إرْمِيا 44:17 - الكتاب المقدس بالعربي الدارجي هنا تشاد

¹⁷ وَ أَكِيدْ أَنِحْنَ نِطَبُّقُوا كُلَّ الْكَلَامْ الْمَرَقْ مِنْ خَشُمْنَا. وَ نِحَرُّقُوا بَخُورْ وَ نِقَدُّمُوا هَدِيَّةْ شَرَابْ لِإِلٰـهْنَا مَلِكَةْ السَّمَاءْ مِثِلْ أَوَّلْ أَنِحْنَ سَوَّيْنَاهْ، أَنِحْنَ وَ جُدُودْنَا وَ مُلُوكْنَا وَ كُبَارَاتْنَا فِي حِلَّالْ بَلَدْ يَهُوذَا وَ فِي شَوَارِعْ مَدِينَةْ الْقُدُسْ. وَ خَلَاصْ فِي الْوَكِتْ دَاكْ، أَنِحْنَ شِبِعْنَا وَ عِشْنَا فِي الرَّاحَةْ وَ أَبَداً مَا شِفْنَا تَعَبْ.

إرْمِيا 44:17 Referenca të Kryqëzuara

إرْمِيا 7:18

الْعِيَالْ يِلَقُّطُوا حَطَبْ وَ الْأَبَّهَاتْ يِقَبُّضُوا نَارْ وَ الْعَوِينْ يِعَجِّنَنْ دَقِيقْ لِيِسَوَّنْ كَعَكْ الْيِقَدُّمُوهْ لِصَنَمْ الْأُسْمَهْ مَلِكَةْ السَّمَاءْ. هُمَّنْ قَاعِدِينْ يِقَدُّمُوا هَدِيَّةْ شَرَابْ لِإِلٰـهَاتْ آخَرِينْ وَ بَيْدَا، يِغَضُّبُونِي أَنَا.

نَحَمْيا 9:34

وَ مُلُوكْنَا وَ كُبَارَاتْنَا وَ رُجَالْ الدِّينْ هَنَانَا وَ أَبَّهَاتْنَا كُلُّهُمْ مَا طَبَّقَوْا شُرُوطْ التَّوْرَاةْ وَ مَا خَطَّوْا بَالْهُمْ فِي وَصِيَّاتَكْ وَ لَا فِي التَّحْذِيرْ الْإِنْتَ حَذَّرْتُهُمْ.

حِزْقِيال 20:8

«‹وَ لَاكِنْ جُدُودْكُو عِصَوْنِي وَ مَا دَوَّرَوْا يَسْمَعَوْنِي. وَ مَا فِي نَادُمْ مِنْهُمْ الزَّقَلْ الْأَصْنَامْ الْمُحَرَّمَاتْ هَنَا مَصِرْ الْيَعَجُبُوهْ وَ لَا خَلَّاهُمْ. وَ أَنَا قُلْت: ”نِنَزِّلْ غَضَبِي فَوْقهُمْ مِنْ بِدَايْتَهْ لَحَدِّي نِهَايْتَهْ فِي أُسُطْ بَلَدْ مَصِرْ.“

تَثْنِية 23:23

وَ لَاكِنْ أَحْفَضَوْا وَ طَبُّقُوا الْكَلَامْ الْقُلْتُوهْ بِخُشُومْكُو حَسَبْ النَّذِرْ السَّوَّيْتُوهْ بِنِيِّتْكُو لِلّٰهْ إِلٰـهْكُو حَسَبْ كَلَامْكُو.

خُروج 16:3

وَ قَالَوْا لَيْهُمْ: «أَخَيْر لَيْنَا كَنْ اللّٰهْ كَتَلَانَا فِي بَلَدْ مَصِرْ وَكِتْ أَنِحْنَ شَبْعَانِينْ جَنْب الْبُرَامْ هَنَا اللَّحَمْ. وَ لَاكِنْ إِنْتُو مَرَقْتُونَا فِي الصَّحَرَاء دِي لِنُمُوتُوا كُلِّنَا مِنْ الْجُوعْ!»

فِلِبِّي 3:19

وَ فِي الأَخِيرْ، هُمَّنْ يَمْشُوا فِي الْهَلَاكْ. بُطُونْهُمْ بِقَوْا لَيْهُمْ رَبُّهُمْ وَ أَشَانْ دَا، يِتَابُعُوا شَهْوَاتْهُمْ بَسْ. الشَّيّءْ الْيِعَيِّبْهُمْ، دَا بَسْ الْيِفَاشُرُوا بَيَّهْ. وَ عُقُولْهُمْ ثَابْتِينْ فِي خُمَامْ الدُّنْيَا بَسْ.

إرْمِيا 44:25

دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ‹إِنْتُو وَ عَوِينْكُو سَوَّيْتُوا بِإِيدَيْكُو كُلَّ الْكَلَامْ الْقُلْتُوهْ بِخَشُمْكُو. وَ دَاهُو الْكَلَامْ الْقُلْتُوهْ: ”أَنِحْنَ نِحَقُّقُوا نَذِرْنَا الْعَاهَدْنَا بَيَّهْ وَ نِحَرُّقُوا بَخُورْ وَ نِقَدُّمُوا هَدِيَّةْ شَرَابْ لِمَلِكَةْ السَّمَاءْ.“ خَلَاصْ، تِمُّوا كَلَامْكُو وَ حَقُّقُوا نَذِرْكُو!›»

إرْمِيا 44:21

«الْبَخُورْ الْأَوَّلْ إِنْتُو حَرَّقْتُوهْ فِي حِلَّالْ بَلَدْ يَهُوذَا وَ فِي شَوَارِعْ مَدِينَةْ الْقُدُسْ، إِنْتُو وَ جُدُودْكُو وَ مُلُوكُّو وَ كُبَارَاتْكُو وَ شَعَبْ الْبَلَدْ، تَحْسُبُوا اللّٰهْ مَا شَافَهْ وَ مَا فَكَّرْ فَوْقَهْ وَلَّا؟

إرْمِيا 19:13

وَ بُيُوتْ مَدِينَةْ الْقُدُسْ وَ قُصُورْ مُلُوكْ يَهُوذَا يَبْقَوْا نِجْسِينْ مِثِلْ تُوفَةْ. أَشَانْ فِي رُوسَيْ الْبُيُوتْ دَوْل، حَرَّقَوْا بَخُورْ لِكُلَّ قُوَّاتْ السَّمَاءْ وَ قَدَّمَوْا هَدَايَا شَرَابْ لِإِلٰـهَاتْ آخَرِينْ.“›»

2 مُلوك 17:16

وَ هُمَّنْ خَلَّوْا مِنْهُمْ وَصَايَا اللّٰهْ إِلٰـهُّمْ وَ صَنَعَوْا لَيْهُمْ عَجَّالْ إِتْنَيْن مِنْ حَدِيدْ وَ غَزَّوْا عِيدَانْ لِعِبَادَةْ أَشِيرَةْ وَ سَجَدَوْا لِكُلَّ قُوَّاتْ السَّمَاءْ وَ عَبَدَوْا إِلٰـهْ بَعَلْ.

قُضياء 11:36

وَ لَاكِنْ هِي قَالَتْ لَيَّهْ: «يَا أَبُويِ، كَنْ إِنْتَ عَاهَدْت اللّٰهْ، سَوِّي فَوْقِي مِثِلْ إِنْتَ قُلْتَهْ أَشَانْ اللّٰهْ شَالْ لَيْك التَّارْ فِي عُدْوَانَكْ بَنِي عَمُّونْ.»

عَدد 30:12

وَ لَاكِنْ كَنْ رَاجِلْهَا يِبَطِّلْ كَلَامْهَا فِي نَفْس الْيَوْم وَكِتْ هُو سِمِعْ، خَلَاصْ هِي مَا عِنْدَهَا نَذِرْ وَ لَا عِنْدَهَا حَلِيفَةْ أَشَانْ رَاجِلْهَا بَطَّلَاهُمْ وَ اللّٰهْ يَغْفِرْ لَيْهَا.

