مِيخا 4:1 - الكتاب المقدس بالعربي الدارجي هنا تشاد

¹ وَ فِي آخِرْ الْوَكِتْ، جَبَلْ بَيْت اللّٰهْ يَثْبِتْ فِي رُوسَيْ الْجِبَالْ وَ يَبْقَى عَالِي مِنْ كُلَّ الْحُجَارْ. وَ الشُّعُوبْ يَجُوا لَيَّهْ بِكَتَرَةْ مِثِلْ أَلْمِي الْجَارِي.

مِيخا 4:1 Referenca të Kryqëzuara

إرْمِيا 3:17

وَ فِي الْوَكِتْ دَاكْ، مَدِينَةْ الْقُدُسْ يِنَادُوهَا عَرْش اللّٰهْ وَ كُلَّ الْأُمَمْ يِلِمُّوا فِي مَدِينَةْ الْقُدُسْ بِأُسْمِي أَنَا اللّٰهْ وَ بَتَّانْ مَا يِقَوُّوا رُوسَيْهُمْ فِي الْفَسَالَةْ.

زَبُور 22:27

كُلَّ أُمَمْ الْأَرْض يِذَّكَّرَوْا اللّٰهْ وَ يَسْمَعَوْا كَلَامَهْ وَ كُلَّ الْعَايِلَاتْ وَ الْأُمَمْ يَسْجُدُوا قِدَّامَهْ.

زَكَرِيَّا 8:3

وَ دَاهُو اللّٰهْ قَالْ: «أَنَا نِقَبِّلْ فِي جَبَلْ صَهْيُون وَ نَسْكُنْ بَتَّانْ فِي أُسُطْ مَدِينَةْ الْقُدُسْ. وَ مَدِينَةْ الْقُدُسْ يِنَادُوهَا مَدِينَةْ الْأَمَانْ. وَ جَبَلْ اللّٰهْ الْقَادِرْ يِنَادُوهْ الْجَبَلْ الْمُقَدَّسْ.»

زَبُور 86:9

كُلَّ الْأُمَمْ الْإِنْتَ خَلَقْتُهُمْ يَجُوا يَسْجُدُوا قِدَّامَكْ، يَا رَبّ، وَ يِمَجُّدُوا أُسْمَكْ.

أعمال الرُسُل 2:17

هُو قَالْ: <فِي الزَّمَنْ الْأَخِيرْ، أَنَا نِنَزِّلْ رُوحِي فِي كُلَّ النَّاسْ. وَ دَا بَسْ كَلَامْ اللّٰهْ. أَوْلَادْكُو وَ بَنَاتْكُو يِتْنَبَّأَوْا وَ صُبْيَانْكُو يِشِيفُوا رُؤْيَةْ وَ شِيَّابْكُو يَحْلَمَوْا بِحِلِمْ.

هُوشَع 3:5

وَ بَعَدْ دَا، بَنِي إِسْرَائِيلْ يِقَبُّلُوا يِتَابُعُوا اللّٰهْ إِلٰـهُّمْ وَ مَلِكْهُمْ الْمِنْ ذُرِّيَّةْ دَاوُدْ. وَ فِي آخِرْ الْوَكِتْ، يَخَافَوْا مِنْ اللّٰهْ وَ يَلْقَوْا خَيْرَهْ.

حِزْقِيال 43:12

وَ دَاهُو قَانُونْ الْبَيْت. كُلَّ رَاسْ الْجَبَلْ دَا وَ كُلَّ حُدُودَهْ فِي كُلِّ جِيهَةْ مُقَدَّسْ مَرَّةْ وَاحِدْ. أَيْوَى، دَا قَانُونْ الْبَيْت الْمُقَدَّسْ.»

مَلاخِـي 1:11

«مِنْ بَكَانْ طَلُوعْ الْحَرَّايْ لَحَدِّي بَكَانْ وَقُوعْهَا، أُسْمِي كَبِيرْ فِي أُسْط الْأُمَمْ. وَ فِي أَيِّ بَكَانْ، يِحَرُّقُوا لَيِّ بَخُورْ وَ يِجِيبُوا ضَحِيَّةْ طَاهِرَةْ أَشَانْ أُسْمِي كَبِيرْ فِي أُسْط الْأُمَمْ. وَ دَا، اللّٰهْ الْقَادِرْ بَسْ قَالَهْ.

