إرْمِيا 44:21 - الكتاب المقدس بالعربي الدارجي هنا تشاد

²¹ «الْبَخُورْ الْأَوَّلْ إِنْتُو حَرَّقْتُوهْ فِي حِلَّالْ بَلَدْ يَهُوذَا وَ فِي شَوَارِعْ مَدِينَةْ الْقُدُسْ، إِنْتُو وَ جُدُودْكُو وَ مُلُوكُّو وَ كُبَارَاتْكُو وَ شَعَبْ الْبَلَدْ، تَحْسُبُوا اللّٰهْ مَا شَافَهْ وَ مَا فَكَّرْ فَوْقَهْ وَلَّا؟

إرْمِيا 44:21 Referenca të Kryqëzuara

إرْمِيا 44:17

وَ أَكِيدْ أَنِحْنَ نِطَبُّقُوا كُلَّ الْكَلَامْ الْمَرَقْ مِنْ خَشُمْنَا. وَ نِحَرُّقُوا بَخُورْ وَ نِقَدُّمُوا هَدِيَّةْ شَرَابْ لِإِلٰـهْنَا مَلِكَةْ السَّمَاءْ مِثِلْ أَوَّلْ أَنِحْنَ سَوَّيْنَاهْ، أَنِحْنَ وَ جُدُودْنَا وَ مُلُوكْنَا وَ كُبَارَاتْنَا فِي حِلَّالْ بَلَدْ يَهُوذَا وَ فِي شَوَارِعْ مَدِينَةْ الْقُدُسْ. وَ خَلَاصْ فِي الْوَكِتْ دَاكْ، أَنِحْنَ شِبِعْنَا وَ عِشْنَا فِي الرَّاحَةْ وَ أَبَداً مَا شِفْنَا تَعَبْ.

إرْمِيا 44:9

وَ إِنْتُو نِسِيتُوا الْفَسَالَةْ السَّوَّوْهَا جُدُودْكُو وَ مُلُوكْ يَهُوذَا وَ عَوِينْهُمْ؟ وَ نِسِيتُوا فَسَالِتْكُو إِنْتُو وَ عَوِينْكُو السَّوَّيْتُوهَا فِي بَلَدْ يَهُوذَا وَ فِي شَوَارِعْ مَدِينَةْ الْقُدُسْ؟

إرْمِيا 14:10

وَ دَاهُو كَلَامْ اللّٰهْ لِلشَّعَبْ دَا. هُو قَالْ: «أَيْوَى، هُمَّنْ يِحِبُّوا يَجْرُوا جَايْ وَ جَايْ وَ مَا يِشِيلُوا الدَّرِبْ الْعَدِيلْ.» لَاكِنْ دَا، اللّٰهْ مَا رَضْيَانْ بَيَّهْ. وَ هَسَّعْ، هُو يِذَّكَّرْ خَطَاهُمْ وَ يِعَاقِبْهُمْ بِسَبَبْ ذُنُوبْهُمْ.

إرْمِيا 11:13

«يَا بَنِي يَهُوذَا، إِلٰـهَاتْكُو أَكْتَرْ مِنْ حِلَّالْكُو. يَا سُكَّانْ مَدِينَةْ الْقُدُسْ، مَدَابِحْكُو أَكْتَرْ مِنْ شَوَارِعْكُو. وَ دَوْل الْمَدَابِحْ الْبَنَيْتُوهُمْ لِلْعَيْب وَ هُو إِلٰـهْ بَعَلْ التِّحَرُّقُوا لَيَّهْ الْبَخُورْ.

إشَعْيا 64:9

يَا اللّٰهْ! مَا تَغْضَبْ فَوْقنَا! مَا تِذَّكَّرْ دَايْماً فِي خَطَانَا! شِيفْ! أَنِحْنَ كُلِّنَا شَعَبَكْ.

زَبُور 79:8

مَا تِذَّكَّرْ خَطَا جُدُودْنَا لَاكِنْ خَلِّي رَحْمَتَكْ تَجِي عَجَلَةْ فَوْقنَا أَشَانْ أَنِحْنَ ضِعِفْنَا زِيَادَةْ.

