إرْمِيا 42:18 - الكتاب المقدس بالعربي الدارجي هنا تشاد

¹⁸ أَشَانْ دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ‹مِثِلْ أَنَا نَزَّلْت غَضَبِي وَ زَعَلِي فِي سُكَّانْ مَدِينَةْ الْقُدُسْ، دَاهُو أَنَا نِنَزِّلْ غَضَبِي فَوْقكُو إِنْتُو كُلَ وَكِتْ تَدْخُلُوا فِي بَلَدْ مَصِرْ. وَ إِنْتُو تَبْقَوْا مَلْعُونِينْ وَ مُخِيفِينْ وَ نَاسْ يَلْعَنَوْكُو وَ يِعَيُّبُوكُو وَ بَتَّانْ بَلَدْكُو مَا تِشِيفُوهَا.›»

إرْمِيا 42:18 Referenca të Kryqëzuara

إرْمِيا 7:20

وَ فِي شَانْ دَا، دَاهُو اللّٰهْ الرَّبّ قَالْ: «غَضَبِي الْمُحْرِقْ يَنْزِلْ فِي الْبَكَانْ دَا، فِي النَّاسْ وَ الْحَيْوَانَاتْ وَ شَدَرْ الْغَابَةْ وَ إِنْتَاجْ الْأَرْض. وَ نَارْ غَضَبِي أَبَداً مَا تُمُوتْ.»

إرْمِيا 29:18

وَ أَنَا نِجِيبْ فَوْقهُمْ دَايْماً الْحَرِبْ وَ الْجُوعْ وَ الْوَبَاءْ وَ نِسَوِّيهُمْ مَثَلْ الْبِخَوِّفْ كُلَّ مَمَالِكْ الْأَرْض. وَ يَبْقَوْا مَلْعُونِينْ وَ خَرَابْ وَ بَهِيتَةْ وَ مُعْيَارْ فِي أُسْط الْأُمَمْ الْأَنَا شَتَّتُّهُمْ فِي لُبُّهُمْ.

إرْمِيا 18:16

وَ هُمَّنْ سَوَّوْا بَلَدْهُمْ بَكَانْ مُخِيفْ وَ الْيِشِيفُوهَا دَايْماً يِنْبَهْتُوا. وَ أَيِّ نَادُمْ الْيُفُوتْ جَنْبَهَا يِلْعَجَّبْ وَ يِهِزُّوا رُوسَيْهُمْ.

إرْمِيا 44:12

وَ نِشِيلْ الْفَضَّلَوْا مِنْ بَنِي يَهُوذَا، هُمَّنْ الْوَجَّهَوْا عَلَيْ بَلَدْ مَصِرْ وَ مَشَوْا لِيَسْكُنُوا فَوْقهَا. هُمَّنْ دَوْل كُلُّهُمْ أَنَا نِكَمِّلْهُمْ فِي مَصِرْ. يُمُوتُوا بِالْحَرِبْ وَ الْجُوعْ وَ يِكَمُّلُوا تَكْ مِنْ الضَّعِيفْ لَحَدِّي الْقَادِرْ. وَ يَبْقَوْا مَلْعُونِينْ وَ مُخِيفِينْ وَ النَّاسْ يَلْعَنَوْهُمْ وَ يِعَيُّبُوهُمْ.

إرْمِيا 24:9

وَ يَبْقَوْا مَثَلْ الْبِخَوِّفْ كُلَّ مَمَالِكْ الْأَرْض وَ فِي كُلَّ بَكَانْ النِّشَتِّتْهُمْ فَوْقَهْ، هُمَّنْ يَبْقَوْا حِجَّيَّة وَ مَضْحَكَةْ لِلنَّاسْ وَ مُعْيَارْ وَ لَعَنَةْ.

إرْمِيا 22:27

وَ أَرْضُكُو التَّقْرَمَوْا لَيْهَا، أَبَداً مَا تِقَبُّلُوا لَيْهَا.»

إشَعْيا 65:15

وَ النَّاسْ الْأَنَا عَزَلْتُهُمْ يِسْتَعْمَلَوْا أُسُمْكُو مِثِلْ لَعَنَةْ. وَ يُقُولُوا: ‹اللّٰهْ الرَّبّ يَكْتُلَكْ مِثِلْ فِلَانْ!› وَ لَاكِنْ لِعَبِيدِي، نِنَادِيهُمْ بِأُسُمْ آخَرْ.

