إرْمِيا 27:12 - الكتاب المقدس بالعربي الدارجي هنا تشاد

¹² وَ أَنَا إِرْمِيَا حَجَّيْت بِنَفْس الْكَلَامْ لِصِدْقِيَّا مَلِكْ يَهُوذَا وَ قُلْت لَيَّهْ: «إِنْتَ وَ شَعَبَكْ وَاجِبْ تِدَنْقُرُوا رَقَبَتْكُو لِتَقَلَةْ دَامِي مَلِكْ بَابِلْ وَ تَخْدُمُوا لَيَّهْ هُو وَ لِشَعَبَهْ. وَ بَيْدَا، تِنَجُّوا حَيَاتْكُو.

إرْمِيا 27:12 Referenca të Kryqëzuara

إرْمِيا 38:17

وَ خَلَاصْ، إِرْمِيَا قَالْ لِلْمَلِكْ صِدْقِيَّا: «دَاهُو اللّٰهْ الْإِلٰـهْ الْقَادِرْ إِلٰـهْ بَنِي إِسْرَائِيلْ قَالْ: ‹كَنْ إِنْتَ مَرَقْت لِقُيَّادْ مَلِكْ بَابِلْ وَ سَلَّمْت نَفْسَكْ لَيْهُمْ، تِنَجِّي حَيَاتَكْ وَ الْمَدِينَةْ دِي كُلَ مَا يِحَرُّقُوهَا. وَ إِنْتَ وَ عَايِلْتَكْ تِعِيشُوا بِسَلَامْ.

إرْمِيا 28:1

وَ فِيَّهْ نَبِي وَاحِدْ أُسْمَهْ حَنَنْيَا وِلَيْد عَزُّورْ مِنْ حِلَّةْ قِبْعُونْ. فِي الشَّهَرْ الْخَامِسْ فِي السَّنَةْ الرَّابْعَةْ فِي بِدَايَةْ حُكُمْ صِدْقِيَّا مَلِكْ يَهُوذَا، حَنَنْيَا جَاءْ وَ حَجَّى لِإِرْمِيَا فِي بَيْت اللّٰهْ قِدَّامْ رُجَالْ الدِّينْ وَ كُلَّ الشَّعَبْ. وَ قَالْ:

إرْمِيا 27:8

«‹”وَ هَسَّعْ، أَيِّ أُمَّةْ أَوْ مَمْلَكَةْ التَّابَى مَا تَخْدِمْ لِنَبُوخَدْنَصَرْ مَلِكْ بَابِلْ وَ لَا تِدَنْقِرْ رَقَبَتْهَا لِتَقَلَةْ دَامِي الْمَلِكْ، أَنَا نِعَاقِبْ الْأُمَّةْ دِي بِالْحَرِبْ وَ بِالْجُوعْ وَ بِالْوَبَاءْ لَحَدِّي نِكَمِّلْهَا مَرَّةْ وَاحِدْ بِإِيدْ الْمَلِكْ. وَ دَا كَلَامْ اللّٰهْ.

أمْثال 1:33

وَ لَاكِنْ الْيَسْمَعْنِي يَسْكُنْ بِأَمَانْ وَ يِعِيشْ بَلَا خَوْف مِنْ أَيِّ مَصِيبَةْ.»

إرْمِيا 17:4

وَ إِنْتُو بِنُفُوسْكُو تِخَلُّوا أَرْض وَرَثَتْكُو الْأَنَا أَنْطَيْتهَا لَيْكُو. وَ نِسَوِّيكُو عَبِيدْ لِعُدْوَانْكُو فِي بَلَدْ الْأَوَّلْ مَا تَعَرْفُوهَا أَشَانْ إِنْتُو قَبَّضْتُوا نَارْ غَضَبِي وَ تَاكُلْكُو دَايْماً.»

إرْمِيا 28:2

«دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ‹أَنَا نِكَسِّرْ دَامِي مَلِكْ بَابِلْ لِنِنَزِّلْ تَقَلَتَهْ مِنْ كَتَافَيْكُو.

إرْمِيا 42:11

مَا تَخَافَوْا مِنْ مَلِكْ بَابِلْ الْإِنْتُو خَايْفِينْ مِنَّهْ. مَا تَخَافَوْا مِنَّهْ أَبَداً أَشَانْ أَنَا قَاعِدْ مَعَاكُو، نَحْمِيكُو وَ نِنَجِّيكُو مِنْ إِيدَهْ. وَ دَا كَلَامْ اللّٰهْ.

إرْمِيا 21:9

وَ دَاهُو الْخِيَارْ. النَّادُمْ الْيَقْعُدْ فِي الْمَدِينَةْ دِي يُمُوتْ بِالْحَرِبْ أَوْ بِالْجُوعْ أَوْ بِالْوَبَاءْ. وَ لَاكِنْ الْيَمْرُقْ مِنْهَا وَ يِسَلِّمْ نَفْسَهْ لِعَسْكَرْ بَابِلْ الْمُحَاصِرِينْكُو، هُو دَا يِعِيشْ وَ يَبْقَى فَرْحَانْ أَشَانْ هُو لِقِي الْحَيَاةْ.