مِيخا 5:3 - الكتاب المقدس بالعربي الدارجي هنا تشاد

³ وَ اللّٰهْ يِخَلِّي شَعَبَهْ لِوَكِتْ شِيَّةْ لَحَدِّي الْمَرَةْ الْغَلْبَانَةْ تَلْدَ وِلَيْدهَا. وَ أَخْوَانَّا الْفَضَّلَوْا فِي الْغُرْبَةْ يِقَبُّلُوا مِنْ هِنَاكْ وَ يِلِمُّوا مَعَ بَنِي إِسْرَائِيلْ.

مِيخا 5:3 Referenca të Kryqëzuara

مَتَّى 1:21

وَ هِي تَلْدَ وِلَيْد وَ إِنْتَ تِسَمِّيهْ عِيسَى أَشَانْ هُو بَسْ النَّادُمْ الْيِنَجِّي شَعَبَهْ مِنْ ذُنُوبْهُمْ.»

مِيخا 4:7

وَ مِنْ الْمَعْضُورِينْ، نِسَوِّي وَاحِدِينْ يِفَضُّلُوا وَ مِنْ الْمُشَتَّتِينْ، نِسَوِّي أُمَّةْ قَوِيَّةْ. وَ فِي جَبَلْ صَهْيُون، أَنَا اللّٰهْ نَبْقَى مَلِكْهُمْ مِنْ هَسَّعْ وَ إِلَى الْأَبَدْ.

هُوشَع 11:8

«يَا أَفْرَايِمْ، كِكَّيْف نِخَلِّيكْ؟ يَا إِسْرَائِيلْ، كِكَّيْف نِسَلِّمَكْ لِلْعَدُو؟ هَلْ نِدَمِّرَكْ مِثِلْ دَمَّرْت حِلَّالْ أَدْمَةْ وَ صَبُويِيمْ وَلَّا؟ أَنَا أَلْحَيَّرْت وَ قَلْبِي حَنَّ فَوْقكُو مَرَّةْ وَاحِدْ.

مِيخا 7:13

وَ الْأَرْض تَبْقَى خَرَابْ بِسَبَبْ سُكَّانْهَا وَ دَا بِسَبَبْ نَتِيجَةْ عَمَلْهُمْ الْفَسِلْ.

هُوشَع 2:14

«وَ بَيْدَا كُلَ، نِحَجِّي لِإِسْرَائِيلْ بِكَلَامْ حَلُو وَ نِوَدِّيهَا فِي الْكَدَادَةْ وَ نِكَلِّمْ لَيْهَا بِحُبّ.

هُوشَع 2:9

وَ فِي شَانْ دَا، أَنَا نَجِي وَ نِشِيلْ قَمَحِي فِي وَكْت الْقَطِعْ وَ خَمَرِي فِي وَكْت الدَّرَتْ. وَ نَقْلَعْ مِنْهَا صُوفْ الْغَنَمْ وَ الْقُمَاشْ التَّكْسِي بَيْهُمْ نَفِسْهَا مِنْ الْعِرَيْ.

رَوْمَا 8:29

أَشَانْ النَّاسْ الْاللّٰهْ عِرِفَاهُمْ مِنْ أَوَّلْ، هُو شَالْ نِيَّةْ أَشَانْ يِسَوِّيهُمْ يِشَابُهُوا إِبْنَهْ عِيسَى الْمَسِيحْ وَ مِثِلْ دَا، إِبْنَهْ عِيسَى الْمَسِيحْ يُكُونْ الْبِكِرْ وَ مَعَايَهْ أَخْوَانْ كَتِيرِينْ.

مَتَّى 25:40

وَ الْمَلِكْ يُقُولْ لَيْهُمْ: ‹نُقُولْ لَيْكُو الْحَقّ، كَنْ سَوَّيْتُوا شَيّءْ مِثِلْ دَا لِوَاحِدْ مِنْ أَخْوَانِي الصُّغَارْ دَوْل، دَا مِثِلْ سَوَّيْتُوهْ لَيِّ أَنَا.›

مَتَّى 12:50

أَشَانْ أَيِّ نَادُمْ الْيِسَوِّي حَسَبْ أَبُويِ فِي السَّمَاءْ يِدَوْرَهْ، هُو بَسْ أَخُويِ وَ أَخْتِي وَ أَمِّي.»

مِيخا 6:14

إِنْتُو تَاكُلُوا وَ مَا تَشْبَعَوْا وَ الْجُوعْ يَسْكُنْ فِي بُطُونْكُو. إِنْتُو تَخْزُنُوا وَ مَا تَقْدَرَوْا تَحْفَضَوْه عَدِيلْ. وَ الْحَفَضْتُوهْ كُلَ، أَنَا نِسَلِّمَهْ لِلْحَرِبْ.

إرْمِيا 31:1

وَ دَاهُو كَلَامْ اللّٰهْ: «فِي الْوَكِتْ دَا، أَنَا نَبْقَى إِلٰـهْ لِكُلَّ خُشُومْ بُيُوتْ بَنِي إِسْرَائِيلْ وَ هُمَّنْ يَبْقَوْا شَعَبِي.»

إشَعْيا 11:11

وَ فِي الْيَوْم دَا، الرَّبّ يِمِدّ إِيدَهْ لِتَانِي مَرَّةْ لِيَفْدَى الْفَضَّلَوْا مِنْ شَعَبَهْ الْقَاعِدِينْ فِي بُلْدَانْ أَشُورْ وَ مَصِرْ وَ فَتْرُوسْ وَ الْحَبَشَةْ وَ عِلَامْ وَ شِنْعَارْ وَ حَمَاتْ وَ فِي جَزَايِرْ الْبَحَرْ.

