رُؤية 22:11 - الكتاب المقدس بالعربي الدارجي هنا تشاد

¹¹ النَّادُمْ الْفَسِلْ، خَلِّي يَقْعُدْ ثَابِتْ فِي فَسَالْتَهْ. وَ النَّادُمْ النِّجِسْ، خَلِّي يَقْعُدْ ثَابِتْ فِي نَجَاسْتَهْ. وَ النَّادُمْ الْعَادِلْ، خَلِّي يَقْعُدْ ثَابِتْ فِي عَدَالْتَهْ. وَ النَّادُمْ الصَّالِحْ، خَلِّي يَقْعُدْ ثَابِتْ فِي حَالَهْ الصَّالْحَةْ.»

رُؤية 22:11 Referenca të Kryqëzuara

دَنْيال 12:10

وَ نَاسْ كَتِيرِينْ التَّعَبْ يِطَهِّرْهُمْ وَ يِصَفِّيهُمْ وَ يِنَضِّفْهُمْ. وَ الْعِنْدُهُمْ حِكْمَةْ يَفْهَمَوْا. وَ لَاكِنْ الْعَاصِيِينْ يِسَوُّوا الشَّرّ وَ وَاحِدْ مِنْهُمْ كُلَ مَا يَفْهَمْ.

أمْثال 4:18

طَرِيقْ الصَّالِحِينْ مِثِلْ ضَيّ الصَّبَاحْ وَ نُورَهْ يِزِيدْ لَحَدِّي الْحَرَّايْ تَطْلَعْ.

حِزْقِيال 3:27

وَ لَاكِنْ وَكِتْ نِكَلِّمْ لَيْك، أَنَا نُفُكّ خَشْمَكْ وَ إِنْتَ تِحَجِّي لَيْهُمْ وَ تُقُولْ: ‹دَاهُو كَلَامْ اللّٰهْ الرَّبّ.› الْيِدَوْر يَسْمَعْ، خَلِّي يَسْمَعْ وَ الْمَا يِدَوْر يَسْمَعْ، خَلِّي مَا يَسْمَعْ أَشَانْ هُمَّنْ شَعَبْ عَاصِيِينْ.»

2 تِمُوتَاوُس 3:13

وَ لَاكِنْ النَّاسْ الْفَسْلِينْ وَ الْكَدَّابِينْ، فَسَالِتْهُمْ تِزِيدْ بِزِيَادَةْ وَ يَبْقَوْا غَشَّاشِينْ وَ مَغْشُوشِينْ.

مَتَّى 15:14

خَلُّوهُمْ! هُمَّنْ عَمْيَانِينْ وَ يُقُودُوا عَمْيَانِينْ. كَنْ نَادُمْ عَمْيَانْ يُقُودْ عَمْيَانْ آخَرْ، كُلُّهُمْ يَقَعَوْا فِي نُقْرَةْ.»

مَتَّى 5:6

مَبْرُوكْ لِلنَّاسْ الْعَطْشَانِينْ وَ جِيعَانِينْ لِلْعَدَالَةْ أَشَانْ اللّٰهْ يِشَبِّعْهُمْ.

أيُّوب 17:9

الصَّالِحْ يَثْبِتْ فِي دَرْبَهْ وَ الْإِيدَيْنَهْ نَضِيفْينْ يَلْقَى قُدْرَةْ زِيَادَةْ.

يَهُوذَا 1:24

اللّٰهْ قَادِرْ وَ يَقْدَرْ يَحْفَضْكُو أَشَانْ مَا تَقَعَوْا. هُو بَسْ يِوَدِّيكُو فِي حَضَرَتَهْ الْمَجِيدَةْ بَلَا أَيِّ عَيْب، فَرْحَانِينْ فَرْحَةْ شَدِيدَةْ.

مَتَّى 25:10

«وَ وَكِتْ الْبَنَاتْ الْمَا عِنْدِهِنْ فِكِرْ مَاشَاتْ يَشْرَنْ الدِّهِنْ، الْعَرِيسْ وِصِلْ. وَ خَلَاصْ، الْبَنَاتْ الْجَاهِزَاتْ مَشَنْ وَ أَنْدَسَّنْ مَعَايَهْ فِي بَيْت الْعَازُومَةْ وَ نَادُمْ وَاحِدْ سَدَّ الدَّرِبْ.

