لُوقا 10:2 - الكتاب المقدس بالعربي الدارجي هنا تشاد

² وَ قَالْ لَيْهُمْ: «النَّاسْ مِثِلْ زَرَعْ كَبِيرْ وَ غَلِّتَهْ نِجْضَتْ خَلَاصْ وَ لَاكِنْ الْيَخْدُمُوا فَوْقَهْ شِيَّةْ. أَشَانْ دَا، أَسْأَلَوْا سِيدْ الزَّرَعْ أَشَانْ يِرَسِّلْ خَدَّامِينَهْ يِلِمُّوا غَلِّتَهْ.

لُوقا 10:2 Referenca të Kryqëzuara

1 تَسَلونِيكِي 5:12

يَا أَخْوَانِي، نَطُلْبُوا مِنْكُو تِكَرُّمُوا النَّاسْ الْقَاعِدِينْ يَخْدُمُوا أَمْبَيْنَاتْكُو الْعِنْدُهُمْ فَوْقكُو مَسْؤُولِيَّةْ وَ قَاعِدِينْ يُقُودُوكُو فِي دَرِبْ الرَّبّ.

مَرْخُوس 16:15

وَ قَالْ لَيْهُمْ: «أَمْشُوا فِي كُلَّ الْأَرْض وَ بَلُّغُوا الْبِشَارَةْ لِكُلَّ النَّاسْ فِي كُلَّ بَكَانْ.

2 تِمُوتَاوُس 4:5

لَاكِنْ إِنْتَ، أَقْعُدْ دَايْماً ثَابِتْ وَ أَحْمَلْ التَّعَبْ وَ بَشِّرْ النَّاسْ بِالْبِشَارَةْ وَ أَخْدِمْ عَدِيلْ الْخِدْمَةْ الْاللّٰهْ أَنْطَاهَا لَيْك.

2 تَسَلونِيكِي 3:1

وَ آخَرْ شَيّءْ يَا أَخْوَانِي، أَسْأَلَوْا لَيْنَا اللّٰهْ أَشَانْ كَلَامْ الرَّبّ يِلْوَزَّعْ عَجَلَةْ فِي أُسْط النَّاسْ وَ يَقْبَلَوْه بِشَرَفْ مِثِلْ إِنْتُو قِبِلْتُوهْ.

مَرْخُوس 13:34

أَيْوَى، دَا يَبْقَى مِثِلْ نَادُمْ وَاحِدْ الْيِدَوْر يِسَافِرْ. وَ قُبَّالْ مَا يُقُمّ مِنْ بَيْتَهْ هُو يِكَلِّفْ عَبِيدَهْ بِمَالَهْ وَ أَيِّ وَاحِدْ مِنْهُمْ عِنْدَهْ مَسْؤُولِيَّةْ. وَ سِيدْ الْبَيْت يَامُرَهْ لِحَارِسْ الْبَابْ أَشَانْ يَقْعُدْ وَاعِي فِي الْبَابْ.

1 تِمُوتَاوُس 4:10

وَ فِي سَبَبْ الْوَعَدْ دَا، نَتْعَبَوْا وَ نِجَاهُدُوا. خَطَّيْنَا عَشَمْنَا ثَابِتْ فِي اللّٰهْ الْحَيّ الْهُو بَسْ مُنَجِّي هَنَا كُلَّ النَّاسْ خَاصَّةً الْمُؤمِنِينْ.

أعمال الرُسُل 22:21

وَ لَاكِنْ هُو قَالْ لَيِّ: ‹أَمْشِي. أَنَا نِرَسِّلَكْ بَعِيدْ مِنْ هِنِي. نِرَسِّلَكْ لِلنَّاسْ الْمَا يَهُودْ.›»

أعمال الرُسُل 20:28

«فَكُّرُوا فِي نُفُوسْكُو وَ فِي كُلَّ جَمَاعَةْ الْمُؤمِنِينْ هَنَا اللّٰهْ أَشَانْ الرُّوحْ الْقُدُّوسْ خَطَّاكُو فَوْقهُمْ رُعْيَانْ. أَيْوَى، أَسْرَحَوْا بِجَمَاعَةْ الْمُؤمِنِينْ الْاللّٰهْ شَرَاهُمْ بِدَمّ إِبْنَهْ.

