إرْمِيا 5:5 - الكتاب المقدس بالعربي الدارجي هنا تشاد

⁵ وَ خَلَاصْ، أَنَا نَمْشِي لِلْكُبَارَاتْ وَ نِحَجِّي مَعَاهُمْ أَشَانْ هُمَّنْ يَعَرْفُوا دَرِبْ اللّٰهْ وَ شَرِيعَةْ إِلٰـهُّمْ.» مَشَيْت وَ لَاكِنْ الْكُبَارَاتْ كُلَ مِثِلْ الْمَسَاكِينْ دَلَّوْا تَقَلَةْ شَرِيعَةْ اللّٰهْ مِنْ رَقَبَتْهُمْ وَ قَطَعَوْا قُيُودْهُمْ وَ بِقَوْا حُرِّينْ.

إرْمِيا 5:5 Referenca të Kryqëzuara

إرْمِيا 2:20

وَ اللّٰهْ قَالْ: «يَا بَنِي إِسْرَائِيلْ! مِنْ وَكِتْ طَوِيلْ إِنْتُو دَلَّيْتُوا التَّقَلَةْ مِنْ رَقَبَتْكُو وَ قَطَّعْتُوا قُيُودْكُو وَ قُلْتُوا: ‹أَبَداً مَا نَعَبُدُوكْ.› وَ فِي رَاسْ أَيِّ جَبَلْ عَالِي وَ تِحِتْ أَيِّ شَدَرَةْ خَضْرَةْ، إِنْتُو رَاقْدِينْ مِثِلْ الشَّرْمُوطَةْ.

لُوقا 19:14

وَ شَعَبْ بَلَدَهْ كِرْهَوْه وَ رَسَّلَوْا وَرَايَهْ مُمَثِّلِينْ أَشَانْ يُقُولُوا: ‹مَا نِدَوْرُوا النَّادُمْ دَا يَبْقَى فَوْقنَا مَلِكْ.›

لُوقا 18:24

وَ عِيسَى شَافْ وِجْهَهْ وَ قَالْ: «الدَّخُولْ فِي مَمْلَكَةْ اللّٰهْ قَاسِي لِلنَّاسْ الْعِنْدُهُمْ مَالْ كَتِيرْ.

مَلاخِـي 2:7

«وَ أَيِّ رَاجِلْ دِينْ، وَاجِبْ لِسَانَهْ يَحْفَضْ الْمَعْرَفَةْ وَ مِنْ خَشْمَهْ، الشَّعَبْ يَسْمَعَوْا شُرُوطْ التَّوْرَاةْ أَشَانْ هُو رَسُولْ اللّٰهْ الْقَادِرْ.

مِيخا 3:11

وَ الْقُضْيَاءْ يَقْطَعَوْا شَرِيعَةْ بِالرَّشْوَةْ وَ رُجَالْ الدِّينْ يِعَلُّمُوا كَلَامْ اللّٰهْ لِيَلْقَوْا فَايْدَةْ وَ الْأَنْبِيَاء يِتْنَبَّأَوْا لِيَلْقَوْا فُضَّةْ. هُمَّنْ يِتْوَكَّلَوْا عَلَيْ اللّٰهْ وَ يُقُولُوا: «اللّٰهْ مَا قَاعِدْ فِي أُسُطْنَا وَلَّا؟ الْفَسَالَةْ أَبَداً مَا تَلْحَقْنَا!»

عَمُوس 4:1

أَسْمَعَنْ، يَا الْعَوِينْ الْقَاعِدَاتْ فِي جِبَالْ مَدِينَةْ السَّامِرَةْ! إِنْتَنْ مِثِلْ بَقَرْ الْيَسْرَحَوْا فِي مَرْعَى بَاشَانْ. إِنْتَنْ تَظُلْمَنْ الْمَسَاكِينْ وَ تِتَعِّبَنْ الْفَقْرَانِينْ. وَ تَامُرَنْ سِيَادْ بُيُوتْكَنْ وَ تُقُولَنْ: «جِيبْ لَيِّ نَشْرَبْ!»

إرْمِيا 6:13

مِنْ الضَّعِيفْ لَحَدِّي الْقَادِرْ، كُلُّهُمْ جَارِيِينْ وَرَاءْ مَالْ الْحَرَامْ. وَ الْأَنْبِيَاء وَ رُجَالْ الدِّينْ كُلُّهُمْ غَشَّاشِينْ.

خُروج 32:25

وَ خَلَاصْ، مُوسَى عِرِفْ كَدَرْ الشَّعَبْ قَاعِدِينْ يِسَوُّوا أَيِّ شَيّءْ بَلَا حُدُودْ. وَ هَارُونْ كُلَ مَا قِدِرْ لَيْهُمْ. وَ بَيْدَا، عُدْوَانْهُمْ قَاعِدِينْ يِشَّمَّتَوْا لَيْهُمْ.

