نَحَمْيا 4:2 - الكتاب المقدس بالعربي الدارجي هنا تشاد

² وَ قَالْ قِدَّامْ أَخْوَانَهْ وَ قِدَّامْ عَسْكَرَهْ فِي بَلَدْ السَّامِرَةْ: «الْيَهُودْ الضَّعِيفِينْ دَوْل قَاعِدِينْ بِسَوُّوا شُنُو؟ صَحِيحْ كَيْ يَقْدَرَوْا يِحَقِّقُوا هَدَفْهُمْ وَ يِقَدُّمُوا ضَحَايَا وَلَّا؟ صَحِيحْ كَيْ الْيَوْم بَسْ يَقْدَرَوْا يِكَمُّلُوا الْخِدْمَةْ وَلَّا؟ وَ مِنْ الْكِيمَانْ هَنَا الْحَجَرْ الْمُكَسَّرْ وَ مُحَرَّقْ هَنَا الْبُنَى الْقَدِيمْ دَا، يَقْدَرَوْا يِشِيلُوا وَ يَبْنُوا بَيَّهْ بَتَّانْ وَلَّا؟»

نَحَمْيا 4:2 Referenca të Kryqëzuara

1 كُرُنْتُس 1:27

لَاكِنْ النَّاسْ الْجُهَّالْ حَسَبْ نَاسْ الدُّنْيَا، هُمَّنْ دَوْل بَسْ اللّٰهْ عَزَلَاهُمْ أَشَانْ يِجِيبْ الْعَيْب فِي الْحُكُمَاءْ. وَ النَّاسْ الْمَا عِنْدُهُمْ قُدْرَةْ حَسَبْ نَاسْ الدُّنْيَا، هُمَّنْ دَوْل اللّٰهْ عَزَلَاهُمْ أَشَانْ يِجِيبْ الْعَيْب فِي الْقَادْرِينْ.

زَكَرِيَّا 12:8

«وَ فِي الْيَوْم دَا، أَنَا اللّٰهْ نَحْمِي سُكَّانْ مَدِينَةْ الْقُدُسْ حَتَّى الضَّعِيفْ مِنْهُمْ كُلَ يَبْقَى شَدِيدْ مِثِلْ الْمَلِكْ دَاوُدْ. وَ ذُرِّيَّةْ دَاوُدْ يَلْقَوْا إِحْتِرَامْ مِثْلِي أَنَا الرَّبّ وَ مِثِلْ مَلَكْ اللّٰهْ الْمَاشِي قِدَّامْهُمْ.

حَبَقُوق 3:2

يَا اللّٰهْ، أَنَا سِمِعْت بَيْك وَ خُفْت. يَا اللّٰهْ، سَوِّي فِعِلَكْ فِي طُولْ السِّنِينْ وَ عَرِّفْنَا بَيَّهْ فِي طُولْ الْأَيَّامْ. وَ فِي وَكِتْ غَضَبَكْ كُلَ، أَرْحَمْنَا.

نَحَمْيا 12:43

فِي الْيَوْم دَا، دَبَحَوْا ضَحَايَا كَتِيرِينْ وَ فِرْحَوْا أَشَانْ الرَّبّ فَرَّحَاهُمْ زِيَادَةْ. وَ الْعَوِينْ وَ الْعِيَالْ كُلَ فِرْحَوْا وَ النَّاسْ قَاعِدِينْ يَسْمَعَوْا فَرْحَةْ مَدِينَةْ الْقُدُسْ مِنْ بَعِيدْ.

نَحَمْيا 4:10

وَ لَاكِنْ نَاسْ يَهُوذَا قَالَوْا: «قُدْرَةْ الْخَدَّامِينْ بِقَتْ شِيَّةْ وَ بَيْدَا، مَا نَقْدَرَوْا نَبْنُوا الدُّرْدُرْ أَشَانْ الْحَجَرْ الْمُكَسَّرْ كَتِيرْ.»

نَحَمْيا 12:27

وَ وَكِتْ كَمَّلَوْا بُنَى دُرْدُرْ مَدِينَةْ الْقُدُسْ، نَادَوْا اللَّاوِيِّينْ مِنْ حِلَّالْهُمْ أَشَانْ يَجُوا فِي الْمَدِينَةْ وَ يِعَيُّدُوا. وَ وَكِتْ اللَّاوِيِّينْ جَايِينْ، جَابَوْا مَعَاهُمْ نَقَاقِيرْ وَ جِقِنْدِيَّةْ وَ أَمْ سِبَيْبَةْ أَشَانْ يَشْكُرُوا وَ يِغَنُّوا بِفَرْحَةْ كَبِيرَةْ هَنَا كَمِّلِينْ الدُّرْدُرْ.

