إرْمِيا 4:14 - الكتاب المقدس بالعربي الدارجي هنا تشاد

¹⁴ وَ اللّٰهْ قَالْ: «يَا مَدِينَةْ الْقُدُسْ، نَضِّفِي قَلِبْكِ مِنْ كُلَّ الْفَسَالَةْ وَ بَيْدَا، تَلْقَيْ النَّجَاةْ. لِمَتَى تَحْفَضَيْ فِي قَلِبْكِ أَفْكَارْكِ الْفَسْلِينْ دَوْل؟

إرْمِيا 4:14 Referenca të Kryqëzuara

يَعْقُوب 4:8

تَعَالُوا قَرُّبُوا لِلّٰهْ وَ اللّٰهْ يِقَرِّبْ لَيْكُو. إِنْتُو الْمُذْنِبِينْ، نَضُّفُوا إِيدَيْكُو مِنْ الذَّنِبْ. إِنْتُو الْقَلِبْكُو إِتْنَيْن، طَهُّرُوا نُفُوسْكُو.

أعمال الرُسُل 8:22

تُوبْ مِنْ فَسَالْتَكْ دِي وَ أَسْأَلْ رَبِّنَا. أَكُونْ يَغْفِرْ لَيْك فِكْرَكْ الْفَسِلْ دَا.

إشَعْيا 55:7

خَلِّي الْعَاصِي يِخَلِّي دَرْبَهْ وَ النَّادُمْ الْفَسِلْ يِخَلِّي أَفْكَارَهْ. خَلِّي يِقَبِّلْ لِلّٰهْ وَ هُو يَرْحَمَهْ أَشَانْ غُفْرَانْ إِلٰـهْنَا وَسِيعْ.

1 كُرُنْتُس 3:20

وَ مَكْتُوبْ بَتَّانْ: <اللّٰهْ يَعَرِفْ كَدَرْ أَفْكَارْ الْحَكِيمِينْ مَا عِنْدُهُمْ فَايْدَةْ.>

رَوْمَا 1:21

هُمَّنْ عِرْفَوْا اللّٰهْ قَاعِدْ وَ لَاكِنْ مَا مَجَّدَوْه وَ مَا شَكَرَوْه مِثِلْ وَاجِبْ لَيَّهْ. بِالْعَكْس، فِكِرْهُمْ وَدَّرْ مَرَّةْ وَاحِدْ وَ خَلَّوْا الضَّلَامْ دَخَلْ فِي قُلُوبْهُمْ الْمَا عِنْدُهُمْ فِهِمْ.

لُوقا 11:39

وَ الرَّبّ عِيسَى قَالْ لَيَّهْ: «إِنْتُو الْفَرِيزِيِّينْ وَكِتْ تِلْوَضَّوْا، دَا يَبْقَى مِثِلْ تِغَسُّلُوا الْكَاسْ وَ الصُّفْرَةْ مِنْ بَرَّا بَسْ. لَاكِنْ فِي قُلُوبْكُو دَاخَلْ إِنْتُو مَلَانِينْ مِنْ السِّرْقَةْ وَ الْفَسَالَةْ.

إرْمِيا 13:27

أَنَا شِفْت أَصْنَامْكِ الْمُحَرَّمِينْ فِي الْجِبَالْ وَ فِي الْكَدَادَةْ. أَنَا شِفْت شَهْوَاتْكِ وَ زِنَاكِ وَ شَرْمَطَتْكِ الْفَسْلَةْ مَعَاهُمْ. يَا خَسَارِتْكِ، يَا مَدِينَةْ الْقُدُسْ، إِنْتِ الْمَا تِدَوْرِي تِطَهِّرِي نَفِسْكِ! وَ دَا لِمَتَى؟»

أمْثال 1:22

«لِمَتَى، يَا الْجُهَّالْ، تِحِبُّوا الْجَهَالَةْ؟ وَ لِمَتَى، يَا الشَّمَّاتِينْ، تِحِبُّوا الشَّمَاتَةْ؟ وَ لِمَتَى، يَا الْمَطَامِيسْ، تَكْرَهَوْا الْمَعْرَفَةْ؟

زَبُور 66:18

وَ كَنْ أَنَا نَوَيْت الشَّرّ فِي قَلْبِي، الرَّبّ مَا يَسْمَعْنِي.

