إرْمِيا 32:18 - الكتاب المقدس بالعربي الدارجي هنا تشاد

¹⁸ وَ إِنْتَ بَسْ التِّوَصِّفْ خَيْرَكْ لِآلَافْ الذُّرِّيَّاتْ. وَ لَاكِنْ تَقْدَرْ تِعَاقِبْ الْعِيَالْ بِذُنُوبْ أَبَّهَاتْهُمْ، إِنْتَ الْإِلٰـهْ الْكَبِيرْ وَ الشَّدِيدْ وَ أُسْمَكْ اللّٰهْ الْقَادِرْ.

إرْمِيا 32:18 Referenca të Kryqëzuara

إرْمِيا 10:16

وَ إِلٰـهْ يَعْقُوبْ مَا مِثِلْهُمْ أَشَانْ هُو بَسْ خَلَقْ كُلَّ شَيّءْ. هُو عَزَلْ قَبِيلَةْ بَنِي إِسْرَائِيلْ لِيَبْقَوْا شَعَبَهْ الْمِثِلْ وَرَثَتَهْ وَ أُسْمَهْ اللّٰهْ الْقَادِرْ.

خُروج 34:7

نِوَصِّفْ خَيْرِي الدَّايِمْ لِآلَافْ الذُّرِّيَّاتْ وَ نَغْفِرْ الْخَطَا وَ الْعِصْيَانْ وَ الذُّنُوبْ. وَ لَاكِنْ الْمُذْنِبْ مَا نَجْعَلَهْ بَرِي. نِعَاقِبْ الْعِيَالْ وَ عِيَالْ الْعِيَالْ بِذُنُوبْ أَبَّهَاتْهُمْ لَحَدِّي الذُّرِّيَّةْ التَّالْتَةْ وَ الرَّابْعَةْ.»

مَتَّى 27:25

وَ النَّاسْ كُلُّهُمْ رَدَّوْا لَيَّهْ وَ قَالَوْا: «خَلِّي دِمِّتَهْ تَقَعْ فِي رَاسْنَا وَ فِي رَاسْ عِيَالْنَا!»

إشَعْيا 57:15

أَشَانْ دَاهُو كَلَامْ اللّٰهْ الْعَالِي الْقَاعِدْ فَوْق، هُو الْقَاعِدْ إِلَى الْأَبَدْ وَ أُسْمَهْ الْقُدُّوسْ. هُو قَالْ: «أَنَا قَاعِدْ فِي بَكَانْ عَالِي وَ مُقَدَّسْ وَ قَاعِدْ بَتَّانْ مَعَ نَاسْ الْقُلُوبْهُمْ تَعْبَانِينْ وَ رُوحْهُمْ مُتَوَاضِعَةْ لِنَحَيِي رُوحْ الْمُتَوَاضِعِينْ وَ نَحَيِي قُلُوبْ التَّعْبَانِينْ.

إشَعْيا 10:21

وَ الْيِفَضُّلُوا يِقَبُّلُوا. أَيْوَى، الْيِفَضُّلُوا مِنْ ذُرِّيَّةْ يَعْقُوبْ يِقَبُّلُوا لِلّٰهْ الْقَادِرْ.

إشَعْيا 9:6

أَشَانْ وِلْدَوْا لَيْنَا صَغِيرْ وَ الْوِلَيْد دَا، أَنْطَوْه لَيْنَا. وَ السُّلْطَةْ تَبْقَى فِي إِيدَيْنَهْ وَ يِنَادُوهْ بِالْأَسَامَيْ دَوْل، الْمُسْتَشَارْ الْعَجِيبْ وَ الْإِلٰـهْ الْقَادِرْ وَ الْأَبُو الدَّايِمْ وَ مَلِكْ السَّلَامْ.

