رُؤية 21:2 - الكتاب المقدس بالعربي الدارجي هنا تشاد

² وَ شِفْت الْمَدِينَةْ الْمُقَدَّسَةْ وَ اللّٰهْ قَاعِدْ يِنَزِّلْهَا مِنْ السَّمَاءْ وَ هِي مَدِينَةْ الْقُدُسْ الْجَدِيدَةْ. وَ هِي مِثِلْ عَرُوسْ مُجَمَّلَةْ جَايَةْ لِعَرِيسْهَا.

رُؤية 21:2 Referenca të Kryqëzuara

عِبْرَانِيِّين 11:10

أَشَانْ إِبْرَاهِيمْ قَاعِدْ يَرْجَى بِعَشَمْ الْمَدِينَةْ الْجَايَةْ الْأَسَاسْهَا ثَابِتْ الْاللّٰهْ بَسْ خَطَّتْهَا وَ بَنَاهَا.

رُؤية 3:12

وَ أَيِّ نَادُمْ الْيِنَّصِرْ، أَنَا نَجْعَلَهْ مِثِلْ عَمُودْ فِي بَيْت اللّٰهْ رَبِّي. وَ هُو يَقْعُدْ فِي الْبَيْت دَا وَ أَبَداً مَا يَمْرُقْ مِنَّهْ وَ أَنَا نَكْتِبْ فَوْقَهْ أُسُمْ اللّٰهْ وَ أُسُمْ مَدِينَةْ اللّٰهْ وَ هِي مَدِينَةْ الْقُدُسْ الْجَدِيدَةْ الْاللّٰهْ رَبِّي يِنَزِّلْهَا مِنْ السَّمَاوَاتْ. وَ نَكْتِبْ فَوْقَهْ أُسْمِي الْجَدِيدْ.

رُؤية 21:10

وَ فِي الرُّؤْيَةْ دِي، هُو وَدَّانِي بَعِيدْ وَ خَطَّانِي فِي رَاسْ هَنَا حَجَرْ طَوِيلْ بِلْحَيْن. وَ وَصَّفَانِي الْمَدِينَةْ الْمُقَدَّسَةْ الْاللّٰهْ قَاعِدْ يِنَزِّلْهَا مِنْ السَّمَاءْ وَ هِي مَدِينَةْ الْقُدُسْ.

إشَعْيا 61:10

أَيْوَى، أَنَا نَفْرَحْ زِيَادَةْ بِاللّٰهْ وَ نَفْسِي تَفْرَحْ بِإِلٰـهِي. أَشَانْ هُو لَبَّسَانِي خُلْقَانْ النَّجَاةْ وَ كَسَانِي بِجَلَّابِيَّةْ الْعَدَالَةْ. هُو جَمَّلَانِي بِكَدْمُولْ مِثِلْ عَرِيسْ أَيْوَى، مِثِلْ كَدْمُولْ رَاجِلْ الدِّينْ وَ مِثِلْ الْعَرُوسْ الْمُجَمَّلَةْ بِزِينِتْهَا.

عِبْرَانِيِّين 13:14

أَشَانْ هِنِي فِي الْأَرْض، مَا عِنْدِنَا مَدِينَةْ التِّطَوِّلْ لَاكِنْ أَنِحْنَ قَاعِدِينْ نُخُطُّوا بَالْنَا فِي الْمَدِينَةْ التَّجِي بَعَدَيْن.

عِبْرَانِيِّين 12:22

لَاكِنْ الْحَجَرْ الْإِنْتُو جِيتُوا قِدَّامَهْ، هُو جَبَلْ صَهْيُون الْقَاعِدَةْ فَوْقَهْ مَدِينَةْ اللّٰهْ الْحَيّ. وَ هِي مَدِينَةْ الْقُدُسْ السَّمَاوِيَّةْ. جِيتُوا قِدَّامْ الْمَلَائِكَةْ الْمَا يِنْحَسْبُوا مِنْ الْكَتَرَةْ اللَّامِّينْ لِلْإِحْتِفَالْ.

رُؤية 22:19

وَ أَيِّ نَادُمْ الْيَنْقُصْ كِلْمَةْ مِنْ الْكَلَامْ الْاللّٰهْ نَزَّلَهْ الْقَاعِدْ فِي الْكِتَابْ دَا، اللّٰهْ يَنْقُصْ مِنَّهْ الْبَرَكَةْ الْيِدَوْر يَلْقَاهَا مِنْ شَدَرَةْ الْحَيَاةْ وَ مِنْ الْمَدِينَةْ الْمُقَدَّسَةْ الْيِحَجِّي بَيْهَا الْكِتَابْ دَا.

2 كُرُنْتُس 11:2

أَنَا عِنْدِي مَحَبَّةْ شَدِيدَةْ لَيْكُو وَ مَحَبِّتِي دِي جَايَةْ مِنْ اللّٰهْ. أَنَا مِثِلْ أَبُو الْبِنَيَّةْ اللِّسَّاعْهَا مَا شَافَتْ رَاجِلْ وَ إِنْتُو بَسْ الْبِنَيَّةْ. وَ أَنَا سَوَّيْت مَوْعِدْ أَشَانْ الْبِنَيَّةْ دِي تَاخُدْ رَاجِلْ وَاحِدْ وَ هُو الْمَسِيحْ. وَ نِدَوْر نِقَدِّمْكُو لَيَّهْ مِثِلْ بِنَيَّةْ الْمَا عِنْدَهَا عَيْب.

إشَعْيا 54:5

أَشَانْ الْخَلَقَاكِ، هُو مِثِلْ رَاجِلْكِ وَ أُسْمَهْ اللّٰهْ الْقَادِرْ. وَ الْيَفْدَاكِ، هُو قُدُّوسْ إِسْرَائِيلْ وَ يِنَادُوهْ إِلٰـهْ كُلَّ الْأَرْض.

إشَعْيا 52:1

قُمِّي! قُمِّي فَوْق! وَ أَبْقَيْ قَوِيَّةْ، يَا مَدِينَةْ صَهْيُون! أَلْبَسَيْ خُلْقَانْكِ هَنَا الشَّرَفْ، يَا مَدِينَةْ الْقُدُسْ، الْمَدِينَةْ الْمُقَدَّسَةْ! أَشَانْ بَتَّانْ مَا يَدْخُلْ فَوْقكِ الْمَا مُطَهَّرْ وَ الْمَا طَاهِرْ.

إشَعْيا 62:4

بَتَّانْ مَا يِنَادُوكِ الْخَلَّوْهَا وَ أَرْضِكِ مَا يِسَمُّوهَا الْخَرْبَانَةْ. لَاكِنْ يِنَادُوكِ الْاللّٰهْ رِضِي بَيْكِ وَ أَرْضِكِ يِسَمُّوهَا الْمُتَزَوِّجَةْ. أَشَانْ اللّٰهْ يَفْرَحْ بَيْكِ وَ يَبْقَى لِأَرْضِكِ مِثِلْ زَوْجهَا.

زَبُور 87:3

يَا مَدِينَةْ الرَّبّ! يِحَجُّوا فَوْقكِ أَشْيَاءْ مَجِيدِينْ. وَقْفَةْ.

رُؤية 11:2

لَاكِنْ مَا تِقَاوِسْ الْفَضَايْ الْبَرَّانِيَّةْ هَنَا بَيْت الْعِبَادَةْ. دَا خَلِّيهْ أَشَانْ اللّٰهْ سَلَّمَهْ لِلْأُمَمْ الْمَا مُؤمِنِينْ وَ هُمَّنْ يِفَجُّقُوا الْمَدِينَةْ الْمُقَدَّسَةْ مُدَّةْ 42 شَهَرْ.

رُؤية 1:9

وَ أَنَا يُوحَنَّا أَخُوكُو الْقَاعِدْ نِتَابِعْ عِيسَى مِثِلْكُو. أَنَا كُلَ مُشَارِكْ مَعَاكُو فِي التَّعَبْ وَ فِي مَمْلَكَةْ اللّٰهْ وَ نَحْمَلْ التَّعَبْ بِصَبُرْ مِثِلْكُو. وَ كَرَبَوْنِي أَشَانْ بَلَّغْت لِلنَّاسْ كَلَامْ اللّٰهْ وَ شَهَادَةْ عِيسَى الْمَسِيحْ. وَ هَسَّعْ أَنَا مَسْجُونْ فِي الْجَزِيرَةْ الْأُسُمْهَا بَطْمُسْ.

