مَراثِي إرْمِيا 1:21 - الكتاب المقدس بالعربي الدارجي هنا تشاد

²¹ عُدْوَانِي سِمْعَوْا قَنِيتِي وَ لَاكِنْ مَا فِي نَادُمْ الْيِصَبِّرْنِي. كُلُّهُمْ سِمْعَوْا بِحِزْنِي وَ فَرْحَانِينْ بَيَّهْ. وَ دَا كُلَّ إِنْتَ بَسْ جَعَلْتَهْ وَ جِبْت يَوْم الْعِقَابْ الْإِنْتَ قَطَعْتَهْ. وَ خَلِّي عُدْوَانِي يَبْقَوْا مِثْلِي أَنَا!

مَراثِي إرْمِيا 1:21 Referenca të Kryqëzuara

مَراثِي إرْمِيا 1:8

مَدِينَةْ الْقُدُسْ أَذْنَبَتْ وَ بَيْدَا، نَجَّسَتْ نَفِسْهَا. وَ كُلَّ النَّاسْ الزَّمَانْ كَرَّمَوْهَا، هَسَّعْ نَكَرَوْهَا أَشَانْ شَافَوْا عِرَيْهَا. وَ لَاكِنْ هِي قَاعِدَةْ تَقْنِتْ وَ تَنْطِيهُمْ ضَهَرْهَا.

مَراثِي إرْمِيا 2:15

وَ كُلَّ النَّاسْ الْفَايْتِينْ بِالدَّرِبْ جَنْبِكِ يِصَفُّقُوا لِخَرَابْكِ. أَيْوَى، يِصَفُّرُوا وَ يِهِزُّوا رُوسَيْهُمْ لَيْكِ إِنْتِ، يَا مَدِينَةْ الْقُدُسْ الْمِثِلْ بِنَيَّةْ، وَ يُقُولُوا: «دِي بَسْ الْمَدِينَةْ الْبِنَادُوهَا أَمْ جَمَالاً كَامِلْ؟ دِي بَسْ الْبِسَمُّوهَا فَرَحْ الدُّنْيَا وَلَّا؟»

مَراثِي إرْمِيا 1:22

جِيبْهُمْ قِدَّامَكْ بِكُلَّ الْفَسَالَةْ السَّوَّوْهَا. وَ سَوِّي فَوْقهُمْ مِثِلْ سَوَّيْت فَوْقِي بِسَبَبْ كُلَّ عِصْيَانِي. أَشَانْ قَنِيتِي بِقِي كَتِيرْ وَ نَفْسِي بِقَتْ مَرْضَانَةْ.»

مَراثِي إرْمِيا 1:16

وَ فِي شَانْ دَا، أَنَا بَكَيْت وَ دُمُوعِي جَرَوْا وُدْيَانْ أَشَانْ الْيِصَبِّرْنِي وَ الْيِحَيِّينِي بِقِي بَعِيدْ مِنِّي. وَ عِيَالِي هِلْكَوْا أَشَانْ الْعَدُو أَنَّصَرْ فَوْقِي.»

إرْمِيا 50:11

أَيْوَى، إِنْتُو فِرِحْتُوا وَ أَنْبَسَطْتُوا، إِنْتُو النَّهَبْتُوا شَعَبِي الْمِثِلْ وَرَثَتِي. وَ نَطَّطْتُوا مِثِلْ الْعِجْلَةْ فِي الْقَشّ الْأَخْضَرْ وَ حَنْحَنْتُوا مِثِلْ الْخَيْل الْعِنْدُهُمْ قُدْرَةْ.

زَبُور 35:15

لَاكِنْ وَكِتْ أَتَّرْتَعْت، هُمَّنْ لَمَّوْا ضِدِّي وَ فِرْحَوْا. وَ مِنْ دُونْ نَعَرْفَهْ، الْفَسْلِينْ قَمَّوْا ضِدِّي وَ دَايْماً يِقَطُّعُوا لَحَمْ جِلْدِي.