أعمال الرُسُل 13:4

بِمِثِلْ دَا، الرُّوحْ الْقُدُّوسْ رَسَّلْ بَرْنَابَا وَ شَاوُولْ. وَ خَلَاصْ، هُمَّنْ مَشَوْا لِحِلَّةْ سَلُوكِيَةْ فِي خَشُمْ الْبَحَرْ وَ رِكْبَوْا فِي سَفِينَةْ وَ مَشَوْا لِجَزِيرَةْ قُبْرُصْ.

أعمال الرُسُل 13:2

وَ يَوْم وَاحِدْ، هُمَّنْ قَاعِدِينْ يَعَبُدُوا الرَّبّ وَ يُصُومُوا، الرُّوحْ الْقُدُّوسْ كَلَّمْ لَيْهُمْ وَ قَالْ: «خَصُّصُوا لَيِّ بَرْنَابَا وَ شَاوُولْ أَشَانْ يِسَوُّوا لَيِّ الْخِدْمَةْ النَّادَيْتهُمْ لَيْهَا.»

أعمال الرُسُل 11:19

وَ بَعَدْ مَوْت إِسْتِفَانْ، الْمُؤمِنِينْ شَتَّوْا بِسَبَبْ التَّعَبْ الشَّدِيدْ الْجَاءْ فَوْقهُمْ. وَ وَاحِدِينْ مَشَوْا بَعِيدْ لَحَدِّي لُبْنَانْ وَ جَزِيرَةْ قُبْرُصْ وَ حِلَّةْ أَنْطَاكِيَةْ. وَ بَلَّغَوْا الْبِشَارَةْ لِلْيَهُودْ لَاكِنْ مَا بَلَّغَوْهَا لِلنَّاسْ الْآخَرِينْ.

أعمال الرُسُل 8:4

وَ الْمُؤمِنِينْ الشَّتَّوْا فِي أَيِّ بَكَانْ قَاعِدِينْ يِبَلُّغُوا الْبِشَارَةْ لِكُلَّ النَّاسْ.

لُوقا 9:1

وَ عِيسَى نَادَى تَلَامِيذَهْ الْأَتْنَا عَشَرْ وَ أَنْطَاهُمْ سُلْطَةْ وَ قُدْرَةْ أَشَانْ يَطُرْدُوا أَيِّ شَيْطَانْ وَ يَشْفُوا الْمَرْضَانِينْ.

مَرْخُوس 16:20

وَ تَلَامِيذَهْ مَشَوْا وَ بَلَّغَوْا الْبِشَارَةْ لِلنَّاسْ فِي أَيِّ بَكَانْ. وَ الرَّبّ عَاوَنَاهُمْ وَ أَنْطَاهُمْ عَجَايِبْ أَشَانْ يِثَبِّتْ الْبِشَارَةْ الْهُمَّنْ قَاعِدِينْ يِبَلُّغُوهَا. آمِينْ.

مَتَّى 20:1

«وَ مَمْلَكَةْ اللّٰهْ هِي مِثِلْ كَيْ. نَادُمْ وَاحِدْ سِيدْ مَالْ وَ عِنْدَهْ جِنَيْنَةْ عِنَبْ. وَ مَرَقْ فَجُرْ بَدْرِي وَ أَجَّرْ خَدَّامِينْ أَشَانْ يَخْدُمُوا فِي جِنَيْنِتَهْ.

زَكَرِيَّا 11:17

الْعَذَابْ لِلرَّاعِي الْمَا عَدِيلْ الْيِخَلِّي الْغَنَمْ! خَلِّي السَّيْف يَضْرُبْ إِيدَهْ وَ يِقِدّ عَيْنَهْ الزَّيْنَةْ! خَلِّي إِيدَهْ تَيْبَسْ وَ عَيْنَهْ الزَّيْنَةْ تُمُوتْ!»

إرْمِيا 3:15

وَ نُخُطّ فَوْقكُو كُبَارَاتْ مِثِلْ رُعْيَانْ الْأَنَا نَرْضَى بَيْهُمْ وَ يُقُودُوكُو بِفِكِرْ عَدِيلْ وَ مَعْرَفَةْ.»

