إرْمِيا 2:19 - الكتاب المقدس بالعربي الدارجي هنا تشاد

¹⁹ وَ خَلِّي فَسَالِتْكُو تِقَبِّلْ لَيْكُو فِي رَاسْكُو وَ كُفُرْكُو يِعَاقِبْكُو. وَ أَعَرْفُوا كِكَّيْف الشَّيّءْ دَا فَسِلْ وَ مُرّ كَدَرْ تَابَوْنِي أَنَا اللّٰهْ إِلٰـهْكُو وَ أَبَداً مَا تَخَافَوْا مِنِّي.» وَ دَا كَلَامْ اللّٰهْ الرَّبّ الْقَادِرْ.

إرْمِيا 2:19 Referenca të Kryqëzuara

إشَعْيا 3:9

عَمَلْهُمْ يِنْشَافْ فِي وُجُوهُّمْ وَ هُمَّنْ بِقَوْا مِثِلْ نَاسْ سَدُومْ الْحَجَّوْا بِذُنُوبْهُمْ، مَا لَبَّدَوْهُمْ. الْعَذَابْ لَيْهُمْ! أَشَانْ هُمَّنْ جَهَّزَوْا الْفَسَالَةْ لِنُفُوسْهُمْ.

إرْمِيا 4:18

وَ دَا تَمَنْ حَالْكِ وَ عَمَلْكِ وَ دِي نَتِيجَةْ فَسَالِتْكِ. صَحِيحْ، دَا مُرّ زِيَادَةْ لَحَدِّي قَلِبْكِ يِنْقَطِعْ.»

إرْمِيا 2:17

يَا بَنِي إِسْرَائِيلْ، إِنْتُو بَسْ جِبْتُوهْ فِي رَاسْكُو أَشَانْ إِنْتُو أَبَيْتُوا اللّٰهْ إِلٰـهْكُو وَكِتْ هُو قَاعِدْ يُقُودْكُو فِي الدَّرِبْ الْعَدِيلْ.

زَبُور 36:1

الْعَاصِي يِتَابِعْ كَلَامْ قَلْبَهْ وَ فِي نَفْسَهْ مَا عِنْدَهْ خَوْف مِنْ الرَّبّ.

هُوشَع 5:5

إِسْتِكْبَارْ بَنِي إِسْرَائِيلْ يَشْهَدْ فَوْقهُمْ. بَنِي إِسْرَائِيلْ وَ نَاسْ أَفْرَايِمْ يِتَّرْتَعَوْا فِي شَانْ خَطَاهُمْ وَ بَنِي يَهُوذَا كُلَ يِتَّرْتَعَوْا مَعَاهُمْ.

عَمُوس 8:10

وَ أَيِّ عِيدْ التِّعَيُّدُوهْ، نِبَدِّلَهْ بِحِزِنْ وَ كُلَّ غِنَيْكُو يَبْقَى نُوَاحْ. وَ كُلُّكُو تَلْبَسَوْا خُلْقَانْ الْحِزِنْ وَ تِزَيُّنُوا رُوسَيْكُو. دَا يَبْقَى مِثِلْ حِزِنْ هَنَا مَوْت الْوِلَيْد الْوَحِيدْ وَ فِي الأَخِيرْ، يَبْقَى يَوْم هَنَا حِزِنْ شَدِيدْ.»

هُوشَع 11:7

شَعَبِي أَنْرَبَطَوْا فِي كُفُرْهُمْ. نَادَوْهُمْ لِيِشِيفُوا عَلَيِّ فَوْق وَ لَاكِنْ وَاحِدْ مِنْهُمْ كُلَ مَا رَفَعْ رَاسَهْ.»

إرْمِيا 5:6

وَ بِسَبَبْ دَا، دُودْ الْغَابَةْ يَضْرُبْهُمْ وَ مَرْفَعِينْ الْكَدَادَةْ يَخْرِبْهُمْ. وَ النِّمِرْ يِرَاقِبْ فِي مُدُنْهُمْ وَ أَيِّ نَادُمْ الْيَمْرُقْ، هُو يِشَرِّطَهْ. أَشَانْ عِصْيَانْهُمْ بِقِي كَتِيرْ وَ كُفُرْهُمْ بِقِي زِيَادَةْ.

رَوْمَا 3:18

<وَ فِي نُفُوسْهُمْ، مَا عِنْدُهُمْ خَوْف مِنْ الرَّبّ.>

زَكَرِيَّا 7:11

وَ لَاكِنْ هُمَّنْ أَبَوْا مَا يُخُطُّوا بَالْهُمْ. قَوَّوْا رُوسَيْهُمْ وَ سَدَّوْا أُدْنَيْهُمْ أَشَانْ مَا يَسْمَعَوْا.

هُوشَع 14:1

قَبُّلُوا لِلّٰهْ إِلٰـهْكُو، يَا بَنِي إِسْرَائِيلْ، أَشَانْ خَطَاكُو بَسْ رَمَاكُو!

إرْمِيا 8:5

وَ خَلَاصْ، مَالَا شَعَبْ مَدِينَةْ الْقُدُسْ وَدَّرَوْا دَرِبْهُمْ وَ أَبَوْا مَا يِقَبُّلُوا لَيِّ أَبَداً؟ هُمَّنْ كَرَبَوْا قَوِي فِي الْغَشّ وَ أَبَوْا مَا يِقَبُّلُوا لَيِّ.

هُوشَع 4:16

أَيْوَى، بَنِي إِسْرَائِيلْ حَرَّانْ مِثِلْ الْبَقَرَةْ وَ بَيْدَا، كِكَّيْف اللّٰهْ يَقْدَرْ يِسَرِّحْهُمْ مِثِلْ غَنَمْ فِي مَرْعَى أَخْضَرْ؟

إرْمِيا 5:22

وَ مَالَا مَا تَخَافَوْا مِنِّي؟ وَ مَالَا مَا تَرْجُفُوا قِدَّامِي؟ أَنَا بَسْ الْخَطَّيْت تُرَابْ حَدّ دَايِمْ لِلْبَحَرْ، هُو مَا يُفُوتْ حُدُودَهْ. كَنْ هُو يُفُورْ وَ مَوْجَهْ يُقُمّ وَ يَضْرُبْ كُلَ، هُو مَا يَقْدَرْ يُفُوتْ الْحُدُودْ دَوْل. وَ دَا كَلَامْ اللّٰهْ.

إرْمِيا 3:22

قَبُّلُوا لَيِّ، يَا عِيَالْ الْكُفَّارْ، وَ أَنَا نَشْفِيكُو مَرَّةْ وَاحِدْ مِنْ كُفُرْكُو.» وَ هُمَّنْ قَالَوْا: «أَيْوَى، دَاهُو أَنِحْنَ جَايِينْ لَيْك أَشَانْ إِنْتَ بَسْ اللّٰهْ إِلٰـهْنَا.

إشَعْيا 50:1

وَ دَاهُو اللّٰهْ قَالْ: «صَحِيحْ أَنَا طَرَدْت أَمُّكُو. وَيْن مَكْتُوبْ الطَّلَاقْ؟ وَ لِيَاتُو أَنَا بِعْتُكُو لِنِكَفِّي دَيْنِي؟ أَعَرْفُوا! بِسَبَبْ خَطَاكُو بَسْ، بَاعَوْكُو وَ بِسَبَبْ عِصْيَانْكُو، طَلَّقَوْا أَمُّكُو.

إشَعْيا 5:5

«وَ هَسَّعْ نِأَوْرِيكُو النِّسَوِّيهْ لِجِنَيْنِتِي. أَنَا نَمْرُقْ الزَّرِيبَةْ وَ الْبَهَايِمْ يَاكُلُوهَا وَ نِقِدّ خُرْمَةْ فِي الدُّرْدُرْ لِيَدْخُلُوا يِفَجُّقُوهَا.