مَراثِي إرْمِيا 1:4

وَ شَوَارِعْ صَهْيُون حِزْنَوْا وَ مَا فِي نَاسْ مَاشِينْ لِلْعِيدْ وَ كُلَّ بِيبَانْ الْمَدِينَةْ دَفَّقَوْا. وَ رُجَالْ الدِّينْ هِنَيْهَا يَقُنْتُوا وَ بَنَاتْهَا الْعُدْرِيَّاتْ حَزْنَانَاتْ وَ مَدِينَةْ صَهْيُون قَاعِدَةْ فِي الْمُرّ.

مَراثِي إرْمِيا 1:2

هِي تَبْكِي، تَبْكِي طُولْ اللَّيْل بِكُلَّ قُدْرِتْهَا وَ مِنْ صُدْقَانْهَا، مَا فِي صَدِيقْ الْيِصَبِّرْهَا. كُلَّ رُفْقَانْهَا خَانَوْهَا وَ بِقَوْا عُدْوَانْهَا.

إرْمِيا 51:24

«وَ لَاكِنْ هَسَّعْ، شِيفُوا يَا بَنِي إِسْرَائِيلْ! أَنَا نِجَازِي بَابِلْ وَ كُلَّ سُكَّانْهَا حَسَبْ كُلَّ الْفَسَالَةْ السَّوَّوْهَا فِي صَهْيُون. وَ دَا كَلَامْ اللّٰهْ.

رُؤية 18:6

«خَلِّي يِسَوُّوا لَيْهَا مِثِلْ هِي سَوَّتَهْ لِلنَّاسْ. خَلِّي يِلْكَفَّوْا فَوْقهَا مَرَّتَيْن الشَّيّءْ الْهِي سَوَّتَهْ. خَلِّي يَمْلَوْا كَاسْهَا بِشَرَابْ الْيِسَكِّرْ مَرَّتَيْن مِنْ الشَّرَابْ الْهِي أَنْطَتَهْ لِلنَّاسْ.

يُوِيل 3:14

دَاهُو آلَافْ النَّاسْ، كَتِيرِينْ مَرَّةْ وَاحِدْ فِي وَادِي الْقَرَارْ. يَوْم اللّٰهْ قَرَّبْ فِي وَادِي الْقَرَارْ.

حِزْقِيال 26:2

«يَا إِبْن آدَمْ، سُكَّانْ مَدِينَةْ صُورْ أَشَّمَّتَوْا وَ قَالَوْا لِمَدِينَةْ الْقُدُسْ: ‹بِيبَانْ الْمَدِينَةْ الْيَدْخُلُوا بَيْهُمْ الشُّعُوبْ كَسَّرَوْهُمْ! وَ تُجَّارْهَا يِوَجُّهُوا عَلَيْنَا. أَيْوَى، نَبْقَوْا غَنِيِّينْ أَشَانْ مَدِينَةْ الْقُدُسْ خِرْبَتْ خَلَاصْ.›»

إرْمِيا 51:49

يَا مَيْتِينْ بَنِي إِسْرَائِيلْ! بَابِلْ كُلَ وَاجِبْ تَقَعْ. أَشَانْ بَيْهَا هِي وَقَعَوْا نَاسْ مَيْتِينْ فِي أَيِّ بَكَانْ فِي الْأَرْض.

إرْمِيا 50:31

أَكِيدْ أَنَا نُقُمّ ضِدِّكِ، يَا بَابِلْ الْمُسْتَكْبِرَةْ! أَشَانْ يَوْمكِ جَاءْ وَ دَا الْوَكِتْ النِّعَاقِبْكِ فَوْقَهْ. وَ دَا كَلَامْ اللّٰهْ الرَّبّ الْقَادِرْ.

