إرْمِيا 7:30 - الكتاب المقدس بالعربي الدارجي هنا تشاد

³⁰ وَ دَاهُو كَلَامْ اللّٰهْ: «بَنِي يَهُوذَا قَاعِدِينْ يِسَوُّوا الْفَسِلْ قِدَّامِي وَ يِجِيبُوا مُحَرَّمَاتْهُمْ فِي بَيْتِي الْفَوْقَهْ أُسْمِي وَ يِنَجُّسُوهْ.

إرْمِيا 7:30 Referenca të Kryqëzuara

حِزْقِيال 7:20

أَيْوَى، أَوَّلْ هُمَّنْ أَسْتَكْبَرَوْا بِسَبَبْ جَمَالْ زِينِتْهُمْ. وَ بِزِينِتْهُمْ، سَوَّوْا أَصْنَامْهُمْ الْمُحَرَّمِينْ الْيِجِيبُوا لَيْهُمْ الْكَرَاهِيَّةْ وَ فِي شَانْ دَا، نِسَوِّي زِينِتْهُمْ نِجْسَةْ.

إرْمِيا 32:34

هُمَّنْ جَابَوْا أَصْنَامْهُمْ الْمُحَرَّمِينْ فِي بَيْتِي الْفَوْقَهْ أُسْمِي أَشَانْ يِنَجُّسُوهْ.

دَنْيال 9:27

وَ الْمَلِكْ دَا يَجْبُرْ نَاسْ كَتِيرِينْ لِيِسَوُّوا مَعَايَهْ مُعَاهَدَةْ لِمُدَّةْ 7 سَنَةْ. وَ بَعَدْ نُصّ الْمُدَّةْ دِي، الضَّحَايَا وَ الْهَدَايَا الْيِقَدُّمُوهُمْ دَايْماً، هُو يَمْنَعْهُمْ. وَ عَجَلَةْ بَسْ، الْمُخَرِّبْ دَا يِسَوِّي الْحَرَامْ الْيِجِيبْ الْخَرَابْ. وَ فِي الأَخِيرْ، هُو ذَاتَهْ يِدَّمَّرْ مِثِلْ مُقَرَّرْ.»

2 أخبار 33:7

وَ هُو خَطَّ فِي بَيْت اللّٰهْ صَنَمْ الْهُو نَجَرَهْ. وَ دَا فِي لُبّ الْبَيْت الْحَجَّى فَوْقَهْ الرَّبّ لِدَاوُدْ وَ لِوِلَيْدَهْ سُلَيْمَانْ وَ قَالْ: «أَنَا نُخُطّ أُسْمِي إِلَى الْأَبَدْ فَوْق الْبَيْت دَا وَ فِي مَدِينَةْ الْقُدُسْ الْمَدِينَةْ الْأَنَا عَزَلْتَهَا مِنْ كُلَّ مُدُنْ قَبَايِلْ بَنِي إِسْرَائِيلْ.

2 مُلوك 21:7

وَ هُو خَطَّ فِي بَيْت اللّٰهْ صَنَمْ أَشِيرَةْ الصَّنَعَهْ. وَ دَا فِي لُبّ الْبَيْت الْحَجَّى فَوْقَهْ اللّٰهْ لِدَاوُدْ وَ لِوِلَيْدَهْ سُلَيْمَانْ وَ قَالْ: «أَنَا نُخُطّ أُسْمِي إِلَى الْأَبَدْ فَوْق الْبَيْت دَا وَ فِي مَدِينَةْ الْقُدُسْ الْمَدِينَةْ الْأَنَا عَزَلْتَهَا مِنْ كُلَّ مُدُنْ قَبَايِلْ بَنِي إِسْرَائِيلْ.

2 مُلوك 21:4

وَ بَنَى لَيْهُمْ مَدَابِحْ فِي لُبّ بَيْت اللّٰهْ وَ دَا الْبَكَانْ الْاللّٰهْ قَالْ فَوْقَهْ: «فِي مَدِينَةْ الْقُدُسْ بَسْ، نُخُطّ أُسْمِي.»

إرْمِيا 23:11

وَ دَاهُو كَلَامْ اللّٰهْ: «الْأَنْبِيَاء وَ رُجَالْ الدِّينْ كُلُّهُمْ أَنَّجَّسَوْا لَحَدِّي فِي بَيْتِي الْمُقَدَّسْ كُلَ أَنَا لِقِيتْ عَلَامَةْ فَسَالِتْهُمْ.

2 أخبار 33:15

وَ هُو مَرَقْ مِنْ بَيْت اللّٰهْ كُلَّ الْإِلٰـهَاتْ الْأَجْنَبِيِّينْ وَ الصَّنَمْ الْأَوَّلْ نَجَرَهْ وَ خَطَّاهْ دَاخَلْ. وَ هَدَّمْ كُلَّ الْمَدَابِحْ الْبَنَاهُمْ فِي جَبَلْ بَيْت اللّٰهْ وَ فِي مَدِينَةْ الْقُدُسْ وَ دَفَّقَاهُمْ بَرَّا مِنْ الْمَدِينَةْ.