أمْثال 14:32

الْعَاصِي يَقَعْ فِي فَسَالْتَهْ وَ لَاكِنْ الصَّالِحْ حَتَّى فِي مَوْتَهْ يَلْقَى مَلْجَأْ.

أفَسُس 5:27

أَشَانْ يِقَدِّمْهَا لِنَفْسَهْ أُمَّةْ مَجِيدَةْ بَلَا نَجَاسَةْ وَ لَا وَسَخْ وَ لَا أَيِّ شَيّءْ الْيِتَلِّفْهَا لَحَدِّي تَبْقَى خَاصَّةْ لَيَّهْ وَ بَلَا أَيِّ عَيْب.

مَتَّى 21:19

وَ شَافْ شَدَرَةْ تِينْ جَنْب الدَّرِبْ. وَ مَشَى لَيْهَا وَ لَاكِنْ مَا لِقِي عِيَالْ فِيهَا إِلَّا الْوَرْشَالْ. وَ عِيسَى قَالْ لِلشَّدَرَةْ دِي: «بَتَّانْ مَا تَلْدَيْ عِيَالْ مَرَّةْ وَاحِدْ.» وَ عَجَلَةْ كَيْ الشَّدَرَةْ يِبْسَتْ.

زَبُور 81:12

وَ خَلَاصْ، أَنَا خَلَّيْتهُمْ بِرُوسَيْهُمْ الْقَوِيِّينْ وَ مَشَوْا حَسَبْ نِيِّتْهُمْ.

يُوحَنَّا 8:21

وَ عِيسَى حَجَّى لَيْهُمْ بَتَّانْ وَ قَالْ: «أَنَا نَمْشِي وَ إِنْتُو تِفَتُّشُونِي وَ لَاكِنْ تُمُوتُوا بِذُنُوبْكُو. الْبَكَانْ النَّمْشِي لَيَّهْ، إِنْتُو مَا تَقْدَرَوْا تَمْشُوا لَيَّهْ.»

رُؤية 16:21

وَ بَرَدْ دَفَّقْ فِي النَّاسْ وَ أَيِّ حَبَّةْ تَقِيلَةْ لَحَدِّي تَوْزِنْ 50 كِيلَوْ وَ النَّاسْ عَيَّرَوْا اللّٰهْ أَشَانْ الْوَبَاءْ بِقِي شَدِيدْ مَرَّةْ وَاحِدْ.

جامِعة 11:3

وَكِتْ السَّحَابْ يِشِيلْ أَلْمِي، الْمَطَرَةْ تُصُبّ فِي الْأَرْض. وَ كَنْ شَدَرَةْ وَقَعَتْ عَلَيْ الْوَطِي أَوْ عَلَيْ الْمُنْشَاقْ، فِي بَكَانْهَا الْوَقَعَتْ فَوْقَهْ دَا بَسْ، هِي تَقْعُدْ.

رُؤية 22:3

وَ أَبَداً مَا فِي أَيِّ لَعَنَةْ بَتَّانْ. وَ الْعَرْش هَنَا اللّٰهْ وَ الْحَمَلْ يَقْعُدْ فِي الْمَدِينَةْ. وَ فِي الْبَكَانْ دَا، عَبِيدَهْ يَعَبُدُوهْ.

كُلُوسِي 1:22

وَ لَاكِنْ هَسَّعْ، اللّٰهْ سَوَّى صُلُحْ مَعَاكُو بِوَاسِطَةْ إِبْنَهْ الْجَاءْ بِجِسِمْ إِنْسَانِي. وَ إِبْنَهْ مَاتْ لِيِسَوِّيكُو نَاسْ خَاصِّينْ وَ يِقَدِّمْكُو لِلّٰهْ بَلَا خَطَا وَ بَلَا عَيْب.

مَتَّى 5:45

وَ كَنْ تِسَوُّوا مِثِلْ دَا، إِنْتُو تَبْقَوْا عِيَالْ أَبُوكُو اللّٰهْ. أَشَانْ هُو يَمْرُقْ الْحَرَّايْ لِلنَّاسْ الْفَسْلِينْ وَ لِلنَّاسْ الصَّالِحِينْ كُلَ. وَ يِخَلِّي الْمَطَرْ يُصُبّ لِلنَّاسْ الْعَدِيلِينْ وَ لِلنَّاسْ الْمَا عَدِيلِينْ كُلَ.