رُؤية 3:2 - الكتاب المقدس بالعربي الدارجي هنا تشاد

² يَلَّا أَبْقَى حَضِيرْ وَ ثَبِّتْ الْإِيمَانْ الْفَضَّلْ لَيْك الْيِدَوْر يُمُوتْ. أَشَانْ أَنَا لِقِيتْ خِدِمْتَكْ السَّوَّيْتهَا مَا كَامِلَةْ قِدَّامْ اللّٰهْ رَبِّي.

رُؤية 3:2 Referenca të Kryqëzuara

1 بُطْرُس 5:8

خُطُّوا بَالْكُو وَ أَقْعُدُوا وَاعِيِّينْ أَشَانْ عَدُوكُو إِبْلِيسْ قَاعِدْ يِحَوِّقْ فَوْقكُو مِثِلْ دُودْ الْقَاعِدْ يِكِرّ وَ يِفَتِّشْ نَادُمْ لِيَاكُلَهْ.

رُؤية 16:15

وَ عِيسَى يُقُولْ: «دَاهُو أَنَا نَجِي بِغَفْلَةْ مِثِلْ جَيَّةْ السَّرَّاقْ. وَ مَبْرُوكْ لِلنَّادُمْ الْوَاعِي بِاللَّيْل وَ خَطَّ لُبَاسَهْ جَاهِزْ جَنْبَهْ أَشَانْ مَا يَمْرُقْ عَرْيَانْ وَ الْعَيْب مَا يِسَوِّيهْ.»

1 بُطْرُس 4:7

كُمَالَةْ كُلَّ شَيّءْ قَرِيبْ. أَشَانْ دَا، خُطُّوا بَالْكُو وَ أَقْعُدُوا ثَابْتِينْ دَايْماً أَشَانْ تَقْدَرَوْا تِصَلُّوا فِي أَيِّ وَكِتْ.

إشَعْيا 35:3

قَوُّوا إِيدَيْكُو الْعَيَّانِينْ وَ ثَبُّتُوا رِكَبُّكُو الْيَرْجُفُوا.

2 أخبار 25:2

وَ هُو سَوَّى الْعَدِيلْ قِدَّامْ اللّٰهْ وَ لَاكِنْ مَا بِنِيَّةْ مُخْلِصَةْ.

أعمال الرُسُل 18:23

وَ قَعَدْ هِنَاكْ أَيَّامْ. وَ بَعَدْ دَا، قَمَّ فَاتْ فِي بُلْدَانْ غَلَاطِيَةْ وَ فِرِقِيَّةْ رَايِغْ مِنْ حِلَّةْ لِحِلَّةْ. وَ بُولُسْ قَاعِدْ يِشَجِّعْ كُلَّ التَّلَامِيذ أَشَانْ يَقْعُدُوا ثَابْتِينْ فِي الْإِيمَانْ.

مَتَّى 25:13

وَ عِيسَى قَالْ: «خَلَاصْ، أَقْعُدُوا وَاعِيِّينْ. إِنْتُو مَا تَعَرْفُوا الْيَوْم وَ لَا السَّاعَةْ الْأَنَا نَجِي فَوْقهَا.

تَثْنِية 3:28

أَنْطِي أَمُرْ لِيَشُوعْ وَ خَلِّي يَبْقَى شَدِيدْ وَ فَحَلْ أَشَانْ هُو بَسْ الْيَقْطَعْ بَحَرْ الْأُرْدُنْ فِي رَاسْ الشَّعَبْ دَا وَ هُو بَسْ الْيَنْطِيهُمْ وَرَثَةْ الْبَلَدْ الْإِنْتَ قَاعِدْ تِشِيفْهَا.»

رُؤية 2:4

لَاكِنْ أَنَا لِقِيتْ فَوْقَكْ شَيّءْ وَاحِدْ مَا عَدِيلْ. إِنْتَ خَلَّيْت مِنَّكْ مَحَبِّتَكْ الْقَوِيَّةْ الْأَوَّلْ عِنْدَكْ.

حِزْقِيال 34:16

الْغَنَمَايْ الرَّايْحَةْ، نِفَتِّشْهَا وَ الْمُوَدِّرَةْ، نِجِيبْهَا وَ الرِّجِلْهَا مَكْسُورَةْ، نَرْبُطْهَا وَ الضَّعِيفَةْ، نِقَوِّيهَا. وَ لَاكِنْ التِّسَمِّنْ نَفِسْهَا أَوْ التِّوَصِّفْ قُدْرِتْهَا، نِدَمِّرْهَا. وَ نَسْرَحْ بِغَنَمِي بِعَدَالَةْ.»

