إرْمِيا 41:5 - الكتاب المقدس بالعربي الدارجي هنا تشاد

⁵ وَ فِي الْوَكِتْ دَا، جَوْا رُجَالْ وَاحِدِينْ عَدَدْهُمْ 80. وَ النَّاسْ دَوْل، دُقُونْهُمْ مُزَيَّنِينْ وَ خُلْقَانْهُمْ مُشَرَّطِينْ وَ جِسِمْهُمْ مُنَخَّشْ مِنْ الْحِزِنْ. وَ هُمَّنْ مِنْ مُدُنْ شَكِيمْ وَ شِيلَوْه وَ السَّامِرَةْ وَ شَايْلِينْ فِي إِيدَيْهُمْ هَدَايَا هَنَا دَقِيقْ وَ بَخُورْ لِيِقَدُّمُوهْ فِي بَيْت اللّٰهْ.

إرْمِيا 41:5 Referenca të Kryqëzuara

1 مُلوك 16:24

وَ هُو شَرَى مِنْ سَامَرْ جَبَلْ بِـ‍ 70 كِيلَوْ فُضَّةْ. وَ بَنَى مَدِينَةْ فِي رَاسْ الْجَبَلْ دَا وَ قَوَّاهَا وَ سَمَّاهَا مَدِينَةْ السَّامِرَةْ. وَ دَا الْأُسُمْ الْأَوَّلْ هَنَا سَامَرْ سِيدْ الْجَبَلْ.

2 مُلوك 25:9

وَ هُو تَشَّ بَيْت اللّٰهْ وَ قَصِرْ الْمَلِكْ وَ كُلَّ بُيُوتْ مَدِينَةْ الْقُدُسْ. وَ كُلَّ بُيُوتْ الْمَسَائِيلْ، هُو حَرَّقَاهُمْ بِنَارْ.

يَشُوع 18:1

وَ بَعَدْ خَطَّوْا كُلَّ الْبَلَدْ تِحِتْ حُكُمْهُمْ، كُلَّ مُجْتَمَعْ بَنِي إِسْرَائِيلْ لَمَّوْا فِي شِيلَوْه وَ بَنَوْا خَيْمَةْ الْإِجْتِمَاعْ.

تَثْنِية 14:1

وَ إِنْتُو عِيَالْ اللّٰهْ إِلٰـهْكُو. وَكِتْ تَحْزَنَوْا لِلْمَيِّتْ مَا تِجَرُّحُوا جِسِمْكُو وَ لَا تِزَيُّنُوا رُوسَيْكُو مِنْ قِدَّامْ.

1 مُلوك 12:1

وَ رَحَبْعَامْ قَمَّ مَشَى حِلَّةْ شَكِيمْ أَشَانْ كُلَّ بَنِي إِسْرَائِيلْ قَاعِدِينْ يَرْجَوْه هِنَاكْ لِيِدَرُّجُوهْ مَلِكْ.

قُضياء 9:1

وَ أَبِيمَلِكْ وِلَيْد يَرْبَعْل مَشَى شَكِيمْ لِيَلْقَى أَخْوَانْ أَمَّهْ وَ كُلَّ عَايِلَةْ أَبُو أَمَّهْ. وَ قَالْ لَيْهُمْ:

تكوين 33:18

وَ يَعْقُوبْ تَابَعْ سَفَرَهْ مِنْ فَدَّانْ أَرَامْ لَحَدِّي وَصَّلْ بِصِحَّةْ وَ سَلَامَةْ فِي حِلَّةْ شَكِيمْ الْقَاعِدَةْ فِي بَلَدْ كَنْعَانْ. وَ هُو قَابَلْ الْحِلَّةْ دِي وَ سَكَنْ.

إشَعْيا 15:2

وَ شَعَبْهَا قَاعِدِينْ يَبْكُوا وَ طَلَعَوْا فِي الْبَكَانَاتْ الْعَالِيِينْ هَنَا الْعِبَادَةْ الْفِي حِلَّةْ هَبَيْت وَ فِي حِلَّةْ دِيبُونْ. نَاسْ مُوَابْ يُنُوحُوا لِحِلَّالْ نَبُو وَ مِيدْبَا وَ كُلَّ رُوسَيْهُمْ مُزَيَّنِينْ وَ دُقُونْهُمْ مَقْطُوعِينْ مِنْ الْحِزِنْ.

1 مُلوك 16:29

وَ فِي سَنِةْ 38 هَنَا حُكُمْ آسَا مَلِكْ مَمْلَكَةْ يَهُوذَا، أَخَابْ وِلَيْد عُمْرِي بِقِي مَلِكْ فِي مَمْلَكَةْ إِسْرَائِيلْ. وَ أَخَابْ وِلَيْد عُمْرِي حَكَمْ 22 سَنَةْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ.

1 مُلوك 12:25

وَ يَرُبَعَامْ بَنَى حِلَّةْ شَكِيمْ فِي جِبَالْ أَفْرَايِمْ وَ سَكَنْ هِنَاكْ. وَ بَعَدْ دَا، مَشَى بَنَى حِلَّةْ فَنُوِيلْ.

1 صَمُوِيل 1:7

وَ الشَّيّءْ دَا قَاعِدْ يَبْقَى كُلِّ سَنَةْ. وَ وَكِتْ حِنَّةْ تَطْلَعْ لِبَيْت اللّٰهْ، فِنِنَّةْ تِوَاجِعْهَا لَحَدِّي تَبْكِي وَ تَابَى الْأَكِلْ.

إرْمِيا 7:14

وَ خَلَاصْ، أَنَا نِجِيبْ نَفْس الدَّمَارْ الْجِبْتَهْ فِي شِيلَوْه فِي بَيْتِي الْفَوْقَهْ أُسْمِي الْإِنْتُو تِتْوَكَّلَوْا عَلَيَّهْ وَ دَا الْبَيْت الْأَنَا أَنْطَيْتَهْ لِجُدُودْكُو وَ لَيْكُو إِنْتُو.

إرْمِيا 7:12

«‹خَلَاصْ، قُمُّوا أَمْشُوا فِي بَكَانِي الزَّمَانْ قَاعِدْ فِي شِيلَوْه وَ دَا الْبَكَانْ الْأَوَّلْ أَنَا خَطَّيْت فَوْقَهْ أُسْمِي. وَ شِيفُوا الدَّمَارْ الْأَنَا جِبْتَهْ فِي الْبَكَانْ دَا، بِسَبَبْ الْفَسَالَةْ السَّوَّوْهَا شَعَبِي بَنِي إِسْرَائِيلْ.

زَبُور 102:14

عَبِيدَكْ يِحِبُّوا حُجَارْهَا وَ مُنْرَبِطِينْ فِي تُرَابْهَا.

2 صَمُوِيل 10:4

وَ خَلَاصْ، حَنُونْ كَرَبْ مَسَائِيلْ دَاوُدْ وَ زَيَّنْ نُصّ دُقُونْهُمْ وَ قَطَّعْ خُلْقَانْهُمْ مِنْ عَلَيْ جَعَبَاتْهُمْ. وَ بَعَدْ دَا، طَرَدَاهُمْ.

يَشُوع 24:32

وَ كَنْ لِعُضَامْ يُوسُفْ الشَّالَوْهُمْ بَنِي إِسْرَائِيلْ مِنْ بَلَدْ مَصِرْ، هُمَّنْ دَفَنَوْهُمْ فِي شَكِيمْ فِي الزَّرَعْ الشَّرَاهْ يَعْقُوبْ بِـ‍ 100 حَجَرْ فُضَّةْ مِنْ أَوْلَادْ حَمُورْ أَبُو شَكِيمْ. وَ دَا كُلَ بِقِي وَرَثَةْ لِذُرِّيَّةْ يُوسُفْ.

تكوين 34:2

وَ شَكِيمْ وِلَيْد حَمُورْ شَيْخ بَلَدْ الْحِوِّيِّينْ شَافَاهَا. وَ هُو خَطَفْهَا وَ لِعِبْ مَعَاهَا وَ تَلَّفْ شَرَفْهَا.

تكوين 37:12

يَوْم وَاحِدْ، أَخْوَانْ يُوسُفْ مَشَوْا فِي الْكَدَادَةْ يَسْرَحَوْا بِغَنَمْ أَبُوهُمْ، قَرِيبْ لِحِلَّةْ شَكِيمْ.

قُضياء 18:31

وَ الصَّنَمْ الصَّنَعَهْ مِيكَا قَاعِدْ فِي بَكَانَهْ فِي كُلَّ الْمُدَّةْ الْقَاعِدْ فَوْقهَا بَيْت اللّٰهْ فِي شِيلَوْه.

زَبُور 78:60

هُو أَبَى مَسْكَنْ الْعِبَادَةْ فِي شِيلَوْه وَ دِي الْخَيْمَةْ الْهُو سَكَنْ فَوْقهَا فِي أُسْط النَّاسْ.

إرْمِيا 16:6

وَ فِي الْبَلَدْ دِي، مِنْ الْقَادِرْ لِلضَّعِيفْ يُمُوتُوا وَ مَا يَدْفُنُوهُمْ وَ لَا يَبْكُوا لَيْهُمْ وَ لَا يِنَخُّشُوا جِسِمْهُمْ وَ لَا يِزَيُّنُوا رُوسَيْهُمْ مِنْ الْحِزِنْ.

إرْمِيا 41:4

وَ لَحَدِّي الْيَوْم التَّانِي بَعَدْ مَوْت قَدَالْيَا كُلَ، مَا فِي نَادُمْ سِمِعْ شَيّءْ.

إرْمِيا 47:5

نَاسْ مُدُنْ غَزَّةْ زَيَّنَوْا رُوسَيْهُمْ مِنْ الْحِزِنْ وَ سُكَّانْ أَشْقَلُونْ كُلَ سَكَتَوْا. وَ إِنْتُو الْفَضَّلْتُوا فِي السَّهَلَةْ، لِمَتَى تَحْزَنَوْا وَ تِجَرُّحُوا جِسِمْكُو؟

إرْمِيا 48:37

وَ بَيْدَا، حِزْنَوْا وَ زَيَّنَوْا رُوسَيْهُمْ وَ قَطَّعَوْا دُقُونْهُمْ وَ جَرَّحَوْا إِيدَيْهُمْ وَ لِبْسَوْا خُلْقَانْ الْحِزِنْ.

يُوِيل 2:13

مَا تِشَرُّطُوا خُلْقَانْكُو بَسْ وَ لَاكِنْ تُوبُوا مِنْ دَاخَلْ قَلِبْكُو وَ قَبُّلُوا لِلّٰهْ إِلٰـهْكُو. أَشَانْ هُو الرَّحْمـٰنْ الرَّحِيمْ وَ الصَّبُورْ وَ الْمُحِبّ وَ يِخَلِّي الْغَضَبْ الْأَوَّلْ هُو قَرَّرْ يِنَزِّلَهْ فَوْقكُو.

1 أخبار 19:4

وَ خَلَاصْ، حَنُونْ كَرَبْ مَسَائِيلْ دَاوُدْ وَ زَيَّنْ دُقُونْهُمْ وَ قَطَّعْ خُلْقَانْهُمْ مِنْ عَلَيْ جَعَبَاتْهُمْ. وَ بَعَدْ دَا، طَرَدَاهُمْ.