تَثْنِية 10:17

أَشَانْ اللّٰهْ إِلٰـهْكُو، هُو إِلٰـهْ الْإِلٰـهَاتْ وَ رَبّ الْأَرْبَابْ. وَ هُو الْإِلٰـهْ الْعَظِيمْ وَ الْقَادِرْ وَ الْمُخِيفْ. وَ هُو عَادِلْ وَ مَا يَرْضَى بِالرَّشْوَةْ.

عَدد 14:18

‹أَنَا اللّٰهْ الصَّبُورْ وَ الْمُحِبّ، نَغْفِرْ لِلْخَاطِي وَ الْعَاصِي. وَ لَاكِنْ الْمُذْنِبْ مَا نَجْعَلَهْ بَرِي. وَ نِعَاقِبْ الْعِيَالْ بِذُنُوبْ أَبَّهَاتْهُمْ لَحَدِّي الذُّرِّيَّةْ التَّالْتَةْ وَ الرَّابْعَةْ.›

حَبَقُوق 1:12

وَ مِنْ زَمَانْ، إِنْتَ بَسْ مَا اللّٰهْ إِلٰـهِي الْقُدُّوسْ؟ أَشَانْ دَا، أَنِحْنَ مَا نُمُوتُوا. يَا اللّٰهْ، إِنْتَ كَلَّفْت الْعَسْكَرْ دَوْل لِيِحَاكُمُونَا. يَا جَبَلْنَا الْيَحْمِينَا، إِنْتَ بَسْ جِبْتُهُمْ لِيِعَاقُبُونَا.

نَحَمْيا 1:5

وَ قُلْت: «يَا اللّٰهْ رَبّ السَّمَاوَاتْ! يَا رَبّ، إِنْتَ عَظِيمْ وَ مُخِيفْ وَ إِنْتَ تَحْفَضْ الْمُعَاهَدَةْ وَ تِوَصِّفْ رَحْمَتَكْ لِلنَّاسْ الْبِرِيدُوكْ وَ الْبَحْفَضَوْا وَصِيَّاتَكْ.

2 مُلوك 9:26

وَ دَاهُو كَلَامْ اللّٰهْ: ‹أَمِسْ، أَنَا شِفْت مَوْت نَابُوتْ وَ عِيَالَهْ. وَ هَسَّعْ، أَنَا نِلْكَفَّى فَوْقَكْ نَفْس الشَّيّءْ فِي الزَّرَعْ دَا.›» وَ يَاهُو قَالْ: «هَسَّعْ دَا، شِيلْهَا لِجَنَازَةْ يُورَامْ وَ أَزْقُلْهَا فِي الزَّرَعْ دَا حَسَبْ كَلَامْ اللّٰهْ الْقَالَهْ.»

إرْمِيا 31:35

وَ دَاهُو اللّٰهْ قَالْ: «يَاتُو الثَّبَّتْ الْحَرَّايْ لِتِضَوِّي بِالنَّهَارْ؟ وَ يَاتُو النَّظَّمْ الْقَمَرْ وَ النُّجُومْ لِيِضَوُّوا بِاللَّيْل؟ وَ يَاتُو الْقَوَّمْ الْبَحَرْ لَحَدِّي تِنْسَمِعْ حَرَكَةْ مَوْجَهْ؟ دَا أَنَا، الْأُسْمِي اللّٰهْ الْقَادِرْ.

زَبُور 50:1

اللّٰهْ إِلٰـهْ الْإِلٰـهَاتْ حَجَّى وَ نَادَى الْأَرْض مِنْ بَكَانْ طَلُوعْ الْحَرَّايْ لَحَدِّي وَقُوعْهَا.

تَثْنِية 7:21

مَا تِنْبَهْتُوا مِنْهُمْ أَشَانْ اللّٰهْ إِلٰـهْكُو قَاعِدْ فِي أُسُطْكُو وَ هُو الْإِلٰـهْ الْعَظِيمْ وَ الْمُخِيفْ.

