إرْمِيا 30:6 - الكتاب المقدس بالعربي الدارجي هنا تشاد

⁶ أَسْأَلَوْا وَ فَكُّرُوا! هَلْ الدُّكُورْ يَلْدَوْا وَلَّا؟ وَ مَالَا أَيِّ رَاجِلْ يُخُطّ إِيدَهْ فِي بَطْنَهْ مِثِلْ الْمَرَةْ الْقَاعِدَةْ تِطَالِقْ؟ وَ مَالَا كُلَّ وُجُوهُّمْ بِقَوْا ضُلُمْ؟

إرْمِيا 30:6 Referenca të Kryqëzuara

نَاحُوم 2:10

نِينَوَى بِقَتْ نَقَعَةْ فَاضِيَةْ وَ خَرَابْ. وَ نَاسْهَا قُلُوبْهُمْ أَنْقَطَعَوْا وَ رِجْلَيْهُمْ بَرَدَوْا. وَ بُطُونْهُمْ كُلَ يَرْجُفُوا وَ وُجُوهُّمْ بِقَوْا ضُلُمْ.

يُوِيل 2:6

قِدَّامْهُمْ، الشَّعَبْ يَرْجُفُوا وَ كُلَّ وُجُوهُّمْ يَبْقَوْا ضُلُمْ مِنْ الْخَوْف.

إرْمِيا 4:31

أَنَا نَسْمَعْ بَكِي مِثِلْ شَكْوَةْ هَنَا مَرَةْ التِّطَالِقْ، مِثِلْ صِرَاخْ أَمْ بِكَيْرِيَّةْ التَّلْدَ. وَ دِي صَهْيُون الْمِثِلْ بِنَيَّةْ، تَصْرَخْ وَ تِنَاهِجْ وَ تِمِدّ إِيدَيْنهَا لِلْفَزَعْ. وَ تُقُولْ: «يَا خَسَارْتِي! أَنَا وَقَعْت مَيْتَةْ قِدَّامْ الْكَتَّالِينْ.»

إشَعْيا 21:3

وَ بِسَبَبْ دَا، صُلْبِي قَاعِدْ يَرْجِفْ مِنْ التَّعَبْ وَ وَجَعْ شَدِيدْ كَرَبَانِي مِثِلْ وَجَعْ هَنَا الْمَرَةْ الْقَاعِدَةْ تِطَالِقْ. مِنْ شِدَّةْ الْوَجَعْ، مَا نَسْمَعْ وَ مِنْ شِدَّةْ الْخَوْف، مَا نِشِيفْ.

1 تَسَلونِيكِي 5:3

وَكِتْ النَّاسْ قَاعِدِينْ يُقُولُوا: «عِنْدِنَا الصِّحَّةْ وَ السَّلَامْ»، فِي الْوَكِتْ الْمِثِلْ دَا بَسْ، الْهَلَاكْ يَضْرُبْهُمْ عَجَلَةْ مِثِلْ الطَّلَقَةْ تَجِي عَجَلَةْ لِلْمَرَةْ الْغَلْبَانَةْ. مَا مُمْكِنْ يِنْبَلْصُوا.

هُوشَع 13:13

وَ وَجَعْ يَجِي لَيْهُمْ مِثِلْ وَجَعْ الطَّلَقَةْ. وَ هُمَّنْ مِثِلْ وِلَيْد الْمَا عِنْدَهْ حِكْمَةْ. فِي وَكِتْ الْوَالُودَةْ، مَا يَمْرُقْ مِنْ بَطُنْ أَمَّهْ!

إرْمِيا 22:23

يَا الْمَلِكْ، إِنْتَ السَّاكِنْ فِي قَصِرْ لُبْنَانْ وَ فِي بَيْتَكْ الْمِثِلْ عُشّ الْمَبْنِي بِحَطَبْ الْأَرْز. فِي وَكْت التَّعَبْ، إِنْتَ تَقْنِتْ مِثِلْ قَنِيتْ الْمَرَةْ الْقَاعِدَةْ تِطَالِقْ.»

إرْمِيا 6:24

وَ سُكَّانْ صَهْيُون قَالَوْا: «وَكِتْ سِمِعْنَا الْخَبَرْ، إِيدَيْنَّا أَنْرَخَوْا وَ الْخَوْف وَ الْوَجَعْ كَرَبَوْنَا مِثِلْ الْمَرَةْ الْقَاعِدَةْ تِطَالِقْ.»

زَبُور 48:6

فِي الْبَكَانْ دَا، أَمْ رَجَّافَةْ كَرَبَتْهُمْ وَ أَتَّنَّوْا مِثِلْ مَرَةْ الْقَاعِدَةْ تِطَالِقْ.

دَنْيال 5:6

خَلَاصْ الْمَلِكْ وِجْهَهْ أَلْغَيَّرْ وَ خَافْ وَ حَيْلَهْ بَرَدْ وَ رِجِلَيْنَهْ قَاعِدِينْ يَرْجُفُوا.

إرْمِيا 50:43

وَ وَكِتْ مَلِكْ بَابِلْ سِمِعْ الْخَبَرْ، إِيدَيْنَهْ أَنْرَخَوْا. وَ الْخَوْف وَ الْوَجَعْ كَرَبَوْه مِثِلْ الْمَرَةْ الْقَاعِدَةْ تِطَالِقْ.»

إرْمِيا 49:24

وَ سُكَّانْ دِمَشْق ضِعْفَوْا وَ قَبَّلَوْا لِيِعَرُّدُوا وَ الْبَهِيتَةْ كَرَبَتْهُمْ. وَ الضِّيقَةْ وَ الْوَجَعْ كَرَبَوْهُمْ مِثِلْ الْمَرَةْ الْقَاعِدَةْ تِطَالِقْ.

إشَعْيا 29:22

وَ فِي شَانْ دَا، دَاهُو اللّٰهْ الْفَدَى إِبْرَاهِيمْ قَالْ لِذُرِّيَّةْ يَعْقُوبْ: «بَتَّانْ ذُرِّيَّةْ يَعْقُوبْ مَا يَلْقَوْا عَيْب وَ لَا يِدَنْقُرُوا رُوسَيْهُمْ.

إرْمِيا 13:21

شُنُو تُقُولِي وَكِتْ أَنَا اللّٰهْ نِكَبِّرْ فَوْقكِ النَّاسْ الْإِنْتِ رَافَقْتِيهُمْ زَمَانْ؟ أَيْوَى، وَجَعْ شَدِيدْ يَكْرُبْكِ مِثِلْ طَلَقَةْ الْمَرَةْ الْقَاعِدَةْ تَلْدَ.

إرْمِيا 48:41

حِلَّةْ قَرْيُوتْ يِشِيلُوهَا وَ بَكَانَاتْهَا الْقَوِيِّينْ يَكُرْبُوهُمْ. وَ فِي الْيَوْم دَا، قَلِبْ عَسْكَرْ مُوَابْ يَبْقَى مِثِلْ قَلِبْ الْمَرَةْ الْقَاعِدَةْ تِطَالِقْ.

إرْمِيا 49:22

الْعَدُو يِنْرَخِي فِي بُصْرَةْ مِثِلْ صَقُرْ الْجَهَّزْ جَنَاحَيْه لِيَضْرُبْهَا. وَ فِي الْيَوْم دَا، قَلِبْ عَسْكَرْ أَدَوْم يَبْقَى مِثِلْ قَلِبْ الْمَرَةْ الْقَاعِدَةْ تِطَالِقْ.