رُؤية 13:11 - الكتاب المقدس بالعربي الدارجي هنا تشاد

¹¹ وَ فِي الْبَكَانْ دَا، أَنَا شِفْت حَيْوَانْ آخَرْ. هُو مَارِقْ مِنْ لُبّ الْأَرْض وَ عِنْدَهْ قُرُونْ إِتْنَيْن مِثِلْ قُرُونْ حَمَلْ وَ لَاكِنْ حِسَّهْ مِثِلْ حِسّ الْغُولْ.

رُؤية 13:11 Referenca të Kryqëzuara

دَنْيال 7:8

وَ وَكِتْ أَنَا قَاعِدْ نِشِيفْ فِي الْقُرُونْ دَوْل، شِفْت قَرِنْ آخَرْ صَغَيَّرْ قَمَّ أَمْبَيْنَاتْهُمْ وَ تَلَاتَةْ قُرُونْ مِنْ الْعَشَرَةْ الْأَوَّلَانِيِّينْ مَرَقَوْهُمْ لِيِخَلُّوا لَيَّهْ الْبَكَانْ. وَ الْقَرِنْ الصَّغَيَّرْ دَا عِنْدَهْ عُيُونْ مِثِلْ عُيُونْ الْإِنْسَانْ وَ عِنْدَهْ خَشُمْ الْيِحَجِّي بِإِسْتِكْبَارْ.

مَتَّى 7:15

«أَنْقَرْعُوا مِنْ النَّاسْ الْيِسَوُّوا نُفُوسْهُمْ أَنْبِيَاء. يَجُوا لَيْكُو ضَلُولِينْ مِثِلْ عِيَالْ غَنَمْ وَ لَاكِنْ فِي قُلُوبْهُمْ هُمَّنْ مِثِلْ مَرَافْعِينْ الْيِدَوْرُوا يَاكُلُوكُو.

رُؤية 17:6

وَ شِفْت الْمَرَةْ دِي سَكْرَانَةْ أَشَانْ هِي شِرْبَتْ دَمّ الصَّالِحِينْ زِيَادَةْ وَ دَمّ النَّاسْ الشَّهَدَوْا لِعِيسَى. وَ وَكِتْ شِفْتَهَا، أَنَا عَجَّبْت مَرَّةْ وَاحِدْ.

رُؤية 16:13

وَ شِفْت تَلَاتَةْ شَوَاطِينْ وَ الْوَاحِدْ مَرَقْ مِنْ خَشُمْ الْغُولْ وَ الْوَاحِدْ مِنْ خَشُمْ الْحَيْوَانْ الْفَسِلْ وَ الْوَاحِدْ مِنْ خَشُمْ الْكَدَّابْ السَّوَّى نَفْسَهْ نَبِي. وَ التَّلَاتَةْ شَوَاطِينْ دَوْل شَيْنِينْ وَ يِشَابُهُوا مِثِلْ الضِّفْدَعْ.

رُؤية 13:17

وَ مِثِلْ دَا، مَا فِي أَيِّ نَادُمْ الْيَقْدَرْ يَشْرِي شَيّءْ وَلَّا يِبِيعْ شَيّءْ إِلَّا كَنْ الْوَسِمْ دَا قَاعِدْ فَوْقَهْ. وَ الْوَسِمْ دَا، هُو أُسُمْ الْحَيْوَانْ أَوْ نِمْرَةْ هَنَا أُسْمَهْ.

رُؤية 11:7

وَ وَكِتْ يِكَمُّلُوا شَهَادِتْهُمْ خَلَاصْ، الْحَيْوَانْ الْقَاعِدْ فِي الْهَاوِيَةْ يَطْلَعْ وَ يِحَارِبْهُمْ وَ يِنَّصِرْ فَوْقهُمْ وَ يَكْتُلْهُمْ.

