لاوِيِّين 5:10 - الكتاب المقدس بالعربي الدارجي هنا تشاد

¹⁰ وَ الطَّيْرَايْ الْآخَرَةْ، يِقَدِّمْهَا ضَحِيَّةْ مُحَرَّقَةْ حَسَبْ الْقَوَانِينْ. وَ بِمِثِلْ دَا، رَاجِلْ الدِّينْ يِسَوِّي لِلرَّاجِلْ دَا كَفَّارَةْ لِلذَّنِبْ الْهُو سَوَّاهْ. وَ خَلَاصْ، هُو يَلْقَى الْغُفْرَانْ.

لاوِيِّين 5:10 Referenca të Kryqëzuara

لاوِيِّين 4:26

وَ يِحَرِّقْ كُلَّ الشَّحَمْ فِي الْمَدْبَحْ مِثِلْ هُو سَوَّاهْ بِالشَّحَمْ هَنَا ضَحِيَّةْ السَّلَامَةْ. وَ بِمِثِلْ دَا، رَاجِلْ الدِّينْ يِسَوِّي كَفَّارَةْ الذَّنِبْ لِلشَّيْخ وَ هُو يَلْقَى الْغُفْرَانْ.

لاوِيِّين 4:20

وَ يِسَوِّي بِالتَّوْر دَا مِثِلْ هُو سَوَّاهْ بِالتَّوْر هَنَا ضَحِيَّةْ كَفَّارَةْ الذَّنِبْ. وَ بِمِثِلْ دَا، رَاجِلْ الدِّينْ يِسَوِّي لَيْهُمْ كَفَّارَةْ وَ هُمَّنْ يَلْقَوْا الْغُفْرَانْ.

1 يُوحَنَّا 2:2

دَا هُو الْقَدَّمْ نَفْسَهْ ضَحِيَّةْ أَشَانْ يَمْحَا ذُنُوبْنَا. وَ ضَحِيّتَهْ مَا لِذُنُوبْنَا أَنِحْنَ بَسْ لَاكِنْ لِذُنُوبْ هَنَا كُلَّ نَاسْ الدُّنْيَا.

يَعْقُوب 5:15

وَ الصَّلَاةْ الْقَدَّمَوْهَا بِالْإِيمَانْ تِنَجِّي الْمَرْضَانْ. وَ رَبِّنَا يَشْفِيهْ وَ كَنْ عِنْدَهْ ذُنُوبْ كُلَ، هُو يَغْفِرْ لَيَّهْ.

أفَسُس 5:2

عِيشُوا بِمَحَبَّةْ مِثِلْ مَحَبَّةْ الْمَسِيحْ الْيِحِبِّنَا بَيْهَا لَحَدِّي فَدَانَا بِرُوحَهْ. وَ قَدَّمْ نَفْسَهْ هَدِيَّةْ مِثِلْ ضَحِيَّةْ الْاللّٰهْ يَرْضَى بِرِيحِتْهَا.

رَوْمَا 5:11

وَ زِيَادَةْ مِنْ دَا، هَسَّعْ أَنِحْنَ قَاعِدِينْ نَفْرَحَوْا بِالْعَلَاقَةْ الْعِنْدِنَا مَعَ اللّٰهْ بِرَبِّنَا عِيسَى الْمَسِيحْ. أَشَانْ بِالْمَسِيحْ بَسْ، أَنِحْنَ لِقِينَا الصُّلُحْ.

لاوِيِّين 5:16

وَ يِكَفِّي تَمَنْ الذَّنِبْ السَّوَّاهْ ضِدّ الْبَكَانْ الْمُقَدَّسْ وَ يِزِيدْ فَوْقَهْ خُمْسَهْ وَ يَنْطِيهْ لِرَاجِلْ الدِّينْ. وَ رَاجِلْ الدِّينْ يِسَوِّي لَيَّهْ كَفَّارَةْ بِالْكَبِشْ هَنَا ضَحِيَّةْ لِكَفَّارَةْ الْخَطَا وَ هُو يَلْقَى الْغُفْرَانْ.

لاوِيِّين 5:13

وَ بِمِثِلْ دَا، رَاجِلْ الدِّينْ يِسَوِّي لِلرَّاجِلْ دَا كَفَّارَةْ لِلذَّنِبْ الْهُو سَوَّاهْ مِنْ الْحَالَاتْ دَوْل. وَ هُو يَلْقَى الْغُفْرَانْ. وَ الْفَضَّلْ يُكُونْ لِرَاجِلْ الدِّينْ مِثِلْ هَدِيَّةْ هَنَا دَقِيقْ.»

لاوِيِّين 4:35

وَ رَاجِلْ الدِّينْ يِشِيلْ كُلَّ الشَّحَمْ مِثِلْ قَاعِدِينْ يِشِيلُوهْ مِنْ الْكَبِشْ هَنَا ضَحِيَّةْ السَّلَامَةْ وَ يِحَرِّقَهْ فِي الْمَدْبَحْ مِنْ فَوْق لِلضَّحَايَا الْمُحَرَّقِينْ الْقَاعِدِينْ فِي النَّارْ قِدَّامْ اللّٰهْ. وَ رَاجِلْ الدِّينْ يِسَوِّي لَيَّهْ كَفَّارَةْ لِلذَّنِبْ الْهُو سَوَّاهْ وَ هُو يَلْقَى الْغُفْرَانْ.»

لاوِيِّين 4:31

وَ يِشِيلْ كُلَّ الشَّحَمْ مِثِلْ قَاعِدِينْ يِشِيلُوهْ مِنْ ضَحِيَّةْ السَّلَامَةْ وَ رَاجِلْ الدِّينْ يِحَرِّقَهْ فِي الْمَدْبَحْ وَ رِيحْتَهْ اللّٰهْ يَرْضَى بَيْهَا. وَ رَاجِلْ الدِّينْ يِسَوِّي لَيَّهْ كَفَّارَةْ وَ هُو يَلْقَى الْغُفْرَانْ.

لاوِيِّين 5:6

وَ فِي شَانْ الذَّنِبْ الْهُو سَوَّاهْ، يِقَدِّمْ ضَحِيَّةْ لِلّٰهْ مِنْ الْغَنَمْ عَنْزَايْ أَوْ غَنَمَايْ ضَحِيَّةْ لِكَفَّارَةْ الْخَطَا. وَ رَاجِلْ الدِّينْ يِسَوِّي لَيَّهْ كَفَّارَةْ لِذَنْبَهْ.