فِلِبِّي 2:25

وَ فِي فِكْرِي أَنَا، وَاجِبْ لَيِّ نِرَسِّلْ لَيْكُو أَخُويِ أَبْفَرِيدْ الْقَاعِدْ يَخْدِمْ مَعَايِ وَ نِجَاهُدُوا سَوَا. صَحِيحْ، إِنْتُو بَسْ رَسَّلْتُوهْ لَيِّ أَشَانْ فِي تَعَبِي هُو يِسَاعِدْنِي.

فِلِبِّي 2:21

كُلَّ الْآخَرِينْ يُخُطُّوا بَالْهُمْ فِي الشَّيّءْ الْيِجِيبْ فَايْدَةْ لَيْهُمْ هُمَّنْ وَ مَا فِي الشَّيّءْ الْيِجِيبْ فَايْدَةْ لِعِيسَى الْمَسِيحْ.

1 كُرُنْتُس 12:28

وَ اللّٰهْ نَظَّمْ جَمَاعَةْ الْمُؤمِنِينْ وَ جَعَلْ لَيْهُمْ خَدَّامِينْ. أَوَّلْ كَيْ الرُّسُلْ وَ تَانِي الْأَنْبِيَاء وَ تَالِتْ الْمُعَلِّمِينْ. وَ بَتَّانْ هُو أَنْطَى عَطِيَّةْ هَنَا قُدْرَةْ أَشَانْ نَاسْ وَاحِدِينْ يِسَوُّوا عَجَايِبْ وَ يِدَاوُوا الْمَرْضَانِينْ وَ يِسَاعُدُوا أَخْوَانْهُمْ وَ يُقُودُوهُمْ وَ يِحَجُّوا لُغَّاتْ شِقْ شِقْ الْيَجُوا مِنْ الرُّوحْ الْقُدُّوسْ.

عَدد 11:17

وَ فِي الْبَكَانْ دَا، أَنَا نَنْزِلْ وَ نِكَلِّمْ مَعَاكْ وَ نِشِيلْ مِنْ الرُّوحْ الْقَاعِدْ فَوْقَكْ وَ نُخُطَّهْ فَوْقهُمْ. وَ بَيْدَا، هُمَّنْ يِشِيلُوا مَعَاكْ مَسْؤُولِيَّةْ الشَّعَبْ وَ بَتَّانْ إِنْتَ مَا تِشِيلْهَا وِحَيْدَكْ.

كُلُوسِي 1:29

وَ أَنَا قَاعِدْ نَتْعَبْ وَ نِجَاهِدْ فِي الْخِدْمَةْ دِي بِالْقُدْرَةْ الْهُو يَنْطِينِي مِنْ قُدُرْتَهْ الْعَظِيمَةْ.

فِلِبِّي 2:30

أَوَّلْ هُو قَرِيبْ يُمُوتْ فِي شَانْ خِدِمْتَهْ لِلْمَسِيحْ وَ دَسَّ نَفْسَهْ فِي خُطُورَةْ شَدِيدَةْ أَشَانْ يِجِيبْ لَيِّ مُسَاعَدَةْ الْإِنْتُو مَا تَقْدَرَوْا تِجِيبُوهَا لَيِّ.

عِبْرَانِيِّين 3:6

لَاكِنْ الْمَسِيحْ بِقِي أَمِينْ أَشَانْ هُو إِبْن اللّٰهْ وَ هُو بَسْ الْمَسْؤُولْ فِي بَيْت اللّٰهْ. وَ أَنِحْنَ بِنُفُوسْنَا بَسْ بَيْتَهْ، كَنْ نَقْعُدُوا ثَابْتِينْ بَلَا شَكَكْ وَ نُخُطُّوا عَشَمْنَا دَايْماً فِي الْمَسِيحْ الْأَنِحْنَ نِلْفَشَّرَوْا بَيَّهْ.

1 تَسَلونِيكِي 2:9

يَا أَخْوَانِي، فَكُّرُوا فِي تَعَبْنَا وَ عَمَلْنَا. لَيْل وَ نَهَارْ خَدَمْنَا بِدُرَاعْنَا. مَا دَوَّرْنَا نِكَلُّفُوا نَادُمْ مِنْكُو بَيْنَا وَكِتْ أَنِحْنَ قَاعِدِينْ نِبَلُّغُوا لَيْكُو بِشَارَةْ اللّٰهْ.

