لاوِيِّين 2:9 - الكتاب المقدس بالعربي الدارجي هنا تشاد

⁹ وَ رَاجِلْ الدِّينْ يَرْفَعْ هَدِيَّةْ الذِّكْرَةْ هَنَا الدَّقِيقْ وَ يِحَرِّقْهَا فِي الْمَدْبَحْ. وَ هِي هَدِيَّةْ مُحَرَّقَةْ الرِّيحِتْهَا اللّٰهْ يَرْضَى بَيْهَا.

لاوِيِّين 2:9 Referenca të Kryqëzuara

لاوِيِّين 2:2

وَ هُو يِوَدِّي هَدِيّتَهْ دِي لِرُجَالْ الدِّينْ مِنْ ذُرِّيَّةْ هَارُونْ. وَ رَاجِلْ الدِّينْ يِشِيلْ مَلْيَةْ إِيدْ مِنْ الدَّقِيقْ الْمُخَلْبَطْ بِدِهِنْ وَ كُلَّ اللُّبَانْ. وَ يِحَرِّقْهُمْ فِي الْمَدْبَحْ. وَ دِي هَدِيَّةْ ذِكْرَةْ وَ هِي هَدِيَّةْ مُحَرَّقَةْ الْاللّٰهْ يَرْضَى بِرِيحِتْهَا.

فِلِبِّي 4:18

وَ كُلَّ شَيّءْ الْأَنَا نِدَوْرَهْ، لِقِيتَهْ خَلَاصْ زِيَادَةْ مِنْ النِّدَوْرَهْ. أَخُوكُو أَبْفَرِيدْ جَابْ الْمُسَاعَدَةْ الرَّسَّلْتُوهَا لَيِّ وَ خَلَاصْ، أَنَا مَبْسُوطْ. وَ الْمُسَاعَدَةْ دِي هِي مِثِلْ هَدِيَّةْ لِلّٰهْ الرِّيحِتْهَا هُو يَرْضَى بَيْهَا وَ يَقْبَلْهَا.

لاوِيِّين 6:15

وَ رَاجِلْ الدِّينْ يِشِيلْ مَلْيَةْ إِيدْ مِنْ الدَّقِيقْ وَ الدِّهِنْ وَ كُلَّ اللُّبَانْ الْقَاعِدْ فِي الْهَدِيَّةْ وَ يِحَرِّقْهُمْ فِي النَّارْ وَ دِي هَدِيَّةْ ذِكْرَةْ هَنَا دَقِيقْ الرِّيحِتْهَا اللّٰهْ يَرْضَى بَيْهَا.

فِلِبِّي 2:17

وَ حَتَّى كَانْ دَمِّي وَاجِبْ يِدَفِّقْ مِثِلْ هَدِيَّةْ شَرَابْ فِي الضَّحِيَّةْ التِّقَدُّمُوهَا لِلّٰهْ فِي شَانْ إِيمَانْكُو وَ خِدْمِتْكُو، خَلَاصْ أَنَا نَفْرَحْ وَ نِنْبَسِطْ مَعَاكُو كُلُّكُو.

أفَسُس 5:2

عِيشُوا بِمَحَبَّةْ مِثِلْ مَحَبَّةْ الْمَسِيحْ الْيِحِبِّنَا بَيْهَا لَحَدِّي فَدَانَا بِرُوحَهْ. وَ قَدَّمْ نَفْسَهْ هَدِيَّةْ مِثِلْ ضَحِيَّةْ الْاللّٰهْ يَرْضَى بِرِيحِتْهَا.

رَوْمَا 15:16

لِنَبْقَى خَدَّامْ لِلْمَسِيحْ عِيسَى. وَ خِدِمْتِي هِي بَلِّغِينْ بِشَارَةْ اللّٰهْ لِلْأُمَمْ الْمَا يَهُودْ. أَنَا نَبْقَى مِثِلْ رَاجِلْ دِينْ وَكِتْ نِبَلِّغْ بِشَارَةْ اللّٰهْ لِلْأُمَمْ الْمَا يَهُودْ لِيَبْقَوْا مِثِلْ ضَحِيَّةْ الْاللّٰهْ يَرْضَى بَيْهَا. وَ الضَّحِيَّةْ دِي تَبْقَى خَاصَّة لِلّٰهْ بِقُدْرَةْ الرُّوحْ الْقُدُّوسْ.

خُروج 29:18

وَ حَرِّقْ كُلَّ الْكَبِشْ دَا فِي الْمَدْبَحْ أَشَانْ دِي ضَحِيَّةْ مُحَرَّقَةْ لِلّٰهْ الْهُو يَرْضَى بِرِيحِتْهَا أَشَانْ هِي هَدِيَّةْ لِلّٰهْ.

رَوْمَا 12:1

يَا أَخْوَانِي، نِوَصِّيكُو بِسَبَبْ رَحْمَةْ اللّٰهْ اللِّقِيتُوهَا، أَيِّ وَاحِدْ مِنْكُو يِقَدِّمْ جِسْمَهْ لِلّٰهْ ضَحِيَّةْ حَيَّةْ وَ مُقَدَّسَةْ الْاللّٰهْ يَرْضَى بَيْهَا. وَ دِي هِي عِبَادِتْكُو الْوَاجْبَةْ.

