رُؤية 19:7 - الكتاب المقدس بالعربي الدارجي هنا تشاد

⁷ خَلِّي نَفْرَحَوْا وَ نِعَيُّدُوا وَ نِمَجُّدُوا اللّٰهْ أَشَانْ يَوْم هَنَا عِرِسْ الْحَمَلْ تَمَّ وَ الْعَرُوسْ جَهَّزَتْ نَفِسْهَا.

رُؤية 19:7 Referenca të Kryqëzuara

رُؤية 21:9

وَ مَلَكْ وَاحِدْ جَاءْ لَيِّ وَ هُو وَاحِدْ مِنْ السَّبْعَةْ مَلَائِكَةْ الْأَوَّلْ عِنْدُهُمْ السَّبْعَةْ كِيسَانْ وَ دَفَّقَوْا السَّبْعَةْ وَبَاءْ الْأَخِيرِينْ فِي الْأَرْض. وَ هُو حَجَّى لَيِّ وَ قَالْ: «تَعَالْ، نِوَصِّفَكْ الْعَرُوسْ التَّبْقَى زَوْجَةْ الْحَمَلْ.»

رُؤية 21:2

وَ شِفْت الْمَدِينَةْ الْمُقَدَّسَةْ وَ اللّٰهْ قَاعِدْ يِنَزِّلْهَا مِنْ السَّمَاءْ وَ هِي مَدِينَةْ الْقُدُسْ الْجَدِيدَةْ. وَ هِي مِثِلْ عَرُوسْ مُجَمَّلَةْ جَايَةْ لِعَرِيسْهَا.

2 كُرُنْتُس 11:2

أَنَا عِنْدِي مَحَبَّةْ شَدِيدَةْ لَيْكُو وَ مَحَبِّتِي دِي جَايَةْ مِنْ اللّٰهْ. أَنَا مِثِلْ أَبُو الْبِنَيَّةْ اللِّسَّاعْهَا مَا شَافَتْ رَاجِلْ وَ إِنْتُو بَسْ الْبِنَيَّةْ. وَ أَنَا سَوَّيْت مَوْعِدْ أَشَانْ الْبِنَيَّةْ دِي تَاخُدْ رَاجِلْ وَاحِدْ وَ هُو الْمَسِيحْ. وَ نِدَوْر نِقَدِّمْكُو لَيَّهْ مِثِلْ بِنَيَّةْ الْمَا عِنْدَهَا عَيْب.

مَتَّى 22:2

«مَمْلَكَةْ اللّٰهْ هِي مِثِلْ مَلِكْ وَاحِدْ السَّوَّى عَازُومَةْ فِي عِرِسْ وِلَيْدَهْ.

رُؤية 19:9

وَ الْمَلَكْ حَجَّى لَيِّ وَ قَالْ: «أَكْتِبْ: ‹عِرِسْ هَنَا الْحَمَلْ جَاءْ وَ مَبْرُوكْ لِكُلَّ الْمَعْزُومِينْ.›» وَ بَتَّانْ، حَجَّى لَيِّ وَ قَالْ: «صَحِيحْ، دَا كَلَامْ اللّٰهْ.»

أفَسُس 5:32

الْكَلَامْ دَا سِرّ عَظِيمْ. أَنَا نُقُولْ لَيْكُو الْكَلَامْ دَا بُخُصّ الْمَسِيحْ وَ أُمَّتَه.

يُوحَنَّا 3:29

النَّادُمْ الْعِنْدَهْ الْعَرُوسْ، هُو بَسْ الْعَرِيسْ. وَ رَفِيقْ الْعَرِيسْ هُو يَقِيفْ جَنْبَهْ وَ يَسْمَعْ كَلَامَهْ. وَ كَنْ يَسْمَعْ حِسّ الْعَرِيسْ، هُو فَرْحَانْ بِفَرْحَةْ كَبِيرَةْ. وَ الْفَرْحَةْ دِي، هِي فَرْحَةْ هِنْتِي وَ هَسَّعْ أَنَا فَرْحَانْ مَرَّةْ وَاحِدْ.

إشَعْيا 62:5

مِثِلْ صَبِي يَاخُدْ بِنَيَّةْ عُدْرِيَّةْ، أَوْلَادْكِ يَكُرْبُوكِ. وَ مِثِلْ الْعَرُوسْ تَبْقَى فَرَحْ لِرَاجِلْهَا، إِنْتِ كُلَ تَبْقَيْ فَرَحْ لِإِلٰـهْكِ.

أفَسُس 5:23

أَشَانْ الرَّاجِلْ هُو رَئِيسْ مَرْتَهْ مِثِلْ الْمَسِيحْ هُو رَئِيسْ أُمَّتَه. وَ أُمَّتَه هِي جِسْمَهْ وَ هُو ذَاتَهْ مُنَجِّي جِسْمَهْ.

إشَعْيا 66:10

«أَفْرَحَوْا مَعَ مَدِينَةْ الْقُدُسْ وَ أَنْبَسْطُوا بَيْهَا، إِنْتُو كُلُّكُو التِّحِبُّوهَا! أَفْرَحَوْا مَعَاهَا بِسُرُورْ، إِنْتُو كُلُّكُو الْحِزِنْتُوا فِي شَانْهَا.

لُوقا 12:36

أَبْقَوْا مِثِلْ عَبِيدْ فِي بَيْت سِيدْهُمْ الْقَاعِدِينْ يَرْجَوْه. سِيدْهُمْ يِقَبِّلْ مِنْ عَازُومَةْ الْعِرِسْ. وَ هُمَّنْ يَقْعُدُوا جَاهِزِينْ أَشَانْ يُفُكُّوا لَيَّهْ الدَّرِبْ بِسُرْعَةْ وَكِتْ هُو يَجِي يُدُقّ الْبَابْ.

زَكَرِيَّا 9:9

«يَا صَهْيُون الْمِثِلْ بِنَيَّةْ، أَفْرَحَيْ زِيَادَةْ! عِيطِي بِفَرَحْ، يَا مَدِينَةْ الْقُدُسْ الْمِثِلْ بِنَيَّةْ! دَاهُو مَلِكِّ جَايِ لَيْكِ. هُو عَادِلْ وَ مُنَّصِرْ. هُو مِسْكِينْ وَ رَاكِبْ فِي حُمَارْ، فِي دَحَشْ وِلَيْد حُمَارَةْ.

إشَعْيا 52:1

قُمِّي! قُمِّي فَوْق! وَ أَبْقَيْ قَوِيَّةْ، يَا مَدِينَةْ صَهْيُون! أَلْبَسَيْ خُلْقَانْكِ هَنَا الشَّرَفْ، يَا مَدِينَةْ الْقُدُسْ، الْمَدِينَةْ الْمُقَدَّسَةْ! أَشَانْ بَتَّانْ مَا يَدْخُلْ فَوْقكِ الْمَا مُطَهَّرْ وَ الْمَا طَاهِرْ.

نشيد 3:11

أَمُرْقَنْ، يَا بَنَاتْ صَهْيُون! تَعَالَنْ شِيفَنْ الْمَلِكْ سُلَيْمَانْ! عِنْدَهْ تَاجْ الْأَمَّهْ خَطَّتَهْ لَيَّهْ فِي يَوْم عَرِيسَهْ وَ دَا يَوْم الْفَرَحْ مَلَا قَلْبَهْ.

فِلِبِّي 3:3

يُقُولُوا هُمَّنْ الْمُطَهَّرِينْ. لَاكِنْ أَنِحْنَ بَسْ النَّاسْ الْمُطَهَّرِينْ بِالصَّحِيحْ، أَنِحْنَ النَّعَبُدُوا اللّٰهْ بِقُدْرَةْ الرُّوحْ الْقُدُّوسْ. وَ نِفَاشُرُوا بِالْمَسِيحْ عِيسَى وَ أَبَداً مَا نِنْتَكْلُوا عَلَيْ جِلِدْنَا.