1 بُطْرُس 1:18

تَعَرْفُوا اللّٰهْ فَدَاكُو أَشَانْ تَمُرْقُوا مِنْ الْحَيَاةْ الْبَاطْلَةْ الْوَرَثْتُوهَا مِنْ جُدُودْكُو. وَ هُو مَا فَدَاكُو بِالْأَشْيَاءْ الْبَعَدَيْن يِدَّمَّرَوْا مِثِلْ الْفُضَّةْ وَ الدَّهَبْ.

مَرْخُوس 6:26

وَ الْمَلِكْ نِدِمْ نَدَامَةْ شَدِيدَةْ بِسَبَبْ الْحَلِيفَةْ الْأَوَّلْ حَلَفْهَا قِدَّامْ ضِيفَانَهْ. وَ لَاكِنْ هُو مَا دَوَّرْ يَفْشُلْ الْحَلِيفَةْ دِي.

إرْمِيا 44:9

وَ إِنْتُو نِسِيتُوا الْفَسَالَةْ السَّوَّوْهَا جُدُودْكُو وَ مُلُوكْ يَهُوذَا وَ عَوِينْهُمْ؟ وَ نِسِيتُوا فَسَالِتْكُو إِنْتُو وَ عَوِينْكُو السَّوَّيْتُوهَا فِي بَلَدْ يَهُوذَا وَ فِي شَوَارِعْ مَدِينَةْ الْقُدُسْ؟

إشَعْيا 48:5

وَ أَنَا أَوْرَيْتكُو مِنْ زَمَانْ بِالْأَشْيَاءْ دَوْل قَبُلْ مَا يَجُوا وَ خَبَّرْتُكُو بَيْهُمْ. مَا وَاجِبْ تُقُولُوا: ‹أَصْنَامْنَا سَوَّوْا الْأَشْيَاءْ دَوْل وَ تَمَاثِيلْنَا هَنَا الْحَدِيدْ وَ الْحَطَبْ أَمَرَوْا بَيْهُمْ.›

زَبُور 106:6

أَنِحْنَ أَذْنَبْنَا مِثِلْ جُدُودْنَا وَ سَوَّيْنَا خَطَا وَ سَوَّيْنَا شَرّ.

زَبُور 12:4

هُمَّنْ يُقُولُوا: «بِلِسْنَيْنَا نِنَّصُرُوا وَ خُشُومْنَا هِنَيْنَا، يَاتُو يَحْكِمْ فَوْقنَا؟»

2 مُلوك 22:17

وَ دَا بِسَبَبْ هُمَّنْ أَبَوْنِي وَ حَرَّقَوْا بَخُورْ لِإِلٰـهَاتْ آخَرِينْ وَ غَضَّبَوْنِي بِكُلَّ عَمَلْهُمْ السَّوَّوْه. وَ غَضَبِي يَنْزِلْ فِي الْمَدِينَةْ دِي وَ أَنَا مَا نِوَقِّفَهْ.“›

عَدد 30:2

كَنْ رَاجِلْ يِسَوِّي نَذِرْ لِلّٰهْ وَ يَحْلِفْ وَ يُقُولْ يِتِمّ حَلِيفْتَهْ، وَاجِبْ الرَّاجِلْ دَا مَا يَفْشُلْ مِنْ النَّذِرْ وَ يِطَبِّقْ سَوَا سَوَا الْكَلَامْ الْهُو قَالَهْ.

2 أخبار 28:23

هُو قَاعِدْ يِقَدِّمْ ضَحَايَا لِإِلٰـهَاتْ مَدِينَةْ دِمَشْق الْهَزَمَوْه وَ قَالْ فِي نَفْسَهْ: «إِلٰـهَاتْ مَلِكْ بَلَدْ أَرَامْ فَزَعَوْا نَاسْهُمْ. كَنْ مِثِلْ دَا، أَنَا كُلَ نِقَدِّمْ لَيْهُمْ ضَحَايَا أَشَانْ يَفْزَعَوْنِي.» وَ لَاكِنْ دَا سَبَّبْ دَمَارْ لَيَّهْ هُو وَ لِكُلَّ بَنِي إِسْرَائِيلْ.

