إرْمِيا 50:15 - الكتاب المقدس بالعربي الدارجي هنا تشاد

¹⁵ حَوُّقُوهَا مِنْ كُلِّ جِيهَةْ وَ كَوْرُكُوا كُرَوْرَاكْ الْحَرِبْ ضِدَّهَا. وَ خَلَاصْ، هِي تِسَلِّمْ نَفِسْهَا وَ قُصُورْهَا يِدَفُّقُوا وَ دَرَادِرْهَا يَقَعَوْا. اللّٰهْ كَفَّى التَّارْ فَوْقهَا. إِنْتُو كُلَ كَفُّوا التَّارْ وَ سَوُّوا فَوْقهَا مِثِلْ هِي سَوَّتْ.

إرْمِيا 50:15 Referenca të Kryqëzuara

إرْمِيا 51:58

وَ دَاهُو اللّٰهْ الْقَادِرْ قَالْ: «دَرَادِرْ بَابِلْ التُّخَانْ يِلْهَدَّمَوْا. وَ بِيبَانْهَا الطُّوَالْ، النَّارْ تَاكُلْهُمْ. الشُّعُوبْ يِعَيُّوا نُفُوسْهُمْ سَاكِتْ وَ الْأُمَمْ يَتْعَبَوْا لِلتَّاكُلَهْ النَّارْ.»

رُؤية 18:6

«خَلِّي يِسَوُّوا لَيْهَا مِثِلْ هِي سَوَّتَهْ لِلنَّاسْ. خَلِّي يِلْكَفَّوْا فَوْقهَا مَرَّتَيْن الشَّيّءْ الْهِي سَوَّتَهْ. خَلِّي يَمْلَوْا كَاسْهَا بِشَرَابْ الْيِسَكِّرْ مَرَّتَيْن مِنْ الشَّرَابْ الْهِي أَنْطَتَهْ لِلنَّاسْ.

إرْمِيا 51:6

عَرُّدُوا مِنْ بَلَدْ بَابِلْ وَ خَلِّي أَيِّ وَاحِدْ يِنَجِّي نَفْسَهْ. مَا تُمُوتُوا بِسَبَبْ ذَنِبْهَا أَشَانْ دَا وَكِتْ اللّٰهْ يِشِيلْ تَارَهْ وَ يِجَازِيهَا حَسَبْ الْوَاجِبْ لَيْهَا.

إرْمِيا 46:10

وَ لَاكِنْ الْيَوْم، دَا يَوْم اللّٰهْ الرَّبّ الْقَادِرْ وَ دَا يَوْم كَفِّينْ التَّارْ، يَوْم يِشِيلْ التَّارْ فِي عُدْوَانَهْ. وَ فِي الْيَوْم دَا، السَّيْف يَاكُلْ وَ يَشْبَعْ لَحَمْ وَ يَشْرَبْ وَ يَرْوَى دَمّ. أَشَانْ دَا ضَحِيَّةْ لِلّٰهْ الرَّبّ الْقَادِرْ فِي بَلَدْ الْمُنْشَاقْ عَلَيْ بَحَرْ الْفُرَاتْ.

مَراثِي إرْمِيا 5:6

لِلْمَصْرِيِّينْ وَ الْأَشُورِيِّينْ، مَدَّيْنَا إِيدَيْنَّا وَ دَوَّرْنَا مِنْهُمْ مَعَاشْنَا.

إرْمِيا 51:44

وَ اللّٰهْ قَالْ: «أَنَا نُقُمّ ضِدّ صَنَمْ بِيلْ فِي بَابِلْ وَ نَمْرُقْ اللُّقْمَةْ مِنْ خَشْمَهْ. وَ بَتَّانْ الْأُمَمْ مَا يَمْشُوا لَيَّهْ وَ دُرْدُرْ بَابِلْ يَقَعْ.

