عَدد 11:12 - الكتاب المقدس بالعربي الدارجي هنا تشاد

¹² كُلَّ النَّاسْ دَوْل، أَنَا بَسْ وِلِدْتُهُمْ وَلَّا؟ وَ مَالَا تَامُرْنِي وَ تُقُولْ لَيِّ: ‹أَحْضِنْهُمْ فِي صَدْرَكْ مِثِلْ الْأَمّ تَحْضِنْ صَغِيرْهَا، لَحَدِّي تِوَدِّيهُمْ فِي الْأَرْض الْأَنَا وَاعَدْت بَيْهَا جُدُودْهُمْ.›

عَدد 11:12 Referenca të Kryqëzuara

إشَعْيا 49:23

وَ مُلُوكْ يِرَبُّوهُمْ وَ مَيَارِمْ يِرَضِّعَنْهُمْ. يَقَعَوْا فِي الْأَرْض وَ يَسْجُدُوا قِدَّامْكِ وَ يَلْحَسَوْا عَجَاجْ رِجِلَيْنكِ. وَ بَيْدَا، إِنْتِ تَعَرْفِي كَدَرْ أَنَا بَسْ اللّٰهْ وَ الْيُخُطّ عَشَمَهْ فَوْقِي، مَا يَلْقَى عَيْب.»

إشَعْيا 40:11

مِثِلْ الرَّاعِي، يَرْعَا غَنَمَهْ وَ بِإِيدَهْ، يِلِمّ حُمْلَانَهْ. وَ يِشِيلْهُمْ فِي حُضْنَهْ وَ يِوَدِّي الشَّوَايِلْ بِهُدُوءْ.»

1 تَسَلونِيكِي 2:7

أَنِحْنَ رُسُلْ الْمَسِيحْ وَ عِنْدِنَا حَقّ لِنَطُلْبُوا مِنْكُو شَيّءْ كَتِيرْ، لَاكِنْ أَنِحْنَ مَا شِلْنَا مِنْكُو شَيّءْ. وَكِتْ أَنِحْنَ قَاعِدِينْ فِي أُسُطْكُو، حَنَّيْنَا فَوْقكُو مِثِلْ الْأَمّ التِّحِنّ فِي عِيَالْهَا.

خُروج 13:5

اللّٰهْ حَلَفْ لِجُدُودْكُو وَ قَالْ يَنْطِيكُو بَلَدْ الْمَلَانَةْ بِاللَّبَنْ وَ الْعَسَلْ. وَ دِي بَلَدْ الْكَنْعَانِيِّينْ وَ الْحِتِّيِّينْ وَ الْأَمُورِيِّينْ وَ الْحِوِّيِّينْ وَ الْيَبُوسِيِّينْ. وَ وَكِتْ اللّٰهْ وَدَّاكُو هِنَاكْ، فِي كُلِّ سَنَةْ وَاجِبْ تِعَيُّدُوا فِي نَفْس الشَّهَرْ.

تكوين 50:24

وَ يَوْم وَاحِدْ، يُوسُفْ قَالْ لِأَخْوَانَهْ: «أَنَا قَرِيبْ نُمُوتْ لَاكِنْ أَكِيدْ الرَّبّ يِفَكِّرْ فَوْقكُو وَ يَمْرُقْكُو مِنْ مَصِرْ وَ يِوَدِّيكُو فِي الْبَلَدْ الْهُو حَلَفْ وَ قَالْ يَنْطِيهَا لِإِبْرَاهِيمْ وَ إِسْحَاقْ وَ يَعْقُوبْ.»

تكوين 26:3

وَ لَاكِنْ هَسَّعْ أَسْكُنْ فِي الْبَلَدْ دِي وَ أَنَا نُكُونْ مَعَاكْ وَ نِبَارِكَكْ. وَ نَنْطِي الْبُلْدَانْ دَوْل لَيْك إِنْتَ وَ لِذُرِّيّتَكْ وَ نِتِمّ الْكَلَامْ الْأَنَا حَلَفْت بَيَّهْ لِأَبُوكْ إِبْرَاهِيمْ.

غَلاطِية 4:19

يَا عِيَالِي النِّحِبُّكُو، أَنَا بِقِيتْ مِثِلْ أَمُّكُو الْقَاعِدَةْ نَلْدَاكُو مَرَّةْ تَانِيَةْ. أَنَا قَاعِدْ نَتْعَبْ فِي الطَّلَقَةْ لَحَدِّي تَبْقَوْا ثَابْتِينْ فِي الْمَسِيحْ.

يُوحَنَّا 10:11

«أَنَا الرَّاعِي الْعَدِيلْ. الرَّاعِي الْعَدِيلْ هُو النَّادُمْ الْيَفْدَى غَنَمَهْ بِحَيَاتَهْ.

حِزْقِيال 34:23

وَ نِجِيبْ لِغَنَمِي رَاعِي وَاحِدْ الْيَسْرَحْ بَيْهُمْ. وَ هُو يَبْقَى مِثِلْ عَبْدِي دَاوُدْ. يَسْرَحْ بَيْهُمْ وَ يَبْقَى لَيْهُمْ رَاعِي.