رُؤية 1:4

وَ دَاهُو أَنَا يُوحَنَّا نَكْتِبْ وَ نِرَسِّلْ الْكَلَامْ دَا لِجَمَاعَاتْ الْمُؤمِنِينْ السَّبْعَةْ الْفِي بَلَدْ آسِيَا. عَلَيْكُمْ السَّلَامْ وَ الرَّحْمَةْ مِنْ اللّٰهْ الْقَاعِدْ فِي الْوَكِتْ الْفَاتْ وَ الْوَكِتْ الْحَاضِرْ وَ الْوَكِتْ الْجَايِ. وَ السَّلَامْ مِنْ الْأَرْوَاحْ السَّبْعَةْ الْقَاعِدِينْ قِدَّامْ عَرْشَهْ

رُؤية 1:1

دِي هِي رُؤْيَةْ هَنَا عِيسَى الْمَسِيحْ الْاللّٰهْ أَنْطَاهَا لَيَّهْ أَشَانْ يِوَصِّفْ لِعَبِيدَهْ الشَّيّءْ اللَّابُدَّ يَبْقَى قَرِيبْ. وَ هُو رَسَّلْ مَلَكَهْ أَشَانْ يِعَرِّفْ الرُّؤْيَةْ دِي لِعَبْدَهْ يُوحَنَّا.

يُوحَنَّا 3:29

النَّادُمْ الْعِنْدَهْ الْعَرُوسْ، هُو بَسْ الْعَرِيسْ. وَ رَفِيقْ الْعَرِيسْ هُو يَقِيفْ جَنْبَهْ وَ يَسْمَعْ كَلَامَهْ. وَ كَنْ يَسْمَعْ حِسّ الْعَرِيسْ، هُو فَرْحَانْ بِفَرْحَةْ كَبِيرَةْ. وَ الْفَرْحَةْ دِي، هِي فَرْحَةْ هِنْتِي وَ هَسَّعْ أَنَا فَرْحَانْ مَرَّةْ وَاحِدْ.

إرْمِيا 31:23

وَ دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: «بَعَدْ نِقَبِّلْهُمْ مِنْ الْغُرْبَةْ وَ نِثَبِّتْهُمْ فِي بَلَدْ يَهُوذَا وَ مُدُنْهَا، هُمَّنْ يِحَجُّوا بِالْكَلَامْ دَا بَتَّانْ وَ يُقُولُوا: ‹خَلِّي اللّٰهْ يِبَارِكَكْ، يَا صَهْيُون الْجَبَلْ الْمُقَدَّسْ، يَا مَسْكَنْ الْعَدَالَةْ!›

إشَعْيا 1:21

كِكَّيْف الْمَدِينَةْ الْأَمِينَةْ بِقَتْ شَرْمُوطَةْ؟ أَوَّلْ هِي مَلَانَةْ بِالْعَدَالَةْ. أَيْوَى، أَوَّلْ الْعَدَالَةْ سَاكْنَةْ فَوْقهَا لَاكِنْ هَسَّعْ سَاكْنِينْ فَوْقهَا كَتَّالِينْ دِمَمْ.

عِبْرَانِيِّين 11:16

لَاكِنْ بِالصَّحِيحْ، هُمَّنْ يِدَوْرُوا وَطَنْ أَخَيْر مِنْ الْمَرَقَوْا مِنَّهْ وَ هُو الْوَطَنْ السَّمَاوِي. أَشَانْ دَا، اللّٰهْ أَكَّدْ كَدَرْ هُو رَبُّهُمْ وَ هُمَّنْ شَعَبَهْ وَ جَهَّزْ لَيْهُمْ مَدِينَةْ.

رُؤية 21:9

وَ مَلَكْ وَاحِدْ جَاءْ لَيِّ وَ هُو وَاحِدْ مِنْ السَّبْعَةْ مَلَائِكَةْ الْأَوَّلْ عِنْدُهُمْ السَّبْعَةْ كِيسَانْ وَ دَفَّقَوْا السَّبْعَةْ وَبَاءْ الْأَخِيرِينْ فِي الْأَرْض. وَ هُو حَجَّى لَيِّ وَ قَالْ: «تَعَالْ، نِوَصِّفَكْ الْعَرُوسْ التَّبْقَى زَوْجَةْ الْحَمَلْ.»

رُؤية 22:17

وَ الرُّوحْ الْقُدُّوسْ وَ الْعَرُوسْ يُرُدُّوا لِلْمَسِيحْ وَ يُقُولُوا «تَعَالْ.» وَ خَلِّي أَيِّ نَادُمْ الْيَسْمَعْ الْكَلَامْ دَا يُقُولْ: «تَعَالْ.» وَ أَيِّ نَادُمْ الْعَطْشَانْ، خَلِّي يَجِي. وَ أَيِّ نَادُمْ الْيِدَوْر يَشْرَبْ أَلْمِي الْحَيَاةْ، خَلِّي يِشِيلَهْ بَلَا تَمَنْ.