إرْمِيا 7:18 - الكتاب المقدس بالعربي الدارجي هنا تشاد

¹⁸ الْعِيَالْ يِلَقُّطُوا حَطَبْ وَ الْأَبَّهَاتْ يِقَبُّضُوا نَارْ وَ الْعَوِينْ يِعَجِّنَنْ دَقِيقْ لِيِسَوَّنْ كَعَكْ الْيِقَدُّمُوهْ لِصَنَمْ الْأُسْمَهْ مَلِكَةْ السَّمَاءْ. هُمَّنْ قَاعِدِينْ يِقَدُّمُوا هَدِيَّةْ شَرَابْ لِإِلٰـهَاتْ آخَرِينْ وَ بَيْدَا، يِغَضُّبُونِي أَنَا.

إرْمِيا 7:18 Referenca të Kryqëzuara

إرْمِيا 19:13

وَ بُيُوتْ مَدِينَةْ الْقُدُسْ وَ قُصُورْ مُلُوكْ يَهُوذَا يَبْقَوْا نِجْسِينْ مِثِلْ تُوفَةْ. أَشَانْ فِي رُوسَيْ الْبُيُوتْ دَوْل، حَرَّقَوْا بَخُورْ لِكُلَّ قُوَّاتْ السَّمَاءْ وَ قَدَّمَوْا هَدَايَا شَرَابْ لِإِلٰـهَاتْ آخَرِينْ.“›»

1 كُرُنْتُس 10:22

وَلَّا نِدَوْرُوا نِزَعُّلُوا رَبِّنَا؟ لَا! أَنِحْنَ قَادْرِينْ مِنَّهْ هُو وَلَّا؟ لَا!

1 مُلوك 14:9

وَ إِنْتَ قَاعِدْ تِسَوِّي الْفَسَالَةْ زِيَادَةْ مِنْ النَّاسْ الْقَبْلَكْ. وَ لِتِزَعِّلْنِي، إِنْتَ صَنَعَتْ لَيْك أَصْنَامْ مِنْ حَدِيدْ الْيِمَثُّلُوا إِلٰـهَاتْ آخَرِينْ. وَ لَيِّ أَنَا كَمَانْ، رَفَضْتِنِي.

إرْمِيا 32:29

وَ الْبَابِلِيِّينْ الْيِحَاصُرُوا الْمَدِينَةْ دِي يَدْخُلُوا فَوْقهَا وَ يُتُشُّوهَا. وَ يُتُشُّوا الْبُيُوتْ الْفِي رَاسْهُمْ حَرَّقَوْا بَخُورْ لِإِلٰـهْ بَعَلْ وَ قَدَّمَوْا هَدَايَا شَرَابْ لِإِلٰـهَاتْ آخَرِينْ وَ دَا غَضَّبَوْنِي أَنَا.

إرْمِيا 25:7

وَ لَاكِنْ إِنْتُو مَا سِمِعْتُونِي. بِالْعَكْس، غَضَّبْتُونِي بِخِدْمَةْ إِيدَيْكُو وَ جِبْتُوا فَوْقكُو الْفَسَالَةْ.›» وَ دَا كَلَامْ اللّٰهْ.

إرْمِيا 11:17

«وَ أَنَا اللّٰهْ الْقَادِرْ بَسْ مَقَّنْتَهَا وَ قَرَّرْت نِسَوِّي لَيْهَا الْفَسَالَةْ، بِسَبَبْ الْفَسَالَةْ السَّوَّوْهَا بَنِي إِسْرَائِيلْ وَ بَنِي يَهُوذَا. وَ هُمَّنْ غَضَّبَوْنِي وَكِتْ حَرَّقَوْا بَخُورْ لِإِلٰـهْ بَعَلْ.»

إشَعْيا 3:8

مَدِينَةْ الْقُدُسْ تِتَّرْتَعْ وَ بَلَدْ يَهُوذَا تَقَعْ. أَشَانْ هُمَّنْ أَتْمَرَّدَوْا ضِدّ اللّٰهْ بِكَلَامْهُمْ وَ عَمَلْهُمْ وَ أَبَوْا مَجْدَهْ.

1 مُلوك 16:2

«إِنْتَ الْمَا تِسَاوِي شَيّءْ كُلَ، أَنَا دَرَّجْتَكْ وَ سَوَّيْتَكْ كَبِيرْ هَنَا شَعَبِي بَنِي إِسْرَائِيلْ. وَ لَاكِنْ إِنْتَ تَابَعْت دَرِبْ يَرُبَعَامْ وَ لَزَّيْت شَعَبِي بَنِي إِسْرَائِيلْ فِي الذُّنُوبْ وَ بِذُنُوبْهُمْ دَا، هُمَّنْ غَضَّبَوْنِي.