إشَعْيا 49:15

وَ لَاكِنْ اللّٰهْ قَالْ: «الْمَرَةْ تَنْسَى صَغِيرْهَا وَلَّا؟ وَلَّا مَا تِحِنّ فِي صَغِيرْ مُصْرَانْهَا؟ كَنْ هِي تَنْسَى صَغِيرْهَا كُلَ، أَبَداً أَنَا مَا نَنْسَاكِ!

تكوين 13:15

كُلَّ الْأَرْض التِّشِيفْهَا دِي، أَنَا نَنْطِيهَا لَيْك وَ لِذُرِّيّتَكْ إِلَى الْأَبَدْ.

1 كُرُنْتُس 4:15

أَكُونْ عِنْدُكُو نَاسْ كَتِيرِينْ الْيِدَوْرُوا يِرَبُّوكُو فِي دَرِبْ الْمَسِيحْ لَاكِنْ مَا عِنْدُكُو أَبَّهَاتْ كَتِيرِينْ. أَيْوَى، أَنَا وِحَيْدِي بِقِيتْ أَبُوكُو أَشَانْ أَنَا بَلَّغْت لَيْكُو بِشَارَةْ الْمَسِيحْ وَ بَيِّ أَنَا بَسْ، إِنْتُو دَخَلْتُوا فِي عَلَاقِتْكُو مَعَ الْمَسِيحْ عِيسَى.

تكوين 24:7

أَشَانْ اللّٰهْ رَبّ السَّمَاوَاتْ الْمَرَقَانِي مِنْ بَيْت أَبُويِ وَ مِنْ بَلَدْ عَايِلْتِي، هُو كَلَّمْ لَيِّ وَ حَلَفْ يَنْطِينِي الْبَلَدْ دِي لِذُرِّيّتِي. وَ اللّٰهْ الْحَجَّى لَيِّ دَا، يِرَسِّلْ مَلَكْ قِدَّامَكْ. وَ مِنْ هِنَاكْ بَسْ تَقْدَرْ تِجِيبْ مَرَةْ لِوِلَيْدِي.

خُروج 13:11

وَ مُوسَى قَالْ بَتَّانْ: «اللّٰهْ يِوَدِّيكُو فِي بَلَدْ الْكَنْعَانِيِّينْ مِثِلْ هُو حَلَفْ لَيْكُو وَ لِجُدُودْكُو وَ قَالْ يَنْطِيهَا لَيْكُو.

خُروج 33:1

وَ بَعَدْ دَا، بَتَّانْ اللّٰهْ قَالْ لِمُوسَى: «أَمْشِي مِنْ هِنِي إِنْتَ وَ الشَّعَبْ الْإِنْتَ مَرَقْتُهُمْ مِنْ بَلَدْ مَصِرْ. وَ قُمُّوا أَمْشُوا لِلْبَلَدْ الْأَنَا حَلَفْت لِإِبْرَاهِيمْ وَ إِسْحَاقْ وَ يَعْقُوبْ وَ قُلْت نَنْطِيهَا لِذُرِّيِّتْهُمْ.

2 مُلوك 10:1

وَ الْمَلِكْ أَخَابْ عِنْدَهْ 70 نَاسْ مِنْ عَايِلْتَهْ السَّاكْنِينْ فِي مَدِينَةْ السَّامِرَةْ. وَ يَاهُو رَسَّلْ جَوَابَاتْ فِي السَّامِرَةْ لِشُيُوخْ حِلَّةْ يَزْرَعِيلْ وَ لِكُبَارَاتْ الشَّعَبْ وَ لِلنَّاسْ الْمُكَلَّفِينْ بِتَرْبِيَةْ عِيَالْ أَخَابْ. وَ قَالْ لَيْهُمْ:

2 مُلوك 10:5

وَ خَلَاصْ، الْمَسْؤُولْ فِي قَصِرْ الْمَلِكْ وَ شَيْخ الْحِلَّةْ وَ كُبَارَاتْ الشَّعَبْ وَ النَّاسْ الْمُكَلَّفِينْ بِتَرْبِيَةْ عِيَالْ الْمَلِكْ، كُلُّهُمْ رَسَّلَوْا لِيَاهُو وَ قَالَوْا لَيَّهْ: «أَنِحْنَ عَبِيدَكْ وَ نِسَوُّوا كُلَّ شَيّءْ التَّامُرْنَا بَيَّهْ. وَ نَادُمْ وَاحِدْ كُلَ، أَنِحْنَ مَا نِدَرُّجُوهْ مَلِكْ. إِنْتَ سَوِّي كُلَّ شَيّءْ التِّدَوْرَهْ.»

خُروج 6:8

وَ وَدَّيْتكُو فِي الْبَلَدْ الْحَلَفْت نَنْطِيهَا لِإِبْرَاهِيمْ وَ إِسْحَاقْ وَ يَعْقُوبْ وَ نَنْطِيهَا لَيْكُو إِنْتُو وَرَثَةْ. أَنَا بَسْ اللّٰهْ.›»

تَثْنِية 1:31

وَ بَتَّانْ فِي الصَّحَرَاء هِنَاكْ، شِفْتُوا اللّٰهْ إِلٰـهْكُو شَالْكُو مِثِلْ رَاجِلْ يِشِيلْ وِلَيْدَهْ، فِي كُلَّ طُولْ الدَّرِبْ الْإِنْتُو رُغْتُوا فَوْقَهْ لَحَدِّي جِيتُوا فِي الْبَكَانْ دَا.»