رُؤية 20:4 - الكتاب المقدس بالعربي الدارجي هنا تشاد

⁴ وَ شِفْت كَرَاسِي وَ الْقَاعِدِينْ فَوْقهُمْ الْكَلَّفَوْهُمْ بِالشَّرِيعَةْ. وَ شِفْت النَّاسْ الْقَطَعَوْا رُوسَيْهُمْ أَشَانْ تَابَعَوْا شَهَادَةْ عِيسَى وَ كَلَامْ اللّٰهْ وَ النَّاسْ الْمَا سَجَدَوْا لِلْحَيْوَانْ الْفَسِلْ وَ لَا صَنَمَهْ وَ مَا قِبْلَوْا وَسْمَهْ وَ لَا فِي جَبْهَاتْهُمْ وَ لَا فِي إِيدَيْهُمْ. وَ هُمَّنْ حِيَوْا وَ حَكَمَوْا مَعَ الْمَسِيحْ مُدَّةْ أَلِفْ سَنَةْ.

رُؤية 20:4 Referenca të Kryqëzuara

دَنْيال 7:27

وَ الْمُلُكْ وَ السُّلْطَةْ وَ الْعَظَمَةْ هَنَا كُلَّ الْمَمَالِكْ الْقَاعِدِينْ فِي الْأَرْض، يَنْطُوهُمْ لِلشَّعَبْ الصَّالِحِينْ هَنَا اللّٰهْ الْعَالِي. وَ مَمْلَكَةْ اللّٰهْ تَقْعُدْ إِلَى الْأَبَدْ وَ كُلَّ النَّاسْ الْعِنْدُهُمْ سُلْطَةْ يَعَبُدُوا اللّٰهْ وَ يَسْمَعَوْا كَلَامَهْ.»

دَنْيال 7:18

وَ لَاكِنْ الصَّالِحِينْ نَاسْ اللّٰهْ الْعَالِي يَلْقَوْا الْمَمْلَكَةْ وَ يِشِيلُوهَا مَرَّةْ وَاحِدْ إِلَى الْأَبَدْ.»

مَتَّى 19:28

عِيسَى رَدَّ لَيْهُمْ وَ قَالْ: «نُقُولْ لَيْكُو الْحَقّ، وَكِتْ أَنَا إِبْن الْإِنْسَانْ نَقْعُدْ فِي الْكُرْسِي الْعَظِيمْ فِي الزَّمَنْ الْفَوْقَهْ اللّٰهْ يِسَوِّي كُلَّ شَيّءْ جَدِيدْ، إِنْتُو التَّابَعْتُونِي تَقْعُدُوا فِي كَرَاسِي 12 وَ تَحْكُمُوا قَبَايِلْ بَنِي إِسْرَائِيلْ الْأَتْنَا عَشَرْ.

رُؤية 6:9

وَكِتْ الْحَمَلْ فَكَّ الْخِتِمْ الْخَامِسْ، أَنَا شِفْت مَدْبَحْ وَ تِحْتَهْ شِفْت النَّاسْ الْكَتَلَوْهُمْ بِسَبَبْ هُمَّنْ بَلَّغَوْا كَلَامْ اللّٰهْ وَ شَهَدَوْا لَيَّهْ.

رُؤية 3:21

وَ أَيِّ نَادُمْ الْيِنَّصِرْ، أَنَا نَنْطِيهْ إِذِنْ أَشَانْ يَقْعُدْ مَعَايِ فِي عَرْشِي. أَيْوَى، هُو يِسَوِّي مِثِلْ أَنَا ذَاتِي أَنَّصَرْت وَ قَعَدْت مَعَ أَبُويِ اللّٰهْ فِي عَرْشَهْ.

2 تِمُوتَاوُس 2:12

وَ كَنْ نَحْمَلَوْا التَّعَبْ فِي شَانَهْ، نَمُلْكُوا مَعَايَهْ. وَ كَنْ نَنْكُرُوهْ، هُو كُلَ يَنْكُرْنَا.

دَنْيال 7:22

لَاكِنْ الشَّايِبْ كَبِيرْ السِّنّ جَاءْ وَ حَكَمْ وَ سَاعَدْ الصَّالِحِينْ نَاسْ اللّٰهْ الْعَالِي. وَ مِثِلْ دَا خَلَاصْ، وَكْت الصَّالِحِينْ جَاءْ وَ هُمَّنْ شَالَوْا الْمَمْلَكَةْ.