رَوْمَا 16:18

النَّاسْ الْمِثِلْ دَوْل مَا يَخْدُمُوا لِرَبِّنَا الْمَسِيحْ لَاكِنْ يَخْدُمُوا لِبُطُونْهُمْ بَسْ. يِحَجُّوا لِلنَّاسْ بِكَلَامْ حَلُو وَ يَشْكُرُوهُمْ كَتِيرْ أَشَانْ يُغُشُّوا النَّاسْ الْعِنْدُهُمْ عِلِمْ شِيَّةْ بَسْ.

رُؤية 12:17

وَ فِي الْبَكَانْ دَا، الْغُولْ زِعِلْ زَعَلْ شَدِيدْ مِنْ الْمَرَةْ وَ قَمَّ يِحَارِبْهُمْ لِعِيَالْهَا الْآخَرِينْ وَ هُمَّنْ النَّاسْ الْيِتَابُعُوا وَصَايَا اللّٰهْ وَ شَهَادَةْ عِيسَى.

2 تَسَلونِيكِي 2:4

هُو عَدُو لِكُلِّ إِلٰـهْ الْيَعَبُدُوهْ النَّاسْ وَ يِسَوِّي نَفْسَهْ أَكْبَرْ مِنَّهْ. وَ هُو يُخُطّ كُرْسِي حَقَّهْ فِي بَيْت اللّٰهْ وَ يُقُولْ: «أَنَا بَسْ اللّٰهْ.»

رُؤية 17:8

الْحَيْوَانْ الشِّفْتَهْ دَا، هُو أَوَّلْ قَاعِدْ وَ هَسَّعْ مَا فِيهْ وَ يَطْلَعْ مِنْ الْهَاوِيَةْ وَ لَاكِنْ بَعَدْ دَا، يَمْشِي فِي الْهَلَاكْ. وَ سُكَّانْ الْأَرْض الْأَسَامَيْهُمْ مَا مَكْتُوبِينْ مِنْ بِدَايَةْ الدُّنْيَا فِي كِتَابْ الْحَيَاةْ، هُمَّنْ يِشِيفُوا الْحَيْوَانْ الْفَسِلْ دَا وَ يِعَجُّبُوا مِنَّهْ بِلْحَيْن أَشَانْ فِي الْوَكِتْ الْفَاتْ، هُو قَاعِدْ وَ فِي الْوَكِتْ الْحَاضِرْ، هُو مَا فِيهْ وَ فِي الْوَكِتْ الْجَايِ، يِقَبِّلْ.

دَنْيال 8:3

وَ فِي الرُّؤْيَةْ، أَنَا رَفَعْت رَاسِي وَ دَاهُو شِفْت كَبِشْ وَاقِفْ فِي خَشُمْ الْبَحَرْ. وَ الْكَبِشْ دَا عِنْدَهْ إِتْنَيْن قُرُونْ طُوَالْ. وَ الْقُرُونْ الْإِتْنَيْن دَوْل، الْوَاحِدْ بِقِي طَوِيلْ مِنْ الْآخَرْ لَاكِنْ الْقَرِنْ الطَّوِيلْ دَا، هُو بَسْ الْقَمَّ وَرَاءْ.

رُؤية 13:1

وَ أَنَا شِفْت حَيْوَانْ فَسِلْ مَارِقْ مِنْ أُسْط الْبَحَرْ. وَ عِنْدَهْ عَشَرَةْ قُرُونْ وَ سَبْعَةْ رَاسْ وَ أَيِّ قَرِنْ عِنْدَهْ تَاجْ صَغَيَّرْ. وَ أَيِّ رَاسْ عِنْدَهْ أُسُمْ مَكْتُوبْ فَوْقَهْ وَ الْكِلْمَةْ دِي تِوَصِّفْ كَلَامْ كُفُرْ.

رُؤية 13:4

وَ كُلَّ النَّاسْ سَجَدَوْا لِلْغُولْ أَشَانْ أَنْطَى قُدُرْتَهْ لِلْحَيْوَانْ دَا. وَ سَجَدَوْا لِلْحَيْوَانْ وَ قَالَوْا: «مَا فِي شَيّءْ قَادِرْ مِثِلْ الْحَيْوَانْ دَا. وَ الْيَقْدَرْ يِدَاوِسَهْ كُلَ مَا فِيهْ.»