زَكَرِيَّا 2:11

وَ فِي الْيَوْم دَا، أُمَمْ كَتِيرِينْ يِنْكَرْبُوا فَوْقِي أَنَا اللّٰهْ. وَ يَبْقَوْا شَعَبِي حَلَالِي. وَ أَنَا نَسْكُنْ فِي أُسُطْكُو.» وَ بَيْدَا، تَعَرْفُوا كَدَرْ اللّٰهْ الْقَادِرْ، هُو بَسْ رَسَّلَانِي لَيْكُو.

إشَعْيا 54:2

«وَسِّعِي بَكَانْ خَيْمِتْكِ وَ فِلِّي قِطَعْ مَسْكَنْكِ بَلَا حِسَابْ وَ طَوِّلِي حُبَالْهَا وَ ثَبِّتِي وُتَادْهَا.

رُؤية 20:4

وَ شِفْت كَرَاسِي وَ الْقَاعِدِينْ فَوْقهُمْ الْكَلَّفَوْهُمْ بِالشَّرِيعَةْ. وَ شِفْت النَّاسْ الْقَطَعَوْا رُوسَيْهُمْ أَشَانْ تَابَعَوْا شَهَادَةْ عِيسَى وَ كَلَامْ اللّٰهْ وَ النَّاسْ الْمَا سَجَدَوْا لِلْحَيْوَانْ الْفَسِلْ وَ لَا صَنَمَهْ وَ مَا قِبْلَوْا وَسْمَهْ وَ لَا فِي جَبْهَاتْهُمْ وَ لَا فِي إِيدَيْهُمْ. وَ هُمَّنْ حِيَوْا وَ حَكَمَوْا مَعَ الْمَسِيحْ مُدَّةْ أَلِفْ سَنَةْ.

رُؤية 11:15

وَ أَنَا شِفْت الْمَلَكْ السَّابِعْ ضَرَبْ الْبُرُنْجِي الْعِنْدَهْ. وَ فِي السَّمَاوَاتْ، أَصْوَاتْ شُدَادْ أَنْسَمَعَوْا وَ قَالَوْا: «خَلَاصْ، مَمْلَكَةْ الدُّنْيَا بِقَتْ مَمْلَكَةْ هَنَا رَبِّنَا اللّٰهْ وَ هَنَا الْمَسِيحْ الْاللّٰهْ عَزَلَهْ. وَ هُو يَمْلُكْهَا دَايْماً وَ إِلَى الْأَبَدْ.»

عِبْرَانِيِّين 1:2

وَ هَسَّعْ فِي الزَّمَنْ الْأَخِيرْ، اللّٰهْ كَلَّمْ لَيْنَا بِوَاسِطَةْ إِبْنَهْ الْهُو جَعَلَهْ وَرِيثْ هَنَا كُلَّ شَيّءْ. وَ بَيَّهْ هُو بَسْ، اللّٰهْ خَلَقْ كُلَّ شَيّءْ.

دَنْيال 7:27

وَ الْمُلُكْ وَ السُّلْطَةْ وَ الْعَظَمَةْ هَنَا كُلَّ الْمَمَالِكْ الْقَاعِدِينْ فِي الْأَرْض، يَنْطُوهُمْ لِلشَّعَبْ الصَّالِحِينْ هَنَا اللّٰهْ الْعَالِي. وَ مَمْلَكَةْ اللّٰهْ تَقْعُدْ إِلَى الْأَبَدْ وَ كُلَّ النَّاسْ الْعِنْدُهُمْ سُلْطَةْ يَعَبُدُوا اللّٰهْ وَ يَسْمَعَوْا كَلَامَهْ.»

دَنْيال 2:44

«وَ فِي وَكِتْ الْمُلُوكْ دَوْل، اللّٰهْ رَبّ السَّمَاوَاتْ يِأَسِّسْ مَمْلَكَةْ الْأَبَداً مَا تِدَّمَّرْ وَ مَا فِي شَعَبْ آخَرْ يِسْتَعْمَرْهَا. وَ هِي تِدَمِّرْ وَ تَرْحَكْ كُلَّ الْمَمَالِكْ دَوْل وَ تَقْعُدْ إِلَى الْأَبَدْ.