رُؤية 20:6

مَبْرُوكْ لِأَيِّ نَادُمْ الْيِشَارِكْ فِي الْبُعَاثْ الْأَوَّلَانِي. هُو يَبْقَى خَاصّ لِلّٰهْ. وَ الْمَوْت التَّانِي مَا عِنْدَهْ قُدْرَةْ فِي النَّاسْ دَوْل. هُمَّنْ يَبْقَوْا رُجَالْ دِينْ وَ يَعَبُدُوا اللّٰهْ وَ الْمَسِيحْ وَ يَحْكُمُوا مَعَايَهْ مُدَّةْ أَلِفْ سَنَةْ.

دَنْيال 7:9

وَ بَتَّانْ أَنَا شِفْت كَرَاسِي الْخَطَّوْهُمْ لِمَجْلَسْ الْقُضْيَاءْ. وَ شَايِبْ وَاحِدْ كَبِيرْ سِنّ جَاءْ وَ قَعَدْ فِي عَرْشَهْ وَ خَلَقَهْ أَبْيَضْ كَرّ مِثِلْ الْقَمَرْ وَ شَعَرْ رَاسَهْ مِثِلْ قُطُنْ النَّضِيفْ. وَ عَرْشَهْ نَارْ أَمْ لَهِيبْ وَ رِجْلَيْ عَرْشَهْ نَارْ مُقَرْقِرَةْ.

لُوقا 22:30

وَ تَاكُلُوا وَ تَشَرْبَوْا فِي نَفْس الدَّبَلَايْ مَعَايِ فِي مَمْلَكَتِي وَ تَقْعُدُوا فِي كَرَاسِي وَ تَحْكُمُوا قَبَايِلْ بَنِي إِسْرَائِيلْ الْأَتْنَا عَشَرْ.»

رُؤية 22:5

وَ بَتَّانْ الْوَطَاةْ أَبَداً مَا تَبْقَى لَيْل وَ مَا يِدَوْرُوا بَتَّانْ ضَيّ وَ لَا الْحَرَّايْ أَشَانْ رَبُّهُمْ اللّٰهْ يَبْقَى ضَيُّهُمْ وَ عَبِيدْ اللّٰهْ يَحْكُمُوا مَعَايَهْ إِلَى الْأَبَدْ.

رُؤية 12:11

وَ هُمَّنْ أَنَّصَرَوْا فَوْقَهْ بِقُدْرَةْ دَمّ الْحَمَلْ وَ بِشَهَادِتْهُمْ لَيَّهْ. وَ هُمَّنْ حَبَّوْا رَبُّهُمْ زِيَادَةْ مِنْ نُفُوسْهُمْ لَحَدِّي أَبَوْا مَا يَجْرُوا مِنْ الْمَوْت.

رُؤية 1:9

وَ أَنَا يُوحَنَّا أَخُوكُو الْقَاعِدْ نِتَابِعْ عِيسَى مِثِلْكُو. أَنَا كُلَ مُشَارِكْ مَعَاكُو فِي التَّعَبْ وَ فِي مَمْلَكَةْ اللّٰهْ وَ نَحْمَلْ التَّعَبْ بِصَبُرْ مِثِلْكُو. وَ كَرَبَوْنِي أَشَانْ بَلَّغْت لِلنَّاسْ كَلَامْ اللّٰهْ وَ شَهَادَةْ عِيسَى الْمَسِيحْ. وَ هَسَّعْ أَنَا مَسْجُونْ فِي الْجَزِيرَةْ الْأُسُمْهَا بَطْمُسْ.

رَوْمَا 8:17

وَ كَنْ أَنِحْنَ عِيَالَهْ، أَنِحْنَ كُلَ مِثِلْ وُرَّاثَهْ. أَنِحْنَ وُرَّاثْ اللّٰهْ، أَيْوَى، وُرَّاثَهْ مَعَ الْمَسِيحْ. أَشَانْ كَنْ نَتْعَبَوْا مَعَ الْمَسِيحْ، نَدْخُلُوا مَعَ الْمَسِيحْ فِي مَجْدَهْ كُلَ.

رُؤية 15:2

وَ شِفْت بَكَانْ يِشَابِهْ مِثِلْ بَحَرْ هَنَا أَلْمِي صَافِي الْبِرَارِي وَ هُو جَامِدْ وَ عِنْدَهْ نَارْ فِي لُبَّهْ. وَ النَّاسْ الْأَنَّصَرَوْا فِي الْحَيْوَانْ الْفَسِلْ وَ فِي صَنَمَهْ وَ فِي نِمْرَةْ أُسْمَهْ، هُمَّنْ وَاقْفِينْ جَنْب الْبَحَرْ. وَ أَيِّ وَاحِدْ عِنْدَهْ جِقِنْدِيَّةْ الْاللّٰهْ أَنْطَاهَا لَيَّهْ.