تكوين 49:24

لَاكِنْ هُو كَرَبْ نُبَّالَهْ عَدِيلْ وَ إِيدَيْنَهْ ثَابْتِينْ. تَلْقَى الْبَرَكَةْ بِقُدْرَةْ اللّٰهْ الْجَبَّارْ، إِلٰـهْ يَعْقُوبْ، أَيْوَى، بِأُسُمْ اللّٰهْ الرَّاعِي الْيَحْمِي إِسْرَائِيلْ.

لُوقا 6:38

أَنْطُوا لِلنَّاسْ وَ اللّٰهْ يَنْطِيكُو. يَنْطِيكُو بِإِيدْ وَسِيعَةْ فِي إِيدَيْكُو وَ يُكُونْ وَزِنْ عَدِيلْ وَ كِيَالَةْ لَحَدِّي يِدَفِّقْ. اللّٰهْ يِكِيل لَيْكُو بِنَفْس الْمِكْيَالْ الْإِنْتُو تِكِيلُوا بَيَّهْ لِلنَّاسْ.»

خُروج 34:6

وَ فَاتْ قِدَّامْ مُوسَى وَ عَالَنْ وَ قَالْ: «أَنَا اللّٰهْ! أَنَا اللّٰهْ الرَّحْمـٰنْ الرَّحِيمْ وَ الصَّبُورْ وَ الْمُحِبّ وَ الْأَمِينْ.

إرْمِيا 10:6

يَا اللّٰهْ! مَا فِي إِلٰـهْ مِثْلَكْ! إِنْتَ عَظِيمْ وَ عَظِيمْ أُسْمَكْ الْقَادِرْ.

إرْمِيا 20:11

وَ لَاكِنْ إِنْتَ، يَا اللّٰهْ، قَاعِدْ مَعَايِ مِثِلْ فَارِسْ الْأَبَداً مَا يِنْهَزِمْ. وَ بَيْدَا، الْيَهْجُمُونِي يَقَعَوْا وَ مَا يِنَّصُرُوا فَوْقِي. وَ الْعَيْب يِغَطِّيهُمْ مَرَّةْ وَاحِدْ وَ أَبَداً مَا يَنْجَحَوْا. وَ يِوَدُّرُوا شَرَفْهُمْ لِلْأَبَدْ وَ يَلْقَوْا إِهَانَةْ الْأَبَداً مَا يَنْسَوْهَا.

إرْمِيا 50:34

وَ لَاكِنْ الْيَفْدَاهُمْ هُو شَدِيدْ وَ أُسْمَهْ اللّٰهْ الْقَادِرْ. هُو يِدَافِعْ لَيْهُمْ مِثِلْ مُحَامِي وَ يِرَجِّفْ سُكَّانْ بَابِلْ أَشَانْ يِجِيبْ السَّلَامْ فِي الْأَرْض.»

دَنْيال 2:45

وَ إِنْتَ شِفْت حَجَرْ الْمَرَقْ مِنْ الْجَبَلْ بَلَا مَا لِمْسَتَهْ إِيدْ. وَ الْحَجَرْ دَا رِحِكْ الْحَدِيدْ وَ النَّحَاسْ وَ الطِّينَةْ وَ الْفُضَّةْ وَ الدَّهَبْ. وَ اللّٰهْ الْقَادِرْ وَصَّفْ لِلْمَلِكْ الشَّيّءْ الْيُكُونْ فِي الْمُسْتَقْبَلْ. وَ الرُّؤْيَةْ دِي أَكِيدَةْ وَ تَفْسِيرْهَا كُلَ صَحِيحْ.»

زَبُور 89:9

إِنْتَ بَسْ التَّحْكِمْ الْبَحَرْ وَكِتْ يِهِيجْ وَ تِهَدِّيهْ وَكِتْ يِقَوِّمْ مَوْجَهْ.

إرْمِيا 33:2

وَ دَاهُو كَلَامْ اللّٰهْ الْخَلَقْ الْأَرْض وَ كَوَّنْهَا وَ ثَبَّتْهَا وَ هُو بَسْ الْأُسْمَهْ اللّٰهْ. هُو قَالْ: