مِيخا 7:1 - الكتاب المقدس بالعربي الدارجي هنا تشاد

¹ يَا خَسَارْتِي! أَنَا بِقِيتْ مِثِلْ نَادُمْ الْيَقْطَعْ الْكِشَّيْب وَ الْيِلَقِّطْ الْفَضْلَةْ هَنَا الْعِنَبْ. وَ دَاهُو مَا فَضَّلْ عَنْقُودْ نَاكُلَهْ وَ لَا تِينْ النِّرِيدَهْ.

مِيخا 7:1 Referenca të Kryqëzuara

هُوشَع 9:10

«زَمَانْ، أَنَا لِقِيتْ بَنِي إِسْرَائِيلْ مِثِلْ عِنَبْ لَذِيذْ فِي الصَّحَرَاءْ. وَ شِفْت جُدُودْهُمْ حَلُوِينْ مِثِلْ فَوَاكِهْ الْأَوَّلْ فِي شَدَرَةْ التِّينْ. وَ لَاكِنْ وَكِتْ هُمَّنْ وِصْلَوْا فِي بَعَلْ فَعُورْ، عَبَدَوْا الصَّنَمْ الْيِجِيبْ الْعَيْب. وَ بِقَوْا مَكْرُوهِينْ مِثِلْ الصَّنَمْ الْمُحَرَّمْ الْعَبَدَوْه.

إشَعْيا 28:4

وَ الْمَدِينَةْ الْقَاعِدَةْ فِي رَاسْ الْوَادِي الْأَخْضَرْ، هِي الْجَمَالْهَا وَ زِينِتْهَا مِثِلْ زُهُورْ الْيَابْسِينْ، هِي تَبْقَى مِثِلْ التِّينْ الْيَلْدَ عَجَلَةْ وَ يَنْجَضْ قُبَّالْ وَكْتَهْ. الْيِشِيفْهُمْ يِشِيلْهُمْ وَ يَزْرُطْهُمْ تُشتّ!

إشَعْيا 24:13

وَ خَلَاصْ فِي أُسْط الْأَرْض وَ بَيْن الشُّعُوبْ مَا يِفَضِّلْ شَيّءْ مِثِلْ الزَّيْتُونْ بَعَدْ الْقَطِعْ وَ الْعِنَبْ الْفَضَّلْ كِشَّيْب.

إشَعْيا 17:6

الْيِفَضِّلْ مِنْهُمْ يَبْقَى شِيَّةْ مِثِلْ الْكِشَّيْب أَوْ مِثِلْ الْفَضَّلْ بَعَدْ حَتَّوْا شَدَرْ الزَّيْتُونْ. وَاحِدْ أَوْ تِنَيْن يِفَضُّلُوا فَوْق فِي رَاسْ الشَّدَرَةْ وَ أَرْبَعَةْ أَوْ خَمْسَةْ فِي الْفُرُوعْ. وَ دَا كَلَامْ اللّٰهْ إِلٰـهْ بَنِي إِسْرَائِيلْ.

إرْمِيا 45:3

‹إِنْتَ قُلْت: ”يَا خَسَارْتِي! اللّٰهْ زَادْ لَيِّ حِزِنْ فِي تَعَبِي. عِيِيتْ مِنْ الْقَنِتِينْ وَ مَا لِقِيتْ رَاحَةْ.“›

إرْمِيا 15:10

وَ إِرْمِيَا قَالْ: «يَا خَسَارْتِي! مَالَا أَمِّي وِلْدَتْنِي لِنُكُونْ رَاجِلْ هَنَا مَشَاكِلْ وَ خِلَافْ فِي كُلَّ الْبَلَدْ. أَنَا وَ لَا دَيَّنْت فُضَّةْ وَ لَا دَيَّنَوْنِي وَ بَيْدَا كُلَ، النَّاسْ يَلْعَنَوْنِي.»

إرْمِيا 4:31

أَنَا نَسْمَعْ بَكِي مِثِلْ شَكْوَةْ هَنَا مَرَةْ التِّطَالِقْ، مِثِلْ صِرَاخْ أَمْ بِكَيْرِيَّةْ التَّلْدَ. وَ دِي صَهْيُون الْمِثِلْ بِنَيَّةْ، تَصْرَخْ وَ تِنَاهِجْ وَ تِمِدّ إِيدَيْنهَا لِلْفَزَعْ. وَ تُقُولْ: «يَا خَسَارْتِي! أَنَا وَقَعْت مَيْتَةْ قِدَّامْ الْكَتَّالِينْ.»

إشَعْيا 24:16

وَ مِنْ طَرَفْ الْأَرْض، نَسْمَعَوْا غِنَيْ الْبُقُولْ: «الْمَجْد لِلّٰهْ الصَّادِقْ!» وَ لَاكِنْ أَنَا نُقُولْ: «أَنَا وَدَّرْت! أَنَا وَدَّرْت! الْعَذَابْ لَيِّ أَنَا! الْخَايْنِينْ خَانَوْا. خِيَانَةْ! الْخَايْنِينْ خَانَوْا.»

إشَعْيا 6:5

وَ خَلَاصْ، أَنَا قُلْت: «الْعَذَابْ لَيِّ! أَنَا وَدَّرْت! أَشَانْ أَنَا نَادُمْ خَشْمِي مَا طَاهِرْ وَ سَاكِنْ فِي أُسُطْ شَعَبْ خُشُومْهُمْ مَا طَاهِرِينْ. وَ عُيُونِي شَافَوْا الْمَلِكْ وَ هُو اللّٰهْ الْقَادِرْ!»

زَبُور 120:5

أَنَا آسِفْ أَشَانْ قَعَدْت فِي بَلَدْ مَاشَكْ مَعَ نَاسْ فَسْلِينْ وَ سَكَنْت فِي خِيَمْ قِدَارْ أَمْبَيْن نَاسْ هَوَانِينْ.

إرْمِيا 24:2

وَ الْقُفَّةْ الْوَاحِدَةْ مَلَانَةْ بِتِينْ سَمَحْ مِنْ النَّوْع الْعَدِيلْ. وَ لَاكِنْ الْقُفَّةْ الْآخَرَةْ مَلَانَةْ بِتِينْ مُعَفَّنْ، أَبَداً مَا بِنْأَكِلْ.

عَدد 18:13

وَ أَنَا نَنْطِيكْ إِنْتَ كُلَ أَوَّلْ إِنْتَاجْ الْيِقَدُّمُوهْ لِلّٰهْ مِنْ زِرَاعِتْهُمْ وَ كُلِّ إِنْسَانْ طَاهِرْ مِنْ أَهَلْ بَيْتَكْ يَقْدَرْ يَاكُلْ مِنَّهْ.

أمْثال 20:6

كَتِيرْ مِنْ النَّاسْ يِسْتَكْبَرَوْا وَ يُقُولُوا عِنْدُهُمْ خَيْر. وَ لَاكِنْ سِيدْ الْأَمَانْ، وَيْن بِنْلَقِي؟

إرْمِيا 5:1

وَ اللّٰهْ قَالْ: «رُوغُوا فِي شَوَارِعْ مَدِينَةْ الْقُدُسْ. شِيفُوا وَ أَسْأَلَوْا وَ فَتُّشُوا فِي النَّقَعَاتْ. هَلْ تَلْقَوْا نَادُمْ وَاحِدْ يِدَافِعْ لِلْحَقّ وَ يِفَتِّشْ الصَّحِيحْ وَلَّا؟ كَنْ لِقِيتُوهْ، خَلَاصْ أَنَا نَعَفَا الْمَدِينَةْ.