كُلُوسِي 4:12

وَ أَخُونَا أَبْفُرَاسْ الْهُو خَدَّامْ الْمَسِيحْ عِيسَى مِنْ حِلِّتْكُو، هُو كُلَ يِسَلِّمْكُو. هُو قَاعِدْ يَسْأَلْ اللّٰهْ دَايْماً لَيْكُو بِشِدَّةْ أَشَانْ تَقْعُدُوا بِثَبَاتْ كَامِلْ وَ مُؤَكِّدِينْ مِنْ نِيَّةْ اللّٰهْ.

2 كُرُنْتُس 6:1

وَ خَلَاصْ، أَنِحْنَ نَخْدُمُوا مَعَ اللّٰهْ وَ أَشَانْ دَا نِوَصُّوكُو. أَكِيدْ قِبِلْتُوا رَحْمَةْ اللّٰهْ وَ هَسَّعْ دَا، أَكُرْبُوهَا قَوِي أَشَانْ تَلْقَوْا مِنْهَا الْفَايْدَةْ الْكَامِلَةْ.

1 كُرُنْتُس 15:10

لَاكِنْ هَسَّعْ، أَنَا رَسُولْ بِرَحْمَةْ اللّٰهْ وَ رَحْمَتَهْ مَا فَشَلَتْ. بِالْعَكْس، أَنَا خَدَمْت خِدْمَةْ زِيَادَةْ مِنْهُمْ كُلُّهُمْ. وَ بِالصَّحِيحْ، الْخَدَمْ عَدِيلْ مَا أَنَا لَاكِنْ رَحْمَةْ اللّٰهْ الْقَاعِدَةْ فَوْقِي.

زَكَرِيَّا 11:5

وَ الْيَشْرُوا الْغَنَمْ دَوْل يَدْبَحَوْهُمْ وَ مَا يَنْدَمَوْا لَيْهُمْ. وَ الْيِبِيعُوهُمْ يُقُولُوا: ‹بَارَكْ اللّٰهْ! دَاهُونِي غَنِيْ!› وَ الْيَسْرَحَوْا بَيْهُمْ كُلَ مَا عِنْدُهُمْ لَيْهُمْ مَحَنَّةْ.

1 مُلوك 18:22

وَ إِلِيَاسْ قَالْ لَيْهُمْ: «أَنَا وِحَيْدِي بَسْ فَضَّلْت مِنْ أَنْبِيَاء اللّٰهْ لَاكِنْ أَنْبِيَاء بَعَلْ هُمَّنْ 450.

عَدد 11:29

وَ مُوسَى قَالْ لَيَّهْ: «إِنْتَ حَسُودْ لَيِّ وَلَّا شُنُو؟ أَيْوَى، خَلِّي اللّٰهْ يِنَزِّلْ رُوحَهْ فِي كُلَّ الشَّعَبْ وَ يِسَوِّيهُمْ كُلُّهُمْ أَنْبِيَاء.»

فِلِمُون 1:1

جَوَابْ مِنِّي أَنَا بُولُسْ الْمَسْجُونْ فِي شَانْ الْمَسِيحْ عِيسَى وَ مِنْ أَخُونَا تِمُوتَاوُسْ. وَ نَكْتِبْ لَيْك إِنْتَ، يَا حَبِيبْنَا وَ رَفِيقْنَا فِي الْخِدْمَةْ فِلِمُونْ

زَبُور 68:11

الرَّبّ أَنْطَى أَمُرْ وَ الْمُبَشِّرَاتْ بِقَنْ كَتِيرَاتْ مِثِلْ دَيْش.

رُؤية 2:1

«أَكْتِبْ كَلَامِي لِلْمَلَكْ هَنَا جَمَاعَةْ الْمُؤمِنِينْ الْفِي حِلَّةْ أَفَسُسْ. دَاهُو كَلَامِي، أَنَا الشَّايِلْ السَّبْعَةْ نُجُومْ فِي إِيدِي الزَّيْنَةْ وَ رَايِغْ أَمْبَيْنَاتْ السَّبْعَةْ فَانُوسْ هَنَا دَهَبْ.