عَدد 4:15 - الكتاب المقدس بالعربي الدارجي هنا تشاد

¹⁵ «وَ وَكِتْ هَارُونْ وَ أَوْلَادَهْ يِكَمُّلُوا مِنْ ضَمْضِمِينْ الْبَكَانْ الْمُقَدَّسْ وَ كُلَّ الْمُعِدَّاتْ الْمُخَصَّصِينْ. وَ وَكِتْ يُقُمُّوا مِنْ الْمُعَسْكَرْ ذُرِّيَّةْ قَهَاتْ يَجُوا يِشِيلُوا الْخُمَامْ دَوْل. لَاكِنْ مَا يِلَمُّسُوا مِنْهُمْ شَيّءْ أَشَانْ دَا يِجِيبْ لَيْهُمْ الْمَوْت. وَ دَا بَسْ الْكَلَّفَوْا بَيَّهْ ذُرِّيَّةْ قَهَاتْ مِنْ خَيْمَةْ الْإِجْتِمَاعْ.

عَدد 4:15 Referenca të Kryqëzuara

عَدد 7:9

وَ لَاكِنْ مَا أَنْطَى شَيّءْ لِذُرِّيَّةْ قَهَاتْ أَشَانْ هُمَّنْ خِدْمِتْهُمْ يَنْقُلُوا الْمُعِدَّاتْ الْمُقَدَّسِينْ فِي كَتَافَيْهُمْ.

تَثْنِية 31:9

وَ مُوسَى كَتَبْ الْوَصَايَا دَوْل وَ أَنْطَاهُمْ لِرُجَالْ الدِّينْ عِيَالْ لَاوِي الشَّايْلِينْ صَنْدُوقْ مُعَاهَدَةْ اللّٰهْ وَ لِكُلَّ شُيُوخْ بَنِي إِسْرَائِيلْ.

عَدد 10:21

وَ بَعَدْ دَا، ذُرِّيَّةْ قَهَاتْ سَارَوْا شَايْلِينْ الْمُعِدَّاتْ الْمُقَدَّسِينْ. وَ قَبُلْ ذُرِّيَّةْ قَهَاتْ مَا يِوَصُّلُوا، اللَّاوِيِّينْ الْآخَرِينْ يَبْنُوا خَيْمَةْ الْعِبَادَةْ وَ يِجَهُّزُوهَا لَيْهُمْ.

1 أخبار 15:2

وَ بَعَدْ دَا، دَاوُدْ قَالْ: «صَنْدُوقْ الرَّبّ نَادُمْ مَا يِشِيلَهْ إِلَّا اللَّاوِيِّينْ بَسْ يِشِيلُوهْ أَشَانْ هُمَّنْ بَسْ اللّٰهْ عَزَلَاهُمْ لِيِشِيلُوا صَنْدُوقْ اللّٰهْ وَ يَخْدُمُوا لَيَّهْ إِلَى الْأَبَدْ.»

1 صَمُوِيل 6:19

وَ اللّٰهْ ضَرَبْ سُكَّانْ حِلَّةْ بَيْت شَمْس أَشَانْ هُمَّنْ شَافَوْا لُبّ صَنْدُوقْ اللّٰهْ. وَ مَاتَوْا مِنْهُمْ 70 رَاجِلْ. وَ الشَّعَبْ بِقَوْا حَزْنَانِينْ أَشَانْ اللّٰهْ ضَرَبَاهُمْ ضَرْبَةْ شَدِيدَةْ.

1 أخبار 15:15

وَ اللَّاوِيِّينْ شَالَوْا صَنْدُوقْ الرَّبّ بِالْعِيدَانْ فِي كَتَافَيْهُمْ مِثِلْ مُوسَى أَمَرْ بَيَّهْ حَسَبْ كَلَامْ اللّٰهْ.