تَثْنِية 32:21

وَ أَنَا بَسْ اللّٰهْ وَ هُمَّنْ قَوَّمَوْا غِيرْتِي بِإِلٰـهُّمْ وَ غَضَّبَوْنِي بِأَصْنَامْهُمْ الزَّايْلِينْ. وَ لَاكِنْ أَنَا كَمَانْ نِقَوِّمْ غِيرِتْهُمْ بِالشَّعَبْ الْمَا تَمَّوْا أُمَّةْ وَ نِزَعِّلْهُمْ بِأُمَّةْ مَطْمُوسَةْ.

تَثْنِية 32:16

وَ قَوَّمَوْا غِيرْتَهْ بِالْإِلٰـهَاتْ الْأَجْنَبِيِّينْ وَ غَضَّبَوْه بِالْحَرَامْ.

تَثْنِية 4:19

مَا تَرْفَعَوْا عُيُونْكُو لِلسَّمَاءْ وَ تِشِيفُوا الْحَرَّايْ وَ الْقَمَرْ وَ النُّجُومْ وَ كُلَّ قُوَّاتْ السَّمَاءْ وَ يَعَجُبُوكُو وَ تَسْجُدُوا قِدَّامْهُمْ وَ تَعَبُدُوهُمْ. هُمَّنْ دَوْل، اللّٰهْ إِلٰـهْكُو أَنْطَاهُمْ لِكُلَّ الشُّعُوبْ الْآخَرِينْ الْقَاعِدِينْ تِحِتْ السَّمَاءْ.

حِزْقِيال 20:28

أَنَا وَدَّيْتهُمْ فِي الْبَلَدْ الْحَلَفْت وَ قُلْت نَنْطِيهَا لَيْهُمْ. وَ وَكِتْ هُمَّنْ شَافَوْا أَيِّ جَبَلْ عَالِي وَ أَيِّ شَدَرَةْ خَضْرَةْ، قَدَّمَوْا فِي الْبَكَانْ دَا ضَحَايَاهُمْ. وَ غَضَّبَوْنِي بِهَدَايَاهُمْ وَ بِالْبَخُورْ الرِّيحْتَهْ تَعَجِبْ وَ بِهَدَايَاهُمْ هَنَا الشَّرَابْ الْقَدَّمَوْهُمْ فِي الْبَكَانْ دَا.

إرْمِيا 44:25

دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ‹إِنْتُو وَ عَوِينْكُو سَوَّيْتُوا بِإِيدَيْكُو كُلَّ الْكَلَامْ الْقُلْتُوهْ بِخَشُمْكُو. وَ دَاهُو الْكَلَامْ الْقُلْتُوهْ: ”أَنِحْنَ نِحَقُّقُوا نَذِرْنَا الْعَاهَدْنَا بَيَّهْ وَ نِحَرُّقُوا بَخُورْ وَ نِقَدُّمُوا هَدِيَّةْ شَرَابْ لِمَلِكَةْ السَّمَاءْ.“ خَلَاصْ، تِمُّوا كَلَامْكُو وَ حَقُّقُوا نَذِرْكُو!›»

إشَعْيا 65:11

«وَ لَاكِنْ إِنْتُو الْآخَرِينْ، أَبَيْتُونِي أَنَا اللّٰهْ. وَ نِسِيتُوا بَيْتِي بَكَانْ الْعِبَادَةْ فِي جَبَلِي الْمُقَدَّسْ. إِنْتُو قَدَّمْتُوا أَكِلْ لِإِلٰـهْ قَادْ وَ كَاسْ الْخَمَرْ لِصَنَمْ مَنَاةْ.

إشَعْيا 65:3

هُمَّنْ شَعَبْ الدَّايْماً يِغَضُّبُونِي بِنِيِّتْهُمْ. وَ يَدْبَحَوْا لِإِلٰـهَاتْهُمْ فِي الْجِنَيْنَاتْ وَ يِحَرُّقُوا لَيْهُمْ بَخُورْ فِي دِرِنْقَيْل!