إشَعْيا 49:6

وَ اللّٰهْ قَالْ: «دَا شِيَّةْ لَيْك تَبْقَى عَبْدِي وَ تِثَبِّتْ قَبَايِلْ يَعْقُوبْ وَ تِقَبِّلْ الْفَضَّلَوْا مِنْ بَنِي إِسْرَائِيلْ. زِيَادَةْ مِنْ دَا، أَنَا نِسَوِّيكْ نُورْ لِلْأُمَمْ أَشَانْ نَجَاتِي تَلْحَقْ لَحَدِّي طَرَفْ الْأَرْض.»

رُؤية 15:4

يَا اللّٰهْ، كِكَّيْف نَادُمْ مَا يَخَافْ مِنَّكْ وَ مَا يِمَجِّدْ أُسْمَكْ؟ أَشَانْ إِنْتَ وِحَيْدَكْ بَسْ قُدُّوسْ. كُلَّ الْأُمَمْ يَجُوا وَ يَسْجُدُوا لَيْك أَشَانْ شَافَوْا عَدَالْتَكْ فِي الشَّيّءْ السَّوَّيْتَهْ.»

مِيخا 3:12

وَ فِي شَانْ دَا، بِسَبَبْكُو إِنْتُو، صَهْيُون يَحَرْتُوهَا مِثِلْ زَرَعْ وَ مَدِينَةْ الْقُدُسْ تَبْقَى كَوْم هَنَا تُرَابْ وَ رَاسْ جَبَلْ بَيْت اللّٰهْ يَبْقَى غَابَةْ.

دَنْيال 7:18

وَ لَاكِنْ الصَّالِحِينْ نَاسْ اللّٰهْ الْعَالِي يَلْقَوْا الْمَمْلَكَةْ وَ يِشِيلُوهَا مَرَّةْ وَاحِدْ إِلَى الْأَبَدْ.»

دَنْيال 7:14

وَ أَنْطَوْا لِإِبْن الْإِنْسَانْ دَا سُلْطَةْ وَ مَجْد وَ مُلُكْ أَشَانْ يَعَبُدُوهْ كُلَّ النَّاسْ مِنْ الشُّعُوبْ وَ الْأُمَمْ وَ اللُّغَّاتْ. وَ سُلْطِتَهْ هِي سُلْطَةْ دَايْمَةْ وَ مَمْلَكَتَهْ أَبَداً مَا تِدَّمَّرْ.

دَنْيال 2:35

وَ خَلَاصْ، الْحَدِيدْ وَ الطِّينَةْ وَ النَّحَاسْ وَ الْفُضَّةْ وَ الدَّهَبْ أَنْرَحَكَوْا دَقِيقْ وَ بِقَوْا مِثِلْ أُتَّابْ الرِّيحْ شَالَتَهْ، مَا فَضَّلْ مِنَّهْ شَيّءْ. وَ الْحَجَرْ الضَّرَبْ الصَّنَمْ دَا كَمَانْ بِقِي جَبَلْ كَبِيرْ وَ سَدَّ كُلَّ الْأَرْض.»

دَنْيال 2:28

لَاكِنْ أَعَرِفْ كَدَرْ اللّٰهْ رَبّ السَّمَاوَاتْ يَكْشِفْ الْأَسْرَارْ. وَ هَسَّعْ، هُو وَصَّفْ لِلْمَلِكْ نَبُوخَدْنَصَرْ الشَّيّءْ الْيَبْقَى فِي الْأَيَّامْ الْجَايِينْ. وَ دَاهُو الْحِلِمْ وَ الرُّؤْيَةْ الْإِنْتَ شِفْتَهْ وَكِتْ إِنْتَ نَايِمْ فِي فُرَاشَكْ.

حِزْقِيال 40:2

وَ فِي الرُّؤْيَةْ الْإِلٰـهِيَّةْ دِي، اللّٰهْ وَدَّانِي فِي بَلَدْ إِسْرَائِيلْ وَ خَطَّانِي فِي جَبَلْ عَالِي مَرَّةْ وَاحِدْ الْفَوْقَهْ مَبْنِيَّةْ مِثِلْ حِلَّةْ فِي نُصَّهْ الْجُنُوبِي.