نَحَمْيا 6:15

وَ مِثِلْ دَا، بُنَى الدُّرْدُرْ كَمَّلْ فِي يَوْم 25 هَنَا الشَّهَرْ السَّادِسْ يَعْنِي فِي مُدَّةْ 52 يَوْم.

إرْمِيا 26:18

«فِي أَيَّامْ حُكُمْ حِزْقِيَّا مَلِكْ يَهُوذَا، مِيخَا الْمِنْ حِلَّةْ مُورَشَتْ أَتْنَبَّأْ وَ قَالْ لِكُلَّ شَعَبْ يَهُوذَا: ‹دَاهُو اللّٰهْ الْقَادِرْ قَالْ: ”صَهْيُون يَحَرْتُوهَا مِثِلْ زَرَعْ وَ مَدِينَةْ الْقُدُسْ تَبْقَى كَوْم هَنَا تُرَابْ وَ رَاسْ جَبَلْ بَيْت اللّٰهْ يَبْقَى غَابَةْ.“›»

إرْمِيا 33:24

«إِنْتَ مَا قَاعِدْ تَسْمَعْ كَلَامْ النَّاسْ دَوْل وَلَّا؟ هُمَّنْ قَاعِدِينْ بُقُولُوا: ‹الْقَبَايِلْ الْإِتْنَيْن الْهُمَّنْ بَنِي يَهُوذَا وَ بَنِي إِسْرَائِيلْ الْعَزَلَاهُمْ اللّٰهْ، هَسَّعْ دَا، هُو أَبَاهُمْ.› وَ بِكَلَامْهُمْ دَا، هُمَّنْ قَاعِدِينْ يَحْقُرُوا شَعَبِي وَ مَا يَجْعَلَوْهُمْ مِثِلْ أُمَّةْ.

زَكَرِيَّا 4:10

«مَا تَحْقُرُوا يَوْم هَنَا بِدَايَةْ صَغَيْرَةْ. تَفْرَحَوْا وَكِتْ تِشِيفُوا فِي إِيدْ زَرُبَابِلْ دُرْدُمْة الْحَدِيدْ الْيِقَاوُسُوا بَيَّهْ.» وَ النِّيرَانْ السَّبْعَةْ هَنَا الْفَانُوسْ دَوْل يِمَثُّلُوا عُيُونْ اللّٰهْ الْقَاعِدِينْ يِرَاقُبُوا كُلَّ الْأَرْض.

عَزْرا 4:4

وَ مِثِلْ دَا، نَاسْ الْبَلَدْ قَاعِدِينْ يِكَسُّلُوهُمْ لِشَعَبْ بَنِي يَهُوذَا وَ يِخَوُّفُوهُمْ لِيَدْحَرَوْهُمْ مِنْ الْبُنَى.

زَبُور 83:4

هُمَّنْ قَالَوْا: «يَلَّا! نُقُشُّوهُمْ مِنْ بَيْن الْأُمَمْ وَ أُسُمْ بَنِي إِسْرَائِيلْ بَتَّانْ مَا يِذَّكَّرَوْه.»

دَنْيال 9:25

أَعَرِفْ وَ أَفْهَمْ! الْوَكِتْ الْمُحَدَّدْ دَا يِلْقَاسَمْ مِثِلْ نُقُولَهْ لَيْك. يَمْرُقْ قَرَارْ هَنَا قَبِّلِينْ بَنِي إِسْرَائِيلْ وَ بَنِيِينْ مَدِينَةْ الْقُدُسْ بَتَّانْ. وَ مِنْ مَرِقِينْ الْقَرَارْ دَا لَحَدِّي جَايِينْ النَّادُمْ الْمَسَحَوْه وَ دَرَّجَوْه مَلِكْ، يِسَاوِي 7 فِي 7 سَنَةْ يَعْنِي 49 سَنَةْ. وَ بَعَدْ 62 فِي 7 سَنَةْ يَعْنِي 434 سَنَةْ، الْمَدِينَةْ دِي يَبْنُوهَا بَتَّانْ هِي وَ شَوَارِعْهَا وَ يِقَوُّوا دَرَادِرْهَا حَتَّى كَانْ دَا وَكْت الضِّيقَةْ كُلَ.