مَتَّى 23:5

«وَ كُلَّ شَيّءْ الْيِسَوُّوهْ، هُمَّنْ يِسَوُّوهْ أَشَانْ يِدَوْرُوا النَّاسْ يِشِيفُوهُمْ. يَلْبَسَوْا لُبَاسْ خَاصّ لِلدِّينْ زِيَادَةْ مِنْ النَّاسْ الْآخَرِينْ.

دَنْيال 5:27

‹تَقِلْ› يَعْنِي وَزِنْ. مَعَنَاتَهْ وَزَنَوْك فِي الْمِيزَانْ وَ وَزْنَكْ مَا تَقِيلْ.

إشَعْيا 57:12

إِنْتِ تَحْسِبِي نَفِسْكِ عَدِيلَةْ وَ لَاكِنْ أَنَا نِخَبِّرْ بِكُلَّ أَعْمَالْكِ وَ بَيْدَا، مَا تَلْقَيْ مِنْهُمْ أَيِّ فَايْدَةْ.

إشَعْيا 56:10

مُرَاقِبِينْ بَنِي إِسْرَائِيلْ، كُلُّهُمْ عَمْيَانِينْ وَ مَا يَعَرْفُوا شَيّءْ. هُمَّنْ مِثِلْ كُلابْ بُكُمْ مَا يَقْدَرَوْا يَنْبَحَوْا. يَحْلَمَوْا رَاقْدِينْ وَ يِحِبُّوا النَّوْم.

1 مُلوك 15:3

وَ أَبِيَّا سَوَّى كُلَّ الذُّنُوبْ الْأَوَّلْ أَبُوهْ سَوَّاهُمْ وَ قَلْبَهْ مَا مُخْلِصْ لِلّٰهْ إِلٰـهَهْ مِثِلْ قَلِبْ جِدَّهْ دَاوُدْ.

1 مُلوك 11:4

وَ وَكِتْ سُلَيْمَانْ شَيَّبْ مَرَّةْ وَاحِدْ، الْعَوِينْ دَيْل مَرَقَنَّهْ مِنْ الدَّرِبْ وَ هُو عَبَدْ إِلٰـهَاتْ آخَرِينْ. وَ بِسَبَبْ دَا، هُو مَا عَبَدْ اللّٰهْ إِلٰـهَهْ بِقَلِبْ مُخْلِصْ مِثِلْ أَبُوهْ دَاوُدْ.

زَكَرِيَّا 11:16

دَاهُو أَنَا نُخُطّ رَاعِي فِي الْبَلَدْ دِي. الْغَنَمَايْ الْمُوَدِّرَةْ، هُو مَا لَمَّاهْ بَيْهَا. وَ التِّوَدِّرْ كُلَ، هُو مَا يِفَتِّشْهَا. وَ التِّنْكَسِرْ كُلَ، هُو مَا يِعَالِجْهَا. وَ الْعَافَيْ كُلَ، هُو مَا يِسَرِّحْهَا. وَ لَاكِنْ هُو يَاكُلْ الْغَنَمْ السُّمَانْ وَ يِقَطِّعْ ضَلَافَيْهُمْ.

أيُّوب 16:5

لَاكِنْ بِكَلَامِي أَنَا، نِقَوِّيكُو وَ بِلِسَانِي، نِسَاعِدْكُو!

رُؤية 3:1

«وَ أَكْتِبْ كَلَامِي لِلْمَلَكْ هَنَا جَمَاعَةْ الْمُؤمِنِينْ الْفِي حِلَّةْ سَارْدِسْ. دَاهُو كَلَامِي، أَنَا الْعِنْدِي الْأَرْوَاحْ السَّبْعَةْ هَنَا اللّٰهْ وَ السَّبْعَةْ نُجُومْ. أَنَا نَعَرِفْ خِدِمْتَكْ. يُقُولُوا إِيمَانَكْ حَيّ وَ لَاكِنْ بِالصَّحِيحْ، إِيمَانَكْ مَيِّتْ.

رُؤية 3:3

وَ أَشَانْ دَا، فَكِّرْ فِي الْكَلَامْ الْأَوَّلْ سِمِعْتَهْ وَ عَلَّمَوْك لَيَّهْ. وَ تَابِعْ الْكَلَامْ دَا وَ تُوبْ مِنْ ذُنُوبَكْ. وَ كَنْ إِنْتَ أَبَيْت مَا قَمَّيْت فَوْق، أَنَا نَجِيكْ بِغَفْلَةْ مِثِلْ جَيَّةْ السَّرَّاقْ وَ نَضُرْبَكْ فِي السَّاعَةْ الْإِنْتَ مَا تَعَرِفْهَا.

مَتَّى 25:7

وَ كُلَّ الْبَنَاتْ قَمَّنْ سَوَا وَ قَبَّضَنْ فَوَانِيسْهِنْ.