حِزْقِيال 38:16

وَ تَهْجُمُوا شَعَبِي بَنِي إِسْرَائِيلْ لَحَدِّي تِغَطُّوا الْبَلَدْ مِثِلْ سَحَابَايْ. وَ دَا يَبْقَى فِي آخِرْ الْوَكِتْ. يَا جُوجْ، أَنَا نِجِيبَكْ ضِدّ بَلَدِي وَ بَيْك إِنْتَ، نِوَصِّفْ قَدَاسْتِي قِدَّامْ الْأُمَمْ أَشَانْ يَعَرْفُونِي.“›»

إرْمِيا 48:47

وَ لَاكِنْ فِي الأَخِيرْ، نِقَبِّلْ نَاسْ مُوَابْ الْوَدَّوْهُمْ فِي الْغُرْبَةْ.» وَ دَا كَلَامْ اللّٰهْ. وَ خَلَاصْ، هِنِي بَسْ كَمَّلَتْ مُحَاكَمَةْ اللّٰهْ لِمُوَابْ.

إرْمِيا 16:19

يَا اللّٰهْ! إِنْتَ قُدُرْتِي وَ بَكَانِي الْقَوِي وَ إِنْتَ مَلْجَئِي فِي يَوْم الضِّيقَةْ. لَيْك إِنْتَ يَجُوا الْأُمَمْ مِنْ آخِرْ الْأَرْض وَ يُقُولُوا: «جُدُودْنَا وَرَثَوْا إِلَّا إِلٰـهَاتْ غَشَّاشِينْ وَ هُمَّنْ الزَّايْلِينْ الْمَا عِنْدُهُمْ فَايْدَةْ.

إشَعْيا 43:6

نُقُولْ لِلْمُنْشَاقْ: ‹أَنْطِيهُمْ لَيِّ!› وَ لِلْجُنُوبْ: ‹مَا تَكْرُبْهُمْ! مِنْ بَعِيدْ، جِيبْ أَوْلَادِي! وَ مِنْ طَرَفْ الْأَرْض، جِيبْ بَنَاتِي!

إشَعْيا 27:13

وَ فِي الْيَوْم دَا، يَضُرْبُوا الْبُوقْ الْكَبِيرْ. وَ خَلَاصْ، يَجُوا الْوَدَّرَوْا فِي بَلَدْ أَشُورْ وَ الْمُشَتَّتِينْ فِي بَلَدْ مَصِرْ. وَ هُمَّنْ يَسْجُدُوا قِدَّامْ اللّٰهْ فِي الْجَبَلْ الْمُقَدَّسْ، فِي مَدِينَةْ الْقُدُسْ.

زَبُور 110:3

وَ بِنِيِّتْهُمْ، كُلَّ شَعَبَكْ يَقِيفُوا مَعَاكْ وَكِتْ تِجَهِّزْ عَسْكَرَكْ فِي الْجِبَالْ الْمُقَدَّسِينْ. وَ الشَّبَابْ يَجُوا لَيْك كَتِيرِينْ وَ يِرَارُوا قِدَّامَكْ مِثِلْ كَرَنْج الْفَجُرْ.

تكوين 49:10

عَصَاةْ الْمُلُكْ تَقْعُدْ فِي عَايِلَةْ يَهُوذَا وَ عَصَاةْ الْحُكُمْ كُلَ مَا تَمْرُقْ مِنْ إِيدَيْهُمْ لَحَدِّي يَجِي النَّادُمْ الْوَاجِبْ لَيَّهْ الْمُلُكْ. وَ كُلَّ الشُّعُوبْ يِكَرُّمُوهْ.

تكوين 49:1

وَ بَعَدْ دَا، يَعْقُوبْ قَالْ لِعِيَالَهْ: «لِمُّوا تَعَالُوا، أَنَا نِبَارِكُّو وَ نِخَبِّرْكُو بِالشَّيّءْ الْبَعَدَيْن يُكُونْ لَيْكُو.

2 بُطْرُس 3:3

وَ دَاهُو أَوَّلْ شَيّءْ الْوَاجِبْ تَفْهَمَوْه. فِي الزَّمَنْ الْأَخِيرْ شَمَّاتِينْ يُقُمُّوا وَ يِشَّمَّتَوْا. وَ يِتَابُعُوا شَهْوَاتْهُمْ بَسْ.

