عَدد 21:29 - الكتاب المقدس بالعربي الدارجي هنا تشاد

²⁹ يَا خَسَارِتْكِ، يَا بَلَدْ مُوَابْ! يَا شَعَبْ الْإِلٰـهْكُو كَمُوشْ، إِنْتُو أَدَّمَّرْتُوا خَلَاصْ. إِنْتُو جَعَلْتُوا أَوْلَادْكُو مَطْرُودِينْ مِنْ مَلِكْ الْأَمُورِيِّينْ وَ حَسَبْتُوا بَنَاتْكُو مَسْجُونَاتْ فِي إِيدَيْن سِيحُونْ.

عَدد 21:29 Referenca të Kryqëzuara

إرْمِيا 48:46

الْعَذَابْ لَيْكُو، يَا نَاسْ مُوَابْ! يَا إِنْتُو شَعَبْ صَنَمْ كَمُوشْ، تِوَدُّرُوا. أَشَانْ صُبْيَانْكُو وَ بَنَاتْكُو يَكُرْبُوهُمْ وَ يِوَدُّوهُمْ فِي الْغُرْبَةْ.

2 مُلوك 23:13

وَ هُو نَجَّسْ كُلَّ الْبَكَانَاتْ الْعَالِيِينْ هَنَا الْعِبَادَةْ الْمُقَابِلِينْ مَدِينَةْ الْقُدُسْ بِنُصّ الزَّيْنَةْ هَنَا حَجَرْ الدَّمَارْ. وَ الْبَكَانَاتْ دَوْل، زَمَانْ سُلَيْمَانْ مَلِكْ بَنِي إِسْرَائِيلْ بَنَاهُمْ لِعَشْتَرُوتْ الْإِلٰـهَةْ الْمُحَرَّمَةْ هِنْت نَاسْ بَلَدْ صَيْدَا وَ لِكَمُوشْ الْإِلٰـهْ الْمُحَرَّمْ هَنَا نَاسْ بَلَدْ مُوَابْ وَ لِمِلْكُومْ الصَّنَمْ الْمَكْرُوهْ هَنَا بَنِي عَمُّونْ.

قُضياء 11:24

وَ إِنْتَ مَا وَرَثْت الْأَرْض الْأَنْطَاهَا لَيْك إِلٰـهَكْ كَمُوشْ وَلَّا؟ وَ أَنِحْنَ كُلَ عِنْدِنَا حَقّ نَوْرُثُوا الْأَرْض الْأَنْطَاهَا لَيْنَا اللّٰهْ إِلٰـهْنَا.

إرْمِيا 48:7

يَا مُوَابْ! إِنْتِ أَتْوَكَّلْتِ فِي أَعْمَالْكِ وَ فِي غُنَاكِ وَ فِي شَانْ دَا، إِنْتِ كُلَ تِنْكَرْبِي. وَ صَنَمْكِ كَمُوشْ يِوَدُّوهْ فِي الْغُرْبَةْ مَعَ رُجَالْ الدِّينْ هِنَيْه وَ خَدَّامِينَهْ.

1 مُلوك 11:33

وَ نِسَوِّي مِثِلْ دَا أَشَانْ هُمَّنْ أَبَوْنِي وَ سَجَدَوْا لِعَشْتَرُوتْ إِلٰـهَةْ نَاسْ بَلَدْ صَيْدَا وَ لِكَمُوشْ صَنَمْ نَاسْ بَلَدْ مُوَابْ وَ لِمِلْكُومْ صَنَمْ بَنِي عَمُّونْ. وَ هُمَّنْ مَا تَابَعَوْا دَرْبِي وَ لَا سَوَّوْا الْعَدِيلْ قِدَّامِي وَ لَا طَبَّقَوْا شُرُوطِي وَ قَوَانِينِي مِثِلْ دَاوُدْ أَبُو سُلَيْمَانْ.

1 مُلوك 11:7

وَ فِي الْوَكِتْ دَا، سُلَيْمَانْ عَدَّلْ بَكَانْ عَالِي فِي رَاسْ الْجَبَلْ الْمُقَابِلْ مَدِينَةْ الْقُدُسْ لِكَمُوشْ الصَّنَمْ الْمُحَرَّمْ هَنَا نَاسْ مُوَابْ وَ لِمُولَكْ الصَّنَمْ الْمُحَرَّمْ هَنَا بَنِي عَمُّونْ.

إرْمِيا 48:13

وَ فِي الْوَكِتْ دَاكْ، مُوَابْ تَخْجَلْ مِنْ صَنَمْهَا كَمُوشْ مِثِلْ بَنِي إِسْرَائِيلْ خِجْلَوْا مِنْ صَنَمْهُمْ الْفِي بَيْت إِيلْ الْأَوَّلْ هُمَّنْ آمَنَوْا بَيَّهْ.»

إشَعْيا 16:2

وَ فِي مَعَدّ وَادِي أَرْنُونْ، بَنَاتْ مُوَابْ يَبْقَنْ مِثِلْ طُيُورْ الْمُشَتَّتِينْ الطَّرَدَوْهُمْ مِنْ عُشُّهُمْ.

إشَعْيا 15:5

قَلْبِي أَنْجَرَحْ لِنَاسْ مُوَابْ. الْمُعَرِّدِينْ مِنْهَا لِحْقَوْا لَحَدِّي حِلَّالْ صُوغَرْ وَ عَقْلَتْ شَلِيشَةْ. وَ قَاعِدِينْ يَطْلَعَوْا فِي قَوْز لُحِيتْ بِبَكِي وَ يَصْرَخَوْا صِرَاخْ شَدِيدْ فِي دَرِبْ حُرُنَايِمْ.

عَدد 24:17

أَنَا نِشِيفْ الْجَايِ وَ لَاكِنْ مَا يَجِي هَسَّعْ. أَنَا قَاعِدْ نِشِيفَهْ وَ لَاكِنْ مَا مِنْ قَرِيبْ. مِنْ ذُرِّيَّةْ يَعْقُوبْ تَطْلَعْ نَجْمَةْ وَ مِنْ بَنِي إِسْرَائِيلْ يَجِي مَلِكْ. بِعَصَاةْ مُلْكَهْ يَكْسِرْ جَبْهَةْ مُوَابْ وَ يَكْتُلْ كُلَّ ذُرِّيَّةْ شِيتْ.

إرْمِيا 48:45

وَ الْيِعَرُّدُوا مَا عِنْدُهُمْ قُدْرَةْ وَ يِدَوْرُوا يِنْجَمَّوْا فِي ضُلّ مَدِينَةْ حَشْبُونْ. لَاكِنْ مِنْ حَشْبُونْ تَمْرُقْ نَارْ وَ مِنْ بَلَدْ سِيحُونْ، أَمْ بَلْبَالَةْ. وَ تَحْرِقْ مُوَابْ بَلَدْ الْعُنُفْ مِنْ طَرَفْهَا لَحَدِّي أُسُطْهَا.