إرْمِيا 3:15 - الكتاب المقدس بالعربي الدارجي هنا تشاد

¹⁵ وَ نُخُطّ فَوْقكُو كُبَارَاتْ مِثِلْ رُعْيَانْ الْأَنَا نَرْضَى بَيْهُمْ وَ يُقُودُوكُو بِفِكِرْ عَدِيلْ وَ مَعْرَفَةْ.»

إرْمِيا 3:15 Referenca të Kryqëzuara

إرْمِيا 23:4

وَ أَنَا نُخُطّ فَوْقهُمْ رُعْيَانْ عَدِيلِينْ الْيَسْرَحَوْا بَيْهُمْ عَدِيلْ. وَ هُمَّنْ مَا يَخَافَوْا بَتَّانْ وَ لَا يِبَرْجُلُوا وَ وَاحِدْ مِنْهُمْ كُلَ مَا يِوَدِّرْ.» وَ دَا كَلَامْ اللّٰهْ.

أعمال الرُسُل 20:28

«فَكُّرُوا فِي نُفُوسْكُو وَ فِي كُلَّ جَمَاعَةْ الْمُؤمِنِينْ هَنَا اللّٰهْ أَشَانْ الرُّوحْ الْقُدُّوسْ خَطَّاكُو فَوْقهُمْ رُعْيَانْ. أَيْوَى، أَسْرَحَوْا بِجَمَاعَةْ الْمُؤمِنِينْ الْاللّٰهْ شَرَاهُمْ بِدَمّ إِبْنَهْ.

حِزْقِيال 34:23

وَ نِجِيبْ لِغَنَمِي رَاعِي وَاحِدْ الْيَسْرَحْ بَيْهُمْ. وَ هُو يَبْقَى مِثِلْ عَبْدِي دَاوُدْ. يَسْرَحْ بَيْهُمْ وَ يَبْقَى لَيْهُمْ رَاعِي.

أمْثال 10:21

كَلَامْ الصَّالِحِينْ يَنْفَعْ نَاسْ كَتِيرِينْ وَ لَاكِنْ مِنْ قِلَّةْ الْفِهِمْ يُمُوتُوا الْمُنَافِقِينْ.

1 كُرُنْتُس 2:6

وَ لَاكِنْ كَنْ أَنِحْنَ قَاعِدِينْ مَعَ مُؤمِنِينْ كُبَارْ فِي الْإِيمَانْ، نِكَلُّمُوا لَيْهُمْ بِحِكْمَةْ عَدِيلَةْ. وَ الْحِكْمَةْ دِي مَا تِشَابِهْ حِكْمَةْ نَاسْ الدُّنْيَا وَ لَا حِكْمَةْ كُبَارَاتْ نَاسْ الدُّنْيَا اللَّابُدَّ يَبْقَوْا مَا فِيهُمْ.

حِزْقِيال 37:24

وَ عَبْدِي الْمِثِلْ الْمَلِكْ دَاوُدْ يَحْكِمْ فَوْقهُمْ وَ يَبْقَى رَاعِي فَوْقهُمْ كُلُّهُمْ. وَ يَمْشُوا حَسَبْ قَوَانِينِي وَ يَحْفَضَوْا شُرُوطِي وَ يِطَبُّقُوهُمْ.

لُوقا 12:42

وَ الرَّبّ عِيسَى قَالْ: «يَاتُو مِنْكُو الْيَبْقَى مِثِلْ الْوَكِيلْ الْأَمِينْ وَ الْفَاهِمْ؟ سِيدَهْ يِكَلِّفَهْ فِي كُلَّ عَبِيدَهْ أَشَانْ يَنْطِيهُمْ الْأَكِلْ فِي وَكْتَهْ.

1 بُطْرُس 2:2

وَ مِثِلْ الصَّغِيرْ الْيِتْمَنَّى لَبَنْ أَمَّهْ، إِنْتُو كُلَ أَتْمَنَّوْا كَلَامْ اللّٰهْ الْمِثِلْ لَبَنْ صَافِي. وَ بِالْكَلَامْ دَا، تَكْبُرُوا وَ تَلْقَوْا النَّجَاةْ.

1 صَمُوِيل 13:14

وَ هَسَّعْ دَا، مُلْكَكْ مَا يِطَوِّلْ. أَشَانْ اللّٰهْ عَزَلْ نَادُمْ آخَرْ الْهُو رَضْيَانْ بَيَّهْ وَ دَرَّجَهْ لِيَحْكِمْ شَعَبَهْ. وَ لَاكِنْ إِنْتَ مَا تَابَعْت وَصِيَّةْ اللّٰهْ الْأَمَرَكْ بَيْهَا.»

إرْمِيا 31:10

يَا الْأُمَمْ، أَسْمَعَوْا كَلَامْ اللّٰهْ وَ بَلُّغُوهْ فِي الْبُلْدَانْ الْبَعِيدِينْ هَنَا خَشُمْ الْبَحَرْ. وَ قُولُوا: «اللّٰهْ الشَّتَّتْ بَنِي إِسْرَائِيلْ يِلِمُّهُمْ وَ يَحْفَضْهُمْ مِثِلْ الرَّاعِي يَحْفَضْ غَنَمَهْ.»

حِزْقِيال 34:2

«يَا إِبْن آدَمْ، أَتْنَبَّأْ ضِدّ رُعْيَانْ إِسْرَائِيلْ. أَتْنَبَّأْ وَ قُولْ لِلرُّعْيَانْ دَوْل: ‹دَاهُو اللّٰهْ الرَّبّ قَالْ: ”الْعَذَابْ لَيْكُو إِنْتُو، يَا رُعْيَانْ إِسْرَائِيلْ التَّسْرَحَوْا بِنُفُوسْكُو بَسْ! الرُّعْيَانْ مَا وَاجِبْ يَسْرَحَوْا بِالْغَنَمْ وَلَّا؟