عَدد 5:18 - الكتاب المقدس بالعربي الدارجي هنا تشاد

¹⁸ وَ بَعَدْ وَقَّفَاهَا قِدَّامْ اللّٰهْ، هُو يَكْشِفْ رَاسْهَا وَ يَنْطِيهَا فِي إِيدَيْنهَا هَدِيَّةْ الذِّكْرَةْ يَعْنِي هَدِيَّةْ الْغِيرَةْ. وَ رَاجِلْ الدِّينْ كَمَانْ يِشِيلْ فِي إِيدَهْ الْأَلْمِي الْمُرّ الْيِجِيبْ اللَّعَنَةْ الْهُو جَهَّزَهْ.

عَدد 5:18 Referenca të Kryqëzuara

عِبْرَانِيِّين 13:4

كُلُّكُو أَحْتَرُمُوا الْأَخِيدَةْ. مَا تِخَلُّوا الزِّنَى يِنَجِّسْ سَرَايِرْكُو الزَّوْجِيَّةْ أَشَانْ تَعَرْفُوا كَدَرْ اللّٰهْ يِحَاسِبْ كُلَّ الزَّنَّايِينْ، كَنْ مَاخْدِينْ وَلَّا مَا مَاخْدِينْ كُلَ.

1 كُرُنْتُس 11:6

وَ كَنْ مَرَةْ تَابَى مَا تِغَطِّي رَاسْهَا، خَلِّي تُقُصّ شَعَرْهَا. وَ لَاكِنْ كَنْ قَصِّينْ الشَّعَرْ وَ زَيِّنِينْ الرَّاسْ دَا عَيْب لِلْمَرَةْ، خَلَاصْ خَلِّي هِي تِغَطِّي رَاسْهَا.

إرْمِيا 2:19

وَ خَلِّي فَسَالِتْكُو تِقَبِّلْ لَيْكُو فِي رَاسْكُو وَ كُفُرْكُو يِعَاقِبْكُو. وَ أَعَرْفُوا كِكَّيْف الشَّيّءْ دَا فَسِلْ وَ مُرّ كَدَرْ تَابَوْنِي أَنَا اللّٰهْ إِلٰـهْكُو وَ أَبَداً مَا تَخَافَوْا مِنِّي.» وَ دَا كَلَامْ اللّٰهْ الرَّبّ الْقَادِرْ.

إشَعْيا 38:17

مُرِّي أَلْبَدَّلْ بِالسَّلَامْ! إِنْتَ نَجَّيْت حَيَاتِي وَ سَلَّمْتِنِي مِنْ الْمَوْت. أَيْوَى، إِنْتَ زَقَلْت كُلَّ ذُنُوبِي وَرَاكْ.

جامِعة 7:26

وَ أَنَا لِقِيتْ شَيّءْ وَاحِدْ مُرّ مِنْ الْمَوْت وَ دِي مَرَةْ الْمِثِلْ الشَّرَكْ. قَلِبْهَا مِثِلْ أَمْ كَجَّامَةْ وَ إِيدَيْنهَا مِثِلْ جَنَازِيرْ. الْيَخَافْ مِنْ الرَّبّ يَنْجَى مِنْهَا وَ لَاكِنْ الْمُذْنِبْ يَقَعْ فِي شَرَكْهَا.

أمْثال 5:4

وَ لَاكِنْ فِي الأَخِيرْ هِي مُرَّةْ مِنْ الْحَمْضَلْ وَ طَرِينَةْ مِنْ السَّيْف.

1 صَمُوِيل 15:32

وَ صَمُوِيلْ قَالْ: «جِيبْ لَيِّ أَقَاقْ مَلِكْ الْعَمَالِقْ.» وَ أَقَاقْ جَايِ لَيَّهْ فَرْحَانْ وَ بُقُولْ فِي قَلْبَهْ: «أَكِيدْ! أَنَا مَعَ الْمَوْت دَا، فَكَّ فَكَّ.»