إرْمِيا 51:14

اللّٰهْ الْقَادِرْ حَلَفْ بِنَفْسَهْ وَ قَالْ: «أَنَا نَمْلَاكِ بِرُجَالْ كَتِيرِينْ مِثِلْ الْجَرَادْ وَ يِكَوْرُكُوا فِي لُبِّكِ كُرَوْرَاكْ النَّصُرْ.»

إرْمِيا 51:11

طَرُّقُوا نَشَاشِيبْكُو وَ أَمْلَوْا كَلَوْتَاتْكُو. اللّٰهْ حَرَّشْ مُلُوكْ مَادِي ضِدّ بَابِلْ أَشَانْ هُو قَرَّرْ يِدَمِّرْ بَابِلْ. يِشِيلْ فَوْقهَا التَّارْ وَ دَا تَارْ بَيْتَهْ الْمُقَدَّسْ الدَّمَّرَوْه.

2 أخبار 30:8

وَ هَسَّعْ دَا، مَا تِقَوُّوا رُوسَيْكُو مِثِلْ أَبَّهَاتْكُو. لَاكِنْ مِدُّوا إِيدَيْكُو لِلّٰهْ وَ تَعَالُوا لِبَيْتَهْ الْمُقَدَّسْ الْهُو قَدَّسَهْ إِلَى الْأَبَدْ. أَعَبُدُوا اللّٰهْ إِلٰـهْكُو وَ هُو يَرْفَعْ مِنْكُو غَضَبَهْ.

1 أخبار 29:24

وَ كُلَّ الْكُبَارَاتْ وَ الرُّجَالْ الْفَحَلِينْ وَ كُلَّ الْعِيَالْ الْآخَرِينْ هَنَا الْمَلِكْ دَاوُدْ قَعَدَوْا تِحِتْ حُكُمْ سُلَيْمَانْ.

رُؤية 19:2

حِسَابَهْ حَقّ وَ عَادِلْ. هُو حَاسَبْ الشَّرْمُوطَةْ الْكَبِيرَةْ الْفَسَدَتْ نَاسْ الْأَرْض بِزِنَاهَا. هِي دَفَّقَتْ دَمّ عَبِيدْ اللّٰهْ وَ اللّٰهْ شَالْ لَيْهُمْ التَّارْ فَوْقهَا.»

رُؤية 16:6

أَشَانْ أَوَّلْ النَّاسْ دَفَّقَوْا دَمّ الْأَنْبِيَاء وَ الصَّالِحِينْ وَ خَلَاصْ إِنْتَ أَنْطَيْتهُمْ دَمّ يَشَرْبَوْه وَ دَا وَاجِبْ لَيْهُمْ.»

يَعْقُوب 2:13

كَنْ نَادُمْ مَا يَرْحَمْ النَّاسْ، اللّٰهْ كُلَ مَا يَرْحَمَهْ فِي يَوْم الْحِسَابْ. وَ لَاكِنْ النَّادُمْ الْيَرْحَمْ النَّاسْ، مَا يَخَافْ مِنْ يَوْم الْحِسَابْ.

2 تَسَلونِيكِي 1:8

هُو يَجِي بِنَارْ أَمّ لَهِيبْ حَامِيَةْ. وَ هُو يِعَاقِبْ النَّاسْ الْمَا يِدَوْرُوا يَعَرْفُوا اللّٰهْ وَ مَا يِتَابُعُوا بِشَارَةْ رَبِّنَا عِيسَى.

رَوْمَا 12:19

يَا الْمَحْبُوبِينْ، مَا تِشِيلُوا التَّارْ. خَلُّوا غَضَبْ اللّٰهْ يِشِيلْ لَيْكُو التَّارْ أَشَانْ مَكْتُوبْ فِي الْكِتَابْ: <التَّارْ هَنَايِ. أَنَا بَسْ النِّشِيلَهْ.> دَا بَسْ كَلَامْ اللّٰهْ.

