إرْمِيا 49:2 - الكتاب المقدس بالعربي الدارجي هنا تشاد

² فِي شَانْ دَا، يَجِي يَوْم وَاحِدْ الْفَوْقَهْ أَنَا نِجِيبْ كُرَوْرَاكْ الْهُجُومْ فِي رَبَّةْ مَدِينَةْ بَنِي عَمُّونْ. وَ دَا كَلَامْ اللّٰهْ. هِي تَخْرَبْ وَ تَبْقَى كَوْم هَنَا تُرَابْ وَ الْحِلَّالْ التَّابْعِينْ لَيْهَا يَحْرَقَوْا بِنَارْ. وَ فِي الْبَكَانْ دَا، بَنِي إِسْرَائِيلْ يَقْلَعَوْا مِنْ الْعُدْوَانْ الْقَلَعَوْا مِنْهُمْ. وَ دَا، اللّٰهْ بَسْ قَالَهْ.

إرْمِيا 49:2 Referenca të Kryqëzuara

إرْمِيا 4:19

وَ إِرْمِيَا قَالْ: «بُطُونِي! بُطُونِي حِرْقَوْا! أَنَا نِتَّنَّ مِنْ الْوَجَعْ وَ قَلْبِي يَضْرُبْ. وَ نَفْسِي مُبَرْجَلَةْ وَ مَا نَقْدَرْ نَسْكُتْ. أَشَانْ أَنَا سِمِعْت حِسّ الْبُوقْ وَ كُرَوْرَاكْ الْحَرِبْ.

حِزْقِيال 21:20

وَ الدَّرِبْ الْوَاحِدْ يِوَدِّي السَّيْف لِرَبَّةْ مَدِينَةْ بَنِي عَمُّونْ. وَ الدَّرِبْ الْآخَرْ يِوَدِّيهْ لِمَدِينَةْ الْقُدُسْ هِي الْمَدِينَةْ الْقَوِيَّةْ فِي بَلَدْ يَهُوذَا.

تَثْنِية 3:11

وَ عُوقْ مَلِكْ بَاشَانْ، هُو آخِرْ وَاحِدْ الْفَضَّلْ مِنْ الرَّفَايِينْ. وَ سَرِيرَهْ هَنَا حَدِيدْ قَاعِدْ فِي رَبَّةْ عَاصِمَةْ بَنِي عَمُّونْ. وَ طُولْ السَّرِيرْ دَا 9 دُرَاعْ وَ عُرْضَهْ 4 دُرَاعْ.

عَمُوس 1:14

وَ فِي شَانْ دَا، أَنَا نِنَزِّلْ نَارْ فِي دَرَادِرْ مَدِينَةْ رَبَّةْ التَّاكُلْ كُلَّ قُصُورْهَا بِكُرَوْرَاكْ فِي يَوْم الْحَرِبْ وَ بِأَمْ زَوْبَعَانَةْ فِي يَوْم هَنَا رِيحْ شَدِيدَةْ.

2 صَمُوِيل 11:1

وَ فِي السَّنَةْ الْجَدِيدَةْ، فِي وَكِتْ الْمُلُوكْ يَمْشُوا الْحَرِبْ، دَاوُدْ رَسَّلْ يُوَابْ قَايِدْ دَيْشَهْ وَ نَاسَهْ وَ كُلَّ بَنِي إِسْرَائِيلْ فِي الْحَرِبْ. وَ هُمَّنْ دَمَّرَوْا بَنِي عَمُّونْ وَ حَاصَرَوْا مَدِينَةْ رَبَّةْ عَاصِمَتْهُمْ. وَ لَاكِنْ دَاوُدْ قَعَدْ فِي أُورُشَلِيمْ.

إرْمِيا 49:1

كَلَامْ بُخُصّ بَنِي عَمُّونْ. دَاهُو اللّٰهْ قَالْ: «إِسْرَائِيلْ مَا عِنْدَهْ وِلَيْد وَلَّا؟ هُو مَا عِنْدَهْ وَرِيثْ وَلَّا؟ مَالَا صَنَمْ مُولَكْ وَرَثْ تُرَابْ قَادْ؟ وَ مَالَا هُو سَكَّنْ شَعَبَهْ فِي مُدُنْهَا؟

زَبُور 97:8

سُكَّانْ صَهْيُون سِمْعَوْا وَ فِرْحَوْا وَ حِلَّالْ بَلَدْ يَهُوذَا أَنْبَسَطَوْا بِسَبَبْ شَرِيعْتَكْ، يَا اللّٰهْ!

زَبُور 48:11

بِسَبَبْ عَدَالْتَكْ، جَبَلْ صَهْيُون يَفْرَحْ وَ حِلَّالْ بَلَدْ يَهُوذَا يِنْبَسْطُوا.