تَثْنِية 29:18

وَ خَلِّي مَا يُكُونْ مِنْكُو الْيَوْم وَ لَا رَاجِلْ وَ لَا مَرَةْ وَ لَا خَشُمْ بَيْت وَ لَا قَبِيلَةْ الْيِقَبِّلْ مِنْ اللّٰهْ إِلٰـهْنَا وَ يَمْشِي يَعَبُدْ إِلٰـهَاتْ الْأُمَمْ دَوْل. وَ خَلِّي مَا يُكُونْ فِي أُسُطْكُو قَلِبْ مُرّ مِثِلْ عِرِقْ هَنَا شَدَرَةْ التَّلْدَ سَمّ وَ حَمْضَلْ.

عَدد 5:22

وَ خَلِّي الْأَلْمِي الْيِجِيبْ اللَّعَنَةْ دَا يَدْخُلْ فِي بَطُنْكِ وَ يَنْفُخْهَا وَ بَيْدَا، تَبْقَيْ عَاقْرَةْ.› وَ هِي تُقُولْ: ‹آمِينْ! آمِينْ!›

عَدد 5:17

وَ يِشِيلْ الْأَلْمِي الْمُقَدَّسْ لِلّٰهْ وَ يُصُبَّهْ فِي مَاعُونْ هَنَا طِينَةْ وَ يُخُمّ تُرَابْ مِنْ لُبّ خَيْمَةْ الْعِبَادَةْ وَ يِخَلْبِطَهْ مَعَ الْأَلْمِي دَا.

عَدد 5:15

خَلِّي رَاجِلْهَا يِوَدِّيهَا قِدَّامْ رَاجِلْ الدِّينْ. وَ يِوَدِّي مَعَايَهْ هَدِيَّةْ كَوْرَوْ هَنَا دَقِيقْ قَمَحْ أَبْيَضْ. وَ الْهَدِيَّةْ دِي، مَا يُصُبّ فَوْقهَا دِهِنْ وَلَّا يُصُبّ فَوْقهَا رِيحَةْ أَشَانْ دِي هَدِيَّةْ هِنْت غِيرَةْ وَ هَدِيَّةْ هِنْت ذِكْرَةْ الْيِذَّكَّرَوْا بَيْهَا الْخَطَا.

لاوِيِّين 13:45

وَ فِي الْحَالَةْ دِي، كَنْ نَادُمْ كَرَبَهْ مَرَضْ الْجِسِمْ وَ بِقِي مَرْضَانْ، وَاجِبْ يَلْبَسْ خُلْقَانْ مُشَرَّطِينْ وَ مَا يِعَدِّلْ صُوفْ رَاسَهْ وَ يِغَطِّي شَنَبَهْ وَ يِعِيطْ وَ يُقُولْ: «نِجِسْ! نِجِسْ!»

1 كُرُنْتُس 11:15

وَ لَاكِنْ كَنْ مَرَةْ عِنْدَهَا شَعَرْ طُوَالْ، دَا سَمَحْ وَ دَا شَرَفْهَا. وَ اللّٰهْ أَنْطَاهَا شَعَرْ طُوَالْ أَشَانْ يَبْقَى لَيْهَا غَطَّايْ.

عَدد 5:19

«وَ خَلَاصْ، رَاجِلْ الدِّينْ يَحَلِّفْ الْمَرَةْ وَ يُقُولْ: ‹كَنْ إِنْتِ بَرِيَّةْ مَا رَقَدْتِ مَعَ رَاجِلْ آخَرْ وَ مَا خَالَفْتِ رَاجِلْكِ وَ مَا نَجَّسْتِ نَفِسْكِ، الْأَلْمِي الْمُرّ الْيِجِيبْ اللَّعَنَةْ دَا، مَا يِسَوِّي لَيْكِ شَيّءْ!