رَوْمَا 3:5

كَنْ بِفَسَالِتْنَا اللّٰهْ يِوَصِّفْ كَدَرْ هُو عَادِلْ، نُقُولُوا شُنُو؟ هَلْ نُقُولُوا اللّٰهْ مَا عَادِلْ وَكِتْ يِنَزِّلْ غَضَبَهْ فَوْقنَا وَلَّا؟ بِالْكَلَامْ دَا، نِحَجِّي بِفِكِرْ إِنْسَانِي بَسْ.

لُوقا 21:22

أَشَانْ فِي الْوَكِتْ دَا، اللّٰهْ يِعَاقِبْ شَعَبَهْ وَ كُلَّ الْكَلَامْ الْأَوَّلْ الْأَنْبِيَاء كَتَبَوْه فَوْقهُمْ يِتِمّ.

مَتَّى 7:2

أَشَانْ مِثِلْ إِنْتُو تِحَاكُمُوا النَّاسْ، مِثِلْ دَا بَسْ اللّٰهْ يِحَاكِمْكُو. هُو يِكِيل لَيْكُو بِنَفْس الْمِكْيَالْ الْإِنْتُو تِكِيلُوا بَيَّهْ لِلنَّاسْ.

نَاحُوم 1:2

اللّٰهْ هُو غَيُّورْ. أَيْوَى، مَا يِدَوْر يَعَبُدُوا إِلٰـهْ آخَرْ بَلَايَهْ وَ يِشِيلْ التَّارْ. أَيْوَى، اللّٰهْ هُو الْيِشِيلْ التَّارْ وَ سِيدْ الْغَضَبْ الشَّدِيدْ. هُو يِشِيلْ التَّارْ فِي خُصْمَانَهْ وَ يَغْضَبْ لِعُدْوَانَهْ.

حِزْقِيال 21:22

وَ فِي إِيدَهْ الزَّيْنَةْ، فِي عُودْ الْيِوَصِّفْ كَدَرْ أَمْ عِيَيْدَاتْ وَقَعَتْ فِي مَدِينَةْ الْقُدُسْ. وَ فِي شَانْ دَا، يِجِيبُوا مُرْدَاسْ كَبِيرْ وَ يِكَوْرُكُوا لِلْكَتِلْ وَ يَرْفَعَوْا حِسُّهُمْ لِلْحَرْبَةْ. وَ يُدُقُّوا بِيبَانْ الْمَدِينَةْ بِالْمُرْدَاسْ الْكَبِيرْ دَا وَ يِلِمُّوا تُرَابْ وَ يَبْنُوا رَدْمِيَّةْ.

حِزْقِيال 17:18

الْمَلِكْ دَا قَطَعْ حَلِيفْتَهْ وَ نَقَضْ مُعَاهَدَتَهْ الْهُو مَضَى فَوْقهَا وَ سَوَّى كُلَّ الشَّيّءْ دَا. وَ بَيْدَا، هُو مَا يَنْجَى.›»

إرْمِيا 51:64

وَ بَعَدْ دَا، قُولْ: ‹بَابِلْ كُلَ تَغْرَقْ مِثِلْ دَا وَ أَبَداً مَا تُقُمّ بَعَدْ الْفَسَالَةْ النِّجِيبْهَا فَوْقهَا.›» «النَّاسْ يَقَعَوْا.» وَ دَاهُو نِهَايَةْ كَلَامْ إِرْمِيَا.

إرْمِيا 51:36

وَ فِي شَانْ دَا، دَاهُو اللّٰهْ قَالْ: «أَنَا نِدَافِعْ لَيْكُو مِثِلْ مُحَامِي وَ نِشِيلْ لَيْكُو التَّارْ. وَ نِيَبِّسْ بَحَرْ بَابِلْ وَ نِجَفِّفْ عُيُونْ أَلْمِيهَا.

إرْمِيا 51:25

وَ أَكِيدْ أَنَا نُقُمّ ضِدِّكِ إِنْتِ، يَا بَابِلْ الْمِثِلْ جَبَلْ الْخَرَابْ، إِنْتِ الْخَرَبْتِ كُلَّ الْأَرْض. أَنَا نِمِدّ إِيدِي لِنَضْرُبْكِ وَ نِدَرْدِقْكِ مِنْ رُوسَيْ الْجِبَالْ وَ نَحْرِقْكِ بِنَارْ. وَ دَا كَلَامْ اللّٰهْ.

إرْمِيا 50:14

يَلَّا! إِنْتُو سِيَادْ النُّبَّالْ قُمُّوا لِمُحَارَبَةْ بَابِلْ وَ مِنْ كُلِّ جِيهَةْ، زَرُّقُوهَا. مَا تِفَضُّلُوا نُشَّابْ وَاحِدْ كُلَ أَشَانْ هِي أَذْنَبَتْ ضِدّ اللّٰهْ.

إشَعْيا 63:4

أَشَانْ فِي قَلْبِي، دَا يَوْم هَنَا تَارْ وَ السَّنَةْ النَّفْدَى فِيهَا، هِي جَاتْ.

إشَعْيا 61:2

أَنَا نَعْلِنْ سَنِةْ نِعْمَةْ اللّٰهْ وَ يَوْم التَّارْ هَنَا إِلٰـهْنَا. وَ دَا، لِنِصَبِّرْ كُلَّ الْحَزْنَانِينْ.

إشَعْيا 59:17

هُو لِبِسْ الْعَدَالَةْ مِثِلْ دِرِعْ وَ خَطَّ طَاقِيَّةْ النَّجَاةْ فِي رَاسَهْ. هُو لِبِسْ خَلَقْ التَّارْ مِثِلْ عِبَايَةْ وَ أَنْكَسَى بِالْغِيرَةْ مِثِلْ جَلَّابِيَّةْ.

زَبُور 149:7

أَشَانْ يِشِيلُوا التَّارْ فِي الْأُمَمْ وَ يِعَاقُبُوا الشُّعُوبْ.

زَبُور 94:1

يَا اللّٰهْ، إِنْتَ الْإِلٰـهْ التِّشِيلْ التَّارْ! يَا إِلٰـهْ التِّشِيلْ التَّارْ، بَيِّنْ نَفْسَكْ!

1 صَمُوِيل 15:33

وَ صَمُوِيلْ قَالْ لَيَّهْ: «مِثِلْ سَيْفَكْ بَكَّى عَوِينْ كَتِيرِينْ، أَمَّكْ إِنْتَ كُلَ الْيَوْم تَبْكِي!» وَ صَمُوِيلْ كَتَلَهْ لِلْمَلِكْ أَقَاقْ قِدَّامْ اللّٰهْ فِي قِلْقَالْ.

يَشُوع 6:20

وَ ضَرَبَوْا الْبُوقْ وَ وَكِتْ الشَّعَبْ سِمْعَوْا ضَرِبِينْ الْبُوقْ، عَاطَوْا بِشِدَّةْ. وَ طَوَّالِي، دُرْدُرْ الْحِلَّةْ وَقَعْ وَ بَنِي إِسْرَائِيلْ هَجَمَوْا الْحِلَّةْ أَيِّ وَاحِدْ بِالْفَرَقَةْ الْقِدَّامَهْ وَ شَالَوْا الْحِلَّةْ.

يَشُوع 6:5

وَ وَكِتْ تَسْمَعَوْا رُجَالْ الدِّينْ يَضُرْبُوا حِسّ طَوِيلْ فِي الْبُوقْ، خَلِّي كُلَّ الشَّعَبْ يِعِيطُوا. وَ الدُّرْدُرْ الْمُحَوِّقْ الْحِلَّةْ يَقَعْ وَ خَلَاصْ، كُلُّكُو تَهْجُمُوا الْحِلَّةْ، أَيِّ وَاحِدْ بِالْفَرَقَةْ الْقِدَّامَهْ.»

تَثْنِية 32:43

يَا الْأُمَمْ، أَفْرَحَوْا مَعَ شَعَبَهْ أَشَانْ اللّٰهْ يِلْكَفَّى دَمّ عَبِيدَهْ وَ يِشِيلْ التَّارْ فِي عُدْوَانَهْ وَ يِكَفِّرْ لِشَعَبَهْ فِي أَرْضَهْ.

تَثْنِية 32:41

وَ وَكِتْ نِطَرِّقْ سَيْفِي وَ نُقُمّ بِالْعَدَالَةْ، نِشِيلْ التَّارْ فِي عُدْوَانِي وَ نِلْكَفَّى فِي الْيَكْرَهَوْنِي.

تَثْنِية 32:35

وَ أَنَا بَسْ النِّشِيلْ التَّارْ وَ نَنْطِي الْأَجُرْ وَكِتْ رِجْلَيْهُمْ يِتَّرْتَعَوْا أَشَانْ يَوْم خَرَابْهُمْ قَرَّبْ وَ يَجِيهُمْ بِسُرْعَةْ.»

إرْمِيا 50:25

اللّٰهْ فَتَحْ بَيْت السِّلَاحْ وَ مَرَقْ سِلَاحْ غَضَبَهْ. وَ مِثِلْ دَا بَسْ، اللّٰهْ الرَّبّ الْقَادِرْ جَهَّزْ خِدِمْتَهْ ضِدّ بَلَدْ بَابِلْ.

إرْمِيا 50:44

وَ اللّٰهْ قَالْ: «مِثِلْ دُودْ الْيَمْرُقْ مِنْ غَابَةْ الْأُرْدُنْ لِيَهْجِمْ غَنَمْ فِي مَرْعَى أَخْضَرْ، أَنَا كُلَ نُقُمّ نَطْرُدْ نَاسْ بَابِلْ بِغَفْلَةْ وَ نِثَبِّتْ فَوْقهَا النَّادُمْ الْأَنَا عَزَلْتَهْ. يَاتُو الْمِثْلِي أَنَا؟ وَ يَاتُو الْيَنْطِينِي أَمُرْ؟ وَ يَاتُو الْمَلِكْ الْيَقْدَرْ يُقُمّ ضِدِّي؟»

إرْمِيا 51:24

«وَ لَاكِنْ هَسَّعْ، شِيفُوا يَا بَنِي إِسْرَائِيلْ! أَنَا نِجَازِي بَابِلْ وَ كُلَّ سُكَّانْهَا حَسَبْ كُلَّ الْفَسَالَةْ السَّوَّوْهَا فِي صَهْيُون. وَ دَا كَلَامْ اللّٰهْ.

إرْمِيا 51:30

وَ الْعَسْكَرْ الْفُرَّاسْ هَنَا بَابِلْ أَبَوْا مَا يِحَارُبُوا وَ أَلَّبَّدَوْا فِي بَكَانَاتْهُمْ الْقَوِيِّينْ. وَ فَحَالِيِّتْهُمْ كُلَ وَدَّرَتْ وَ هُمَّنْ بِقَوْا مِثِلْ عَوِينْ. وَ بُيُوتْ بَابِلْ أَنْتَشَّوْا وَ بِيبَانْهَا أَلْكَسَّرَوْا.

إشَعْيا 59:18

خَلَاصْ، اللّٰهْ يِكَافِي أَيِّ نَادُمْ حَسَبْ عَمَلَهْ وَ يَغْضَبْ لِخُصْمَانَهْ وَ يِجَازِي عُدْوَانَهْ وَ يِكَافِي سُكَّانْ الْجَزَايِرْ حَسَبْ عَمَلْهُمْ.