رُؤية 14:10

هُو يَشْرَبْ خَمَرْ، مَعَنَاتَهْ هُو يَلْقَى غَضَبْ اللّٰهْ. وَ الْخَمَرْ دَا، خَمَرْ تَقِيلْ بِلْحَيْن وَ مَصْبُوبْ فِي كَاسْ هَنَا الْعَذَابْ وَ النَّادُمْ الْيَشْرَبْ مِنَّهْ يِعَذُّبُوهْ بِنَارْ وَ كِبْرِيتْ قِدَّامْ الْمَلَائِكَةْ الْمُخَصَّصِينْ وَ قِدَّامْ الْحَمَلْ.

زَكَرِيَّا 8:13

يَا بَنِي يَهُوذَا وَ بَنِي إِسْرَائِيلْ، أَوَّلْ إِنْتُو بِقِيتُوا لَعَنَةْ فِي أُسْط الْأُمَمْ. وَ لَاكِنْ هَسَّعْ، نِنَجِّيكُو وَ تَبْقَوْا بَرَكَةْ. مَا تَخَافَوْا، شِدُّوا حَيْلكُو!»

نَاحُوم 1:6

وَ يَاتُو يَقْدَرْ يَحْمَلْ زَعَلَهْ؟ وَ مِنْ شِدَّةْ غَضَبَهْ، يَاتُو يَقْدَرْ يَقِيفْ قِدَّامَهْ؟ غَضَبَهْ يِنْصَبَّ مِثِلْ النَّارْ حَتَّى الْجِبَالْ يِشَّقَّقَوْا قِدَّامَهْ.

دَنْيال 9:27

وَ الْمَلِكْ دَا يَجْبُرْ نَاسْ كَتِيرِينْ لِيِسَوُّوا مَعَايَهْ مُعَاهَدَةْ لِمُدَّةْ 7 سَنَةْ. وَ بَعَدْ نُصّ الْمُدَّةْ دِي، الضَّحَايَا وَ الْهَدَايَا الْيِقَدُّمُوهُمْ دَايْماً، هُو يَمْنَعْهُمْ. وَ عَجَلَةْ بَسْ، الْمُخَرِّبْ دَا يِسَوِّي الْحَرَامْ الْيِجِيبْ الْخَرَابْ. وَ فِي الأَخِيرْ، هُو ذَاتَهْ يِدَّمَّرْ مِثِلْ مُقَرَّرْ.»

دَنْيال 9:11

وَ أَنِحْنَ بَنِي إِسْرَائِيلْ كُلِّنَا خَالَفْنَا شُرُوطْ التَّوْرَاةْ وَ أَبَيْنَا مَا سِمِعْنَا كَلَامَكْ. وَ خَلَاصْ، إِنْتَ نَزَّلْت فَوْقنَا اللَّعَنَةْ وَ الْحُكُمْ الْمَكْتُوبْ فِي تَوْرَاةْ مُوسَى عَبْدَكْ أَشَانْ أَنِحْنَ أَذْنَبْنَا قِدَّامَكْ.

حِزْقِيال 22:22

وَ مِثِلْ الْفُضَّةْ تِنْقَطِعْ فِي لُبّ النَّارْ، بِمِثِلْ دَا إِنْتُو كُلَ تِنْقَطْعُوا فِي لُبّ مَدِينَةْ الْقُدُسْ. وَ بَيْدَا، إِنْتُو تَعَرْفُوا كَدَرْ أَنَا بَسْ اللّٰهْ وَ نَزَّلْت غَضَبِي فَوْقكُو.»

مَراثِي إرْمِيا 4:11

وَ اللّٰهْ نَزَّلْ كُلَّ زَعَلَهْ وَ غَضَبَهْ الْمُحْرِقْ زَادَهْ وَ قَبَّضْ نَارْ فِي صَهْيُون أَكَلَتْ أَسَاسْهَا.

