رُؤية 18:6 - الكتاب المقدس بالعربي الدارجي هنا تشاد

⁶ «خَلِّي يِسَوُّوا لَيْهَا مِثِلْ هِي سَوَّتَهْ لِلنَّاسْ. خَلِّي يِلْكَفَّوْا فَوْقهَا مَرَّتَيْن الشَّيّءْ الْهِي سَوَّتَهْ. خَلِّي يَمْلَوْا كَاسْهَا بِشَرَابْ الْيِسَكِّرْ مَرَّتَيْن مِنْ الشَّرَابْ الْهِي أَنْطَتَهْ لِلنَّاسْ.

رُؤية 18:6 Referenca të Kryqëzuara

إرْمِيا 50:29

نَادُوا سِيَادْ النُّبَّالْ ضِدّ بَابِلْ، كُلَّ الْيَعَرْفُوا يِسْتَعْمَلَوْا النُّشَّابْ. يُخُطُّوا مُعَسْكَرْهُمْ حَوَالَيْهَا أَشَانْ نَادُمْ مِنْهَا مَا يِنْبَلِصْ. عَاقُبُوهَا حَسَبْ عَمَلْهَا وَ سَوُّوا فَوْقهَا مِثِلْ هِي سَوَّتْ. أَشَانْ هِي أَسْتَكْبَرَتْ قِدَّامْ اللّٰهْ، قِدَّامْ قُدُّوسْ إِسْرَائِيلْ.

زَبُور 137:8

يَا مَدِينَةْ بَابِلْ الْمِثِلْ بِنَيَّةْ، وَاجِبْ تَخْرَبَيْ! مَبْرُوكْ لِلْيِعَامِلْكِ مِثِلْ عَامَلْتِينَا!

إرْمِيا 50:15

حَوُّقُوهَا مِنْ كُلِّ جِيهَةْ وَ كَوْرُكُوا كُرَوْرَاكْ الْحَرِبْ ضِدَّهَا. وَ خَلَاصْ، هِي تِسَلِّمْ نَفِسْهَا وَ قُصُورْهَا يِدَفُّقُوا وَ دَرَادِرْهَا يَقَعَوْا. اللّٰهْ كَفَّى التَّارْ فَوْقهَا. إِنْتُو كُلَ كَفُّوا التَّارْ وَ سَوُّوا فَوْقهَا مِثِلْ هِي سَوَّتْ.

رُؤية 16:19

وَ الْمَدِينَةْ الْكَبِيرَةْ أَنْشَقَّتْ عَلَيْ تَلَاتَةْ بَكَانْ. وَ كُلَّ مُدُنْ الْأُمَمْ أَدَّمَّرَوْا مَرَّةْ وَاحِدْ وَ مِثِلْ دَا اللّٰهْ عَاقَبْ مَدِينَةْ بَابِلْ الْكَبِيرَةْ بِذُنُوبْهَا. وَ اللّٰهْ جَبَرَاهَا تَشْرَبْ خَمَرْ مِنْ كَاسَهْ وَ الْخَمَرْ دَا يِمَثِّلْ غَضَبَهْ الشَّدِيدْ بِلْحَيْن.

رُؤية 14:10

هُو يَشْرَبْ خَمَرْ، مَعَنَاتَهْ هُو يَلْقَى غَضَبْ اللّٰهْ. وَ الْخَمَرْ دَا، خَمَرْ تَقِيلْ بِلْحَيْن وَ مَصْبُوبْ فِي كَاسْ هَنَا الْعَذَابْ وَ النَّادُمْ الْيَشْرَبْ مِنَّهْ يِعَذُّبُوهْ بِنَارْ وَ كِبْرِيتْ قِدَّامْ الْمَلَائِكَةْ الْمُخَصَّصِينْ وَ قِدَّامْ الْحَمَلْ.

إرْمِيا 51:24

«وَ لَاكِنْ هَسَّعْ، شِيفُوا يَا بَنِي إِسْرَائِيلْ! أَنَا نِجَازِي بَابِلْ وَ كُلَّ سُكَّانْهَا حَسَبْ كُلَّ الْفَسَالَةْ السَّوَّوْهَا فِي صَهْيُون. وَ دَا كَلَامْ اللّٰهْ.

رُؤية 17:4

وَ الْمَرَةْ لَابْسَةْ لُبَاسْ لَوْنَهْ قَرَضِي وَ أَحْمَرْ تُشْو وَ زِينَةْ كَتِيرَةْ هَنَا دَهَبْ وَ فَارُوسْ وَ لُؤلُؤ. وَ عِنْدَهَا كَاسْ هَنَا دَهَبْ فِي إِيدْهَا وَ الْكَاسْ مَلَانْ بِخُمَامْ مُحَرَّمْ وَ نِجِسْ الْيِمَثِّلْ زِنَاهَا.

زَكَرِيَّا 9:12

يَا الْمَسَاجِينْ الْعِنْدُكُو عَشَمْ، قَبُّلُوا فِي الْبَكَانْ الْقَوِي. هَسَّعْ نِخَبِّرْكُو كَدَرْ نِكَفِّيكُو تَعَبْكُو مَرَّتَيْن.