2 صَمُوِيل 6:13

وَ وَكِتْ النَّاسْ الشَّالَوْا صَنْدُوقْ اللّٰهْ يِسَوُّوا سِتَّةْ خَطْوَةْ، دَاوُدْ يَدْبَحْ تَوْر وَ عِجِلْ سَمِينْ.

يَشُوع 4:10

وَ رُجَالْ الدِّينْ الشَّايْلِينْ صَنْدُوقْ مُعَاهَدَةْ اللّٰهْ وَقَفَوْا فِي أُسُطْ بَحَرْ الْأُرْدُنْ لَحَدِّي تَمَّ كُلَّ الْكَلَامْ الْاللّٰهْ أَمَرْ بَيَّهْ يَشُوعْ لِيُقُولَهْ لِلشَّعَبْ. وَ دَا حَسَبْ الْكَلَامْ الْمُوسَى أَمَرْ بَيَّهْ يَشُوعْ. وَ الشَّعَبْ مَشَوْا عَجَلَةْ لِيَقْطَعَوْا الْبَحَرْ.

عَدد 3:38

وَ مُوسَى وَ هَارُونْ وَ أَوْلَادَهْ يَنْزُلُوا قِدَّامْ خَيْمَةْ الْإِجْتِمَاعْ مِنْ جِيهَاتْ الصَّبَاحْ. وَ هُمَّنْ يَحْفَضَوْا بَنِي إِسْرَائِيلْ قِدَّامْ الْبَيْت الْمُقَدَّسْ. وَ أَيِّ نَادُمْ آخَرْ كَنْ يِقَرِّبْ لِلْبَيْت دَا وَاجِبْ يُمُوتْ.

عَدد 1:51

وَ وَكِتْ تِسِيرُوا، اللَّاوِيِّينْ بَسْ يِفَرْتُقُوهَا. وَ وَكِتْ تَنْزُلُوا كُلَ، هُمَّنْ بَسْ يَبْنُوهَا. لَاكِنْ أَيِّ نَادُمْ آخَرْ كَنْ يِقَرِّبْ لِلْخَيْمَةْ دِي، وَاجِبْ يُمُوتْ.

خُروج 19:12

خُطّ حُدُودْ بَيْن الشَّعَبْ وَ الْجَبَلْ وَ قُولْ لَيْهُمْ: ‹أَنْقَرْعُوا مَا تَطْلَعَوْا فِي الْجَبَلْ وَ لَا تِلَمُّسُوهْ. أَيِّ نَادُمْ الْيِلَمِّسْ الْجَبَلْ دَا، يَكْتُلُوهْ.

خُروج 27:7

وَ الْعِيدَانْ دَوْل دِسُّهُمْ فِي الْخَوَاتِمْ الْقَاعِدِينْ فِي جَوَانِبْ الْمَدْبَحْ لِيِشِيلُوهْ بَيْهُمْ.

لاوِيِّين 16:13

وَ هُو يُصُبّ الْبَخُورْ دَا فِي النَّارْ قِدَّامْ اللّٰهْ أَشَانْ الدُّخَّانْ هَنَا الْبَخُورْ دَا يِغَطِّي سِدَادَةْ صَنْدُوقْ الْمُعَاهَدَةْ. وَ بِمِثِلْ دَا، هُو مَا يُمُوتْ.

عَدد 1:50

كَلِّفْهُمْ بِخَيْمَةْ الْعِبَادَةْ الْفَوْقهَا الصَّنْدُوقْ الْعِنْدَهْ لِيحَانْ الْمُعَاهَدَةْ وَ كُلَّ مُعِدَّاتْهَا وَ كُلَّ شَيّءْ الْفَوْقهَا. هُمَّنْ يِشِيلُوا الْخَيْمَةْ دِي وَ كُلَّ مُعِدَّاتْهَا وَ يَخْدُمُوا فَوْقهَا وَ يَنْزُلُوا حَوَالَيْهَا.

