رُؤية 20:6 - الكتاب المقدس بالعربي الدارجي هنا تشاد

⁶ مَبْرُوكْ لِأَيِّ نَادُمْ الْيِشَارِكْ فِي الْبُعَاثْ الْأَوَّلَانِي. هُو يَبْقَى خَاصّ لِلّٰهْ. وَ الْمَوْت التَّانِي مَا عِنْدَهْ قُدْرَةْ فِي النَّاسْ دَوْل. هُمَّنْ يَبْقَوْا رُجَالْ دِينْ وَ يَعَبُدُوا اللّٰهْ وَ الْمَسِيحْ وَ يَحْكُمُوا مَعَايَهْ مُدَّةْ أَلِفْ سَنَةْ.

رُؤية 20:6 Referenca të Kryqëzuara

رُؤية 1:6

وَ هُو كَوَّنَانَا مَمْلَكَةْ وَ سَوَّانَا كُلِّنَا رُجَالْ دِينْ أَشَانْ نَعَبُدُوا اللّٰهْ أَبُوهْ. وَ وَاجِبْ لِعِيسَى الْمَسِيحْ الْمَجْد وَ الْمُلُكْ دَايْماً وَ إِلَى الْأَبَدْ. آمِينْ.

رُؤية 2:11

أَيِّ نَادُمْ الْعِنْدَهْ أَدَانْ، خَلِّي يَسْمَعْ الْكَلَامْ الْيُقُولَهْ الرُّوحْ الْقُدُّوسْ لِجَمَاعَاتْ الْمُؤمِنِينْ. وَ أَيِّ نَادُمْ الْيِنَّصِرْ، مَا يَخَافْ مِنْ الْمَوْت التَّانِي.

رُؤية 20:14

وَ خَلَاصْ الْمَوْت وَ الْقَبُرْ، رَمَوْهُمْ فِي بَحَرْ النَّارْ. وَ بَحَرْ النَّارْ، هُو الْمَوْت التَّانِي.

رُؤية 5:10

وَ إِنْتَ كَوَّنْتُهُمْ مَمْلَكَةْ وَ سَوَّيْتهُمْ رُجَالْ دِينْ أَشَانْ يَعَبُدُوا اللّٰهْ وَ يَحْكُمُوا فِي الْأَرْض.»

1 بُطْرُس 2:9

لَاكِنْ كَنْ لَيْكُو إِنْتُو، بِقِيتُوا الْقَبِيلَةْ الْاللّٰهْ عَزَلَاهَا وَ رُجَالْ دِينْ هَنَا الْمَلِكْ الْكَبِيرْ وَ أُمَّةْ مُخَصَّصَةْ لِلّٰهْ وَ شَعَبْ اللّٰهْ ذَاتَهْ. هُو نَادَاكُو أَشَانْ تَمُرْقُوا مِنْ الضَّلَامْ وَ تَدْخُلُوا فِي نُورَهْ الْعَجِيبْ وَ خَلَاصْ تِبَلُّغُوا خَبَرْ هَنَا أَعْمَالْ اللّٰهْ الْكُبَارْ.

2 تِمُوتَاوُس 2:12

وَ كَنْ نَحْمَلَوْا التَّعَبْ فِي شَانَهْ، نَمُلْكُوا مَعَايَهْ. وَ كَنْ نَنْكُرُوهْ، هُو كُلَ يَنْكُرْنَا.

رَوْمَا 8:17

وَ كَنْ أَنِحْنَ عِيَالَهْ، أَنِحْنَ كُلَ مِثِلْ وُرَّاثَهْ. أَنِحْنَ وُرَّاثْ اللّٰهْ، أَيْوَى، وُرَّاثَهْ مَعَ الْمَسِيحْ. أَشَانْ كَنْ نَتْعَبَوْا مَعَ الْمَسِيحْ، نَدْخُلُوا مَعَ الْمَسِيحْ فِي مَجْدَهْ كُلَ.

دَنْيال 12:12

وَ مَبْرُوكْ لِلنَّادُمْ الْيَصْبُرْ لَحَدِّي 1 335 يَوْم.

رُؤية 22:7

«وَ دَاهُو أَنَا عِيسَى جَايِ قَرِيبْ. وَ مَبْرُوكْ لِلنَّادُمْ الْيِتَابِعْ الْكَلَامْ النَّزَلْ فِي الْكِتَابْ دَا.»

