مِيخا 4:8 - الكتاب المقدس بالعربي الدارجي هنا تشاد

⁸ يَا جَبَلْ صَهْيُون الْمِثِلْ بِنَيَّةْ، إِنْتَ تِرَاقِبْ شَعَبَكْ مِنْ فَوْق مِثِلْ قَصِرْ الْحُرَّاسْ هَنَا الْغَنَمْ. سُلْطِتَكْ الْأَوَّلْ تِقَبِّلْ لَيْك وَ بَتَّانْ مَدِينَةْ الْقُدُسْ الْمِثِلْ بِنَيَّةْ تَبْقَى عَاصِمَةْ مَمْلَكَةْ.»

مِيخا 4:8 Referenca të Kryqëzuara

إشَعْيا 1:26

نِجِيبْ لَيْكِ قُضْيَاءْ مِثِلْ أَوَّلْ وَ مُسْتَشَارِينْ مِثِلْ فِي الْبِدَايَةْ. وَ بَعَدْ دَا، يِنَادُوكِ مَدِينَةْ الْعَدَالَةْ وَ حِلَّةْ الْأَمَانْ.

زَكَرِيَّا 9:10

أَنَا نِدَمِّرْ عَرَبَاتْ الْحَرِبْ فِي تُرَابْ أَفْرَايِمْ وَ خَيْل الدُّوَاسْ فِي مَدِينَةْ الْقُدُسْ وَ نِكَسِّرْ نُبَّالْ الْحَرِبْ. وَ الْمَلِكْ دَا يِكَلِّمْ بِالسَّلَامْ لِلْأُمَمْ وَ سُلْطِتَهْ تَمْشِي مِنْ الْبَحَرْ الْمَيِّتْ لَحَدِّي الْبَحَرْ الْأَبْيَضْ وَ مِنْ بَحَرْ الْفُرَاتْ لَحَدِّي آخِرْ الْأَرْض.»

رُؤية 22:5

وَ بَتَّانْ الْوَطَاةْ أَبَداً مَا تَبْقَى لَيْل وَ مَا يِدَوْرُوا بَتَّانْ ضَيّ وَ لَا الْحَرَّايْ أَشَانْ رَبُّهُمْ اللّٰهْ يَبْقَى ضَيُّهُمْ وَ عَبِيدْ اللّٰهْ يَحْكُمُوا مَعَايَهْ إِلَى الْأَبَدْ.

زَكَرِيَّا 9:12

يَا الْمَسَاجِينْ الْعِنْدُكُو عَشَمْ، قَبُّلُوا فِي الْبَكَانْ الْقَوِي. هَسَّعْ نِخَبِّرْكُو كَدَرْ نِكَفِّيكُو تَعَبْكُو مَرَّتَيْن.

عُبَدْيا 1:21

وَ الْمُنَجِّيِينْ يَطْلَعَوْا جَبَلْ صَهْيُون وَ يَحْكُمُوا جِبَالْ ذُرِّيَّةْ عِيسُو. وَ الْمُلُكْ يُكُونْ لِلّٰهْ!

تكوين 35:21

وَ يَعْقُوبْ الْبِنَادُوهْ إِسْرَائِيلْ حَوَّلْ مِنْ الْبَكَانْ دَا وَ مَشَى بَنَى خَيْمِتَهْ قِدَّامْ مِنْ مِقْدَلْ عِدَرْ.

أفَسُس 1:21

الْمَسِيحْ قَاعِدْ فِي بَكَانْ عَالِي بِلْحَيْن مِنْ كُلَّ الْحُكَّامْ وَ الْكُبَارَاتْ وَ مِنْ كُلَّ شَيّءْ الْعِنْدَهْ قُدْرَةْ وَلَّا مُلُكْ. أُسْمَهْ عَالِي مِنْ كُلَّ أُسُمْ الْيَطْرُوهْ النَّاسْ، مَا فِي الدُّنْيَا بَسْ لَاكِنْ فِي الْآخِرَةْ كُلَ.

مَرْخُوس 12:1

وَ فِي الْبَكَانْ دَا، عِيسَى قَمَّ يِحَجِّي لَيْهُمْ بِأَمْثَالْ وَ قَالْ: «نَادُمْ وَاحِدْ مَقَّنْ عِنَبْ فِي جِنَيْنَةْ. وَ زَرَبَاهَا وَ سَوَّى فَوْقهَا عَصَّارَةْ هَنَا عِنَبْ وَ بَنَى بَيْت هَنَا حَرَاسَةْ. وَ هُو أَجَّرْ حَرَّاتِينْ أَشَانْ يَخْدُمُوا فَوْقهَا وَ خَلَاصْ خَطَرْ وَ مَشَى فِي بَلَدْ آخَرَةْ.

دَنْيال 2:44

«وَ فِي وَكِتْ الْمُلُوكْ دَوْل، اللّٰهْ رَبّ السَّمَاوَاتْ يِأَسِّسْ مَمْلَكَةْ الْأَبَداً مَا تِدَّمَّرْ وَ مَا فِي شَعَبْ آخَرْ يِسْتَعْمَرْهَا. وَ هِي تِدَمِّرْ وَ تَرْحَكْ كُلَّ الْمَمَالِكْ دَوْل وَ تَقْعُدْ إِلَى الْأَبَدْ.

2 صَمُوِيل 5:7

وَ بَيْدَا كُلَ، دَاوُدْ شَالْ بَكَانْهُمْ الْقَوِي الْأُسْمَهْ صَهْيُون. وَ الْبَكَانْ دَا، سَمَّوْه مَدِينَةْ دَاوُدْ.

