لاوِيِّين 26:41 - الكتاب المقدس بالعربي الدارجي هنا تشاد

⁴¹ وَ أَنَا كُلَ نُقُمّ ضِدُّهُمْ وَ نِوَدِّيهُمْ فِي بَلَدْ عُدْوَانْهُمْ. وَ بَيْدَا، قُلُوبْهُمْ الْمَا طَاهِرِينْ يِعَيُّبُوهُمْ وَ عِقَابْهُمْ يِلْحَقَّقْ.

لاوِيِّين 26:41 Referenca të Kryqëzuara

حِزْقِيال 44:7

وَكِتْ قَدَّمْتُوا لَيِّ الشَّحَمْ وَ الدَّمّ هَنَا الضَّحَايَا مِثِلْ أَكِلْ، فِي الْوَكِتْ دَا بَسْ، دَخَّلْتُوا فِي بَيْتِي الْمُقَدَّسْ أَجَانِبْ الْمَا مُطَهَّرِينْ وَ قُلُوبْهُمْ كُلَ مَا طَاهِرِينْ. وَ بَيْدَا، مَا أَحْتَرَمْتُوا بَيْتِي وَ بَتَّانْ قَطَعْتُوا مُعَاهَدَتِي بِكُلَّ مُحَرَّمَاتْكُو.

أعمال الرُسُل 7:51

وَ إِسْتِفَانْ قَالْ: «يَا النَّاسْ الْعَاصِيِينْ! قُلُوبْكُو قَوِيِّينْ وَ مَا تِدَوْرُوا تَسْمَعَوْا كَلَامْ اللّٰهْ! إِنْتُو دَايْماً تَعَصَوْا الرُّوحْ الْقُدُّوسْ. إِنْتُو تِسَوُّوا نَفْس الشَّيّءْ مِثِلْ جُدُودْكُو سَوَّوْه.

إرْمِيا 4:4

طَهُّرُوا نُفُوسْكُو لَيِّ أَنَا اللّٰهْ، طَهُّرُوا قُلُوبْكُو، يَا نَاسْ بَلَدْ يَهُوذَا وَ يَا سُكَّانْ مَدِينَةْ الْقُدُسْ! وَ بِسَبَبْ عَمَلْكُو الْفَسِلْ، غَضَبِي يُقُمّ ضِدُّكُو مِثِلْ نَارْ، يَاكُلْكُو وَ مَا فِي نَادُمْ الْيَكْتُلْهَا.»

2 أخبار 32:26

وَ بَعَدْ دَا، حِزْقِيَّا وَ سُكَّانْ مَدِينَةْ الْقُدُسْ مَسْكَنَوْا نُفُوسْهُمْ مِنْ الْإِسْتِكْبَارْ. وَ بَيْدَا، اللّٰهْ مَا نَزَلْ غَضَبَهْ فَوْقهُمْ فِي مُدَّةْ حَيَاةْ حِزْقِيَّا.

1 مُلوك 21:29

«هَلْ شِفْت كِكَّيْف أَخَابْ أَلْمَسْكَنْ قِدَّامِي؟ وَ أَشَانْ دَا، أَنَا مَا نِنَزِّلْ الشَّرّ دَا فِي وَكِتْ حُكْمَهْ. لَاكِنْ نِنَزِّلْ الشَّرّ دَا فِي عَايِلْتَهْ فِي وَكِتْ حُكُمْ وِلَيْدَهْ.»

كُلُوسِي 2:11

وَ فِي الْمَسِيحْ، إِنْتُو بِقِيتُوا مُطَهَّرِينْ بِطَهُورَةْ شِقْ مِنْ الطَّهُورَةْ الْيِسَوُّوهَا النَّاسْ. فِي طَهُورَةْ النَّاسْ، يَقْطَعَوْا جِلْدَةْ صَغَيْرَةْ. وَ لَاكِنْ فِي طَهُورَةْ الْمَسِيحْ، هُو سَلَّمْ نَفْسَهْ لِلْمَوْت وَ فِي الْمَوْت دَا، خَلَّى مِنَّهْ جِسْمَهْ كُلَّ كَيْ. وَ إِنْتُو شَارَكْتُوا فِي الطَّهُورَةْ دِي.

فِلِبِّي 3:3

يُقُولُوا هُمَّنْ الْمُطَهَّرِينْ. لَاكِنْ أَنِحْنَ بَسْ النَّاسْ الْمُطَهَّرِينْ بِالصَّحِيحْ، أَنِحْنَ النَّعَبُدُوا اللّٰهْ بِقُدْرَةْ الرُّوحْ الْقُدُّوسْ. وَ نِفَاشُرُوا بِالْمَسِيحْ عِيسَى وَ أَبَداً مَا نِنْتَكْلُوا عَلَيْ جِلِدْنَا.