زَكَرِيَّا 13:9

وَ التِّلِتْ الْفَضَّلْ دَا، نُخُطَّهْ فِي النَّارْ وَ نِصَفِّيهْ مِثِلْ يِصَفُّوا الْفُضَّةْ وَ نَكْشِفَهْ مِثِلْ يَكْشُفُوا الدَّهَبْ. وَ هُمَّنْ يِنَادُوا أُسْمِي وَ أَنَا نُرُدّ لَيْهُمْ. وَ أَنَا نُقُولْ لَيْهُمْ: ‹إِنْتُو تَبْقَوْا شَعَبِي.› وَ هُمَّنْ يُقُولُوا: ‹اللّٰهْ بَسْ يَبْقَى إِلٰـهْنَا.›»

زَكَرِيَّا 13:7

دَاهُو كَلَامْ اللّٰهْ الْقَادِرْ: «يَا سَيْف، قُمّ ضِدّ رَاعِيِّ. أَيْوَى، قُمّ ضِدّ قَرِيبِي! أَضْرُبْ الرَّاعِي وَ الْغَنَمْ يِشِتُّوا وَ نَضْرُبْ حَتَّى الدُّقَاقْ كُلَ.

إشَعْيا 53:10

وَ اللّٰهْ رِضِي يَرْحَكَهْ بِالتَّعَبْ وَ كَنْ حَيَاتَهْ بِقَتْ ضَحِيَّةْ لِكَفَّارَةْ الْخَطَا، خَلَاصْ هُو يِشِيفْ ذُرِّيّتَهْ. هُو يِطَوِّلْ أَيَّامْ عُمْرَهْ وَ نِيَّةْ اللّٰهْ تِلْحَقَّقْ بَيَّهْ هُو.

لاوِيِّين 2:8

وَ هَدِيَّةْ الدَّقِيقْ الْيِسَوِّيهَا مِثِلْ دِي لِلّٰهْ، يَنْطِيهَا لِرَاجِلْ الدِّينْ وَ هُو يِقَرِّبْهَا لِلْمَدْبَحْ.

لاوِيِّين 2:16

وَ رَاجِلْ الدِّينْ يِحَرِّقْهُمْ مِثِلْ هَدِيَّةْ ذِكْرَةْ، نُصّ مِنْ الْقَمَحْ الْمَدْرُوشْ وَ الدِّهِنْ مَعَ كُلَّ اللُّبَانْ. وَ دِي هَدِيَّةْ مُحَرَّقَةْ لِلّٰهْ.

لاوِيِّين 4:31

وَ يِشِيلْ كُلَّ الشَّحَمْ مِثِلْ قَاعِدِينْ يِشِيلُوهْ مِنْ ضَحِيَّةْ السَّلَامَةْ وَ رَاجِلْ الدِّينْ يِحَرِّقَهْ فِي الْمَدْبَحْ وَ رِيحْتَهْ اللّٰهْ يَرْضَى بَيْهَا. وَ رَاجِلْ الدِّينْ يِسَوِّي لَيَّهْ كَفَّارَةْ وَ هُو يَلْقَى الْغُفْرَانْ.

لاوِيِّين 5:12

وَ هُو يِوَدِّي هَدِيّتَهْ دِي لِرَاجِلْ الدِّينْ. وَ رَاجِلْ الدِّينْ يِشِيلْ مَلْيَةْ إِيدْ مِنْ هَدِيَّةْ الذِّكْرَةْ وَ يِحَرِّقْهَا فِي الْمَدْبَحْ مِنْ فَوْق لِلضَّحِيَّةْ الْمُحَرَّقَةْ لِلّٰهْ. وَ دِي ضَحِيَّةْ لِكَفَّارَةْ الذَّنِبْ.

لاوِيِّين 24:7

وَ أَيِّ رَوْق تُخُطّ فَوْقَهْ لُبَانْ صَافِي وَ تِحَرِّقَهْ فِي بَدَلْ الْخُبْزَةْ مِثِلْ ذِكْرَةْ لِلّٰهْ. وَ دِي هَدِيَّةْ مُحَرَّقَةْ.

عَدد 5:26

وَ يَمْلَا إِيدَهْ مِنْ دَقِيقْ الْهَدِيَّةْ وَ دَا يِمَثِّلْ كُلَّ الْهَدِيَّةْ دِي. وَ هُو يِحَرِّقَهْ فِي الْمَدْبَحْ. وَ بَيْدَا، اللّٰهْ يَذْكُرَهْ. وَ بَعَدْ دَا، يَزْقِي الْمَرَةْ الْأَلْمِي دَا.

لاوِيِّين 1:9

وَ النَّادُمْ دَا يِغَسِّلْ الْبُطُونْ وَ الضَّلَافَيْ بِأَلْمِي وَ رَاجِلْ الدِّينْ يِحَرِّقْهُمْ كُلُّهُمْ فِي الْمَدْبَحْ. وَ دِي ضَحِيَّةْ مُحَرَّقَةْ وَ هِي هَدِيَّةْ مُحَرَّقَةْ الرِّيحِتْهَا اللّٰهْ يَرْضَى بَيْهَا.