إرْمِيا 50:29

نَادُوا سِيَادْ النُّبَّالْ ضِدّ بَابِلْ، كُلَّ الْيَعَرْفُوا يِسْتَعْمَلَوْا النُّشَّابْ. يُخُطُّوا مُعَسْكَرْهُمْ حَوَالَيْهَا أَشَانْ نَادُمْ مِنْهَا مَا يِنْبَلِصْ. عَاقُبُوهَا حَسَبْ عَمَلْهَا وَ سَوُّوا فَوْقهَا مِثِلْ هِي سَوَّتْ. أَشَانْ هِي أَسْتَكْبَرَتْ قِدَّامْ اللّٰهْ، قِدَّامْ قُدُّوسْ إِسْرَائِيلْ.

إرْمِيا 50:15

حَوُّقُوهَا مِنْ كُلِّ جِيهَةْ وَ كَوْرُكُوا كُرَوْرَاكْ الْحَرِبْ ضِدَّهَا. وَ خَلَاصْ، هِي تِسَلِّمْ نَفِسْهَا وَ قُصُورْهَا يِدَفُّقُوا وَ دَرَادِرْهَا يَقَعَوْا. اللّٰهْ كَفَّى التَّارْ فَوْقهَا. إِنْتُو كُلَ كَفُّوا التَّارْ وَ سَوُّوا فَوْقهَا مِثِلْ هِي سَوَّتْ.

إرْمِيا 48:27

وَ إِنْتِ، يَا مُوَابْ، مَا ضِحِكْتِ لِبَنِي إِسْرَائِيلْ وَلَّا؟ هَلْ لِقِيتِ بَنِي إِسْرَائِيلْ مَعَ السَّرَارِيقْ وَلَّا؟ وَ كَنْ لَا! مَالَا كُلَّ وَكِتْ تِحَجِّي بَيْهُمْ وَ تِهِزِّي رَاسْكِ؟

إرْمِيا 30:16

وَ بَيْدَا خَلَاصْ، الْأَكَلَوْكِ يِنْأَكْلُوا وَ كُلَّ عُدْوَانْكِ يِوَدُّوهُمْ عَبِيدْ. وَ الْكَسَبَوْكِ يَبْقَوْا كَسِيبَةْ وَ النَّهَبَوْكِ نِسَلِّمْهُمْ لِلنَّهِبْ.

زَبُور 38:16

أَشَانْ أَنَا قُلْت: «خَلِّي مَا يِشَّمَّتَوْا لَيِّ. وَكِتْ رِجِلَيْنِي يِتَّرْتَعَوْا، خَلِّي مَا يِسْتَكْبَرَوْا فَوْقِي.»

زَبُور 37:13

وَ لَاكِنْ الرَّبّ يَضْحَكْ لَيَّهْ أَشَانْ هُو يَعَرِفْ كَدَرْ يَوْمَهْ يَجِي.

إشَعْيا 14:5

اللّٰهْ كَسَّرْ عِصَيْ الْعَاصِيِينْ وَ عَصَاةْ الْحُكَّامْ.

إشَعْيا 14:6

أَشَانْ بِغَضَبْ الْمُضَايِقْ ضَرَبْ الشَّعَبْ وَ بِضَرِبِينْ مُتَتَابِعْ. وَ بِزَعَلْ، هُو مَلَكْ الْأُمَمْ وَ طَرَدَاهُمْ بَلَا رَحْمَةْ.

مَراثِي إرْمِيا 2:16

كُلَّ عُدْوَانْكِ فَتَحَوْا خُشُومْهُمْ وَ أَلْكَلَّمَوْا بَيْكِ. هُمَّنْ صَفَّرَوْا وَ عَضَّوْا شَلَالِيفْهُمْ وَ قَالَوْا: «خَلَاصْ دَمَّرْنَاهَا! دَا بَسْ الْيَوْم الْقَاعِدِينْ نَرْجَوْه وَ دَاهُو حِضِرْنَاهْ وَ شِفْنَاهْ.»