إرْمِيا 38:23 - الكتاب المقدس بالعربي الدارجي هنا تشاد

²³ «وَ كُلَّ عَوِينَكْ وَ عِيَالَكْ يَكُرْبُوهُمْ وَ يِوَدُّوهُمْ لِلْبَابِلِيِّينْ. وَ إِنْتَ ذَاتَكْ مَا تَنْجَى مِنْ مَلِكْ بَابِلْ. هُو يَكُرْبَكْ وَ يِحَرِّقْ الْمَدِينَةْ دِي.»

إرْمِيا 38:23 Referenca të Kryqëzuara

إرْمِيا 41:10

وَ بَعَدْ دَا، إِسْمَاعِيلْ كَرَبْ كُلَّ الشَّعَبْ الْفَضَّلَوْا فِي مِصْفَةْ مَسَاجِينْ وَ هُمَّنْ بَنَاتْ الْمَلِكْ وَ كُلَّ النَّاسْ الْفَضَّلَوْا فِي مِصْفَةْ. وَ دَوْل النَّاسْ النَّبُوزَرَدَانْ كَبِيرْ الْحُرَّاسْ أَمَّنَاهُمْ لِقَدَالْيَا. وَ إِسْمَاعِيلْ كَرَبَاهُمْ مَسَاجِينْ وَ مَشَى بَيْهُمْ عَلَيْ بَلَدْ بَنِي عَمُّونْ.

إرْمِيا 39:6

وَ مَلِكْ بَابِلْ دَبَحْ أَوْلَادْ صِدْقِيَّا قِدَّامَهْ فِي رِبْلَةْ وَ بَتَّانْ دَبَحْ كُلَّ شُيُوخْ يَهُوذَا.

إرْمِيا 38:18

وَ لَاكِنْ كَنْ إِنْتَ مَا مَرَقْت لِقُيَّادْ مَلِكْ بَابِلْ وَ سَلَّمْت نَفْسَكْ لَيْهُمْ، خَلَاصْ الْمَدِينَةْ دِي، الْبَابِلِيِّينْ يِشِيلُوهَا وَ يِحَرُّقُوهَا وَ إِنْتَ كُلَ مَا تَنْجَى مِنْهُمْ.›»

2 مُلوك 25:7

وَ هُمَّنْ دَبَحَوْا أَوْلَادْ صِدْقِيَّا فِي قِدَّامَهْ. وَ بَعَدْ دَا، مَلِكْ بَابِلْ قَدَّدْ عُيُونْ صِدْقِيَّا وَ جَنْزَرَهْ بِجِنْزِيرْ هَنَا نَحَاسْ مَطْبُوقْ وَ وَدَّاهْ فِي بَابِلْ.

حِزْقِيال 43:3

وَ الرُّؤْيَةْ دِي تِشَابِهْ الرُّؤْيَةْ الْأَنَا أَوَّلْ شِفْتَهَا وَكِتْ اللّٰهْ جَايِ لِيِدَمِّرْ مَدِينَةْ الْقُدُسْ وَ وَكِتْ أَنَا قَاعِدْ جَنْب بَحَرْ خَابُورْ. وَ طَوَّالِي، أَنَا وَقَعْت بِوِجْهِي فِي الْأَرْض.

حِزْقِيال 14:9

«‹”وَ كَنْ النَّبِي يُغُشّ نَفْسَهْ وَ يُرُدّ لِلنَّادُمْ دَا بِأَيِّ كَلَامْ، أَنَا اللّٰهْ بَسْ غَشَّيْتَهْ لِلنَّبِي دَا. وَ أَنَا نَرْفَعْ إِيدِي ضِدَّهْ وَ نِدَمِّرَهْ مِنْ أُسُطْ شَعَبِي بَنِي إِسْرَائِيلْ.

إرْمِيا 6:12

وَ بُيُوتْهُمْ وَ زِرَاعِتْهُمْ وَ عَوِينْهُمْ يَبْقَوْا لِنَاسْ آخَرِينْ أَشَانْ أَنَا مَدَّيْت إِيدِي لِنَضْرُبْ سُكَّانْ الْبَلَدْ. وَ دَا كَلَامْ اللّٰهْ.

إرْمِيا 32:4

وَ صِدْقِيَّا مَلِكْ يَهُوذَا كُلَ مَا يَنْجَى مِنْ دَيْش الْبَابِلِيِّينْ وَ هُو ذَاتَهْ أَكِيدْ نِسَلِّمَهْ لِمَلِكْ بَابِلْ. وَ يِقَابِلَهْ وِجِهْ بِوِجِهْ وَ يِحَجِّي مَعَايَهْ خَشُمْ بِخَشُمْ.

إرْمِيا 37:8

وَ خَلَاصْ، الْبَابِلِيِّينْ يَجُوا بَتَّانْ يَهْجُمُوا الْمَدِينَةْ دِي وَ يِشِيلُوهَا وَ يِحَرُّقُوهَا.“

إرْمِيا 38:24

وَ صِدْقِيَّا قَالْ لِإِرْمِيَا: «كَنْ إِنْتَ مَا تِدَوْر تُمُوتْ دَا، خَلِّي نَادُمْ مَا يَسْمَعْ الْكَلَامْ الْقُلْنَا مَعَاكْ.

إرْمِيا 39:5

وَ لَاكِنْ عَسْكَرْ بَابِلْ طَرَدَوْه لِصِدْقِيَّا وَ لِحْقَوْه وَ كَرَبَوْه فِي كَدَادَةْ أَرِيحَا. وَ هُمَّنْ جَابَوْه فِي حِلَّةْ رِبْلَةْ فِي بَلَدْ حَمَاتْ قِدَّامْ نَبُوخَدْنَصَرْ مَلِكْ بَابِلْ. وَ فِي الْبَكَانْ دَا، حَاكَمَهْ.

حِزْقِيال 17:15

«‹وَ لَاكِنْ الْمَلِكْ دَا أَتْمَرَّدْ ضِدّ مَلِكْ بَابِلْ. هُو رَسَّلْ نَاسَهْ لِمَصِرْ أَشَانْ يَنْطُوهْ خَيْل وَ عَسْكَرْ كَتِيرِينْ. هَلْ مَلِكْ مِثِلْ دَا يَنْجَحْ وَلَّا؟ هَلْ نَادُمْ السَّوَّى مُؤآمَرَةْ مِثِلْ دِي يَنْجَى وَلَّا؟ هَلْ هُو النَّقَضْ الْعَلَاقَةْ دِي يَنْجَى وَلَّا؟

عَدد 4:18

«مَا تِخَلُّوا خُشُومْ بُيُوتْ قَهَاتْ يِنْقَطْعُوا مِنْ أُسْط اللَّاوِيِّينْ.

إرْمِيا 21:10

أَيْوَى، أَنَا قَرَّرْت ضِدّ الْمَدِينَةْ دِي لِنِسَوِّي لَيْهَا الشَّرّ، مَا الْخَيْر. وَ نِسَلِّمْهَا لِمَلِكْ بَابِلْ وَ هُو يِحَرِّقْهَا.“›» وَ دَا كَلَامْ اللّٰهْ.

إرْمِيا 34:3

يَا صِدْقِيَّا، إِنْتَ ذَاتَكْ مَا تَنْجَى مِنَّهْ، أَكِيدْ هُو يَكُرْبَكْ. وَ تِلْقَابَلَوْا مَعَ مَلِكْ بَابِلْ وِجِهْ بِوِجِهْ وَ تِحَجِّي مَعَايَهْ خَشُمْ بِخَشُمْ وَ يِوَدِّيكْ فِي بَابِلْ.