رُؤية 6:9 - الكتاب المقدس بالعربي الدارجي هنا تشاد

⁹ وَكِتْ الْحَمَلْ فَكَّ الْخِتِمْ الْخَامِسْ، أَنَا شِفْت مَدْبَحْ وَ تِحْتَهْ شِفْت النَّاسْ الْكَتَلَوْهُمْ بِسَبَبْ هُمَّنْ بَلَّغَوْا كَلَامْ اللّٰهْ وَ شَهَدَوْا لَيَّهْ.

رُؤية 6:9 Referenca të Kryqëzuara

رُؤية 20:4

وَ شِفْت كَرَاسِي وَ الْقَاعِدِينْ فَوْقهُمْ الْكَلَّفَوْهُمْ بِالشَّرِيعَةْ. وَ شِفْت النَّاسْ الْقَطَعَوْا رُوسَيْهُمْ أَشَانْ تَابَعَوْا شَهَادَةْ عِيسَى وَ كَلَامْ اللّٰهْ وَ النَّاسْ الْمَا سَجَدَوْا لِلْحَيْوَانْ الْفَسِلْ وَ لَا صَنَمَهْ وَ مَا قِبْلَوْا وَسْمَهْ وَ لَا فِي جَبْهَاتْهُمْ وَ لَا فِي إِيدَيْهُمْ. وَ هُمَّنْ حِيَوْا وَ حَكَمَوْا مَعَ الْمَسِيحْ مُدَّةْ أَلِفْ سَنَةْ.

يُوحَنَّا 16:2

يَطُرْدُوكُو مِنْ بُيُوتْ الصَّلَاةْ. وَ يَجِي وَكِتْ وَاحِدْ أَيِّ نَادُمْ الْيَكْتُلْكُو يِفَكِّرْ هُو قَاعِدْ يَخْدِمْ لِلّٰهْ.

رُؤية 1:9

وَ أَنَا يُوحَنَّا أَخُوكُو الْقَاعِدْ نِتَابِعْ عِيسَى مِثِلْكُو. أَنَا كُلَ مُشَارِكْ مَعَاكُو فِي التَّعَبْ وَ فِي مَمْلَكَةْ اللّٰهْ وَ نَحْمَلْ التَّعَبْ بِصَبُرْ مِثِلْكُو. وَ كَرَبَوْنِي أَشَانْ بَلَّغْت لِلنَّاسْ كَلَامْ اللّٰهْ وَ شَهَادَةْ عِيسَى الْمَسِيحْ. وَ هَسَّعْ أَنَا مَسْجُونْ فِي الْجَزِيرَةْ الْأُسُمْهَا بَطْمُسْ.

رُؤية 2:13

أَنَا نَعَرِفْ الْبَكَانْ الْإِنْتُو سَاكْنِينْ فَوْقَهْ وَ هُو الْبَكَانْ الْإِبْلِيسْ خَطَّ فَوْقَهْ كُرْسِي حَقَّهْ. وَ إِنْتُو مُنْكَرِبِينْ فِي أُسْمِي. وَ إِنْتُو مَا نَكَرْتُوا إِيمَانْكُو بَيِّ وَكِتْ كَتَلَوْا أَنْتِبَاسْ فِي أُسُطْكُو وَ هُو شَهَدْ لَيِّ شَهَادَةْ ثَابْتَةْ فِي الْبَكَانْ الْإِبْلِيسْ سَاكِنْ فَوْقَهْ.

2 تِمُوتَاوُس 1:8

مَا تَخَافْ وَ مَا تَخْجَلْ. بَشِّرْ النَّاسْ بِأُسُمْ الرَّبّ الْأَنَا مَسْجُونْ فِي شَانَهْ. مَا تِدَنْقِرْ رَاسَكْ بِسَبَبْ سِجْنِي أَنَا. شَارِكْنِي فِي التَّعَبْ فِي شَانْ بِشَارَةْ الْمَسِيحْ وَ اللّٰهْ يَنْطِيكْ الْقُدْرَةْ.

رُؤية 16:7

وَ أَنَا سِمِعْت حِسّ جَايِ مِنْ الْمَدْبَحْ وَ قَالْ: «يَا رَبِّنَا اللّٰهْ الْقَادِرْ، حُكْمَكْ فَوْقهُمْ حَقّ وَ عَادِلْ.»

رُؤية 14:18

وَ فِي الْبَكَانْ دَا، مَلَكْ آخَرْ بَتَّانْ مَرَقْ مِنْ الْمَدْبَحْ. وَ الْمَلَكْ دَا، هُو الْمَلَكْ الْمَسْؤُولْ فِي النَّارْ. وَ هُو عَاطْ بِحِسّ شَدِيدْ لِلْمَلَكْ الْعِنْدَهْ الْخَنْجَرْ الطَّرِينْ وَ قَالْ: «مِدّ إِيدَكْ عَلَيْ الْأَرْض وَ أَقْطَعْ الْعِنَبْ بِخَنْجَرَكْ وَ لِمَّهْ أَشَانْ فِي كُلَّ الْأَرْض، الْعِنَبْ نِجِضْ خَلَاصْ.»

رُؤية 1:2

وَ يُوحَنَّا شَهَدْ بِكُلَّ شَيّءْ الشَّافَهْ الْبُخُصّ كَلَامْ اللّٰهْ وَ شَهَادَةْ عِيسَى الْمَسِيحْ. وَ هُو كَتَبَاهُمْ فِي الْكِتَابْ دَا.