إرْمِيا 9:3

وَ دَاهُو كَلَامْ اللّٰهْ: «لِسَانْهُمْ طَرِينْ مِثِلْ النُّشَّابْ وَ يُغُشُّوا وَ قُدْرِتْهُمْ فِي الْبَلَدْ دِي، مَا لِقَوْهَا بِصَحِيحْ. لَاكِنْ هُمَّنْ مَاشِينْ مِنْ فَسِلْ لِأَفْسَلْ وَ مَا يَعَرْفُونِي.

حِزْقِيال 11:2

وَ اللّٰهْ قَالْ لَيِّ: «يَا إِبْن آدَمْ، دَوْل الرُّجَالْ الْيِخَطُّطُوا الظُّلُمْ وَ يِوَصُّوا بِالْفَسَالَةْ فِي الْمَدِينَةْ دِي.

2 أخبار 36:14

وَ زِيَادَةْ مِنْ دَا، كُلَّ كُبَارَاتْ رُجَالْ الدِّينْ وَ كُبَارَاتْ الشَّعَبْ عِصَوْا مَرَّةْ وَاحِدْ. سَوَّوْا نَفْس الْمُحَرَّمَاتْ السَّوَّوْهُمْ الْأُمَمْ الْآخَرِينْ وَ نَجَّسَوْا بَيْت اللّٰهْ الْهُو قَدَّسَهْ فِي مَدِينَةْ الْقُدُسْ.

إشَعْيا 1:23

مَسَائِيلْكِ بِقَوْا حَرَامِيِّينْ وَ مُنْرَبِطِينْ مَعَ السَّرَارِيقْ. وَ يِحِبُّوا الرَّشْوَةْ وَ يَجْرُوا وَرَاءْ الْفَايْدَةْ. هُمَّنْ مَا يِدَافُعُوا لِحُقُوقْ الْأَتِيمْ وَ مَا لَمَّاهُمْ بِشَكْوَةْ الْأَرْمَلَةْ.

إرْمِيا 2:31

وَ إِنْتُو نَاسْ الْيَوْم دَوْل، أَسْمَعَوْا كَلَامِي أَنَا اللّٰهْ. يَا بَنِي إِسْرَائِيلْ، هَلْ أَنَا بِقِيتْ لَيْكُو مُخِيفْ مِثِلْ الصَّحَرَاء؟ وَلَّا بِقِيتْ لَيْكُو مِثِلْ الْبَلَدْ الْعِنْدَهَا ضَلَامْ أَزْرَقْ كُرُمْ؟ مَالَا نَاسْ شَعَبِي بُقُولُوا: ‹يَلَّا نَمْشُوا! مَا نِقَبُّلُوا لَيْك أَبَداً!›

إرْمِيا 8:7

حَتَّى الْكُنْجِي فِي الْكَدَادَةْ كُلَ يَعَرِفْ وَكْتَهْ هَنَا مَشِيهْ وَ جَيْتَهْ. وَ الْقِمْرِيْ وَ أَبُنْ جَرَارِي وَ أَبُنْ غَنَمْ يَعَرْفُوا وَكِتْهُمْ الْيِقَبُّلُوا فَوْقَهْ. وَ لَاكِنْ شَعَبِي مَا يِفَكُّرُوا فِي الطَّبِيعَةْ الْأَنَا اللّٰهْ أَنْطَيْتهَا لَيْهُمْ.

إرْمِيا 30:14

كُلَّ صُدْقَانْكِ يَنْسَوْكِ، هُمَّنْ مَا يِهِمُّوا بَيْكِ. أَنَا ضَرَبْتِكِ ضَرْبَةْ عَدُو وَ عَاقَبْتِكِ بَلَا رَحْمَةْ. وَ دَا، فِي شَانْ خَطَاكِ الْكَتِيرْ وَ ذَنِبْكِ الْمَا عِنْدَهْ حَدّ.

عَمُوس 6:1

الْعَذَابْ لَيْكُو إِنْتُو الْقَاعِدِينْ مُرْتَاحِينْ فِي جَبَلْ صَهْيُون وَ الْقَاعِدِينْ بِأَمَانْ فِي جَبَلْ السَّامِرَةْ. إِنْتُو تَحْسُبُوا نُفُوسْكُو أَحْسَنْ نَاسْ فِي أَحْسَنْ أُمَّةْ وَ كُلَّ بَنِي إِسْرَائِيلْ يَجُوا لَيْكُو إِنْتُو.