أمْثال 5:22

الْعَاصِي يَقَعْ فِي عِصْيَانَهْ وَ ذَنْبَهْ يَبْقَى شَرَكْ يَكُرْبَهْ.

أمْثال 1:31

وَ هَسَّعْ دَا، خَلَاصْ. عِيشُوا بِنَتِيجَةْ عَمَلْكُو وَ وَصِيِّتْكُو دِي، خَلِّي تَنْفَعْكُو.

أمْثال 1:32

أَيِّ جَاهِلْ كَنْ يَابَى لُوَامْتِي، يُمُوتْ وَ أَيِّ مَطْمُوسْ كَنْ مَا يِهِمّ بَيِّ، يِوَدِّرْ.

إرْمِيا 5:24

وَ مَا قُلْتُوا فِي نُفُوسْكُو: ”خَلِّي نَخَافَوْا مِنْ اللّٰهْ إِلٰـهْنَا الْيَنْطِينَا الْخَرِيفْ فِي وَكْتَهْ. وَ يَنْطِينَا مَطَرْ الرِّشَاشْ وَ أَلْمِي الْخَرِيفْ وَ يَضْمَنْ لَيْنَا وَكْت الْقَطِعْ.“

حِزْقِيال 39:24

وَ أَنَا عَامَلْتُهُمْ حَسَبْ نَجَاسِتْهُمْ وَ عِصْيَانْهُمْ وَ مَا وَجَّهْت عَلَيْهُمْ.»

هُوشَع 7:2

هُمَّنْ مَا يَحْسُبُوا كَدَرْ أَنَا نِذَّكَّرْ كُلَّ فَسَالِتْهُمْ. هَسَّعْ أَعْمَالْهُمْ حَوَّقَوْهُمْ وَ قَاعِدِينْ قِدَّامِي دَايْماً.

هُوشَع 13:9

«يَا بَنِي إِسْرَائِيلْ، أَدَّمَّرْتُوا أَشَانْ قَمَّيْتُوا ضِدِّي أَنَا النَّفْزَعْكُو.

مِيخا 1:5

وَ دَا كُلَّ فِي شَانْ عِصْيَانْ ذُرِّيَّةْ يَعْقُوبْ وَ فِي شَانْ ذُنُوبْ بَنِي إِسْرَائِيلْ. وَ يَاتُو اللَّزَّ ذُرِّيَّةْ يَعْقُوبْ فِي الْعِصْيَانْ؟ دِي مَا مَدِينَةْ السَّامِرَةْ وَلَّا؟ وَ يَاتُو الْحَرَّشْ بَنِي يَهُوذَا لِيَعَبُدُوا إِلٰـهَاتْ فِي الْبَكَانَاتْ الْعَالِيِينْ؟ دِي مَا مَدِينَةْ الْقُدُسْ وَلَّا؟

خُروج 33:6

وَ خَلَاصْ مِنْ الْيَوْم دَا فِي جَبَلْ حُورِيبْ، بَنِي إِسْرَائِيلْ سَلَّوْا زِينِتْهُمْ وَ مَا لِبْسَوْهَا بَتَّانْ.

قُضياء 10:13

وَ لَاكِنْ إِنْتُو أَبَيْتُونِي وَ عَبَدْتُوا لَيْكُو إِلٰـهَاتْ آخَرِينْ وَ فِي شَانْ دَا، أَنَا مَا نِنَجِّيكُو بَتَّانْ.

1 مُلوك 18:18

وَ إِلِيَاسْ رَدَّ لَيَّهْ وَ قَالْ: «أَنَا مَا جِبْت بَرْجَالْ لِبَنِي إِسْرَائِيلْ. لَاكِنْ إِنْتَ وَ عَايِلَةْ أَبُوكْ بَسْ جِبْتُوهْ أَشَانْ خَلَّيْتُوا وَصَايَا اللّٰهْ وَ تَابَعْتُوا إِلٰـهَاتْ بَعَلْ.

2 أخبار 12:5

وَ وَكِتْ شِيشَقْ قَرَّبْ لِمَدِينَةْ الْقُدُسْ، النَّبِي شَمَعْيَا جَاءْ لِرَحَبْعَامْ وَ لِكُبَارَاتْ مَمْلَكَةْ يَهُوذَا اللَّمَّوْا فِي مَدِينَةْ الْقُدُسْ وَ قَالْ لَيْهُمْ: «دَاهُو اللّٰهْ قَالْ: ‹إِنْتُو أَبَيْتُونِي وَ هَسَّعْ أَنَا كُلَ نَابَاكُو وَ نِسَلِّمْكُو فِي إِيدْ شِيشَقْ.›»

2 أخبار 21:10

وَ التَّمَرُّدْ هَنَا بَلَدْ أَدَوْم ضِدّ حُكُمْ يَهُورَامْ قَاعِدْ لَحَدِّي الْيَوْم. وَ فِي الْوَكِتْ دَا، حِلَّةْ لِبْنَةْ كُلَ أَتْمَرَّدَتْ ضِدّ حُكُمْ يَهُورَامْ أَشَانْ هُو أَبَى اللّٰهْ رَبّ جُدُودَهْ.

2 أخبار 25:16

وَ لَاكِنْ وَكِتْ النَّبِي قَاعِدْ يِحَجِّي لَيَّهْ، أَمَصْيَا قَطَعْ كَلَامَهْ وَ قَالْ: «يَاتُو خَطَّاكْ مُسْتَشَارْ هَنَايِ أَنَا الْمَلِكْ؟ أَسْكُتْ كَنْ مَا تِدَوْر يُدُقَّكْ!» وَ النَّبِي قَالْ: «أَنَا نَعَرِفْ كَدَرْ الرَّبّ قَرَّرْ لِيِدَمِّرَكْ أَشَانْ إِنْتَ سَوَّيْت الشَّيّءْ دَا وَ أَبَيْت مَا تَسْمَعْ وَصِيّتِي.» وَ بَعَدْ دَا، سَكَتْ.

إرْمِيا 1:16

وَ بَيْدَا، أَنَا نِحَاكِمْ شَعَبِي فِي شَانْ فَسَالِتْهُمْ. وَ فَسَالِتْهُمْ دِي، هُمَّنْ أَبَوْنِي أَنَا وَ حَرَّقَوْا بَخُورْ لِإِلٰـهَاتْ آخَرِينْ وَ سَجَدَوْا لِلْأَصْنَامْ السَّوَّوْهُمْ بِإِيدَيْهُمْ.

إرْمِيا 7:19

هَلْ دَا يِغَضِّبْنِي وَلَّا؟ الْعَيْب يَجِي فَوْقهُمْ هُمَّنْ بَسْ.» وَ دَا كَلَامْ اللّٰهْ.

إرْمِيا 13:22

وَ تَسْأَلَيْ نَفِسْكِ وَ تُقُولِي: ‹مَالَا الشَّيّءْ دَا جَاءْ لَيِّ؟› وَ بِسَبَبْ خَطَاكِ الْكَتِيرْ، يِسِلُّوا مِنْكِ فَرْدِتْكِ وَ يِسَوُّوا فَوْقكِ الْعُنُفْ.

حِزْقِيال 23:30

وَ يِعَاقُبُوكِ مِثِلْ دَا أَشَانْ إِنْتِ أَشَّرْمَطْتِ وَكِتْ تَابَعْتِ الْأُمَمْ وَ نَجَّسْتِ نَفِسْكِ بِأَصْنَامْهُمْ.

هُوشَع 9:1

يَا بَنِي إِسْرَائِيلْ، مَا تَفْرَحَوْا وَ تِنْبَسْطُوا مِثِلْ الشُّعُوبْ الْآخَرِينْ. أَشَانْ إِنْتُو بَعَّدْتُوا مِنْ إِلٰـهْكُو وَ أَشَّرْمَطْتُوا وَ حَبَّيْتُوا أُجْرَةْ الشَّرْمَطَةْ اللِّقِيتُوهَا فِي كُلَّ مَدَقَّاتْ الْقَمَحْ.