عَدد 24:19

وَ يَجِي مَلِكْ قَوِي مِنْ ذُرِّيَّةْ يَعْقُوبْ وَ يِدَمِّرْ النَّاسْ الْفَضَّلَوْا فِي الْمَدِينَةْ.»

مَتَّى 21:33

«أَسْمَعَوْا، نُقُولْ لَيْكُو مَثَلْ آخَرْ. نَادُمْ وَاحِدْ سِيدْ الْمَالْ مَقَّنْ عِنَبْ فِي جِنَيْنَةْ وَ زَرَبَاهَا وَ سَوَّى فَوْقهَا عَصَّارَةْ هَنَا عِنَبْ وَ بَنَى بَيْت هَنَا حَرَاسَةْ. وَ هُو أَجَّرْ حَرَّاتِينْ أَشَانْ يَخْدُمُوا فَوْقهَا وَ خَلَاصْ خَطَرْ وَ مَشَى فِي بَلَدْ آخَرَةْ.

دَنْيال 7:18

وَ لَاكِنْ الصَّالِحِينْ نَاسْ اللّٰهْ الْعَالِي يَلْقَوْا الْمَمْلَكَةْ وَ يِشِيلُوهَا مَرَّةْ وَاحِدْ إِلَى الْأَبَدْ.»

إشَعْيا 5:2

هُو حَرَتْ الْأَرْض وَ مَرَقْ حُجَارْهَا وَ شَالْ أَحْسَنْ مَقَنْ وَ مَقَّنَهْ. وَ بَنَى بَيْت طَوِيلْ لِلْمُرَاقَبَةْ فِي لُبّ الْجِنَيْنَةْ وَ فِي الْحَجَرْ، سَوَّى عَصَّارَةْ. عِنْدَهْ عَشَمْ يَلْقَى عِنَبْ عَدِيلْ وَ لَاكِنْ جِنَيْنِتَهْ أَنْتَجَتْ إِلَّا عِنَبْ تَلْفَانْ.

إشَعْيا 10:32

وَ فِي نَفْس الْيَوْم، عَسْكَرْ أَشُورْ يَقِيفُوا فِي حِلَّةْ نُوبْ وَ يَرْفَعَوْا إِيدَيْهُمْ ضِدّ جَبَلْ صَهْيُون الْمِثِلْ بِنَيَّةْ وَ دَا حَجَرْ الْفَوْقَهْ مَدِينَةْ الْقُدُسْ.

زَبُور 48:3

وَ فِي قُصُورْ صَهْيُون، الرَّبّ مَعْرُوفْ مِثِلْ مَلْجَأْ قَوِي.

زَبُور 61:3

أَشَانْ إِنْتَ مَلْجَئِي وَ بَيْت الْمُرَاقَبَةْ قِدَّامْ عُدْوَانِي.

مِيخا 2:12

وَ اللّٰهْ قَالْ: «أَكِيدْ أَنَا نِلِمُّكُو كُلُّكُو، يَا ذُرِّيَّةْ يَعْقُوبْ وَ نَجْمَعْكُو كُلُّكُو الْفَضَّلْتُوا مِنْ بَنِي إِسْرَائِيلْ. وَ نِجِيبْكُو سَوَا مِثِلْ غَنَمْ فِي الزَّرِيبَةْ وَ مِثِلْ دَوْر فِي أُسْط الْمَرْعَى. وَ تَبْقَوْا مَجْمُوعَةْ كَبِيرَةْ الْعِنْدَهَا حَرَكَةْ.

نَحَمْيا 3:25

وَ فَلَالْ وِلَيْد أُزَايْ قَاعِدْ يَبْنِي الدُّرْدُرْ مِنْ الْبَكَانْ الْمُقَوَّسْ دَا وَ مِنْ بَيْت الْمُرَاقَبَةْ الْمُقَوَّسْ هَنَا فَضَايَةْ الْحُرَّاسْ هَنَا قَصِرْ الْمَلِكْ. وَ جَنْبَهْ فَدَايَا وِلَيْد فَرْعُوشْ.

زَبُور 24:7

أَنْفَتْحُوا، يَا بِيبَانْ! أَنْفَتْحُوا، يَا مَدَاخِلْ الدَّايْمِينْ! وَ خَلِّي يَدْخُلْ فَوْقكُو الْمَلِكْ الْعَظِيمْ.

نشيد 4:4

وَ رَقَبَتْكِ طَوِيلَةْ مِثِلْ بَيْت الْمُرَاقَبَةْ هَنَا دَاوُدْ. وَ زِينِتْهَا تِشَابِهْ الْأَلِفْ دَرَقْ الْمُعَلَّقِينْ فِي الْبَيْت دَا رَوْق بَعَدْ رَوْق.

زَكَرِيَّا 9:9

«يَا صَهْيُون الْمِثِلْ بِنَيَّةْ، أَفْرَحَيْ زِيَادَةْ! عِيطِي بِفَرَحْ، يَا مَدِينَةْ الْقُدُسْ الْمِثِلْ بِنَيَّةْ! دَاهُو مَلِكِّ جَايِ لَيْكِ. هُو عَادِلْ وَ مُنَّصِرْ. هُو مِسْكِينْ وَ رَاكِبْ فِي حُمَارْ، فِي دَحَشْ وِلَيْد حُمَارَةْ.