رُؤية 14:11

وَ الدُّخَّانْ الْيَطْلَعْ مِنْ النَّارْ التِّعَذِّبْهُمْ دِي، هُو يَطْلَعْ دَايْماً وَ إِلَى الْأَبَدْ. وَ النَّاسْ الْيَسْجُدُوا لِلْحَيْوَانْ الْفَسِلْ وَ لِصَنَمَهْ وَ يَقْبَلَوْا وَسِمْ أُسْمَهْ مَا عِنْدُهُمْ جُمَّةْ وَ لَا لَيْل وَ لَا نَهَارْ.»

رُؤية 11:7

وَ وَكِتْ يِكَمُّلُوا شَهَادِتْهُمْ خَلَاصْ، الْحَيْوَانْ الْقَاعِدْ فِي الْهَاوِيَةْ يَطْلَعْ وَ يِحَارِبْهُمْ وَ يِنَّصِرْ فَوْقهُمْ وَ يَكْتُلْهُمْ.

يُوحَنَّا 14:19

بَعَدْ وَكِتْ شِيَّةْ بَسْ، نَاسْ الدُّنْيَا مَا يِشِيفُونِي بَتَّانْ. لَاكِنْ إِنْتُو تِشِيفُونِي. أَنَا نَحْيَى وَ أَشَانْ دَا، إِنْتُو كُلَ تَحْيَوْا.

دَنْيال 2:44

«وَ فِي وَكِتْ الْمُلُوكْ دَوْل، اللّٰهْ رَبّ السَّمَاوَاتْ يِأَسِّسْ مَمْلَكَةْ الْأَبَداً مَا تِدَّمَّرْ وَ مَا فِي شَعَبْ آخَرْ يِسْتَعْمَرْهَا. وَ هِي تِدَمِّرْ وَ تَرْحَكْ كُلَّ الْمَمَالِكْ دَوْل وَ تَقْعُدْ إِلَى الْأَبَدْ.

رُؤية 17:8

الْحَيْوَانْ الشِّفْتَهْ دَا، هُو أَوَّلْ قَاعِدْ وَ هَسَّعْ مَا فِيهْ وَ يَطْلَعْ مِنْ الْهَاوِيَةْ وَ لَاكِنْ بَعَدْ دَا، يَمْشِي فِي الْهَلَاكْ. وَ سُكَّانْ الْأَرْض الْأَسَامَيْهُمْ مَا مَكْتُوبِينْ مِنْ بِدَايَةْ الدُّنْيَا فِي كِتَابْ الْحَيَاةْ، هُمَّنْ يِشِيفُوا الْحَيْوَانْ الْفَسِلْ دَا وَ يِعَجُّبُوا مِنَّهْ بِلْحَيْن أَشَانْ فِي الْوَكِتْ الْفَاتْ، هُو قَاعِدْ وَ فِي الْوَكِتْ الْحَاضِرْ، هُو مَا فِيهْ وَ فِي الْوَكِتْ الْجَايِ، يِقَبِّلْ.

رُؤية 11:15

وَ أَنَا شِفْت الْمَلَكْ السَّابِعْ ضَرَبْ الْبُرُنْجِي الْعِنْدَهْ. وَ فِي السَّمَاوَاتْ، أَصْوَاتْ شُدَادْ أَنْسَمَعَوْا وَ قَالَوْا: «خَلَاصْ، مَمْلَكَةْ الدُّنْيَا بِقَتْ مَمْلَكَةْ هَنَا رَبِّنَا اللّٰهْ وَ هَنَا الْمَسِيحْ الْاللّٰهْ عَزَلَهْ. وَ هُو يَمْلُكْهَا دَايْماً وَ إِلَى الْأَبَدْ.»

رُؤية 11:11

وَ بَعَدْ تَلَاتَةْ يَوْم وَ نُصّ، اللّٰهْ رَسَّلْ رُوحْ الْحَيَاةْ فِي جَنَازَاتْهُمْ وَ هُمَّنْ قَمَّوْا وَ وَقَفَوْا فَوْق. وَ خَوْف شَدِيدْ دَخَلْ لِكُلَّ النَّاسْ الشَّافَوْهُمْ.

رُؤية 11:3

وَ فِي الْمُدَّةْ دِي، نَنْطِي قُدْرَةْ لِشُهُودِي الْإِتْنَيْن أَشَانْ يِتْنَبَّأَوْا لَيْهُمْ فِي مُدَّةْ هَنَا 1 260 يَوْم. وَ لَابْسِينْ خُلْقَانْ هَنَا حِزِنْ.»