إرْمِيا 1:16

وَ بَيْدَا، أَنَا نِحَاكِمْ شَعَبِي فِي شَانْ فَسَالِتْهُمْ. وَ فَسَالِتْهُمْ دِي، هُمَّنْ أَبَوْنِي أَنَا وَ حَرَّقَوْا بَخُورْ لِإِلٰـهَاتْ آخَرِينْ وَ سَجَدَوْا لِلْأَصْنَامْ السَّوَّوْهُمْ بِإِيدَيْهُمْ.

إرْمِيا 11:12

نَاسْ حِلَّالْ بَلَدْ يَهُوذَا وَ سُكَّانْ مَدِينَةْ الْقُدُسْ يَمْشُوا يِكَوْرُكُوا يِدَوْرُوا الْفَزَعْ مِنْ الْإِلٰـهَاتْ الْهُمَّنْ يِحَرُّقُوا لَيْهُمْ الْبَخُورْ. وَ لَاكِنْ الْإِلٰـهَاتْ دَوْل مَا يَقْدَرَوْا يِنَجُّوهُمْ مِنْ الْفَسَالَةْ دِي.

إرْمِيا 18:15

وَ لَاكِنْ شَعَبِي نِسَوْنِي وَ حَرَّقَوْا بَخُورْ لِإِلٰـهَاتْ الْمَا يَنْفَعَوْا، الْيِتَرْتُعُوهُمْ فِي دَرِبْهُمْ. وَ فِي شَانْ الْإِلٰـهَاتْ دَوْل، هُمَّنْ أَبَوْا دَرِبْهُمْ الْعَدِيلْ هَنَا زَمَانْ لِيَمْشُوا فِي دَبَالِيْ الْكَدَادَةْ.

حِزْقِيال 8:16

وَ هُو وَدَّانِي دَاخَلْ فِي فَضَايَةْ بَيْت اللّٰهْ الدَّخْلَانِيَّةْ. وَ دَاهُو فِي خَشُمْ بَيْت اللّٰهْ أَمْبَيْن غُرْفَةْ الْمَدَخَلْ وَ الْمَدْبَحْ، فِيَّهْ حَوَالَيْ 25 رَاجِلْ. أَنْطَوْا ضُهُورْهُمْ لِبَيْت اللّٰهْ وَ وَجَّهَوْا صَبَاحْ عَلَيْ الْحَرَّايْ وَ سَجَدَوْا لَيْهَا.

حِزْقِيال 20:32

«‹إِنْتُو فَكَّرْتُوا وَ قُلْتُوا: ”أَنِحْنَ نِدَوْرُوا نَبْقَوْا مِثِلْ أُمَمْ وَ قَبَايِلْ هَنَا بُلْدَانْ آخَرِينْ. نِدَوْرُوا نَعَبُدُوا لَيْنَا أَصْنَامْ هَنَا حَطَبْ وَ حَجَرْ مِثِلْهُمْ.“ وَ لَاكِنْ دَا مَا يَبْقَى!

حِزْقِيال 23:41

وَ مَشَنْ قَعَدَنْ فِي سَرِيرْ جَمِيلْ وَ قِدَّامَهْ طَرَبَيْزَةْ مُجَهَّزَةْ الْفَوْقهَا بَخُورِي وَ دِهْنِي.

حَبَقُوق 1:16

وَ فِي شَانْ دَا، هُو دَبَحْ ضَحِيَّةْ لِشَرَكَهْ وَ حَرَّقْ بَخُورْ لِشَبَكَتَهْ. أَشَانْ بَيْهُمْ بَسْ، هُو كَبَّرْ قِسْمَهْ وَ كَتَّرْ مَعَاشَهْ.

إرْمِيا 7:17

إِنْتَ مَا قَاعِدْ تِشِيفْ الشَّيّءْ الْقَاعِدِينْ يِسَوُّوهْ فِي حِلَّالْ بَلَدْ يَهُوذَا وَ شَوَارِعْ مَدِينَةْ الْقُدُسْ وَلَّا؟