إرْمِيا 17:18

وَ الْيِطَارُدُونِي، خَلِّي الْعَيْب يَكْرُبْهُمْ وَ لَاكِنْ مَا يَكْرُبْنِي أَنَا. وَ خَلِّي هُمَّنْ يِبَرْجُلُوا وَ لَاكِنْ أَنَا مَا نِبَرْجِلْ. وَ جِيبْ فَوْقهُمْ يَوْم الْفَسَالَةْ وَ دَمِّرْهُمْ مَرَّةْ وَاحِدْ.

إرْمِيا 16:18

وَ أَوَّلْ شَيّءْ، أَنَا نِلْكَفَّى مِنْهُمْ مَرَّتَيْن تَمَنْ الْخَطَا وَ الذَّنِبْ الْهُمَّنْ سَوَّوْه. أَشَانْ هُمَّنْ مَا أَحْتَرَمَوْا بَلَدِي وَ مَلَوْهَا بِتَمَاثِيلْهُمْ الْمَكْرُوهِينْ. وَ أَرْض وَرَثَتِي مَلَوْهَا بِمُحَرَّمَاتْهُمْ.»

2 تِمُوتَاوُس 4:14

وَ إِسْكَنْدَرْ دَقَّاقْ النَّحَاسْ هُو سَوَّى لَيِّ فَسِلْ بِلْحَيْن. رَبِّنَا بَسْ يِجَازِيهْ فِي الشَّيّءْ السَّوَّاهْ لَيِّ.

إرْمِيا 51:49

يَا مَيْتِينْ بَنِي إِسْرَائِيلْ! بَابِلْ كُلَ وَاجِبْ تَقَعْ. أَشَانْ بَيْهَا هِي وَقَعَوْا نَاسْ مَيْتِينْ فِي أَيِّ بَكَانْ فِي الْأَرْض.

رُؤية 17:2

دِي بَسْ الشَّرْمُوطَةْ الْمُلُوكْ الْأَرْض زَنَوْا مَعَاهَا وَ سُكَّانْ الْأَرْض شِرْبَوْا مِنْ كَاسْ زِنَاهَا وَ سِكْرَوْا.»

رُؤية 13:10

أَيِّ نَادُمْ الْمَكْتُوبْ فِي صَفَّهْ يَكُرْبُوهْ فِي السِّجِنْ، خَلِّي يَكُرْبُوهْ فِي السِّجِنْ. وَ أَيِّ نَادُمْ الْمَكْتُوبْ فِي صَفَّهْ يَكْتُلُوهْ بِالْسَّيْف، خَلِّي يَكْتُلُوهْ. وَ الْكَلَامْ دَا يِوَصِّفْ كَدَرْ الصَّالِحِينْ وَاجِبْ يَحْمَلَوْا التَّعَبْ بِصَبُرْ وَ إِيمَانْ.

إشَعْيا 40:2

رَقُّدُوا قَلِبْ مَدِينَةْ الْقُدُسْ وَ قُولُوا لَيْهَا كَدَرْ خِدْمِتْهَا الْإِجْبَارِيَّةْ كَمَّلَتْ وَ خَطَاهَا أَنْمَحَى وَ هِي لِقَتْ مِنْ إِيدْ اللّٰهْ مَرَّتَيْن جَزَا هَنَا كُلَّ ذُنُوبْهَا.»

إشَعْيا 61:7

وَ اللّٰهْ قَالْ: «بَدَلْ الْعَيْب، تَلْقَوْا قِسِمْكُو مَرَّتَيْن وَ بَدَلْ الْإِهَانَةْ، الْفَرَحْ يَبْقَى قِسِمْكُو. أَشَانْ دَا، تَوْرُثُوا مَرَّتَيْن مِنْ بَلَدْكُو وَ فَرْحِتْكُو تَقْعُدْ إِلَى الْأَبَدْ.

زَبُور 28:4

عَاقِبْهُمْ حَسَبْ عَمَلْهُمْ وَ حَسَبْ عَمَلْهُمْ الْفَسِلْ. وَ عَاقِبْهُمْ حَسَبْ خِدْمَةْ إِيدَيْهُمْ وَ جَازِيهُمْ حَسَبْ الْوَاجِبْ لَيْهُمْ!

رُؤية 18:20

يَا سُكَّانْ السَّمَاوَاتْ، أَفْرَحَوْا بِدَمَارْهَا. يَا الرُّسُلْ وَ الْأَنْبِيَاء وَ الصَّالِحِينْ، أَفْرَحَوْا! أَشَانْ اللّٰهْ قَطَعْ لَيْكُو شَرِيعَةْ وَ عَاقَبَاهَا خَلَاصْ.»

مَراثِي إرْمِيا 3:64

يَا اللّٰهْ! قَبِّلْ لَيْهُمْ فِي رَاسْهُمْ نَفْس الْعَمَلْ السَّوَّوْه.