حِزْقِيال 20:43

وَ هِنَاكْ، تِذَّكَّرَوْا دُرُوبْكُو وَ كُلَّ عَمَلْكُو النَّجَّسْتُوا بَيْهُمْ نُفُوسْكُو. وَ الْعَيْب يَكْرُبْكُو بِسَبَبْ كُلَّ الْفَسَالَةْ السَّوَّيْتُوهَا.

إرْمِيا 6:10

وَ إِرْمِيَا قَالْ: «أَنَا نِحَجِّي لِيَاتُو؟ وَ يَاتُو يَسْمَعْنِي كَنْ نِحَذِّرْهُمْ؟ هُمَّنْ عِنْدُهُمْ أُدْنَيْ طُرُشْ الْمَا يَقْدَرَوْا يَسْمَعَوْا. وَ يَجْعَلَوْا كَلَامْ اللّٰهْ مِثِلْ مُعْيَارْ، مَا يِدَوْرُوهْ.

تَثْنِية 30:6

وَ اللّٰهْ إِلٰـهْكُو يِطَهِّرْ قُلُوبْكُو وَ قُلُوبْ ذُرِّيِّتْكُو وَ دَا لِتِحِبُّوا اللّٰهْ إِلٰـهْكُو بِكُلَّ قُلُوبْكُو وَ كُلَّ فِكِرْكُو وَ دَا أَشَانْ تَحْيَوْا.

غَلاطِية 5:6

أَشَانْ فِي دَرِبْ الْمَسِيحْ عِيسَى، كَنْ نَادُمْ مُطَهَّرْ وَلَّا مَا مُطَهَّرْ كُلَ، دَا مَا مُهِمّ. الشَّيّءْ الْمُهِمّ دَا، هُو الْإِيمَانْ بِالْمَسِيحْ وَ الْمَحَبَّةْ الْجَايَةْ مِنْ الْإِيمَانْ دَا.

لُوقا 18:14

«وَ نُقُولْ لَيْكُو مِنْ النَّاسَيْن دَوْل، الرَّاجِلْ التَّانِي بَسْ قَبَّلْ فِي بَيْتَهْ وَ اللّٰهْ جَعَلَهْ صَالِحْ. أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.»

لُوقا 14:11

أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ. وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.»

مَتَّى 23:12

أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.

حِزْقِيال 44:9

دَاهُو اللّٰهْ الرَّبّ قَالْ: ”خَلِّي أَيِّ أَجْنَبِي الْمَا مُطَهَّرْ وَ قَلْبَهْ كُلَ مَا طَاهِرْ مَا يَدْخُلْ فِي بَيْتِي الْمُقَدَّسْ حَتَّى كَانْ هُو سَاكِنْ فِي أُسُطْ بَنِي إِسْرَائِيلْ كُلَ.“›

حِزْقِيال 6:9

وَ نَاسْكُو الْفَضَّلَوْا يِذَّكَّرَوْنِي فِي أُسْط الْأُمَمْ فِي الْبَكَانْ الْوَدَّوْهُمْ فَوْقَهْ فِي الْغُرْبَةْ. وَ أَنَا نِبَدِّلْ قُلُوبْهُمْ الْبَيْهُمْ بَعَّدَوْا مِنِّي وَ أَشَّرْمَطَوْا وَرَاءْ الْأَصْنَامْ وَ عُيُونْهُمْ الْبَيْهُمْ أَشَّرْمَطَوْا وَرَاءْ أَصْنَامْهُمْ. وَ الْعَيْب يَكْرُبْهُمْ بِسَبَبْ الْفَسَالَةْ السَّوَّوْهَا وَ بِسَبَبْ كُلَّ مُحَرَّمَاتْهُمْ.

زَبُور 39:9

أَنَا سَكَتّْ وَ بَتَّانْ مَا نُفُكّ خَشْمِي أَشَانْ إِنْتَ بَسْ خَطَّيْتنِي فِي الْحَالَةْ دِي.

نَحَمْيا 9:33

إِنْتَ عَادِلْ وَ فِي كُلَّ شَيّءْ الْبِقِي لَيْنَا، إِنْتَ عَامَلْتِنَا بِالصِّدِقْ لَاكِنْ أَنِحْنَ سَوَّيْنَا الشَّرّ.

عَزْرا 9:15

يَا اللّٰهْ إِلٰـهْ بَنِي إِسْرَائِيلْ، إِنْتَ صَادِقْ وَ خَلَّيْت الْفَضَّلَوْا مِنِّنَا عَايْشِينْ لَحَدِّي الْيَوْم. وَ دَاهُو أَنِحْنَ جِينَا قِدَّامَكْ مُذْنِبِينْ. وَ فِي شَانْ الشَّرّ السَّوَّيْنَاهْ دَا، مَا وَاجِبْ نَقِيفُوا قِدَّامَكْ.»

عَزْرا 9:13

«وَ كُلَّ الشَّيّءْ الْبِقِي فَوْقنَا، دَا جَاءْ بِسَبَبْ ذُنُوبْنَا وَ فِعِلْنَا الشَّيْن. وَ بَيْدَا كُلَ، إِنْتَ إِلٰـهْنَا مَا عَاقَبْتِنَا حَسَبْ ذُنُوبْنَا الْوَاجِبْ نِلْعَاقَبَوْا بِسَبَبْهُمْ. وَ لَاكِنْ إِنْتَ خَلَّيْت الْفَضَّلَوْا مِنِّنَا عَايْشِينْ.

2 أخبار 33:23

وَ لَاكِنْ آمُونْ مَا مَسْكَنْ نَفْسَهْ قِدَّامْ اللّٰهْ مِثِلْ أَبُوهْ مَنَسَّى سَوَّاهْ وَ هُو خَطَا زِيَادَةْ مِنْ أَبُوهْ.

2 أخبار 33:19

وَ صَلَاتَهْ الْقِبِلْهَا اللّٰهْ وَ ذُنُوبَهْ وَ عِصْيَانَهْ وَ الْبُنَى هَنَا الْبَكَانَاتْ الْعَالِيِينْ الْغَزَّ فَوْقهُمْ عِيدَانْ لِعِبَادَةْ أَشِيرَةْ وَ الْأَصْنَامْ، دَوْل كُلَّ مَكْتُوبِينْ فِي كِتَابْ الْأَنْبِيَاء الْيِشِيفُوا بِرُؤْيَةْ.

2 أخبار 12:12

وَكِتْ الْمَلِكْ مَسْكَنْ نَفْسَهْ، اللّٰهْ مَا نَزَّلْ فَوْقَهْ غَضَبَهْ لِيِدَمِّرَهْ مَرَّةْ وَاحِدْ. أَشَانْ فِي أَشْيَاءْ عَدِيلِينْ فِي لُبّ مَمْلَكَةْ يَهُوذَا.

خُروج 10:3

وَ خَلَاصْ، مُوسَى وَ هَارُونْ مَشَوْا لِلْمَلِكْ وَ قَالَوْا لَيَّهْ: «دَاهُو اللّٰهْ رَبّ الْعِبْرَانِيِّينْ قَالْ: ‹لَحَدِّي مَتَى إِنْتَ تَابَى مَا تِدَنْقِرْ قِدَّامِي؟ خَلِّي شَعَبِي يَمُرْقُوا وَ يَمْشُوا لِيَعَبُدُونِي!

لاوِيِّين 26:24

أَنَا كُلَ نُقُمّ ضِدُّكُو وَ أَنَا كُلَ نَضْرُبْكُو سَبْعَةْ مَرَّاتْ بِسَبَبْ ذُنُوبْكُو.

لاوِيِّين 26:28

أَنَا كُلَ نُقُمّ ضِدُّكُو بِغَضَبْ شَدِيدْ وَ أَنَا ذَاتِي نِعَاقِبْكُو سَبْعَةْ مَرَّاتْ بِسَبَبْ ذُنُوبْكُو.

عَدد 5:7

خَلِّي يِعْتَرِفْ بِذَنْبَهْ الْهُو سَوَّاهْ وَ يِقَبِّلْ الشَّيّءْ الْهُو سَرَقَهْ وَ يِزِيدْ فَوْقَهْ الْخُمُسْ هَنَا تَمَنَهْ وَ يَنْطِيهْ لِلنَّادُمْ الْهُو خِطِي فَوْقَهْ.

تَثْنِية 10:16

طَهُّرُوا قُلُوبْكُو وَ مَا تِقَوُّوا رُوسَيْكُو وَ تَعَصَوْا اللّٰهْ بَتَّانْ.

تَثْنِية 31:21

وَ وَكِتْ يَقَعْ فَوْقهُمْ الْبَلَاءْ الْكَتِيرْ وَ التَّعَبْ، الْغِنَيْ دَا ذُرِّيِّتْهُمْ مَا يَنْسَوْه وَ هُو يَبْقَى لَيِّ شَهَادَةْ فَوْقهُمْ. وَ الْيَوْم، أَنَا نَعَرِفْ تَمَامْ الشَّيّءْ الْهُمَّنْ يِدَوْرُوا يِسَوُّوهْ قَبُلْ أَنَا مَا نِدَخِّلْهُمْ فِي الْبَلَدْ الْأَنَا حَلَفْت لِجُدُودْهُمْ وَ قُلْت نَنْطِيهَا لَيْهُمْ.»

حِزْقِيال 14:23

وَ تِصَبُّرُوا نُفُوسْكُو وَكِتْ تَعَرْفُوا دَرِبْهُمْ وَ عَمَلْهُمْ الْفَسْلِينْ. وَ بَيْدَا، تَعَرْفُوا كَدَرْ دَا مَا بَلَا سَبَبْ أَنَا حَقَّقْت كُلَّ الْعِقَابْ دَا فِي الْمَدِينَةْ.» وَ دَا كَلَامْ اللّٰهْ الرَّبّ.