رُؤية 2:5 - الكتاب المقدس بالعربي الدارجي هنا تشاد

⁵ هَسَّعْ فَكِّرْ فِي الْكَلَامْ دَا وَ أَعَرِفْ كَدَرْ أَكِيدْ إِنْتَ مَرَقْت بَعِيدْ مِنْ الدَّرِبْ. وَ خَلَاصْ، تُوبْ مِنْ ذُنُوبَكْ وَ خَلِّي حَالَكْ تَبْقَى مِثِلْ أَوَّلْ. وَ كَنْ مَا تُتُوبْ، أَنَا نَجِيكْ وَ نَرْفَعْ فَانُوسَكْ مِنْ بَكَانَهْ.

رُؤية 2:5 Referenca të Kryqëzuara

رُؤية 3:19

أَنَا نَهْرِجْ النَّاسْ النِّحِبُّهُمْ وَ نِأَدِّبْهُمْ. أَشَانْ دَا، أنْكَرِبْ فِي كَلَامِي وَ تُوبْ مِنْ ذُنُوبَكْ.

رُؤية 2:16

وَ أَشَانْ دَا، نُقُولْ لَيْك تُوبْ مِنْ ذُنُوبَكْ. وَ كَنْ مَا تُبْت، أَنَا نَجِي لَيْك قَرِيبْ وَ نِدَاوِسْ النَّاسْ دَوْل بِالْسَّيْف الْمَارِقْ مِنْ خَشْمِي.

هُوشَع 14:1

قَبُّلُوا لِلّٰهْ إِلٰـهْكُو، يَا بَنِي إِسْرَائِيلْ، أَشَانْ خَطَاكُو بَسْ رَمَاكُو!

رُؤية 2:19

أَنَا نَعَرِفْ خِدِمْتَكْ. نَعَرِفْ مَحَبِّتَكْ وَ إِيمَانَكْ وَ صَبْرَكْ فِي التَّعَبْ. وَ نَعَرِفْ كَدَرْ خِدِمْتَكْ الْهَسَّعْ أَخَيْر مِنْ الْأَوَّلْ.

رُؤية 1:20

نِفَسِّرْ لَيْك السِّرّ هَنَا السَّبْعَةْ نُجُومْ الشِّفْتُهُمْ فِي إِيدِي الزَّيْنَةْ وَ السَّبْعَةْ فَانُوسْ هَنَا دَهَبْ. السَّبْعَةْ نُجُومْ دَوْل هُمَّنْ يِمَثُّلُوا الْمَلَائِكَةْ الْيَحْفَضَوْا جَمَاعَاتْ الْمُؤمِنِينْ السَّبْعَةْ. وَ السَّبْعَةْ فَانُوسْ، هُمَّنْ السَّبْعَةْ جَمَاعَاتْ ذَاتْهُمْ.»

حِزْقِيال 20:43

وَ هِنَاكْ، تِذَّكَّرَوْا دُرُوبْكُو وَ كُلَّ عَمَلْكُو النَّجَّسْتُوا بَيْهُمْ نُفُوسْكُو. وَ الْعَيْب يَكْرُبْكُو بِسَبَبْ كُلَّ الْفَسَالَةْ السَّوَّيْتُوهَا.

لُوقا 1:17

وَ يَجِي قِدَّامْ اللّٰهْ بِقُدْرَةْ الرُّوحْ الْقُدُّوسْ سَوَا سَوَا مِثِلْ النَّبِي إِلِيَاسْ. وَ دَا لِيِجِيبْ السَّلَامْ بَيْن الْأَبَّهَاتْ وَ عِيَالْهُمْ وَ أَشَانْ الْعَاصِيِينْ يُتُوبُوا وَ يِتَابُعُوا فِكِرْ الصَّالِحِينْ. وَ لِيِجَهِّزْ الشَّعَبْ لِلّٰهْ.»