زَبُور 9:14

أَشَانْ نِحَجِّي بِكُلَّ شُكْرَكْ فِي بِيبَانْ صَهْيُون الْمِثِلْ بِنَيَّةْ وَ نَفْرَحْ بِسَبَبْ نَجَاتَكْ.

1 صَمُوِيل 2:1

وَ حِنَّةْ صَلَّتْ وَ قَالَتْ: «نِعْمَةْ اللّٰهْ مَلَتْ قَلْبِي بِالْفَرَحْ، اللّٰهْ رَفَعْ رَاسِي وَ أَنْطَانِي قُدْرَةْ. قِدَّامْ عُدْوَانِي، ضِحِكْت بِحِسّ عَالِي وَ بِنَجَاتَكْ أَنَا فِرِحْت، يَا رَبِّي.

أمْثال 29:2

كَنْ الصَّالِحْ يَنْجَحْ، الشَّعَبْ يَفْرَحَوْا لَاكِنْ كَنْ الْعَاصِي يَحْكِمْ، الشَّعَبْ يَقُنْتُوا.

زَبُور 107:42

النَّاسْ الْعَدِيلِينْ يِشِيفُوا وَ يَفْرَحَوْا وَ أَيِّ ظَالِمْ يَسْكُتْ.

زَبُور 48:11

بِسَبَبْ عَدَالْتَكْ، جَبَلْ صَهْيُون يَفْرَحْ وَ حِلَّالْ بَلَدْ يَهُوذَا يِنْبَسْطُوا.

تَثْنِية 32:43

يَا الْأُمَمْ، أَفْرَحَوْا مَعَ شَعَبَهْ أَشَانْ اللّٰهْ يِلْكَفَّى دَمّ عَبِيدَهْ وَ يِشِيلْ التَّارْ فِي عُدْوَانَهْ وَ يِكَفِّرْ لِشَعَبَهْ فِي أَرْضَهْ.

إشَعْيا 66:14

وَ إِنْتُو تِشِيفُوا وَ قُلُوبْكُو يَفْرَحَوْا وَ عُضَامْكُو يِقَوُّوا مِثِلْ الْقَشّ الْيِخَضِّرْ. وَ عَبِيدْ اللّٰهْ يَعَرْفُوا قُدُرْتَهْ وَ عُدْوَانَهْ يَعَرْفُوا لَعَنْتَهْ.

مَتَّى 1:20

وَ وَكِتْ هُو لِسَّاعْ قَاعِدْ يِفَكِّرْ فِي الْكَلَامْ دَا، وَاحِدْ مِنْ مَلَائِكَةْ اللّٰهْ جَاءْ لَيَّهْ فِي رُؤْيَةْ وَ قَالْ: «يَا يُوسُفْ وِلَيْد دَاوُدْ، مَا تَخَافْ. شِيلْ مَرْيَمْ فِي بَيْتَكْ وَ خَلِّي تَبْقَى مَرْتَكْ أَشَانْ الصَّغِيرْ الْفِي بَطُنْهَا دَا، جَاءْ بِقُدْرَةْ الرُّوحْ الْقُدُّوسْ.

رُؤية 11:13

وَ فِي الْوَكِتْ دَا بَسْ، بِقِي زِلْزَالْ شَدِيدْ بِلْحَيْن وَ عَشَرَةْ فِي الْمِيَةْ مِنْ بُيُوتْ الْمَدِينَةْ أَدَّمَّرَوْا وَ 7 000 إِنْسَانْ مَاتَوْا. وَ النَّاسْ الْفَضَّلَوْا حَمَدَوْا اللّٰهْ رَبّ السَّمَاوَاتْ.