مَتَّى 12:33

«الشَّدَرَةْ الْعَدِيلَةْ تَلْدَ عِيَالْ عَدِيلِينْ وَ الشَّدَرَةْ الْفَسْلَةْ تَلْدَ عِيَالْ فَسْلِينْ. وَ النَّاسْ يَعَرْفُوا الشَّدَرَةْ مِنْ عِيَالْهَا.

حِزْقِيال 18:31

خَلُّوا مِنْكُو عِصْيَانْكُو وَ غَيَّرَوْا قَلِبْكُو بِقَلِبْ جَدِيدْ وَ غَيَّرَوْا رُوحْكُو بِرُوحْ جَدِيدَةْ. مَالَا تُمُوتُوا، يَا بَنِي إِسْرَائِيلْ؟

زَبُور 119:113

نَكْرَهْ النَّاسْ الْقُلُوبْهُمْ تِنَيْن وَ لَاكِنْ أَنَا نِحِبّ تَوْرَاتَكْ.

زَبُور 51:2

قُشّ خَطَايِ مَرَّةْ وَاحِدْ وَ طَهِّرْنِي مِنْ ذَنْبِي.

إرْمِيا 2:22

وَ كَنْ تِلْغَسَّلَوْا بِعَطْرَوْن وَ تِلْبَرَّدَوْا بِصَابُونْ كُلَ، خَطَاكُو مَا يِنْقَشَّ وَ يَقْعُدْ مِثِلْ بُقْعَةْ قِدَّامِي. وَ دَا كَلَامْ اللّٰهْ الرَّبّ.

إرْمِيا 6:19

يَا الْأَرْض، أَسْمَعَيْ! أَنَا بَسْ نِجِيبْ الْفَسَالَةْ فِي الشَّعَبْ دَا وَ هِي نَتِيجَةْ أَفْكَارْهُمْ. هُمَّنْ مَا خَطَّوْا بَالْهُمْ لِكَلَامِي وَ رَفَضَوْا شُرُوطِي الْفِي التَّوْرَاةْ.

إرْمِيا 17:1

وَ اللّٰهْ قَالْ: «ذَنِبْ بَنِي يَهُوذَا مَنْقُوشْ بِمُنْقَاشْ هَنَا حَدِيدْ الْخَشْمَهْ قَوِي مِثِلْ الْمَاسّ. وَ مَكْتُوبْ فِي قُلُوبْهُمْ مِثِلْ فِي لَوْح وَ فِي قُرُونْ مَدَابِحْهُمْ.

زَكَرِيَّا 8:17

مَا تِشِيلُوا نِيَّةْ لِتِسَوُّوا الْفَسَالَةْ أَمْبَيْنَاتْكُو وَ مَا تِحِبُّوا الْحَلِيفَةْ بِكِدِبْ أَشَانْ كُلَّ الْأَشْيَاءْ دَوْل، أَنَا نَكْرَهُّمْ.» وَ دَا كَلَامْ اللّٰهْ.

إرْمِيا 18:11

وَ هَسَّعْ، قُمّ أَمْشِي لِنَاسْ يَهُوذَا وَ سُكَّانْ مَدِينَةْ الْقُدُسْ وَ قُولْ: ‹دَاهُو اللّٰهْ قَالْ: ”أَكِيدْ أَنَا بَسْ جَهَّزْت لَيْكُو فَسَالَةْ وَ قَمَّيْت بِمُؤآمَرَةْ ضِدُّكُو. خَلِّي أَيِّ وَاحِدْ يِقَبِّلْ مِنْ دَرْبَهْ الْفَسِلْ وَ يِعَدِّلْ دَرْبَهْ وَ عَمَلَهْ.“

يُوحَنَّا 13:9

وَ سِمْعَانْ بُطْرُسْ قَالْ: «سَيِّدْنَا، كَنْ يَبْقَى مِثِلْ دَا، مَا تِغَسِّلْ رِجِلَيْنِي بَسْ. غَسِّلْ إِيدَيْنِي وَ رَاسِي كُلَ!»