عَدد 4:14

وَ يِشِيلُوا كُلَّ الْمُعِدَّاتْ الْيَخْدُمُوا بَيْهُمْ وَ يُخُطُّوهُمْ فَوْقَهْ مِثِلْ خَمَّامَاتْ النَّارْ وَ الْحَدَايِدْ الْيِسِلُّوا بَيْهُمْ اللَّحَمْ وَ الْفَيْلَاتْ وَ الْكِيسَانْ. وَ الْمَدْبَحْ وَ كُلَّ مُعِدَّاتَهْ يِلِفُّوهْ بِفَرْوَةْ عِجِلْ الْبَحَرْ وَ بَعَدْ دَا، يِدِسُّوا لَيَّهْ عِصَيَّهْ الْيِشِيلُوهْ بَيْهُمْ.

عَدد 4:19

وَ خَلِّي هَارُونْ وَ أَوْلَادَهْ يَدْخُلُوا وَ يِكَلُّفُوا أَيِّ وَاحِدْ مِنْ ذُرِّيَّةْ قَهَاتْ بِخِدِمْتَهْ وَ بِحِمْلَهْ الْيَنْقُلَهْ. وَ بَيْدَا، هُمَّنْ مَا يُمُوتُوا وَكِتْ يَنْقُلُوا الْمُعِدَّاتْ الْمُقَدَّسِينْ مَرَّةْ وَاحِدْ.

عَدد 4:20

وَ مَا وَاجِبْ يَدْخُلُوا يِشِيفُوا الْمُعِدَّاتْ الْمُقَدَّسِينْ حَتَّى لِمُدَّةْ قِصَيْرَةْ كُلَ أَشَانْ دَا يِجِيبْ لَيْهُمْ الْمَوْت.»

عَدد 18:3

اللَّاوِيِّينْ يَخْدُمُوا تِحِتْ أَمْرَكْ وَ يَحْفَضَوْا كُلَّ خَيْمَةْ الْعِبَادَةْ وَ لَاكِنْ مَا يِقَرُّبُوا لِلْمُعِدَّاتْ الْمُخَصَّصِينْ وَ لَا لِلْمَدْبَحْ أَشَانْ مَا يِجِيبُوا الْمَوْت لِنُفُوسْهُمْ وَ لَا لَيْكُو إِنْتُو.

2 صَمُوِيل 15:24

وَ مَشَى مَعَاهُمْ صَدُوقْ رَاجِلْ الدِّينْ وَ مَعَايَهْ كُلَّ اللَّاوِيِّينْ الشَّايْلِينْ صَنْدُوقْ مُعَاهَدَةْ الرَّبّ. وَ هُمَّنْ خَطَّوْا الصَّنْدُوقْ دَا تِحِتْ وَ أَبِيَاتَرْ رَاجِلْ الدِّينْ قَاعِدْ جَنْبَهْ لَحَدِّي كُلَّ النَّاسْ الْمَارْقِينْ مِنْ الْحِلَّةْ كَمَّلَوْا.

1 أخبار 23:26

وَ بِمِثِلْ دَا، اللَّاوِيِّينْ مَا يَنْقُلُوا بَتَّانْ خَيْمَةْ الْعِبَادَةْ وَ كُلَّ مُعِدَّاتْ الْخِدْمَةْ.»

خُروج 19:21

وَ اللّٰهْ قَالْ لِمُوسَى: «أَنْزِلْ وَ حَذِّرْ الشَّعَبْ أَشَانْ مَا يُفُوتُوا الْحُدُودْ لِيَجُوا يِشِيفُونِي. كَنْ هُمَّنْ فَاتَوْا الْحُدُودْ، كَتِيرْ مِنْهُمْ يُمُوتُوا.

1 مُلوك 8:3

وَكِتْ كُلَّ شُيُوخْ بَنِي إِسْرَائِيلْ جَوْا، رُجَالْ الدِّينْ شَالَوْا الصَّنْدُوقْ.