2 مُلوك 23:12

وَ الْمَلِكْ هَدَّمْ الْمَدَابِحْ الْبَنَوْهُمْ مُلُوكْ مَمْلَكَةْ يَهُوذَا فِي رَاسْ قَصِرْ مَلِكْ أَحَازْ وَ الْمَدَابِحْ الْمَنَسَّى بَنَاهُمْ فِي الْفَضَايَاتْ الْإِتْنَيْن هَنَا بَيْت اللّٰهْ. وَ بَعَدْ هَدَّمَاهُمْ، هُو شَالْ التُّرَابْ وَ دَفَّقَهْ فِي وَادِي قِدْرُونْ.

2 مُلوك 21:3

وَ هُو بَنَى بَتَّانْ الْبَكَانَاتْ الْعَالِيِينْ هَنَا الْعِبَادَةْ الْأَبُوهْ حِزْقِيَّا هَدَّمَاهُمْ. وَ بَنَى مَدَابِحْ لِإِلٰـهْ بَعَلْ وَ غَزَّ عِيدَانْ لِعِبَادَةْ أَشِيرَةْ مِثِلْ أَخَابْ مَلِكْ مَمْلَكَةْ إِسْرَائِيلْ سَوَّاهْ. وَ مَنَسَّى سَجَدْ قِدَّامْ كُلَّ قُوَّاتْ السَّمَاءْ وَ عَبَدْهُمْ.

2 أخبار 33:3

وَ هُو بَنَى بَتَّانْ الْبَكَانَاتْ الْعَالِيِينْ هَنَا الْعِبَادَةْ الْأَبُوهْ حِزْقِيَّا هَدَّمَاهُمْ. وَ بَنَى مَدَابِحْ لِإِلٰـهْ بَعَلْ وَ غَزَّ عِيدَانْ لِعِبَادَةْ أَشِيرَةْ وَ سَجَدْ قِدَّامْ كُلَّ قُوَّاتْ السَّمَاءْ وَ عَبَدْهُمْ.

إشَعْيا 66:4

أَنَا كُلَ نَعَزِلْ لَيْهُمْ نَتِيجَةْ عَمَلْهُمْ وَ نِجِيبْ فَوْقهُمْ الْيِخَوِّفْهُمْ. أَشَانْ أَنَا نَادَيْتهُمْ وَ مَا رَدَّوْا لَيِّ وَ كَلَّمْت لَيْهُمْ وَ مَا سِمْعَوْا كَلَامِي. وَ لَاكِنْ هُمَّنْ سَوَّوْا الْفَسِلْ قِدَّامِي وَ عَزَلَوْا الْمَا نِدَوْرَهْ.»

إرْمِيا 16:18

وَ أَوَّلْ شَيّءْ، أَنَا نِلْكَفَّى مِنْهُمْ مَرَّتَيْن تَمَنْ الْخَطَا وَ الذَّنِبْ الْهُمَّنْ سَوَّوْه. أَشَانْ هُمَّنْ مَا أَحْتَرَمَوْا بَلَدِي وَ مَلَوْهَا بِتَمَاثِيلْهُمْ الْمَكْرُوهِينْ. وَ أَرْض وَرَثَتِي مَلَوْهَا بِمُحَرَّمَاتْهُمْ.»

إرْمِيا 32:35

وَ فِي وَادِي بَنِي هِنُّومْ بَنَوْا مَدْبَحْ لِبَعَلْ لِيِحَرُّقُوا فَوْقَهْ أَوْلَادْهُمْ وَ بَنَاتْهُمْ لِإِلٰـهُّمْ مُولَكْ. وَ دَا أَنَا مَا أَمَرْتُهُمْ بَيَّهْ وَ لَا فَكَّرْت فَوْقَهْ يَوْم وَاحِدْ. وَ بِالْمُحَرَّمَاتْ دَوْل، لَزَّوْا بَنِي يَهُوذَا فِي الذَّنِبْ.»

دَنْيال 11:31

هُو يِرَسِّلْ عَسْكَرَهْ وَ هُمَّنْ مَا يِحْتَرُمُوا الْبَيْت الْمُقَدَّسْ الْقَوِي. يَمْنَعَوْا الضَّحِيَّةْ الْيِقَدُّمُوهَا كُلَّ يَوْم وَ يِسَوُّوا الْحَرَامْ الْيِجِيبْ الْخَرَابْ.

حِزْقِيال 8:3

وَ هُو مَدَّ مِثِلْ إِيدْ وَ كَرَبَانِي مِنْ صُوفْ رَاسِي. وَ الرُّوحْ دَا رَفَعَانِي فَوْق أَمْبَيْن السَّمَاءْ وَ الْأَرْض. وَ فِي الرُّؤْيَةْ الْمِنْ الرَّبّ دِي، هُو وَدَّانِي فِي بَيْت اللّٰهْ فِي مَدِينَةْ الْقُدُسْ. وَ هِنَاكْ، هُو وَدَّانِي فِي خَشُمْ الْبَابْ الْمُقَابِلْ مُنْشَاقْ هَنَا الْفَضَايْ الدَّخْلَانِيَّةْ. وَ دَا الْبَكَانْ الْيِنْلَقِي فَوْقَهْ صَنَمْ الْغِيرَةْ الْيِقَوِّمْ غِيرَةْ اللّٰهْ.