رُؤية 14:13

وَ سِمِعْت حِسّ جَايِ مِنْ السَّمَاءْ قَالْ: «أَكْتِبْ: ‹مَبْرُوكْ لِلنَّاسْ الْيُمُوتُوا فِي دَرِبْ الرَّبّ مِنْ الْوَكِتْ دَا وَ قِدَّامْ.›» وَ رُوحْ اللّٰهْ رَدَّ لَيَّهْ وَ قَالْ: «آمِينْ، تَعَبْهُمْ يِكَمِّلْ وَ هُمَّنْ يِنْجَمَّوْا وَ أَجُرْ هَنَا خِدْمِتْهُمْ مَاشِي وَرَاهُمْ.»

رَوْمَا 12:1

يَا أَخْوَانِي، نِوَصِّيكُو بِسَبَبْ رَحْمَةْ اللّٰهْ اللِّقِيتُوهَا، أَيِّ وَاحِدْ مِنْكُو يِقَدِّمْ جِسْمَهْ لِلّٰهْ ضَحِيَّةْ حَيَّةْ وَ مُقَدَّسَةْ الْاللّٰهْ يَرْضَى بَيْهَا. وَ دِي هِي عِبَادِتْكُو الْوَاجْبَةْ.

رُؤية 21:8

لَاكِنْ الْخَوَّافِينْ وَ الْمَا مُؤمِنِينْ وَ الْفَاسْدِينْ وَ كَتَّالِينْ الدِّمَمْ وَ الزَّنَّايِينْ وَ السَّحَّارِينْ وَ عَابِدِينْ الْأَصْنَامْ وَ كُلَّ الْكَدَّابِينْ، بَكَانْهُمْ يَبْقَى بَحَرْ النَّارْ وَ الْكِبْرِيتْ الْأَصْفَرْ. وَ دَا بَسْ الْمَوْت التَّانِي.»

1 بُطْرُس 2:5

وَ إِنْتُو كُلَ مِثِلْ حُجَارْ الْحَيِّينْ الْاللّٰهْ قَاعِدْ يَبْنِي بَيْكُو بَيْت هَنَا رُوحَهْ. وَ إِنْتُو رُجَالْ دِينْ خَاصِّيْن وَ قَاعِدِينْ تِقَدُّمُوا لِلّٰهْ ضَحَايَا بِإِذِنْ الرُّوحْ الْقُدُّوسْ الْاللّٰهْ يَرْضَى بَيْهُمْ بِوَاسِطَةْ عِيسَى الْمَسِيحْ.

لُوقا 14:15

وَ نَادُمْ وَاحِدْ الْقَاعِدْ يَاكُلْ مَعَايَهْ سِمِعْ الْكَلَامْ دَا وَ حَجَّى لِعِيسَى وَ قَالْ: «مَبْرُوكْ لِلنَّاسْ الْيِلْعَشَّوْا فِي عَازُومَةْ هَنَا مَمْلَكَةْ اللّٰهْ!»

إشَعْيا 61:6

وَ كَنْ لَيْكُو إِنْتُو، يِنَادُوكُو رُجَالْ الدِّينْ هَنَا اللّٰهْ وَ خَدَّامِينْ إِلٰـهْنَا. تَاكُلُوا غُنَى الْأُمَمْ وَ تِفَاشُرُوا بِقُدْرِتْهُمْ.

إشَعْيا 4:3

وَ خَلَاصْ، الْفَضَّلَوْا فِي صَهْيُون، الْخَلَّوْهُمْ حَيِّينْ فِي مَدِينَةْ الْقُدُسْ، يِنَادُوهُمْ مُخَصَّصِينْ. أَيْوَى، كُلُّهُمْ اللّٰهْ كَتَبَاهُمْ أَشَانْ يِعِيشُوا فِي مَدِينَةْ الْقُدُسْ.

رُؤية 3:21

وَ أَيِّ نَادُمْ الْيِنَّصِرْ، أَنَا نَنْطِيهْ إِذِنْ أَشَانْ يَقْعُدْ مَعَايِ فِي عَرْشِي. أَيْوَى، هُو يِسَوِّي مِثِلْ أَنَا ذَاتِي أَنَّصَرْت وَ قَعَدْت مَعَ أَبُويِ اللّٰهْ فِي عَرْشَهْ.

رُؤية 22:5

وَ بَتَّانْ الْوَطَاةْ أَبَداً مَا تَبْقَى لَيْل وَ مَا يِدَوْرُوا بَتَّانْ ضَيّ وَ لَا الْحَرَّايْ أَشَانْ رَبُّهُمْ اللّٰهْ يَبْقَى ضَيُّهُمْ وَ عَبِيدْ اللّٰهْ يَحْكُمُوا مَعَايَهْ إِلَى الْأَبَدْ.