إشَعْيا 57:6

وَ فِي الْأَصْنَامْ هَنَا الْحُجَارْ الْمُلُسْ فِي الْوَادِي تَلْقَيْ نَصِيبْكِ، يَا مَدِينَةْ الْقُدُسْ وَ هُمَّنْ دَوْل بَسْ قِسِمْكِ! أَشَانْ لَيْهُمْ إِنْتِ صَبَّيْتِ هَدَايَا شَرَابْ وَ قَدَّمْتِ هَدَايَا هَنَا دَقِيقْ. هَلْ نَرْضَى بِالْأَشْيَاءْ دَوْل وَلَّا؟

زَبُور 16:4

وَ لَاكِنْ الْيِفَتُّشُوا رِضَى الْإِلٰـهَاتْ الْآخَرِينْ يِجِيبُوا لِنُفُوسْهُمْ تَعَبْ. أَنَا مَا نِشَارِكْ فِي قَدِّمِينْ هَدَايَاهُمْ هَنَا الدَّمّ وَ فِي خَشْمِي، مَا نِجِيبْ أُسُمْ إِلٰـهَاتْهُمْ.

إرْمِيا 7:17

إِنْتَ مَا قَاعِدْ تِشِيفْ الشَّيّءْ الْقَاعِدِينْ يِسَوُّوهْ فِي حِلَّالْ بَلَدْ يَهُوذَا وَ شَوَارِعْ مَدِينَةْ الْقُدُسْ وَلَّا؟

إرْمِيا 17:2

وَ مِثِلْ يِذَّكَّرَوْا عِيَالْهُمْ، هُمَّنْ يِذَّكَّرَوْا مَدَابِحْ إِلٰـهَاتْهُمْ وَ الْعِيدَانْ الْغَزَّوْهُمْ لِعِبَادَةْ أَشِيرَةْ. وَ دَوْل تِحِتْ أَيِّ شَدَرَةْ خَضْرَةْ وَ فِي رَاسْ أَيِّ جَبَلْ عَالِي.

مَراثِي إرْمِيا 5:13

وَ الشَّبَابْ شَالَوْا الْمُرْحَاكَةْ التَّقِيلَةْ وَ الصُّبْيَانْ أَتَّرْتَعَوْا مِنْ تَقَلَةْ الْحَطَبْ.

حِزْقِيال 8:17

وَ هُو قَالْ لَيِّ: «يَا إِبْن آدَمْ، إِنْتَ قَاعِدْ تِشِيفْ وَلَّا؟ دَا شِيَّةْ! بَنِي يَهُوذَا يِسَوُّوا مُحَرَّمَاتْ زِيَادَةْ مِنْ دَوْل. يِغَضُّبُونِي وَ يَمْلَوْا الْبَلَدْ بِالْعُنُفْ وَ يِعَيُّرُونِي مُعْيَارْ خَطِيرْ!

حِزْقِيال 16:26

وَ أَشَّرْمَطْتِ مَعَ الْمَصْرِيِّينْ جِيرَانْكِ الْأَجْسَامْهُمْ كُبَارْ وَ كَتَّرْتِ شَرْمَطَتْكِ لِتِغَضِّبِينِي.

إرْمِيا 1:16

وَ بَيْدَا، أَنَا نِحَاكِمْ شَعَبِي فِي شَانْ فَسَالِتْهُمْ. وَ فَسَالِتْهُمْ دِي، هُمَّنْ أَبَوْنِي أَنَا وَ حَرَّقَوْا بَخُورْ لِإِلٰـهَاتْ آخَرِينْ وَ سَجَدَوْا لِلْأَصْنَامْ السَّوَّوْهُمْ بِإِيدَيْهُمْ.

إرْمِيا 44:4

أَنَا رَسَّلْت لَيْهُمْ دَايْماً عَبِيدِي الْأَنْبِيَاء وَ بِوَاسِطَةْ الْأَنْبِيَاء دَوْل أَنَا قُلْت لَيْهُمْ: ‹مَا تِسَوُّوا الْحَرَامْ دَا أَشَانْ أَنَا نَكْرَهَهْ.›

حِزْقِيال 8:16

وَ هُو وَدَّانِي دَاخَلْ فِي فَضَايَةْ بَيْت اللّٰهْ الدَّخْلَانِيَّةْ. وَ دَاهُو فِي خَشُمْ بَيْت اللّٰهْ أَمْبَيْن غُرْفَةْ الْمَدَخَلْ وَ الْمَدْبَحْ، فِيَّهْ حَوَالَيْ 25 رَاجِلْ. أَنْطَوْا ضُهُورْهُمْ لِبَيْت اللّٰهْ وَ وَجَّهَوْا صَبَاحْ عَلَيْ الْحَرَّايْ وَ سَجَدَوْا لَيْهَا.