عَدد 6:12 - الكتاب المقدس بالعربي الدارجي هنا تشاد

¹² وَ يِخَصِّصْ نَفْسَهْ مِنْ جَدِيدْ لِلّٰهْ لَحَدِّي يِتِمّ نَذْرَهْ. وَ يِجِيبْ خَرُوفْ وَلْد سَنَةْ وَ يِقَدِّمَهْ ضَحِيَّةْ لِكَفَّارَةْ الْخَطَا. وَ الْأَيَّامْ الْفَاتَوْا مَا يَحْسِبْهُمْ أَشَانْ نَذْرَهْ الْأَوَّلْ دَا أَنَّجَّسْ خَلَاصْ.

عَدد 6:12 Referenca të Kryqëzuara

لاوِيِّين 5:6

وَ فِي شَانْ الذَّنِبْ الْهُو سَوَّاهْ، يِقَدِّمْ ضَحِيَّةْ لِلّٰهْ مِنْ الْغَنَمْ عَنْزَايْ أَوْ غَنَمَايْ ضَحِيَّةْ لِكَفَّارَةْ الْخَطَا. وَ رَاجِلْ الدِّينْ يِسَوِّي لَيَّهْ كَفَّارَةْ لِذَنْبَهْ.

2 يُوحَنَّا 1:8

أَنْقَرْعُوا أَشَانْ الْأَجُرْ الْيَجِي بِسَبَبْ عَمَلْكُو مَا يِوَدِّرْ. شِدُّوا حَيْلكُو أَشَانْ تَلْقَوْا أَجُرْكُو كَامِلْ.

يَعْقُوب 2:10

تَعَرْفُوا كَدَرْ النَّادُمْ التَّابَعْ كُلَّ الشُّرُوطْ وَ لَاكِنْ خَالَفْ شَرْط وَاحِدْ، هُو مِثِلْ خَالَفْ كُلَّ الشُّرُوطْ.

مَتَّى 24:13

وَ لَاكِنْ النَّادُمْ الْقَاعِدْ ثَابِتْ لَحَدِّي كُمَالَةْ كُلَّ شَيّءْ، يَنْجَى.

مَتَّى 3:15

وَ عِيسَى قَالْ لَيَّهْ: «مَا تَابَى. خَلِّي يَبْقَى مِثِلْ دَا أَشَانْ نِتِمُّوا كُلَّ شَيّءْ الْاللّٰهْ بِدَوْرَهْ.» وَ خَلَاصْ، يَحْيَى قَصَّدْ وَ غَطَّسَهْ.

حِزْقِيال 18:24

وَ لَاكِنْ كَنْ الصَّالِحْ يِخَلِّي عَدَالْتَهْ وَ يِسَوِّي الظُّلُمْ وَ يِسَوِّي كُلَّ الْمُحَرَّمَاتْ السَّوَّاهُمْ الْعَاصِي، هَلْ يَحْيَى وَلَّا؟ وَ كُلَّ الْعَدَالَةْ السَّوَّاهَا أَوَّلْ، مَا يِذَّكَّرَوْهَا بَتَّانْ. هُو يُمُوتْ بِسَبَبْ الْخِيَانَةْ وَ الذُّنُوبْ السَّوَّاهُمْ.

لاوِيِّين 14:24

وَ رَاجِلْ الدِّينْ يِشِيلْ الْخَرُوفْ هَنَا ضَحِيَّةْ كَفَّارَةْ الْخَطَا وَ تِلِتْ لِيتِرْ هَنَا دِهِنْ وَ يِقَدِّمْهُمْ هَدِيَّةْ مَرْفُوعَةْ قِدَّامْ اللّٰهْ.

خُروج 12:5

وَ وَاجِبْ تَعَزُلُوا حَمَلْ أَوْ سَخَلْ وَلْد سَنَةْ الْمَا عِنْدَهْ أَيِّ عَيْب.

لاوِيِّين 5:7

«وَ كَنْ نَادُمْ مَا يَقْدَرْ يَلْقَى خَرُوفْ، هُو يَقْدَرْ يِقَدِّمْ ضَحِيَّةْ لِلّٰهْ لِلذَّنِبْ الْهُو سَوَّاهْ إِتْنَيْن قِمْرِيْ أَوْ إِتْنَيْن حَمَامْ، وَاحِدَةْ لِضَحِيَّةْ كَفَّارَةْ الْخَطَا وَ الْآخَرَةْ لِلضَّحِيَّةْ الْمُحَرَّقَةْ.

عَدد 6:11

وَ رَاجِلْ الدِّينْ يِقَدِّمْ الْوَاحِدْ ضَحِيَّةْ لِكَفَّارَةْ الذَّنِبْ وَ الْآخَرْ ضَحِيَّةْ مُحَرَّقَةْ. وَ دَا يَبْقَى كَفَّارَةْ لِلذَّنِبْ الْهُو سَوَّاهْ بِسَبَبْ الْمَيِّتْ وَ فِي نَفْس الْيَوْم هُو بَتَّانْ يِخَصِّصْ رَاسَهْ.

عَدد 6:13

«وَ دَاهُو قَانُونْ النَّذِرْ. وَكِتْ النَّادُمْ دَا يِتِمّ نَذْرَهْ، يِوَدُّوهْ فِي مَدَخَلْ خَيْمَةْ الْإِجْتِمَاعْ.