مَلاخِـي 4:6

وَ هُو يِجِيبْ السَّلَامْ بَيْن الْأَبَّهَاتْ وَ عِيَالْهُمْ وَ بَيْن الْعِيَالْ وَ أَبَّهَاتْهُمْ. وَ مِثِلْ دَا، مَا نَجِي نِدَمِّرْ الْبَلَدْ.»

إشَعْيا 1:26

نِجِيبْ لَيْكِ قُضْيَاءْ مِثِلْ أَوَّلْ وَ مُسْتَشَارِينْ مِثِلْ فِي الْبِدَايَةْ. وَ بَعَدْ دَا، يِنَادُوكِ مَدِينَةْ الْعَدَالَةْ وَ حِلَّةْ الْأَمَانْ.

لُوقا 20:16

أَكِيدْ، هُو يَجِي وَ يِكَتِّلْهُمْ لِلْحَرَّاتِينْ دَوْل وَ خَلَاصْ يَنْطِي الْجِنَيْنَةْ لِنَاسْ آخَرِينْ.» وَ وَكِتْ النَّاسْ سِمْعَوْا الْكَلَامْ دَا قَالَوْا: «خَلِّي اللّٰهْ يَدْحَرَهْ!»

مَرْخُوس 12:9

وَ عِيسَى قَالْ: «وَ هَسَّعْ دَا، نَسْأَلْكُو. سِيدْ الْجِنَيْنَةْ يِسَوِّي فَوْقهُمْ شُنُو؟ أَكِيدْ هُو يَجِي فِي الْجِنَيْنَةْ وَ يَكْتُلْ الْحَرَّاتِينْ دَوْل وَ خَلَاصْ يَنْطِي الْجِنَيْنَةْ لِنَاسْ آخَرِينْ.

حِزْقِيال 36:31

وَ إِنْتُو تِذَّكَّرَوْا دُرُوبْكُو الْفَسْلِينْ وَ أَعْمَالْكُو الْمَا عَدِيلِينْ وَ الْعَيْب يَكْرُبْكُو بِسَبَبْ خَطَاكُو وَ مُحَرَّمَاتْكُو.

رُؤية 2:2

أَنَا نَعَرِفْ كُلَّ شَيّءْ الْإِنْتَ سَوَّيْتَهْ وَ جُهْدَكْ فِي الْخِدْمَةْ وَ ثَبَاتَكْ فَوْقهَا. وَ إِنْتَ مَا قَصَّدْت بِالنَّاسْ الْيِسَوُّوا الشَّرّ. وَ إِنْتَ جَرَّبْت النَّاسْ الْيَكْدُبُوا وَ يُقُولُوا هُمَّنْ رُسُلْ الْمَسِيحْ وَ إِنْتَ أَكَّدْت كَدَرْ هُمَّنْ كَدَّابِينْ.

غَلاطِية 5:4

إِنْتُو التِّدَوْرُوا تَبْقَوْا صَالِحِينْ بِطَبِّقِينْ شُرُوطْ التَّوْرَاةْ دَوْل، أَنْفَرَقْتُوا مَرَّةْ وَاحِدْ مِنْ الْمَسِيحْ وَ خَلَّيْتُوا مِنْكُو نِعْمَةْ اللّٰهْ.

مَلاخِـي 3:4

وَ خَلَاصْ، اللّٰهْ يَرْضَى بِضَحَايَا هَنَا نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ مِثِلْ فِي الْأَيَّامْ الْفَاتَوْا وَ السِّنِينْ الزَّمَانْ.

إشَعْيا 14:12

«كِكَّيْف إِنْتَ وَقَعْت مِنْ السَّمَاوَاتْ، يَا ضَيّ الصَّبَاحْ الْيِرَارِي؟ كِكَّيْف رَمَوْك فِي الْأَرْض، يَا مُفَشِّلْ الْأُمَمْ؟

يَهُوذَا 1:24

اللّٰهْ قَادِرْ وَ يَقْدَرْ يَحْفَضْكُو أَشَانْ مَا تَقَعَوْا. هُو بَسْ يِوَدِّيكُو فِي حَضَرَتَهْ الْمَجِيدَةْ بَلَا أَيِّ عَيْب، فَرْحَانِينْ فَرْحَةْ شَدِيدَةْ.