فِلِبِّي 1:23

عِنْدِي شَهْوَاتْ إِتْنَيْن الْقَاعِدِينْ يِدَّاوَسَوْا فَوْقِي. نِدَوْر نِفَارِقْ الدُّنْيَا وَ نَقْعُدْ مَعَ الْمَسِيحْ أَشَانْ دَا بَسْ الْأَفْضَلْ.

2 كُرُنْتُس 5:8

أَيْوَى، عَشَمْنَا قَوِي وَ أَخَيْر لَيْنَا نِخَلُّوا الْجِسِمْ الْأَرْضِي دَا أَشَانْ نَسْكُنُوا مَعَ رَبِّنَا.

لاوِيِّين 4:7

وَ رَاجِلْ الدِّينْ يَمْسَحْ بِالدَّمّ دَا قُرُونْ مُخْبَرْ الْبَخُورْ الْمُعَطَّرْ الْقَاعِدْ فِي خَيْمَةْ الْإِجْتِمَاعْ قِدَّامْ اللّٰهْ. وَ هُو يِدَفِّقْ كُلَّ دَمّ التَّوْر الْفَضَّلْ فِي قَعَرْ الْمَدْبَحْ هَنَا الضَّحَايَا الْمُحَرَّقِينْ الْقَاعِدْ بَرَّا فِي مَدَخَلْ خَيْمَةْ الْإِجْتِمَاعْ.

رُؤية 19:10

وَ عَجَلَةْ كَيْ، أَنَا سَجَدْت قِدَّامْ رِجِلَيْنَهْ أَشَانْ نَعَبُدَهْ لِلْمَلَكْ وَ لَاكِنْ هُو قَالْ: «لَا، مَا تَسْجُدْ لَيِّ أَنَا. أَعَبُدْ اللّٰهْ. أَنَا عَبِدْ مِثْلَكْ إِنْتَ وَ مِثِلْ أَخْوَانَكْ الْيِتَابُعُوا شَهَادَةْ عِيسَى. أَشَانْ شَهَادَةْ عِيسَى، هِي الْكَلَامْ الْيِنَزِّلَهْ الرُّوحْ الْقُدُّوسْ فِي الْأَنْبِيَاء.»

رُؤية 8:3

وَ مَلَكْ آخَرْ جَاءْ وَ وَقَفْ قِدَّامْ الْمَدْبَحْ وَ شَايِلْ فِي إِيدَهْ مُخْبَرْ هَنَا دَهَبْ. وَ أَنْطَوْه بَخُورْ كَتِيرْ أَشَانْ يِقَدِّمَهْ لِلّٰهْ مَعَ صَلَاوَاتْ كُلَّ الصَّالِحِينْ وَ قَدَّمَهْ فِي الْمُخْبَرْ الدَّهْبِي الْقَاعِدْ قِدَّامْ الْعَرْش.

2 تِمُوتَاوُس 4:6

وَ لَاكِنْ أَنَا بِقِيتْ مِثِلْ هَدِيَّةْ شَرَابْ وَ قَرِيبْ دَمِّي يِدَفِّقْ. وَ أَنَا مَوْتِي قَرَّبْ خَلَاصْ.

رُؤية 9:13

وَ الْمَلَكْ السَّادِسْ ضَرَبْ الْبُرُنْجِي الْعِنْدَهْ. وَ أَنَا شِفْت الْمَدْبَحْ الدَّهْبِي الْقَاعِدْ قِدَّامْ اللّٰهْ وَ سِمِعْت حِسّ جَايِ مِنْ أُسْط قُرُونَهْ الْأَرْبَعَةْ.

فِلِبِّي 2:17

وَ حَتَّى كَانْ دَمِّي وَاجِبْ يِدَفِّقْ مِثِلْ هَدِيَّةْ شَرَابْ فِي الضَّحِيَّةْ التِّقَدُّمُوهَا لِلّٰهْ فِي شَانْ إِيمَانْكُو وَ خِدْمِتْكُو، خَلَاصْ أَنَا نَفْرَحْ وَ نِنْبَسِطْ مَعَاكُو كُلُّكُو.

تكوين 4:10

وَ اللّٰهْ قَالْ لَيَّهْ: «شُنُو السَّوَّيْتَهْ دَا؟ أَنَا قَاعِدْ نَسْمَعْ حِسّ دَمّ أَخُوكْ الدَّفَّقْتَهْ، قَاعِدْ يَصْرَخْ لَيِّ مِنْ التُّرَابْ.

خُروج 29:12

وَ شِيلْ مِنْ دَمّ التَّوْر بِأُصْبَعَكْ وَ خُطَّهْ فِي قُرُونْ الْمَدْبَحْ. وَ الْبَاقِي مِنْ الدَّمّ كَمَانْ صُبَّهْ فِي قَعَرْ الْمَدْبَحْ.

عِبْرَانِيِّين 12:23

وَ جِيتُوا قِدَّامْ جَمَاعَةْ أَوْلَادْ الْبِكِرْ الْأَسَامَيْهُمْ مُسَجَّلِينْ فِي السَّمَاءْ. وَ جِيتُوا قِدَّامْ اللّٰهْ الْيِحَاسِبْ كُلَّ النَّاسْ. وَ جِيتُوا قِدَّامْ أَرْوَاحْ الصَّالِحِينْ الْاللّٰهْ سَوَّاهُمْ كَامِلِينْ.