مَراثِي إرْمِيا 2:4

وَ مِثِلْ عَدُو، جَبَدْ نُبَّالَهْ وَ مِثِلْ خَصِيمْ، بِإِيدَهْ الزَّيْنَةْ قَاعِدْ يِصَوِّبْ فَوْقهُمْ. هُو كَتَلْ كُلَّ عِيَالْهُمْ الْهُمَّنْ زِينَةْ بُيُوتْهُمْ. وَ نَزَّلْ غَضَبَهْ مِثِلْ نَارْ فِي خَيْمَةْ صَهْيُون الْمِثِلْ بِنَيَّةْ.

إرْمِيا 29:22

وَ نَاسْ يَهُوذَا الْفِي الْغُرْبَةْ فِي بَابِلْ يَلْعَنَوْا وَ يُقُولُوا: ‹خَلِّي اللّٰهْ يَجْعَلَكْ مِثِلْ صِدْقِيَّا وَ أَخَابْ هُمَّنْ الْمَلِكْ بَابِلْ حَرَّقَاهُمْ بِنَارْ.›

إرْمِيا 26:6

وَ كَنْ مَا تَسْمَعَوْنِي، خَلَاصْ أَنَا نِدَمِّرْ الْبَيْت دَا، مِثِلْ دَمَّرْت مَسْكَنِي الْأَوَّلْ قَاعِدْ فِي شِيلَوْه. وَ نَلْعَنْ مَدِينَةْ الْقُدُسْ وَ هِي تَبْقَى مَثَلْ لِكُلَّ أُمَمْ الْأَرْض.“›»

إرْمِيا 25:9

أَكِيدْ أَنَا نِنَادِي لَيْكُو كُلَّ قَبَايِلْ الْمُنْشَاقْ وَ عَبْدِي نَبُوخَدْنَصَرْ مَلِكْ بَابِلْ. وَ نِجِيبْهُمْ ضِدّ الْبَلَدْ دِي وَ ضِدّ سُكَّانْهَا وَ ضِدّ كُلَّ الْأُمَمْ الْمُجَاوِرِينْهَا وَ يِدَمُّرُوهُمْ. وَ نِجِيبْ فَوْقهُمْ الْخَرَابْ وَ الْبَهِيتَةْ وَ يَبْقَوْا كَوْم هَنَا تُرَابْ إِلَى الْأَبَدْ. وَ دَا كَلَامْ اللّٰهْ.

إرْمِيا 6:11

وَ هَسَّعْ، أَنَا أَنْمَلَيْت بِغَضَبْ اللّٰهْ وَ عِيِيتْ مَا نَقْدَرْ نَحْمَلَهْ.» وَ اللّٰهْ قَالْ: «خَلِّي غَضَبِي يَنْزِلْ فِي الْعِيَالْ الْفِي الشَّوَارِعْ وَ فِي كُلَّ مَجْمُوعَةْ الشَّبَابْ. وَ الرُّجَالْ وَ الْعَوِينْ يِنْكَرْبُوا وَ النَّاسْ الْكُبَارْ وَ الشِّيَّابْ كُلَ.

2 أخبار 34:25

وَ دَا فِي شَانْ شَعَبِي أَبَوْنِي وَ حَرَّقَوْا بَخُورْ لِإِلٰـهَاتْ آخَرِينْ وَ غَضَّبَوْنِي بِكُلَّ عَمَلْهُمْ السَّوَّوْه. وَ غَضَبِي يَنْزِلْ فِي الْمَدِينَةْ دِي وَ أَنَا مَا نِوَقِّفَهْ.“›

عَدد 5:27

وَ بَعَدْ هُو زَقَاهَا الْأَلْمِي خَلَاصْ، دَاهُو الشَّيّءْ الْيُكُونْ لَيْهَا كَنْ هِي نَجَّسَتْ نَفِسْهَا وَ خَانَتْ رَاجِلْهَا. الْأَلْمِي الْيِجِيبْ اللَّعَنَةْ يِدَخِّلْ فَوْقهَا الْمُرّ وَ يَنْفُخْ بَطُنْهَا وَ بَيْدَا، هِي تَبْقَى عَاقْرَةْ. وَ تَبْقَى مَرَةْ مَلْعُونَةْ فِي أُسُطْ أَهَلْهَا.

إشَعْيا 30:3

وَ لَاكِنْ حِمَايَةْ فِرْعَوْن تِجِيبْ لَيْكُو الْعَيْب. وَ الْمَلْجَأْ فِي مَصِرْ يِجِيبْ لَيْكُو الْإِهَانَةْ.