عَدد 21:25

وَ بَنِي إِسْرَائِيلْ شَالَوْا كُلَّ مُدُنْ الْأَمُورِيِّينْ وَ سَكَنَوْا فَوْقهُمْ. هُمَّنْ سَكَنَوْا فِي حَشْبُونْ وَ كُلَّ الْحِلَّالْ التَّابْعِينْ لَيْهَا.

عُبَدْيا 1:19

وَ فِي الْجُنُوبْ، بَنِي يَهُوذَا يَقْلَعَوْا جِبَالْ ذُرِّيَّةْ عِيسُو وَ فِي سَهَلَةْ شَفِيلَةْ، يَقْلَعَوْا بَلَدْ الْفِلِسْطِيِّينْ. وَ يَقْلَعَوْا تُرَابْ قَبِيلَةْ أَفْرَايِمْ وَ تُرَابْ مَدِينَةْ السَّامِرَةْ. وَ نَاسْ قَبِيلَةْ بَنْيَامِينْ يَقْلَعَوْا قِلْعَادْ.

عَدد 10:9

«وَ وَكِتْ تَمْشُوا لِلْحَرِبْ ضِدّ عُدْوَانْكُو الْقَاعِدِينْ يَهْجُمُوكُو فِي بَلَدْكُو، أَضُرْبُوا الْبُرُنْجِي الْإِتْنَيْن عِدَّةْ مَرَّاتْ. وَ بَيْدَا، أَنَا اللّٰهْ إِلٰـهْكُو نِفَكِّرْ فَوْقكُو وَ نِنَجِّيكُو مِنْ عُدْوَانْكُو.

تَثْنِية 13:16

وَ لِمُّوا كُلَّ الْغَنِيمَةْ اللِّقِيتُوهَا فِي نَقَعَةْ الْحِلَّةْ وَ حَرُّقُوا الْحِلَّةْ وَ كُلَّ الْغَنِيمَةْ قِدَّامْ اللّٰهْ إِلٰـهْكُو. وَ الْبَكَانْ دَا يَقْعُدْ مِثِلْ دُنْقُسْ أَشَانْ الْحِلَّةْ دِي أَبَداً مَا تَعَمِرْ بَتَّانْ.

يَشُوع 17:11

وَ قَبِيلَةْ مَنَسَّى لِقَوْا مُدُنْ فِي أَرْض يَسَّاكَرْ وَ أَرْض أَشِيرْ. وَ الْمُدُنْ دَوْل هُمَّنْ بَيْت شَانْ وَ يِبْلَعَامْ وَ الْحِلَّالْ التَّابْعِينْ لَيْهُمْ وَ دُورْ وَ عَيْن دُورْ وَ تَعْنَكْ وَ مَقِدُّو وَ سُكَّانْهُمْ وَ الْحِلَّالْ التَّابْعِينْ لَيْهُمْ. وَ دَا، تَلَاتَةْ مَنَاطِقْ.

يَشُوع 17:16

وَ ذُرِّيَّةْ يُوسُفْ قَالَوْا لَيَّهْ: «صَحِيحْ الْجِبَالْ وِحَيْدهُمْ مَا يِتِمُّونَا وَ لَاكِنْ الْكَنْعَانِيِّينْ السَّاكْنِينْ فِي السَّهَلَةْ هَنَا الْبَلَدْ دِي عِنْدُهُمْ عَرَبَاتْ هَنَا حَدِيدْ وَ نَاسْ الْقَاعِدِينْ فِي بَيْت شَانْ وَ حِلَّالْهَا التَّابْعِينْ لَيْهَا وَ الْفِي وَادِي يَزْرَعِيلْ كُلَ.»

إشَعْيا 17:1

مُحَاكَمَةْ مَدِينَةْ دِمَشْق. دِمَشْق بَتَّانْ مَا تُكُونْ مَدِينَةْ. هِي تِلْهَدَّمْ وَ تَبْقَى كَوْم هَنَا تُرَابْ.

إشَعْيا 11:14

وَ هُمَّنْ يِنْصَبَّوْا فِي الْفِلِسْطِيِّينْ فِي الْغَرِبْ وَ سَوَا يَنْهَبَوْا الْقَاعِدِينْ فِي الصَّبَاحْ. وَ فِي بُلْدَانْ أَدَوْم وَ مُوَابْ، يَحْكُمُوا وَ لِبَنِي عَمُّونْ، يَمُلْكُوهُمْ.

حِزْقِيال 21:25

يَا إِنْتَ مَلِكْ بَنِي إِسْرَائِيلْ! يَا إِنْتَ كَتَّالْ الدِّمَمْ وَ كَافِرْ! يَوْمَكْ قَرَّبْ وَ وَكِتْ عِقَابَكْ جَاءْ.