عِبْرَانِيِّين 10:32

فَكُّرُوا فِي الْوَكِتْ الْفَاتْ وَكِتْ أَوَّلْ مَرَّةْ دَخَلْتُوا فِي نُورْ اللّٰهْ. فِي الْوَكِتْ دَاكْ، إِنْتُو جَاهَدْتُوا وَ صَبَرْتُوا صَبُرْ قَوِي فِي الضِّيقَةْ.

هُوشَع 9:10

«زَمَانْ، أَنَا لِقِيتْ بَنِي إِسْرَائِيلْ مِثِلْ عِنَبْ لَذِيذْ فِي الصَّحَرَاءْ. وَ شِفْت جُدُودْهُمْ حَلُوِينْ مِثِلْ فَوَاكِهْ الْأَوَّلْ فِي شَدَرَةْ التِّينْ. وَ لَاكِنْ وَكِتْ هُمَّنْ وِصْلَوْا فِي بَعَلْ فَعُورْ، عَبَدَوْا الصَّنَمْ الْيِجِيبْ الْعَيْب. وَ بِقَوْا مَكْرُوهِينْ مِثِلْ الصَّنَمْ الْمُحَرَّمْ الْعَبَدَوْه.

رُؤية 16:9

وَ حَرَارَةْ الْحَرَّايْ الشَّدِيدَةْ طَقَّتْ النَّاسْ وَ بَيْدَا، هُمَّنْ قَالَوْا كَلَامْ فَسِلْ فِي أُسُمْ اللّٰهْ أَشَانْ عِرْفَوْا اللّٰهْ عِنْدَهْ قُدْرَةْ فِي أَيِّ وَبَاءْ. وَ مَا تَابَوْا مِنْ ذُنُوبْهُمْ وَ مَا مَجَّدَوْه.

مَتَّى 5:14

وَ إِنْتُو نُورْ لِنَاسْ الدُّنْيَا. كَنْ حِلَّةْ كَبِيرَةْ قَاعِدَةْ فِي رَاسْ حَجَرْ، مَا مُمْكِنْ يِلَبُّدُوهَا.

مَتَّى 5:15

وَ النَّاسْ مَا يِأَوْقُدُوا فَانُوسْ وَ يِدِسُّوهْ فِي تِحِتْ دَوْزَمْ لَاكِنْ يُخُطُّوهْ فِي بَكَانْ فَوْق أَشَانْ يِضَوِّي لِكُلَّ النَّاسْ الْفِي الْبَيْت.

فِلِبِّي 2:15

أَشَانْ تَبْقَوْا نَاسْ بَلَا خَطَا وَ بَرِيِّينْ وَ تِعِيشُوا مِثِلْ عِيَالْ اللّٰهْ بَلَا عَيْب فِي أُسُطْ النَّاسْ الْفَسْلِينْ وَ عُوُجْ هَنَا الدُّنْيَا دِي. وَ تَبْقَوْا فِي أُسُطْهُمْ نُورْ مِثِلْ النُّجُومْ فِي الْعَالَمْ الْأَضْلَمْ

2 بُطْرُس 3:17

وَ لَيْكُو إِنْتُو يَا أَخْوَانِي النِّحِبُّكُو، تَعَرْفُوا الْكَلَامْ دَا مِنْ أَوَّلْ. وَ أَشَانْ دَا، أَوْعُوا بَالْكُو وَ مَا تِخَلُّوا كِدِبْ الْعَاصِيِينْ يِوَدِّيكُو فِي دَرِبْهُمْ وَ يِتَلِّفْ إِيمَانْكُو الثَّابِتْ.