إرْمِيا 23:40

وَ نِجِيبْ الْعَيْب الْيَقْعُدْ فَوْقكُو دَايْماً وَ قِلَّةْ الشَّرَفْ الْمَا تِنَّسِي إِلَى الْأَبَدْ.›»

إرْمِيا 33:5

«وَكِتْ يِحَارُبُوا الْبَابِلِيِّينْ، الْبُيُوتْ دَوْل يِنْمَلُوا بِجَنَازَاتْ الشَّعَبْ الْأَنَا كَتَلْتُهُمْ فِي زَعَلِي وَ غَضَبِي. وَ أَنَا بَتَّانْ مَا نِوَجِّهْ عَلَيْ الْمَدِينَةْ دِي وَ دَا بِسَبَبْ كُلَّ فَسَالَةْ شَعَبْهَا.

إرْمِيا 44:6

وَ بِسَبَبْ دَا بَسْ، غَضَبِي وَ زَعَلِي قَمَّوْا ضِدُّهُمْ وَ حَرَّقَوْا حِلَّالْ بَلَدْ يَهُوذَا وَ شَوَارِعْ مَدِينَةْ الْقُدُسْ. وَ بِقَوْا كَوْم هَنَا تُرَابْ وَ بَكَانْ خَرَابْ لَحَدِّي الْيَوْم.»

إرْمِيا 44:8

وَ غَضَّبْتُونِي بِخِدْمَةْ إِيدَيْكُو وَكِتْ حَرَّقْتُوا بَخُورْ لِإِلٰـهَاتْ آخَرِينْ فِي بَلَدْ مَصِرْ الْإِنْتُو جِيتُوا وَ سَكَنْتُوا فَوْقهَا. وَ بَيْدَا، دَمَّرْتُوا نُفُوسْكُو وَ بِقِيتُوا مَلْعُونِينْ وَ عَايْبِينْ فِي أُسْط كُلَّ أُمَمْ الْأَرْض.

إرْمِيا 44:22

اللّٰهْ أَبَى مَا يَحْمَلَهْ بَتَّانْ بِسَبَبْ عَمَلْكُو الْفَسِلْ وَ الْمُحَرَّمَاتْ السَّوَّيْتُوهُمْ. وَ فِي شَانْ دَا، بَلَدْكُو بِقَتْ كَوْم هَنَا تُرَابْ وَ خَرَابْ وَ مَلْعُونْ وَ فَاضِيَةْ مِنْ سُكَّانْهَا لَحَدِّي الْيَوْم.

حِزْقِيال 20:34

وَ بِإِيدْ شَدِيدَةْ وَ دُرَاعْ قَوِي وَ نَزِّلِينْ غَضَبِي، أَنَا نَمْرُقْكُو مِنْ أُسْط الْأُمَمْ وَ نِلِمُّكُو مِنْ الْبُلْدَانْ الْإِنْتُو مُشَتَّتِينْ فَوْقهُمْ.

مَراثِي إرْمِيا 2:6

هُو خَرَبْ زَرِيبْتَهْ مِثِلْ زَرِيبَةْ هَنَا جِنَيْنَةْ وَ اللّٰهْ دَمَّرْ بَكَانَهْ هَنَا الْمَلَمَّةْ. وَ فِي صَهْيُون، هُو نَسَّاهُمْ يَوْم الْعِيدْ وَ يَوْم السَّبْت. وَ مِنْ شِدَّةْ غَضَبَهْ، هُو أَبَاهُمْ لِلْمُلُوكْ وَ رُجَالْ الدِّينْ.

هُوشَع 7:16

هُمَّنْ يِقَبُّلُوا وَ لَاكِنْ مَا عَلَيِّ أَنَا اللّٰهْ الْعَالِي. هُمَّنْ مِثِلْ نُبَّالْ أَعْوَجْ وَ كُبَارَاتْهُمْ يُمُوتُوا بِالْسَّيْف بِسَبَبْ لِسَانْهُمْ الطَّرِينْ ضِدِّي. وَ دَاهُو فِي بَلَدْ مَصِرْ، النَّاسْ يِشَّمَّتَوْا فَوْقهُمْ.»