِي كُلَّ وَكِتْ. وَ فِي شَانْ مَا يَدْخُلُوا فَوْقهَا، أَنَا قَاعِدْ نَحْرِسْهَا لَيْل وَ نَهَارْ.

دَنْيال 11:4

وَ لَاكِنْ وَكِتْ مَمْلَكَتَهْ أُسُمْهَا طَلَعْ خَلَاصْ، طَوَّالِي هُو يُمُوتْ وَ ذُرِّيّتَهْ مَا يَوْرُثُوا مَمْلَكَتَهْ. وَ هِي يِقَسُّمُوهَا أَرْبَعَةْ مَمَالِكْ لِنَاسْ آخَرِينْ. وَ الْمَمَالِكْ دَوْل مَا يَبْقَوْا قَوِيِّينْ مِثِلْ الْمَمْلَكَةْ الْأَوَّلَانِيَّةْ.

زَكَرِيَّا 6:5

وَ الْمَلَكْ رَدَّ لَيِّ وَ قَالْ: «هُمَّنْ دَوْل يِمَثُّلُوا رِيحْ السَّمَاءْ التُّسُوقْ عَلَيْ الْجِيهَاتْ الْأَرْبَعَةْ، الْمَارْقَةْ مِنْ حَضَرَةْ اللّٰهْ سِيدْ كُلَّ الْأَرْض.

رُؤية 8:7

وَ الْمَلَكْ الْأَوَّلْ ضَرَبْ الْبُرُنْجِي الْعِنْدَهْ. وَ خَلَاصْ، بَرَدْ وَ نَارْ مُخَلْبَطِينْ بِدَمّ دَفَّقَوْا فِي الْأَرْض. وَ تِلْت الْأَرْض حِرِقْ وَ تِلْت الشَّدَرْ حِرِقْ وَ الْقَشّ الْأَخْضَرْ كُلَ حِرِقْ.

رُؤية 20:8

وَ يَمْرُقْ مِنَّهْ أَشَانْ يَمْشِي لَحَدِّي آخِرْ الْأَرْض وَ يُغُشّ كُلَّ الْأُمَمْ وَ هُمَّنْ يَبْقَوْا مِثِلْ جُوجْ وَ مَاجُوجْ. وَ الشَّيْطَانْ يِلِمُّوهُمْ وَ يُخُطُّهُمْ جَاهِزِينْ لِلدُّوَاسْ. وَ عَدَدْهُمْ يَبْقَى كَتِيرْ مِثِلْ رَمْلَةْ هَنَا خَشُمْ الْبَحَرْ.