رَوْمَا 11:15

وَكِتْ اللّٰهْ أَبَى الْيَهُودْ، نَاسْ الدُّنْيَا لِقَوْا سَلَامْ مَعَ اللّٰهْ. وَ كَنْ بِقِي مِثِلْ دَا، يَبْقَى كِكَّيْف وَكِتْ اللّٰهْ يَقْبَلْ الْيَهُودْ بَتَّانْ؟ دَا يِجِيبْ بُعَاثْ الْمَيْتِينْ.

لُوقا 1:17

وَ يَجِي قِدَّامْ اللّٰهْ بِقُدْرَةْ الرُّوحْ الْقُدُّوسْ سَوَا سَوَا مِثِلْ النَّبِي إِلِيَاسْ. وَ دَا لِيِجِيبْ السَّلَامْ بَيْن الْأَبَّهَاتْ وَ عِيَالْهُمْ وَ أَشَانْ الْعَاصِيِينْ يُتُوبُوا وَ يِتَابُعُوا فِكِرْ الصَّالِحِينْ. وَ لِيِجَهِّزْ الشَّعَبْ لِلّٰهْ.»

مَلاخِـي 4:5

«دَاهُو أَنَا نِرَسِّلْ لَيْكُو النَّبِي إِلِيَاسْ وَ دَا قُبَّالْ يَوْم اللّٰهْ مَا يَجِي وَ الْيَوْم دَا عَظِيمْ وَ مُخِيفْ.

مَرْخُوس 9:11

وَ سَأَلَوْا عِيسَى وَ قَالَوْا: «مَالَا الْعُلَمَاءْ قَاعِدِينْ يُقُولُوا أَكِيدْ إِلِيَاسْ يَجِي قُبَّالَكْ؟»

مَرْخُوس 6:27

وَ طَوَّالِي الْمَلِكْ رَسَّلْ عَسْكَرِي وَ أَنْطَى إِذِنْ أَشَانْ يِجِيبْ لَيَّهْ رَاسْ يَحْيَى. وَ الْعَسْكَرِي مَشَى وَ قَطَعْ رَاسْ يَحْيَى فِي لُبّ السِّجِنْ.

مَرْخُوس 6:16

وَ وَكِتْ هِرُودُسْ ذَاتَهْ سِمِعْ خَبَرَهْ، قَالْ: «دَا يَحْيَى الْمُغَطِّسْ. أَنَا قَطَعْت رَاسَهْ لَاكِنْ هُو بَعَثْ مِنْ أُسْط الْمَيْتِينْ.»

مَتَّى 24:10

وَ مُؤمِنِينْ كَتِيرِينْ يِخَلُّوا الْإِيمَانْ وَ يَكْرَهَوْا أَخْوَانْهُمْ وَ يُخُونُوهُمْ.

لُوقا 14:14

وَ اللّٰهْ يِبَارِكَكْ أَشَانْ هُمَّنْ مَا يَقْدَرَوْا يِقَبُّلُوا لَيْك شَيّءْ. وَ اللّٰهْ يِآجِرَكْ وَكِتْ بُعَاثْ الصَّالِحِينْ.»

رُؤية 1:2

وَ يُوحَنَّا شَهَدْ بِكُلَّ شَيّءْ الشَّافَهْ الْبُخُصّ كَلَامْ اللّٰهْ وَ شَهَادَةْ عِيسَى الْمَسِيحْ. وَ هُو كَتَبَاهُمْ فِي الْكِتَابْ دَا.

رُؤية 2:26

وَ أَيِّ نَادُمْ الْيِنَّصِرْ وَ يِتَابِعْ حَسَبْ الْأَنَا نِدَوْرَهْ لَحَدِّي الْيَوْم الْأَخِيرْ، أَنَا نُخُطَّهْ يَحْكِمْ فِي الْأُمَمْ.

رُؤية 4:4

وَ أَنَا شِفْت 24 كَرَاسِي مُحَوِّقِينْ الْعَرْش دَا وَ 24 شُيُوخْ قَاعِدِينْ فَوْقهُمْ. وَ أَيِّ وَاحِدْ لَابِسْ خَلَقْ أَبْيَضْ وَ عِنْدَهْ تَاجْ هَنَا دَهَبْ فِي رَاسَهْ.

رُؤية 7:3

وَ قَالْ: «مَا تِتَلُّفُوا الْأَرْض وَ لَا الْبَحَرْ وَ لَا الشَّدَرْ لَحَدِّي نُخُطُّوا وَسِمْ لِأَيِّ عَبِدْ هَنَا رَبِّنَا اللّٰهْ فِي جَبْهِتَهْ.»