2 أخبار 30:7

مَا تَبْقَوْا مِثِلْ أَبَّهَاتْكُو وَ أَخْوَانْكُو الْعِصَوْا اللّٰهْ رَبّ جُدُودْهُمْ! اللّٰهْ دَمَّرَاهُمْ مِثِلْ إِنْتُو قَاعِدِينْ تِشِيفُوهْ.

1 مُلوك 14:16

وَ اللّٰهْ يَابَاهُمْ لِبَنِي إِسْرَائِيلْ بِسَبَبْ الذَّنِبْ الْيَرُبَعَامْ سَوَّاهْ، هُو اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.»

عَمُوس 5:15

أَكْرَهَوْا الشَّرّ وَ حِبُّوا الْخَيْر وَ أَنْصُرُوا الْحَقّ فِي الشَّرِيعَةْ. وَ بَيْدَا، أَكُونْ اللّٰهْ الْإِلٰـهْ الْقَادِرْ يِحِنّ فِي الْفَضَّلَوْا مِنْ ذُرِّيَّةْ يُوسُفْ.

مِيخا 5:7

وَ الْفَضَّلَوْا مِنْ ذُرِّيَّةْ يَعْقُوبْ يُكُونُوا فِي أُسُطْ شُعُوبْ كَتِيرِينْ. يَبْقَوْا مِثِلْ مَطَرَةْ الْجَايَةْ مِنْ اللّٰهْ وَ مِثِلْ كَرَنْج فِي الْقَشّ. مَا يَرْجَوْا شَيّءْ مِنْ نَادُمْ وَ لَا يُخُطُّوا عَشَمْهُمْ فِي إِنْسَانْ.

مِيخا 5:8

وَ الْفَضَّلَوْا مِنْ ذُرِّيَّةْ يَعْقُوبْ يُكُونُوا بَيْن الْأُمَمْ فِي أُسُطْ شُعُوبْ كَتِيرِينْ. يَبْقَوْا مِثِلْ دُودْ أَمْبَيْن حَيْوَانَاتْ الْغَابَةْ وَ مِثِلْ فَرْخ الدُّودْ أَمْبَيْن دَوْر الْغَنَمْ. وَ فِي أَيِّ بَكَانْ الْيَمْشِي، يَكْتُلْ وَ يِشَرِّطْ وَ مَا فِي نَادُمْ الْيِخَلِّصْ مِنَّهْ.

زَبُور 67:3

يَا رَبّ! خَلِّي كُلَّ الشُّعُوبْ يَشْكُرُوكْ! أَيْوَى، كُلُّهُمْ يِمَجُّدُوكْ!

إشَعْيا 49:6

وَ اللّٰهْ قَالْ: «دَا شِيَّةْ لَيْك تَبْقَى عَبْدِي وَ تِثَبِّتْ قَبَايِلْ يَعْقُوبْ وَ تِقَبِّلْ الْفَضَّلَوْا مِنْ بَنِي إِسْرَائِيلْ. زِيَادَةْ مِنْ دَا، أَنَا نِسَوِّيكْ نُورْ لِلْأُمَمْ أَشَانْ نَجَاتِي تَلْحَقْ لَحَدِّي طَرَفْ الْأَرْض.»

إرْمِيا 23:5

وَ دَاهُو كَلَامْ اللّٰهْ: «أَكِيدْ يَجِي يَوْم وَاحِدْ، أَنَا نِقَوِّمْ نَادُمْ صَالِحْ مِنْ ذُرِّيَّةْ دَاوُدْ مِثِلْ بِذْرَةْ. وَ النَّادُمْ دَا، أَنَا بَسْ نِدَرِّجَهْ مَلِكْ وَ هُو يَحْكِمْ بِحِكْمَةْ وَ يِجِيبْ الْحَقّ وَ الْعَدَالَةْ فِي الْبَلَدْ.

حِزْقِيال 34:16

الْغَنَمَايْ الرَّايْحَةْ، نِفَتِّشْهَا وَ الْمُوَدِّرَةْ، نِجِيبْهَا وَ الرِّجِلْهَا مَكْسُورَةْ، نَرْبُطْهَا وَ الضَّعِيفَةْ، نِقَوِّيهَا. وَ لَاكِنْ التِّسَمِّنْ نَفِسْهَا أَوْ التِّوَصِّفْ قُدْرِتْهَا، نِدَمِّرْهَا. وَ نَسْرَحْ بِغَنَمِي بِعَدَالَةْ.»

مِيخا 4:4

وَ أَيِّ نَادُمْ يَقْعُدْ فِي جِنَيْنِتَهْ هَنَا الْعِنَبْ وَ تِحِتْ شَدَرَتَهْ هَنَا التِّينْ. وَ مَا فِي نَادُمْ يِبَشْتِنَهْ أَشَانْ اللّٰهْ الْقَادِرْ بَسْ قَرَّرَهْ.

زَكَرِيَّا 10:6

«أَنَا نِقَوِّي بَنِي يَهُوذَا وَ نِنَجِّي ذُرِّيَّةْ يُوسُفْ. وَ نِقَبِّلْهُمْ فِي بَلَدْهُمْ أَشَانْ حَنَّيْت فَوْقهُمْ مِثِلْ أَوَّلْ أَبَداً مَا أَبَيْتهُمْ. أَشَانْ أَنَا اللّٰهْ إِلٰـهُّمْ وَ نَقْبَلْ صَلَاتْهُمْ.