إرْمِيا 37:18 - الكتاب المقدس بالعربي الدارجي هنا تشاد

¹⁸ وَ إِرْمِيَا قَالْ بَتَّانْ لِمَلِكْ صِدْقِيَّا: «أَنَا سَوَّيْت شُنُو لَيْك إِنْتَ وَ كُبَارَاتَكْ وَ شَعَبَكْ أَشَانْ تِدِسُّونِي فِي السُّلُولُو دَا؟

إرْمِيا 37:18 Referenca të Kryqëzuara

أعمال الرُسُل 25:8

وَ بُولُسْ دَافَعْ لِنَفْسَهْ وَ قَالْ: «أَنَا مَا خَالَفْت قَوَانِينْ الْيَهُودْ وَ لَا سَوَّيْت خَطَا ضِدّ بَيْت اللّٰهْ وَ لَا سَوَّيْت خَطَا ضِدّ سُلْطَانْ الرَّوْمَانِيِّينْ.»

يُوحَنَّا 10:32

وَ عِيسَى حَجَّى لَيْهُمْ وَ قَالْ: «أَنَا سَوَّيْت قِدَّامْكُو حَسَنَاتْ كَتِيرِينْ جَايِينْ مِنْ أَبُويِ. وَيْن هِي الْحَسَنَةْ الْبِسَبَبْهَا تِدَوْرُوا تَرْجُمُونِي؟»

أعمال الرُسُل 25:25

لَاكِنْ فِي فِكْرِي أَنَا، هُو مَا سَوَّى شَيّءْ فَسِلْ وَ مَا وَاجِبْ لَيَّهْ الْمَوْت. وَ هُو ذَاتَهْ قَدَّمْ لَيِّ طَلَبْ أَشَانْ أَغُسْطُسْ السُّلْطَانْ الرَّوْمَانِي يَقْطَعْ لَيَّهْ شَرِيعْتَهْ. وَ أَشَانْ دَا، قَرَّرْت نِوَدِّيهْ لِرَوْمَا.

أعمال الرُسُل 25:11

وَ كَنْ أَنَا مُجْرِمْ وَ الْمَوْت وَاجِبْ لَيِّ، مَا نِدَوْر نَجْرِي مِنَّهْ. لَاكِنْ كَنْ كَلَامْهُمْ فَوْقِي كِدِبْ، مَا وَاجِبْ لِأَيِّ نَادُمْ يِسَلِّمْنِي لَيْهُمْ. أَنَا نِقَدِّمْ طَلَبْ أَشَانْ سُلْطَانْ الرَّوْمَانِيِّينْ ذَاتَهْ يِشَارِعْنِي.»

دَنْيال 6:22

أَيْوَى، إِلٰـهِي رَسَّلْ مَلَكَهْ وَ سَدَّ خُشُومْ الدِّيدَانْ. وَ هُمَّنْ مَا قِدْرَوْا سَوَّوْا لَيِّ شَيّءْ أَشَانْ هُو يَعَرِفْ أَنَا بَرِي. وَ قِدَّامَكْ إِنْتَ الْمَلِكْ كُلَ، أَنَا مَا سَوَّيْت شَيّءْ فَسِلْ.»

غَلاطِية 4:16

وَ هَسَّعْ دَا، أَنَا بِقِيتْ عَدُوكُو أَشَانْ أَوْرَيْتكُو الْحَقّ وَلَّا؟

أعمال الرُسُل 26:31

وَ وَكِتْ مَرَقَوْا مِنْ الْبَكَانْ، حَجَّوْا أَمْبَيْنَاتْهُمْ وَ قَالَوْا: «النَّادُمْ دَا مَا سَوَّى جَرِيمَةْ الْوَاجِبْ لَيَّهْ الْمَوْت وَ لَا سِجِنْ.»

أعمال الرُسُل 24:16

وَ أَشَانْ دَا، أَنَا نَعَصِرْ قَلْبِي أَشَانْ نِعِيشْ دَايْماً بِنِيَّةْ مُخْلِصَةْ قِدَّامْ اللّٰهْ وَ قِدَّامْ النَّاسْ.

أعمال الرُسُل 23:1

وَ بُولُسْ قَاعِدْ يِشِيفْ نَاسْ الْمَجْلَسْ عَدِيلْ فِي عُيُونْهُمْ وَ قَالْ: «يَا الْأَخْوَانْ، كُلَّ حَيَاتِي أَنَا عِشْتَهَا بِنِيَّةْ مُخْلِصَةْ قِدَّامْ اللّٰهْ.»

إرْمِيا 26:19

وَ الشُّيُوخْ قَالَوْا بَتَّانْ: «هَلْ حِزْقِيَّا مَلِكْ يَهُوذَا وَ شَعَبَهْ كَتَلَوْه وَلَّا؟ لَا! هُمَّنْ خَافَوْا مِنْ اللّٰهْ وَ قَمَّوْا شَحَدَوْه. وَ اللّٰهْ خَلَّى قَرَارْ الْفَسَالَةْ الْقَالْ يِسَوِّيهْ لَيْهُمْ. وَ هَسَّعْ دَا، كَنْ كَتَلْنَا النَّادُمْ دَا، نِسَوُّوا الْفَسَالَةْ لِنُفُوسْنَا.»

أمْثال 17:26

مَا عَدِيلْ تِعَاقِبْ الصَّالِحِينْ وَ مَا عِنْدَكْ حَقّ تُدُقّ الْمُكَرَّمِينْ.

أمْثال 17:13

الْيِبَدِّلْ الْخَيْر بِالشَّرّ، الشَّرّ مَا يِكِسّ مِنْ بَيْتَهْ.

تكوين 31:36

وَ خَلَاصْ فِي الْبَكَانْ دَا، يَعْقُوبْ زِعِلْ وَ هَرَجْ لِلَابَانْ وَ قَالْ: «أَنَا كَيْ جَرِيمْتِي شُنُو؟ وَ شُنُو ذَنْبِي، لَحَدِّي تَجْرِي وَرَايِ بِزَعَلْ مِثِلْ دَا؟