دَنْيال 10:14

وَ هَسَّعْ، جِيتْ نِفَسِّرْ لَيْك الشَّيّءْ الْيُكُونْ لِشَعَبَكْ بَعَدَيْن أَشَانْ الرُّؤْيَةْ دِي تُخُصّ آخِرْ الْوَكِتْ.»

دَنْيال 7:22

لَاكِنْ الشَّايِبْ كَبِيرْ السِّنّ جَاءْ وَ حَكَمْ وَ سَاعَدْ الصَّالِحِينْ نَاسْ اللّٰهْ الْعَالِي. وَ مِثِلْ دَا خَلَاصْ، وَكْت الصَّالِحِينْ جَاءْ وَ هُمَّنْ شَالَوْا الْمَمْلَكَةْ.

زَبُور 48:1

اللّٰهْ هُو عَظِيمْ وَ وَاجِبْ لَيَّهْ الْحَمْد فِي مَدِينَةْ إِلٰـهْنَا، فِي جَبَلَهْ الْمُقَدَّسْ.

إشَعْيا 56:7

النَّاسْ دَوْل، أَنَا نِوَدِّيهُمْ فِي جَبَلِي الْمُقَدَّسْ وَ نِفَرِّحْهُمْ فِي بَيْتِي، بَيْت الصَّلَاةْ. وَ نَرْضَى بِضَحَايَاهُمْ الْمُحَرَّقِينْ وَ ضَحَايَاهُمْ الْآخَرِينْ الْهُمَّنْ يِقَدُّمُوهُمْ فِي مَدْبَحِي. أَشَانْ بَيْتِي يِسَمُّوهْ بَيْت الصَّلَاةْ لِكُلَّ الشُّعُوبْ.»

إرْمِيا 26:18

«فِي أَيَّامْ حُكُمْ حِزْقِيَّا مَلِكْ يَهُوذَا، مِيخَا الْمِنْ حِلَّةْ مُورَشَتْ أَتْنَبَّأْ وَ قَالْ لِكُلَّ شَعَبْ يَهُوذَا: ‹دَاهُو اللّٰهْ الْقَادِرْ قَالْ: ”صَهْيُون يَحَرْتُوهَا مِثِلْ زَرَعْ وَ مَدِينَةْ الْقُدُسْ تَبْقَى كَوْم هَنَا تُرَابْ وَ رَاسْ جَبَلْ بَيْت اللّٰهْ يَبْقَى غَابَةْ.“›»

إرْمِيا 31:12

هُمَّنْ يِقَبُّلُوا وَ يِزَغْرُطُوا فِي جَبَلْ صَهْيُون. وَ يَفْرَحَوْا بِخَيْر اللّٰهْ، بِالْقَمَحْ وَ الْخَمَرْ الْجَدِيدْ وَ الدِّهِنْ وَ الْبَقَرْ وَ الْغَنَمْ. وَ حَيَاتْهُمْ سَمْحَةْ مِثِلْ جِنَيْنَةْ مَزْقِيَّةْ وَ بَتَّانْ مَا يَتْعَبَوْا.

زَكَرِيَّا 14:10

وَ كُلَّ الْبَلَدْ تِغَيِّرْ وَ تَبْقَى مُسْتَوِيَةْ وَ خَضْرَةْ مِنْ قَبَعْ فِي الْمُنْشَاقْ لَحَدِّي رِمُّونْ جُنُوبْ مَدِينَةْ الْقُدُسْ. وَ لَاكِنْ مَدِينَةْ الْقُدُسْ تُكُونْ فِي الْعَالِي فِي بَكَانْهَا. وَ حُدُودْهَا يَمْشُوا مِنْ بَابْ بَنْيَامِينْ لَحَدِّي الْبَابْ الْقَدِيمْ وَ لَحَدِّي بَابْ الرُّكُنْ. وَ يَمْشُوا مِنْ بَيْت الْمُرَاقَبَةْ هَنَا حَنَنِيلْ لَحَدِّي عَصَّارَاتْ الْعِنَبْ هَنَا الْمَلِكْ.