عَمُوس 8:7

وَ اللّٰهْ حَلَفْ بِالْبَلَدْ الْفَرْحَانِينْ بَيْهَا ذُرِّيَّةْ يَعْقُوبْ وَ قَالْ: «أَنَا أَبَداً مَا نَنْسَى عَمَلْكُو الشَّيْن الْقَاعِدِينْ تِسَوُّوهْ.

هُوشَع 7:2

هُمَّنْ مَا يَحْسُبُوا كَدَرْ أَنَا نِذَّكَّرْ كُلَّ فَسَالِتْهُمْ. هَسَّعْ أَعْمَالْهُمْ حَوَّقَوْهُمْ وَ قَاعِدِينْ قِدَّامِي دَايْماً.

رُؤية 18:5

أَمُرْقُوا أَشَانْ كَوْم ذُنُوبْهَا بِقِي كَبِيرْ بِلْحَيْن لَحَدِّي لِحِقْ السَّمَاءْ. وَ خَلَاصْ، اللّٰهْ عَاقَبَاهَا بِظُلُمْهَا.

رُؤية 16:19

وَ الْمَدِينَةْ الْكَبِيرَةْ أَنْشَقَّتْ عَلَيْ تَلَاتَةْ بَكَانْ. وَ كُلَّ مُدُنْ الْأُمَمْ أَدَّمَّرَوْا مَرَّةْ وَاحِدْ وَ مِثِلْ دَا اللّٰهْ عَاقَبْ مَدِينَةْ بَابِلْ الْكَبِيرَةْ بِذُنُوبْهَا. وَ اللّٰهْ جَبَرَاهَا تَشْرَبْ خَمَرْ مِنْ كَاسَهْ وَ الْخَمَرْ دَا يِمَثِّلْ غَضَبَهْ الشَّدِيدْ بِلْحَيْن.

حِزْقِيال 16:24

وَ إِنْتِ بَنَيْتِ لِقْدَابَةْ وَ سَوَّيْتِ بَكَانْ عَالِي هَنَا عِبَادَةْ فِي أَيِّ نَقَعَةْ.

1 مُلوك 17:18

وَ هِي قَالَتْ لِإِلِيَاسْ: «شُنُو الْبَيْنِي وَ بَيْنَكْ، يَا نَبِي اللّٰهْ؟ إِنْتَ جِيتْ أَشَانْ تِذَكِّرْنِي بِخَطَايِ وَ تَكْتُلْ وِلَيْدِي وَلَّا؟»

1 صَمُوِيل 15:3

هَسَّعْ دَا، أَمْشِي وَ حَارِبْ شَعَبْ عَمَالِقْ وَ دَمِّرْ كُلَّ شَيّءْ الْعِنْدُهُمْ. وَ مَا تِحِنّ فَوْقهُمْ! أَكْتُلْ الرُّجَالْ وَ الْعَوِينْ وَ الْعِيَالْ وَ الْأَطْفَالْ وَ الْبَقَرْ وَ الْغَنَمْ وَ الْجُمَالْ وَ الْحَمِيرْ.›»

تَثْنِية 32:19

وَ اللّٰهْ شَافَاهُمْ وَ رَفَضَاهُمْ أَشَانْ عِيَالَهْ غَضَّبَوْه.

تَثْنِية 32:34

وَ اللّٰهْ قَالْ: «دَا كُلَّ مُلَبَّدْ فِي بَكَانِي وَ مَخْتُومْ وَ قَاعِدْ فِي مَخَزَنِي.

إرْمِيا 32:32

وَ بَنِي إِسْرَائِيلْ وَ بَنِي يَهُوذَا غَضَّبَوْنِي بِسَبَبْ الْعَمَلْ الْفَسِلْ الْقَاعِدِينْ يِسَوُّوهْ، هُمَّنْ وَ مُلُوكْهُمْ وَ كُبَارَاتْهُمْ وَ رُجَالْ دِينْهُمْ وَ أَنْبِيَائْهُمْ وَ كُلَّ نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ.

إرْمِيا 44:20

وَ خَلَاصْ، إِرْمِيَا حَجَّى لِكُلَّ الشَّعَبْ، عَوِينْ وَ رُجَالْ، الرَّدَّوْا لَيَّهْ بِالْكَلَامْ دَا وَ قَالْ: